sábado, 30 de diciembre de 2017

Conciertu en Sol Mayor pa vigulín de maíz

La mar va espardiendo adulces l'ocle sobre'l sable de la playa. Ruxen les foles y les gaviotes esnalen cubriendo'l cielu col so chiar. Alluendi, ximiélgase un barcu al  velume. Orpina. Atapez. El faru alluma y guía corazones vagarientos. La brisa sele afalaga les vidayes y descansen los güeyos estelaos n'horizonte. La serena achúcase gargoliando vieyos cancios d'amores marineros.

El mofu que tapa'l tueru del caborniu amuga la mano que lo afalaga. L'alborecer posa la  rosada na viesca qu'esconsoña pente una guañada d'ocres. Les fayes enseñen les sos aguyes doraes na seronda. L'arfueyu amuesa les sos perles de nácare tresaleciendo por vieyos druides con focetes d'oru. Sonsonia'l regatu. El molín ye piedra y silenciu. Esproña la ñeve. Nel abellugu del güeyu l'agua, fila una xana rocaes de suaños.

Restalla la lleña qu'ambura en llar. Cabo d'elli, escalez el cuerpu y aposienta'l calter. La mente va esfoyando adulces  semeyes y renombrances de tiempos sumíos del ayeri y los antiguos. Arroxa'l fornu de los sentires fondos. Amiya la nueche de punteres, despacín, silenciosa. Pel cuarterón entornáu de la puerta ceguñen milenta estrelles. Engoláu na calamiyera, enreda'l trasgu pasando granos de fisga pel furacu de la mano.

Lloñe del traxín cotidianu que nos enarta, a vegaes , la vida ye daqué simple, cercano, primario, real ya imaxinario. Un ruxerrux sonce. Un  xuegu familiar y ancestral de lluces y sombres. Una sinfonía de sentires, recuerdos y suaños malapenes esbozada.

Porque, resalvando los grandes eventos coronaos de sonadía y ringorrangu, hai momentos seles y sublimes qu'aporten a nós endolcaos nun refocilu de cenciellez. Requexos d'esistencia namái que nuestros dafechu. Onde'l rellugu escuca pente les nubes espayando los sones melgueros d'un conciertu en Sol Mayor pa vigulín de maíz.
                                                                       

sábado, 23 de diciembre de 2017

Tiempu de Comedies

Voi entamar esta entrada rellatando una anécdota real que me cuntaron güei y que foi la que m'afaló escribila.

Un grupu rapacinos d'un colexu de la Cuenca'l Nalón empobinaba pa un festival de los que davezu se faen per estes feches nos colexos de toa Asturies. Diben marutaos pa l'actuación, incluyendo los que s'amazcaraben d'animales.

Ello foi qu'un par de paisanos de lo qu'anguaño conocemos como la "tercer edá" taben viéndolos pasar y ún d'ellos comentó-y a l'otru:

"Normal, tamos nel tiempu les comedies".

La fras, si nun reparamos nella, podía pasanos desapercibida. Pero si-y prestamos atención tien un caláu fondu. Remítenos a l'alcordanza de tiempos vieyos onde per estes feches entamaben les mazcaraes ivernales, cola salida de sidros , zamarrones, zaparrastros...y les comedies. Unes representaciones teatrales populares que s'incluyíen nes mazcaraes y qu'anguaño aliten y rescamplen coles recuperaes comedies de los sidros o guirrios, por poner un exemplu bien reconocíu na actualidá.

Y representa tamién toa una llección pa toes aquelles persones enfotaes en pescudar nos raigaños culturales de nuestro. Porque, magar la innegable aculturación que nos acute antuaño, tovía queden resclavos vivos de la nuestra cultura que rescamplen dayures, nel sitiu y momentu más inesperaos. Y esta anécdota ye ún de los milenta exemplos que podríemos apurrir nesti ámbitu.

Tamos somorguiaos na época onde anicien los antroxos ivernales qu'algamen al mes de Febreru o inda más p'acullá. Y tovía queden na alcordanza de xente mayor de nuestro eses époques pasaes que tuvieron a piques de sumise, pero que nun lo fixeron dafechu pese a la brutal aculturación que padecemos.

Como mampurra a l'anécdota, amestar que nel colexu onde esos rapacinos diben actuar, los actos tuvieron como llingua vehicular l'asturiana, resalvando un casu onde s'axuntaron asturianu, castellanu ya inglés, y onde los actos d'estes dómines presentáronse como festivales d'iviernu , tou un guiñu a la nuestra cultura tradicional y ancestral. Y cola inclusión de trazos culturales de la nuestra cultura tradicional, como l'actuación d'un rapacín echando una tonada.

Son rellumos, refocilos na escuridá de la nueche, anécdotes que pa les monxures y palmeros del asturianismu llingüísticu y cultural, centraliegu y amante de de tirar tetu de les subvenciones, nun van tener reconocencia neguna enxamás. Per sí la van tener, y abonda, pa la xente que, como esti xanu, creyemos nel país mui penriba de los intereses peselbristes d'asturianismos oficiales de focicu espurríu y ringurrangu aforiatáu.

Tiempu de Comedies. Tiempu de cultura ancestral. Tiempu d'idioma popular qu'inda alienda. Tiempu d'asturianos y asturianes, a seques, que caltienen vivos los sos raigones. Tiempu, en definitiva de danos la norabona. Y que perviva per munchu tiempu más.

Hai una llinia trazada. Y enagora nun se borró. Hai que la caltener visible contra vientu y marea. Y nello tamos.
                                                                           

domingo, 10 de diciembre de 2017

Alcordanza de Santolaya

Cuenta la tradición que les cenices de Santolaya tráxoles p'Asturies el rei Silo dempués de que-y les apurrieren los cristianos col envís de que nun cayeren en manes enemigues cuando'l monarca andaba faciendo incursiones escontra los árabes.

Yera naquellos tiempos una santa con gran sonadía y devoción pente la cristiandá peninsular y tamién nel reinu asturianu. Como exemplos, valga'l documentu del sieglu IX perteneciente al reináu d'Ordoño I onde se da anuncia d'una ilesia consagrada a Santolaya en tierres de Llangréu, o l'entierru de Pelayu na ilesia de Santolaya d'Abamia.

Tamién la batalla d'Olalíes, nome deriváu d'Olaya, onde derrotaron ensembre a les tropes del gobernador Munuza tres la batalla de Cuadonga informanos de que'l sitiu escoyíu pal alcuentru taba relacionáu cola devoción a esta santa.

Anguaño les cenices de Santolaya reposen nuna urna de plata na capiella que tien dedicada na Catedral d'Uviéu.

Allá pel sieglu XVII el poeta Antón de Marirreguera ganara un concursu lliterariu entamáu pola Universidá d'Uviéu con un poema n'asturiano compitiendo con otres llingües incluyíes les clásiques. El poema facía referencia al pleitu aniciáu ente la ciudá asturiana y la de Mérida por tener eses cenices y qu'al final arromanó de la parte asturiana.

A lo llargo de los sieglos foi Santolaya la patrona de la diócesis eclesiástica de nuestro - títulu que tien na actualidá- y tamién d'Asturies, siendo refrendáu esti patronazgu caberu por votación al traviés de los conceyos. Actualmente sigue teniendo ilesies consagraes al so nome n'abondos llugares a lo llargo de la nuestra tierra, anque ye la Virxe de Cuadonga la empicorotiada como patrona asturiana.

Pero hai otru datu que nun nos tien de cayer en baxo. Y ello ye que, ente les atribuciones de Santolaya, ta la de ser la patrona de la llibertá de pensamientu y de la llibertá d'espresión, dos encontos fundamentales de tou estáu democráticu y de drechu, arriendes de dos aspiraciones básiques pa poder llograr unes sociedaes cada vegada más llibres y democrátiques.

Tamos entós ante una figura perimportante na historia d'Asturies y de los nuestros conceyos que, como suel asoceder llamentablemente, anda nestes dómines que vivimos bastante apostalgada y escaecida. Asina qu'hoi, diez d'Avientu, la fecha onde se cellebra la so festividá, paeciome oportuno dedica-y esta pequeña reseña na so alcordanza.
                                                                               

jueves, 30 de noviembre de 2017

Los Castañeos

Matá la fame. Esa esmolición diaria de la xente al traviés de los sieglos.

Y ente nós una compañera que llevaron los antiguos atravesando les xeneraciones hasta tiempos bien recientes p'ayudalos a alimentase en tiempos abegosos: la castañal.

La bayura nunca foi bagax de la xente de les nuestres aldees y pueblos. La precariedá, el mirar polo poco que se tenía, el sacrificiu, yera xera cotidiana. Y achisbando ehí cerquina, siempre l'amenaza de la fame.

Les castañales foron a lo llargo de la historia una guaña d'alimentu pa tranquilizar el ruxir de les tripes esfamiaes. Dimir, echar na cuerria, andar de gueta o a la rebusca. Amagostar les castañes, coceles, facer potax, mayucales...

Les castañes tuvieron per munchu tiempu un papel perimportante na nuestra alimentación. Un elementu necesariu y que nun se podía prescindir d'él. Y qu'anició toa una cultura tradicional alredor de la esplotación de los castañeos.

Dempués, ayeri como quien diz, salimos un poco del aforfugu de la fame, remanamos daqué más de perres y fuimos a algamar mayores posibilidaes alimenticies. Y les castañes dexaron de ser aquel elementu importante na nuestra dieta. Colgóse-yos hasta'l so propiu sambenitu calificándoles de madera poco amañoso pa comer.

Y los castañeos quedaron, pali que pali, abandonaos. Y les castañes pa los gochos o nin siquiera pa eso, simplemente dexales apodrigañando o, si acasu, pa los xabalinos que pasen fozando per ende.

Muncho crió la boroña, dicen. Y ye cierto. El refalfiu fai ver coses ridícules, como a la xente mercando castañes foriates y nada barates mentes dan el llombu hasta a los castañeos propios. Y eso que n'Asturies tenemos una de les mayores mases forestales d'esti árbol de tol Estáu. Pero ¡ca!, d'esplotar esa riqueza nin un res, que pa grandonos nosotros.

Ye corriente atopar los castañeos formando viesques mistes xunto a los carbayos. Dambos árboles combinen guapamente. Antaño aprovechábense les frutes de dambos y la madera ye de lo más preciao que tenemos. Podemos atopar nelles tamién a exemplares centenarios camudaos bien de veces en cabornios que tal paecen ofrecenos l'abellugu del so tueru güecu.

Dacuando camines pel monte y agüeyes castañales que sobrevivieron a incendios, pervieyes, camudaes en cabornios como dixi enantes, y con cañes inda vives que dan la so collecha prestosa. Ye toa una gozada atopase con estes supervivientes d'otres dómines. Güeles venerables de la viesca.

Anguaño  siguen faciéndose amagüestos n'entrando la seronda. Hasta nos colexos los faen pa los rapacinos y ye prestoso qu'asina seya. Cola sidra'l duernu p'acompañar, claro. Tamién hai un remanecer de la ufierta del potax de castañes, o pa dicilo meyor, de los potaxes que se puen tresnar con elles. Contrasta ello col pocu ciñu que ponemos en curiar los castañeos y col envizcamientu por comprar les d'otros sitios. Son eses contradiciones onde nos movemos dacuando, como nesti casu.

Camiento que cuando penetramos nun castañéu entramos nun vieyu santuariu onde los nuestros antepasaos anduvieron trepando pa consiguir un alimentu que collaboró, en cierta midida, a que nosotros teamos anguaño nesti mundu. Un alliviu nel so día pa la fame, que nun ye poco.

Paga la pena curiar de los abondos castañeos qu'inda tenemos na nuestra tierra. Recuperar la cultura vinculada a  ellos, que ye como recuperar tamién una parte de les nuestres raíces. Y paga la pena tamién echase al monte pela seronda a esfrutar d'ellos y a guetar de pasu pa saborgar, por exemplu, unes castañes calentines nes nueches cuando'l fríu yá se dexa notar y fai qu'andemos con ganes d'escalecer.
                                                                                 

martes, 21 de noviembre de 2017

Un proyeutu industrial del añu 1.872

Pente documentos vieyos que conservo en casa tengo dos qu'informen de la formación d'una "sociedad regular colectiva" creada'l 4/12/1.872. 

Formalícenla ante'l notariu D. José Antonio Rodríguez tres socios, vecinos de la parroquia de Santolaya de Turiellos en Llangréu: D.Plácido Menéndez Prim, D. Juan Antuña Riera y D. Fernando Antuña Fernández (tataragüelu maternu mio y d'ehí que llegaren a mi los documentos). L'actividá yera la de fabricar fierro en cubilotes o segunda fusión, ensin perxuiciu de facelo en primera nel futuru.

La denominación yera "Genio Industrial" y la razón social Plácido Menéndez y Compañía. Allugábase la fábrica en Vega d'Arriba (cerca d'onde ta l'actual cementeriu de Pando) na citada parroquia llangreana. El capital constaba de 241.593 riales. Plácido, sociu mayoritariu, aportaba 176.517, Fernando 35.627 y Juan 29.449. 

Les instalaciones constaben d'una máquina a vapor de 8 caballos, cubilotes pa fundir fierro en segunda fusión, un molín, un fornu pa fundir bronce, un taller de reparación, dos forxes o fragües, un taller de moldería colos sos útiles, dos edificios yá construyíos y otros dos en construcción, arriendes del terrén u s'allugaba too ello. 

La duración inicial de la sociedá yera per cuatro años, de 1.872 a 1.876, y, al cabu d'esi intervalu, los socios decidiríen si siguir con ella o disolvela y repartise'l dineru y bienes proporcionalmente a la so participación nella. A manera de xuez de paz pa permediar nos posibles conflictos ente los socios nomaben al inxenieru y director de la empresa Duro y Compañía, Gregorio Aurre, dándo-y plenos poderes na so función y renunciando a recurrir les sos decisiones nel xulgáu. 

Desconozo'l desenllaz d'aquella iniciativa, pero quixi facer esta reseña pa mostrala como un  granín d'arena más p'añadir a la historia del procesu industrial qu'espoxigaba naquelles dómines (fundiciones de fierro, minería, ferrocarril...) nesti conceyu asturianu onde s'entamó.

(La semeya correspuende a ún de los documentos citaos).
                                                                                

sábado, 11 de noviembre de 2017

Los xigantes de la nuesa mar

Nel añu de 1.895 el vapor Sultán capturaba una ballena de la triba los rorcuales y posábala na zona de La Salmoriera en Xixón (semeya de la entrada). De siguío, milenta curiosos foron a vela, sacáronse-y semeyes y sopelexóse bien la noticia. Tamién nos dexó la so güelga nel nuesu idioma. Ñació la espresión "a ver la ballena" que tovía s'usa anguaño pa referise a daquién que nos resulta cafiante o que se pasa de bocayón.

Yera ún de los nuesos colosos de la mar. Unos exemplares almirables de tamañu que, evidentemente, nun son privativos d'Asturies, pero qu'algamen ente nós una categoría especial. ¿Por qué?. Pues, cenciellamente, porque la mar que baña les nueses costes tien una bayura particular d'ellos. Y les razones tenemos que dir a buscales a la orografía del fondu marín.

Güeyando esa orografía atopamos que dende Navia a Llanes esisten un garrapiellu de cañones marinos. Grandes fuexes qu'algamen munchos metros de fondura. El mayor ye'l d'Avilés qu'aporta aprosimadamente a los 5.000m de profundidá. Esti sistema de fuexes formen un somantu afayadizu pa que nelles se reproduzan delles especies animales, ente les que s'alcuentren les fosforescentes abisales, llamaes asina por emitir la so propia lluz, al vivir en profundidaes onde ésta yá nun algama.

Y ente eses especies tenemos a los grandes cetacios, como les ballenes, qu'anguaño tán representaes polos rorcuales común y aliblancu, los romos o los míticos peludinos, por poner dellos exemplos, siendo estes dos especies caberes grandes enemigos, al ser el romu depredador del peludín y protagonizar dambos colosales amarraces allabaxón na mar, qu'enxamás foron enagora a filmase.

Poro, nun ye gran cosa esceicional atopase con varamientos d'estos xigantes. Unes vegaes muertos por lluches ente ellos, o por causes que podríamos calificar como naturales. Pero, desgraciadamente, otres por culpa de la contaminación y la puxarra que los humanos dexamos tirada na mar: plásticos, artes de pesca abandonaes, hélices de los barcos, prospecciones a la busca de petróliu o gas, etc.

Anguaño tenemos un centru d'interpretación dedicáu a la vida marina asitiáu nel Cabu Peñes. Tamién tenemos en L.luarca'l Parque de la Vida, onde s'amuesen diez exemplares de peludinos, dempués de la llaceria que supunxo qu'una vagamar esgonciare'l Muséu del Calamar Xigante valdesanu. Esti tipu de centros o museos dedicaos a la natura puen ser unes bones iniciatives tanto pa divulgar la vida marina ente nosotros como pa enanchar la nuesa ufierta turística basada nel turismu cultural, que nun ye esautamente estacional y pue espurrir la so actividá  a lo llargo de tol añu.

Y nesa estaya, la divulgación de lo relativo a los nuesos cañones marinos y a los xigantes de la mar que críen nelles o que les visiten como llugares onde alimentase, pue tener un sitiu afayadizu y vidable.        
                                                                              


                                                                                        

miércoles, 8 de noviembre de 2017

Corrupción, nacionalismu ya izquierda

Un peludín descomanáu xiringa y produz milenta víes d'agua nel barcu del Estáu que taramiella y tien yá abiertes milenta víes  d'agua. Lleva cuantayá sopelexándolu, pero enagora nun s'acollumbra manera efectiva d'encetalu.

Llámase corrupción. Una gafura que fura los cimientos de la nuesa convivencia porque ta institucionalizada. Nun se trata de casos aisllaos, ¡ca!, tien los sos tentáculos afitaos fondamente nel sistema.

Poderes políticos y económicos en xuntanza buscando porgüeyu a costa de corromper les estructures estatales y los preceutos constitucionales. Esbrexando por interferir nel poder xudicial tratando de mancorniar la so independencia y la separación de poderes. Echando esllava nel duernu d'abondos medios de comunicación camudaos en noyos de propaganda y adoctrinamientu. Esto son dalgunes pingarates de lo que tenemos güei enriba como una guaxa esglamiando les posibilidaes d'avanzar p'hacia un Estáu modernu, democráticu y de drechu onde los ciudadanos podamos afayanos y buscar un futuru. Porque los casos de corrupción guañen a magüeyu. Raru ye'l día que nun españa dalgún. Y, con ello, el barcu estatal onde realizamos la nuestra convivencia ciudadana amenaza seriamente nestes dómines con dir a pique o en acabar camudando nun bou con fuerte presencia d'elementos de tiempos que creyíamos pasaos.

Pa detrás, una parte perimportante de la ciudadanía resígnase y afáyase nesta llamarga de podrén. Formaciones polítiques empozaes hasta la cuguruta en casos y práutiques corruptes ganen les elecciones per dayuri. Y son les que lleven les riendes de bien de gobiernos autonómicos arriendes del gobiernu del Estáu. Talo paez qu'esa llaceria nun pasare factura o, de facelo, nun apurriere mayores consecuencies.

Facía falta, de toles maneres, fixar l'atención de la xente nuna cuestión que nun fuere la de los diarios escándalos de les corrupteles. Y espolletó entós con fuerza'l tema del secesionismu catalán. De siguío y de sutrucu, tol aparatu estatal  y los sos voceros d'unos medios d'información consideraos los menos fiables d'Europa entamaron a tirar carrobexazos escontra l'enemigu soberanista catalán. Y la corrupción quedó entós amatagada per esti otru tema y los implicaos nella solliviaos al vese fuera del centru d'atención.

Pero nun nos engañemos. Anguaño esi secesionismu ye la sida perfeuta pa usalu como coartada pa puñar escontra cualquier  nacionalismu non español. Y tamién escontra la izquierda non mardomada. La gran folada d'apoyos que'l gobiernu central ta algamando na so engarradiella contra elli ta faciendo que'l nacionalismu español más ultramontanu ande enchipáu y plantegue abiertamente lo que lleva naguando por consiguir mesmo dende la transición: tarazar l'estáu autonómicu, recentralizar competencies, apilancar l'avance de los idiomes minoritarios, demonizar la izquierda que nun sofita abiertamente les posiciones gubernamentales nel baturiciu territorial...

Siéntense plantegamientos que mos remiten a tiempos abegosos. Como prohibir determinaes ideoloxíes o intervenir nes redes sociales o nos medios de comunicación críticos son dalgunos d'ellos. Notres pallabres, pone-yos torgues a la llibertá de pensamientu y a la d'espresión, dos encontos básicos y fundamentales de cualquier estáu democráticu y de drechu que pueda llamase asina.

Quieren arremangase pa mangoniar les autonomíes y hasta los ayuntamientos. Y yá entainaron a ponese a ello. Tres l'aplicación del artículu 155 de la Constitución a Cataluña, vieno la intervención del ayuntamientu de Madrid, que vien a ser como aplicar esi artículu a nivel municipal. Casualmente, tres bien d'años en manes del partíu imputáu como organización en casos de corrupción, y actualmente en manes d'esa izquierda que nun bailla al son de los conservadores. El "a por ellos, oé" aplicao a autonomíes ya izquierda.

Y, entrín y non pasa too esto, dificultaes de los fiscales y xueces encargaos d'instruir los procesos xudiciales escontra los corruptos, salides de prisión de los yá condergaos, xente escandalosamente suelto safándose de la prisión y, por supuesto, nuevos casos de corrupción nuna espiral constante.

Resumiendo, nacionalismu, izquierda, autonomíes, llibertá ideolóxica, llibertá d'espresión... Les monxures más reaccionaries del Estáu guirriando y rinflando porque ven posible guiar la situación pa una especie de sistema precariu de democracia arcoxada, deficitaria, perronera que-yos vien como aniellu al deu pa los sos intereses. Nun sedría nada nuevo. Casos asina tenemoslos per ende si queremos facenos una idea de pa ónde quieren qu'empobinemos.
                                                                           




viernes, 3 de noviembre de 2017

El ñeru'l dictador

Tomar una pinta en chigre da pa muncho. El chigre siegue siendo un foru onde atopes lo que se cuez na cai, hasta muncho más fiable que los medios de comunicación qu'anden anguaño más que nunca al rau del peselbre que-yos da de comer.

Pues taba yo güei na barra del chigre de turnu. Nuna mesa discutíen de política. Ún de los contertulios enfotábase no bien fecho que taba meter preventivamente na cárcel a dellos componentes del gobiernu catalán. Namás  qu'otru contertuliu en soledá s'oponía al clamor españolista revestíu de barrotes carcelarios. Pa la mio sorpresa ún de los patriotes españolistes partidarios d'encaxotar a gafos separatistes catalanes participare nel so tiempu en movilizaciones obreres onde líderes sindicales acabaren deteníos y en cuartón. Quedé clisáu.

L'españolismu, que ye simplemete'l nacionalismu español, anubre tolo que se-y pon per delantre. Fai escaecer que l'Estáu Español ye ún de los más corruptos del mundu. Ehí tenemos los milenta casos asoleyaos hasta güei y los qu'inda queden por sacar a la lluz. Pero esi españolismu fai de crisol p'axuntar cabo d'elli a izquierdes (parte d'elles, pa ser xustos) y dreches, pa que faigan un exerciciu d'amnesia colectiva y pa qu'andechen na mesma dirección actualmente.

¿Y cuála dirección ye esa?. Pues la de recular cuarenta años y ponemos na antoxana del cambiu de réxime vivíu nos años 70. Pero pa peor. Non p'afondar nos cambios sociales, políticos y de conceición del Estáu que s'intentaron echar a andar daquella. ¡Ca!. Non. Pa tornar al ñeru'l dictador.

Cualquier persona demócrata y, en consecuencia,  partidariu del estáu democráticu y de drechu que güeye los acontecimientos d'estes dómines tien de tar, a la fuerza, esmolecida. Reculamos a reblagos. Entainamos al pasáu predemocráticu. Y respiga pensar que los grupos minoritarios y demonizaos que nos encamentaben qu'esto de la cacarexada democracia española yera simplemente tardofranquismu nun yeren unos alloriaos inconformistes. Porque la trampa ta rescamplando y va ser que, desgraciademante, llevaben razón.

Anguaño la preocupación d'una probable mayoría social española -y asturiana- nun ye la corrupción xeneralizada, nin los recortes sociales, nin los paraísos fiscales. Non. La gran preocupación ye la unidá de la patria española a l'antigua usanza, esto ye, uniformista y enemiga de les identidaes territoriales, anque p'afitala haya que mandar a tostar guiaes al estáu democráticu y de drechu, anque pa ello haya que convertir y apoyar ensin regalladures a políticos corruptos, partíos corruptos, medios de comunicación vendíos a los corruptos, y mirar pa otru llau ante inxusticies sociales a magüeyu y un llargu etc.

Porque esa unidá patria sagrada xustifícalo too. Y si p'algamala hai que recular cuarenta años y sustituir los avances sociales llograos hasta güei por un reforzamientu descaráu de la dictablanda, bienvenío seya.

Y esto, señores, ye lo que cualquier persona que salga actualmente a la cai, que sintonice radios o televisiones, o qu'eche una güeyada a los panfletos propagandísticos amazcaraos de prensa independiente pue observar de siguío.

Tornamos al ñeru'l dictador. Tornamos al pasáu. Tornamos a la España propiedá particular d'un puñáu de castres que mangonien l'Estáu dende hai sieglos. La democracia, les llibertaes, les autonomíes, los drechos llaborales y ciudadanos, en definitiva, l'estáu democráticu y de drechu, fai agua escandalosamente nel Estáu Español nestes dómines que vivimos. Y la causa última, el megollu de tou esti desbaraxuste espantible llámase españolismu, notres pallabres, nacionalismu español. Esa ideoloxía rancia, golpista, totalitaria y enemiga de cualquier proyeutu de convivencia ciudadana dende cuantisimayá.

Asina que nesta entrada nun voi yá a referime a ideoloxíes rexonalistes o nacionalistes, drechistes o izquierdistes, nin a una riestra de conceutos más que puen tener el so foru de debate y decisión na marcación d'un estáu democráticu. Voi referime a que güei les sofitancies d'esi estáu supuestamente democráticu taramiellen delantre les nueses ñarices y lleven camín de que les sustituyan por un sucedániu del réxime anterior, suponiendo que lo que tuvimos hasta agora nun lo podamos calificar asina.

Y esi ye'l camín per onde nos empobinen eses monxures rancies y dueñes d'esti Estáu dende hai xeneraciones. Y l'alternativa rescampla hasta pa los más galbaniegos: o los demócrates verdá reaccionamos o vamos acabar como oveyes recluyíes na llende nós y escurque delles xeneraciones que nos sucedan. Tamos nun momentu críticu, históricu y vital pal diseñu del nuesu futuru.

Y eso ye lo qu'hai. Y lo que nun pase perhí, autoengañamos.
                                                                                


jueves, 2 de noviembre de 2017

¡Que m'escurez!

Al final de los años 70 yera aquello un fervideru. El sentimientu de país emburriaba a bien de xente que, col réxime anterior dando les boquiaes y la transición faciendo galanes, sentía'l pruyiciu de puxar pol país asturianu.

Nun duró muncho la cosa. Nos 80 el poder del tardofranquismu acabante ñacer iguó un duernu y tresnó esllava pa enllenalu. Bien de xente d'aquello tiróse de calón a la ufierta. El porgüeyu ye ún de los motores principales que mueve'l mundu. Ye persabío de los tiempos.

Y quien nun s'amusgó al nuevu tiempu pasó a ser un diañu gafu y radical con cuernos y rau. Por exemplu yo. O quiciabes tu mesmu, que tas lleendo estes llinies.

Quedó de pies una izquierda radical reivindicadora del idioma, pero acoxando espantiblemente a la hora de reivindicar la identidá histórica y política del país y acomplexada de contino pola izquierda españolista qu'acabó por torgala y, en gran parte, por asumila.

La defensa enfotada y radical de la identidá asturiana, permancorniada, quedó entós en sucu baxeru hasta güei.

Ya'l duernu españolista dictó la so llei.

Ya la nueva cazumbre de finales de los 70 escosó camudando nos tiempos vinientes el país nun ermu.

Llingüísticamente, xorrecieron amagüestos de mediocres subvencionaos que se presentaron como la única parte visible de la lliteratura contemporania y, como mampurra, de la defensa de les esencies patries asturianes.

Políticamente, la izquierda acabó al rau de les alternatives españolistes, vasques o catalanes. El centru derecha, conformóse con participar n'escisiones de la española que siempre acabaron ente dolco y la media manga. L'asturianismu centrista que nun siguió la llinia anterior sapióse contra la muria de los sos propios complexos y erros que lu  emburriaron a combayar col españolismu más moderáu como manera d'atropar un viveru granible de votos.

Pero col baturiciu catalán la situación retorcigañóse enforma y rescampló de manera ablucante que la España preconstitucional taba perviva y nestos díes ta dexando claro qu'eso de les autonomíes ya identidaes históriques, culturales, llingüístiques y polítiques van a cortalo pela freba d'una vegada, dempués d'unes décades esperando pel momentu afayadizu pa ello.

Y entós...¡Ai de mi, que m'escurez!. Dalguna xente que s'enfotare nos practicantes  del siguidismu españolista y duernista de bona fé considerando que nun había otra sienda alternativa si se quería avanzar daqué empecipió a cayer de la burra y a decatase de que'l camín entamáu, allá pelos 80 nun llevaba nenyures.

Y neses tamos anguaño. Lo meyor, qu'una minoría ta esconsoñando del engañu. Lo peor, qu'una mayoría sigue aneciando nesi camín sestaferiáu hasta agora y nesos patriotes de cartón piedra que nos lleven al precipiciu cuantisimayá. En resumíes cuentes, mui mal pinten les coses nestes dómines y nes que s'avecinen, maninos.

Nel vieyu monte Patalexos, onde voi dacuando a espansionar, sigue viéndose riscar l'alba. El vieyu caborniu de castañal chamuscáu sigue en pies y na contorna rebulle esi xanu echáu al monte y empalagáu de tantu despropósitu que me xuxuria coses pa escribir nesta bitácora. Pero mentes el clarior escuque nel finxu'l cielu toca siguir, anque per agora, como yá ye un vezu repetitivu y tarrecible, seya dando voces nel castañéu.

Pues nello tamos.
                                                                     



miércoles, 1 de noviembre de 2017

Lluces, calabaces, amagüestos y ánimes

La lluz y les ánimes. Dos conceutos que van xuncíos. La Güestia camina con güesos encesos. En munches de les sos representaciones eses ánimes rellumen como si tuvieren feches de lluz. En cementeriu prendemos veles. Na Nueche d'Ánimes tamién les prendemos y facemos llinternes con ñabos o calabaces agüecaos. Nel vezu de dir a pidir los rapacinos peles cases nestes dómines tamién llevaben lluces.

Esa lluz asumióla'l crisltianismu. Escurque nes cultures precristianes simbolizaba la vida de les ánimes, una representación hermana d'elles.

La perconocida calabaza de Tolosantos aportó a güei con un significáu doble. Camiento que'l más antiguu xúnese a esa xuntanza ente lluz y ánimes. Poro, antiguamente -y quiciabes anguaño se conseve dayures- poníense enceses en sitios que podíen facer de referencia y guía a l'ánima que tornaba pa casa. Nun prau cerca la caleya. Na siempre engañosa cruciada nel tenebreru de la nueche. Y nel corredor de casa, puntu final del trayeutu de l'ánima andariega.

Arriendes de lo anterior, tamién hai una xuntanza ente esa calabaza y eses veles, pero notru sen. Nesti casu p'axorizar y recordar que la nueche ye pa eses ánimes y non pa los vivos (¡Andái de día, que la nueche ye mía!). Porque na Nueche d'Ánimes podemos atopar dos tribes d'elles. Una, la de los difuntos de casa que tornen a visitar a los sos y los llares onde vivieron. Vienen entós en plan afayadizu. Pero tamién anda de ronda La Güestia. Y nesti casu, yá nun vien nesi plan, sinón que pue trayenos una desgracia si nos atopamos con ella. Poro, esa utilización de les lluces les calabaces tien dos ámbetos dixebraos.

Saliéndome del tema de les lluces, quiero facer referencia a la tradición del amagüestu de la viéspora de Tolosantos. Nél dase una xuntanza ente la xente, pero tamién de los vivos colos difuntos, pues hai que dexar unes ambozaes de castañes onde s'amagüesta pa que los que tornen de la ultratumba puedan matar la fame. Algama entós esi amagüestu les dimensiones d'una comunión ritual. Cosa que nun ye un tema menor, miániques.

Actualmente ta recuperándose, pali que pali, el nuesu samaín propiu. Los amagüestos, les calaveres enceses y les veles, el recordatoriu de La Güestia y los sos recitaos, el marutase p'axorizar, el pidir peles cases los ñeños...Recuperar estes tradiciones habría tomase como una xera perimportante por toa aquella xente amante de les tradiciones asturianes y respetuosa pa con elles. Curiosamente, alrodiu d'estes feches n'abondos colexos faen amagüestos, tallen calabaces y marútense. Bien ye cierto que baxo la denominación foriata y comercializada del Halloween. Pero ehí hai una estaya bien granible pa da-y al dengue y dir recuperando estos vezos y rituales tan importantnes nel nuesu calandariu añal. Pasar del Halloween a la Nueche d'Ánimes ye relativamente fácil porque la bas ye asemeyada al venir el primeru de tradiciones europees esportaes al continente americanu.

Ayeri felicitábavos nesta bitácora l'Añu Nuevu Celta. Güei aprovecho pa deseavos que vos pinte afayadizu y pa recordavos que nesta viesca del Xanu tenéis posafuelles aseguráu pa cuando queráis averavos a ella.
Un saludu candial.
                                                                               

martes, 31 de octubre de 2017

Nueche d'Ánimes y Día de Tolosantos

Güei entramos na Nueche d'Ánimes o Difuntos que ye la viéspora del Día de Tolosantos. Tamos nel nuestru Samain. Y resclavos de vezos revieyos tornen a rescamplar.

Una nueche au l'amagüestu faise necesariu pa escalecer. Tamién pa dexar na cocina una ambozada castañes pa los difuntos, cabo una xarra d'agua, que vendrán con fame y con secañu.

Porque esta nueche les ánimes tornen a los llares onde pasaron les sos vides. A visitar a los sos. Y hai que les recibir como merecen ensin escaecer una cama afechisca nun cuartu pa que descansen.

Convién alluma-yos el camín pa que nun escabarrien. Una calavera de calabaza, d'un ñabu...o de verdá con una vela encesa dientro fai esi llabor de guía. Asitiándola nel prau, na cruciada de caminos, nel corredor de la casa o na ventana.

Tamién ye esta nueche un poco aquello p'andar de candonga. Hai que tener seyellu porque La Güestia sal de procesión y atopar con ella pue resultar peligroso. Si asina cuadrare, salir a escape, o entainar a dibuxar un círculu en suelu y metese dientro. Nun te vayan apurrir un güesu encesu y t'axunten pa coles ánimes vagarientes.

Claro que tamién pue ser un vecín marutáu quien t'axorice, que tamién ye tiempu afayadizu pa eses engataes. Y puen picar a la puerta los rapacinos de la contorna a pidir llambiotaes, asina que tener dalgunes nun ta de más.

Filvanes de costumes antigües qu'anguaño tornen a nós rebautizaes con otros nomes y preñaes de porgüeyos comerciales. Ye'l Halloween...

Pues ello ye que la entrada d'un nuevu ciclu, según los raigaños ancestrales, alita ente nós nestes feches. Visítenmos los difuntos pela nueche y visitamos nós les sos tumbes al día siguiente orniándoles con flores y prendiendo veles. Los muertos y los vivos, el pasáu ya'l presente van en xermandía nestes feches.

Pues feliz añu nuevu celta.
                                                                                 

sábado, 28 de octubre de 2017

La FADE ya'l secesionismu racista

Va unes selmanes sorprendíenme unes declaraciones de l'actual dirección de la FADE onde se truñaba escontra'l conflictu catalán con descalificaciones ayenes a una espirica económica.

Díes dempués entamaben n'Uviéu la entrega de los premios "Princesa de Asturias". Torna a llamame l'atención que dende esa asociación empresarial fixeren un llamáu a dir al actu con banderes d'España, pero non d'Asturies. Y convién recordar que la bandera asturiana vien arrecoyida nel Estatutu d'Autonomía vixente  y pa nada pila pa llau políticu nengún.

Güei tando nel chigre echo una mirada de regüeyu pa la persona que tenía al llau y que taba lleendo'l panfletu LNE que, como yo nun toi por papar esllava desinformativa, cuantisimayá que nun lleo. Pero da la casualidá de que na páxina au taba'l llector veníen unes declaraciones de les monxures de la FADE sobre'l "secesionismu racista catalán" (sic), la unidá d'España y bla-bla-xu-xu.

Ello ye que la economía onde nos desenvolemos ta mui globalizada. Les empreses nun se basen un tes nel autoconsumu ya, independientemente de cuestiones polítiques, ta too mecío ya interrelacionao.

Poro, un empresariu asturianu con iniciativa y que se la xuega día a día tien, sí o sí, que dir buscando mercaos dayures pa los sos productos. Independientemente de les circunstancies polítiques del momentu, que puen cambiar inesperadamente y dexar descolocáu a quien s'enfote nelles pa buscar porgüeyu empresarial a curtiu plazu.

Asina qu'un empresariu asturianu actual, arriesgáu ya innovador, tien de buscar mercaos nuevos onde esparder el so negociu, seya en Murcia, Occitania, Portugal o Catalunya. Y ye entós cuando nos tenemos qu'entrugar si la federación empresarial enantes mencionada ta representando los intereses d'esti empresariu o si empobina per otros caminos.

Y equí aportamos al megollu de la cuestión referida a Asturies. Porque nel nuestru país conviven anguaño dos tribes empresariales.

 D'un llau empresarios arriesgaos, modernos ya innovadores que se la xueguen nel día a día.

Pero, d'otru llau, hai un comiciu empresarial de parásitos que viven de les subvenciones públiques, que nun arriesguen un res y que si dexen de percibir la mampurra del gobiernín autonómicu de turnu ven cómo en cuestión de díes les sos rellumantes empreses esbarrumben como un flan.

Y al llegar equí surde la entruga del millón: ¿a cuála d'estes dos menes empresariales representa la FADE?.

Pues, maninos, too apunta qu'a la segunda. Dicho notres pallabres, al duernu del Réxime Clientelar Asturianu que llevamos de los tiempos soportando nesta tierra mancorniada.

Y esto ye una anuncia pergrave y peresmolecedora. Nun doble sen. D'un llau, una notica tarrecible pa tou empresariu asturianu verdá, arriesgáu y con iniciativa. Y, d'otru llau, pal colectivu de trabayadores d'esta tierra, que se ven condergaos a trabayar pa parásitos subvencionaos y non pa entamadores con enfotu en crecer y tener futuru pa les sos empreses y onde aquel que val pue tener u camín de promoción llaboral.

Una Asturies empresarial "oficial" que nun ye que truñe a la economía y a la intelixencia con descalificativos ablucantes como'l de "secesionismu racista" que nin siquiera les formaciones polítiques más españolistes s'atreven a sopelexar ante'l gafu problema territorial qu'acute al Estáu nestes feches. Ye que nin siquiera aceuten la bandera estaturaria, constitucional y llegal asturiana. Ablucante.

Pa facéselo mirar mui fondamente. Españistán Cañí n'estáu puru.
                                                             

jueves, 26 de octubre de 2017

El boicot de los fatos

Ser fatu vien a ser el trax a la midida del españolista descerebráu, suponiendo qu'esista otru con un mizcu de sesera. Amás, la pallabra pinta perbién pola doble aceición que'l vocablu tien nel nuesu idioma.

Nestes dómines hai un españíu brutal en foma de boicot a los productos catalanes. Simplemente por selo ensin más consideraciones. Hasta tal puntu ta espolletando estos díes qu'hasta les cadenes de tv enceten esti tema nos sos telediarios.

L'españolista fatu puña a cencielles cuando entama cruzaes boicoteadores. Nesti casu que mos ocupa, nun hai análisis nin chapeta nengunos y los resultaos tórnense ridículos dafechu. Ver a un presidente estremeñu poner el gritu en cielu porque esi boicot ta frayando sectores económicos de la so comunidá algama unes traces de patetismu tan bultables que talo paez l'argumentu d'una película de Berlanga.

Dexando claro que toi escontra dafechu d'estes espantayaes, voi tratar d'asitiame del llau de los cruzaos entamadores. Si quixere emburriar contra productos y empreses del dalgún llugar al que-y tengo zuna poles razones que fueren, fadríame delles entrugues antes d'empecipiar con ello. Claro que l'españolista fatu boicoteador nun se les fai. Porque ello ye que nun tien neurones na cocorota como pa plantegase coses tan de caxón como estes que vienen de siguío:

¿La empresa a boicotear ta a favor o escontra del independentismu catalán o del motivu oxetu a boicotear que fuere?.

¿L'empresariu en cuestión d'ónde ye?. Y los trabayadores ¿d'onde son?.

¿Los proveedores de qué comunidaes son?.

¿Nun podría dase la carambola que l'empresariu, los trabayadores y los proveedores seyan de la comunidá autónoma del patriota boicoteador?.

La marca refugada ¿produz sólo na so tierra o tien empreses produciendo notres comunidaes?.

Y si'l carrobexazu  torna y los consumidores de la comunidá a boicotear faen lo mesmo escontra dalguna perteneciente a los boicoteadores ¿quién acabaría más mancorniáu?. ¿Pa qué llau pila la balanza comercial?.

Pues, ¡adepuxa!, nel casu que mos ocupa, resulta que dalgunes empreses que llevaben siendo boicoteaes abenayá declaráronse escontra'l soberanismu y delles hasta cambiaron el domiciliu social fuera de tierres catalanes. Y resulta tamién que los proveedores d'otres empreses son de fuera n'abondos casos. Y asocede tamién qu'hai marques catalanes, asitiaes y produciendo notres comunidaes autónomes. Tres casos que son exemplos que nestos momentos tan rescamplando y nun se puen ñegar. Resumiendo, l'españolista fatu boicoteador ¿a quién rediós ta boicoteando a fin de cuentes?.

Pero pese a tolo anterior y a que se ta faciendo finca, mesmo dende seutores gubernamentales nada menos (¡que ronca la madera!) de lo irresponsable y dañible pal conxuntu de les autonomíes d'estos comportamientos, los españolistes fatos a lo so. Ehí siguen cola so cruzada, turriando ensin contemplaciones. Faciendo llamamientos a valtar productos y empreses basaos únicamente n'ocurrencies y zunes personales que nun tienen encontu domumentáu nengún. Da perceguera y noxu güeyar cómo se comparten peles redes sociales, orniaes con perles cultivaes personales, bilordios puros y duros asoleyaos a lo xole, simples mentires y mazcayaes d'impresentables.

Y como la decencia inteleutual lleva cuantayá arreflundida na pila cuchu, cuando dalgún personax nomáu de la nuesa quintana -qu'hubo dalgún, miániques- queda albintestate y col culu al aire dempués de collaborar nun d'estos boicots, nin rectifica, nin pide disculpes, nin nada. A despistar y asuntu resueltu.

En fin, que por si n'Asturies nun teníamos bastantes frayadures, tamién tenemos una representación perbultable d'españolistes fatos boicoteadores. Y ye qu'ente nós hai xente que p'apuntase a cualquier despropósitu fálta-yos tiempu, hom.
                                                                           
                                                                   

martes, 24 de octubre de 2017

Españolismu y utilización política d'Asturies

L'españolismu espárdese como un andanciu. Enceta la identidá llariega y fai arrenegar de la so a quien fixo galanes notru bierzu que nun cuadra col que se considera xenuín español. Razonar con un españolista ye perder el tiempu. Nunca se va dar y enxamás va aceptar argumentación dala. Siempre va puñar contra les llingües estatales resalvando'l castellán. Va turriar contra cualquier conceición autonomista o federal del Estáu, que siempre observa con rocea. Arrenunciará a ser asturianu, gallegu, andaluz o llionés pa ser español, un conceutu que s'opón a cualisquier identidá que nun seya la so y que lu fai encerriscase na llucha por desaniciar toles demás identidaes en bien del so imperiu nacional, sobre manera nel momentu qu'aprecie un  rispiu de tensión ente autonomíes y Estáu. Esto cabero ta rescamplando anguaño pola mor del baturiciu territorial qu'hai entamáu.

N'Asturies l'andanciu del españolismu espolletó y sigue faciéndolo d'una manera que pue apoderar nos años vinientes a lo que cada vegada menos va quedando d'esti país. Y en faciéndolo, la vieya nación asturiana va sumise na historia. Nestes dómines que vivimos enveredamos pal día en que'l güercu cante na ventana de la nuestra tierra empobinando asina pa una fas terminal. Nun ye irreversible dafechu enagora, pero esmolez que nun se güeyen alternatives con brenga que puedan enfrentase con garantíes al andanciu españolista. Y esto postrero agrava inda más la situación.

Otramiente, estos díes repitióse un episodiu más de la utilización política d'Asturies per aciu d'unos premios ayenos al país y que sólo tienen como vinculación con elli'l sitiu onde se dan, Uviéu. Nun picurrabucu nel tiempu, el más ranciu cuadonguismu asítiase ente nós. Les monxures madrilanes y los bufones llambe culos autóctonos faen de la nuestra nación un bierzu onde se grita alto y claro que, frente a la dinámica d'afondamientu de les identidaes históriques de los países qu'igüen l'Estáu, equí'l centralismu uniformista tien el so posafuelles permanente. Remánase una Asturies fondamente españolista frente a tou quisqui que discrepe d'esa conceición territorial unitarista y uniformista. El papel asturianu na España de gu ye arrodiar y sofitar la institución de la monarquía, curiar pola unidá española y arrenunciar a la propia historia, cultura, idioma y poder políticu, sacrificándolos pa esos fines. Y too ello sofitao por una parte perimportante de la población que s'afáya empapirotiada nel siguidismu d'esa actitú suicida.

Cada día que pasa tengo la impresión de vivir nun sitiu onde nunca nun pasa nada arriendes de recular. Una especie d'ermu intelectual, social y políticu. Diráseme qu'hai esceiciones y ye verdá. Pero guerrien en minoría y con poques arbíes. Tampoco nun se güeya capacidá p'algamar alcuerdos amplios que lleven a  entamar una sestaferia qu'axeite un camín propiu de nuestro col envís d'algamar un futuru vidable y afayadizu. El discursu y l'andecha alternativos trabaos y con puxu  pa planta-y cara y tornar l'españolismu que nos aforfuga sigue siendo anguaño la nuestra asignatura pendiente. Ya'l tiempu afala.
                                                                                   
                                                                           


sábado, 14 de octubre de 2017

Esa izquierda asturiana tan aquello

"Nacionalismu=fascismu". Tovía güei esta pintada pue vese na cuenca minera del Nalón. Ta fecha por militantes que de mano yeren nacionalistes asturianos, pero que camudaron d'ideoloxía hasta acabar nesti finxu. Evidentemente, la pintada refierse al nacionalismu asturianu, pa nada al español.

Dempués de 40 años, el nacionalismu asturianu d'izquierda derivó nuna moñolada política fedionda que, a efectos prácticos, allána-y el camín al nacionalismu fascistoide español. Nada nuevo baxo'l sol. Los posicionamientos políticos aparentemente dixebraos, a vegaes axúntense.

El casu catalán rescampla qu'eslluma. Los qu'apocayá facíen pintaes como la del entamu, güei esguedéyense nes redes sociales sofitando'l secesionismu catalán. Un secesionismu con bas nacionalista y camín onde andechen la burguesía catalana y la izquierda antisistema. Lo que-yos val pa Catalunya, p'Asturies non.

Porque los que zarren files col plantegamientu catalán son los mesmos que n'Asturies calificaben apocayá de noonazis o fascistes a quien plantega una xuntanza amplia de sectores asturianistes pa la defensa del nuestru país.

Pero la trampa rescampló.

Y della izquierda asturiana quedó col culu al aire, porque los sos discursos contradictorios hasta güei mesmo tán ehí, bien nidios, pa quien los quiera ver.

La gochada vomitiva d'esa izquierda queda entós asoleyada. Nun voi dar nomes, pero acuéyome a la sentencia que reza que dizse'l pecáu, pero non el pecador. Y esta entrada va empobinada pa xente de pensamientu llibre ya independiente, pero non a esfozadores d'esllava del duernu izquierdista envizcáu y acríticu.

Llamentablemente, la drecha asturiana envereda nestes dómines pal españolismu nacionalista, uniformista y, lo que ye abondo más grave y esmolecedor, fascista. Per esti carreru, propuestes de futuru pal país asturianu son perpoco vidables anguaño y per bien d'años.

Pero pel llau de la izquierda, onde teóricamente habría de quedar inda dalgún rellumu, la cosa ta perenguedeyada. Les zunes pa cola posibilidá de xuntar plantegamientos d'izquierda y una defensa enfotada na pervivencia identitaria del país, tán ende. La fuérciga sigue abierta. Y mentes nun s'igue, un proyectu social, políticu ya identitariu p'Asturies tien unes posibilidaes de futuru más que cuestionables.

Avecínense tiempos gafos pa la pervivencia social, polítia ya identitaria del país asturianu.

Malos tiempos pa la llírica.
                                                                               

 





jueves, 14 de septiembre de 2017

La Cueva y La Vieya

Nun requexu apartáu del Pozu'l Ramu hai una formación caliar pintada peles dos cares con antropomorfos qu'al treslluz amuesen una escena sexual. L'entornu da-y la solemnidá y la maxa a la representación. La reproducción del clan que garantice la supervivencia. La xuntanza del humanu col animal que-y da alimentu. Dambos comparten protagonismu na escuridá del refuxu maternu. La Cueva ye'l vientre de la madre Tierra qu'abelluga y acorica a los sos fíos.

Cruzando en pelondines, nun reblagu de milenios, atopamos otra vuelta cola Cueva. Nesti casu más reconocible pa los que triamos anguaño esti país de raigaños fondos. Esta vegada La Cueva ye  un vientre que protexe del enemigu y pare una nación: Asturies. El vientre de Cuadonga, morada de Deva antaño y de La Santina anguaño. Pero convién que nun empixen les apariencies. Porque la veneración qu'ellí se fai nun ye sólo a la virxe, sinón tamién al sitiu. A la La Cueva y a La Naturaleza. Y equí entra n'escena la segunda madre del clan y de la nación: La Vieya.


La Cueva ufierta'l refuxu máxicu de les sos coraes y ofrez el so partu nacional. Pero precísase l'escaniellu qu'añe a la reciella. Que l'amorose cola ñublina, col orbayu, col aire... La Vieya, que señala col so arcu multicolor el final de la boriada, la bocana y el rellugu. Ella ye la que, otra vuelta, afalaga ya igua'l somantu afayadizu pa la vida. Un somantu onde espoxigar, escutruxar, facese adultos y reproducir el clan nacional. Torna la xuntanza humana cola animal, cola viesca, col ríu y cola mar. Cuando'l brañeru axorizáu esconxura a Xuan de la Borrina llogrando la so ayuda, ésti apaez acompañáu d'una muyer barbuda (la barba, atributu davezu de llonxevidá y sabencia), quiciabes un trasuntu de La Vieya, que fila la borrina nel so fusu inmemorial y tien el poder de facer qu'escample.


La Cueva Madre como abellugu y vientre qu'echa vida. La Vieya del Arcu como iguadora del  trubiecu y la bayura vital. Dos sofitos ancestrales de la milenaria triba astur con una güelga inda marcada na nuestra alcordanza colectiva. 

                                                                     

martes, 22 de agosto de 2017

Visita a La Falguera (Somiedu)

"Vaqueirina, vaqueirina/la tua braña óndi queda/allá arriba naquel altu/metida pa La Falguera".

El pueblu somedanu de Veigas resúlta-y al visitante afayadizu. Unes cases de teitu bien conservaes, horru, una bolera,  con merenderu detrás pa la otra mano de la carretera, un bar pa beber o comer, llavaderu y fonte con barcal...Ambiente tranquilu qu'afalaga al visitante. Dende esti llugar ñaz una xubida empluna y acuriosada con una pista hormigonada qu'empobina pa La Falguera. Ablanos, carbayos, o escayos coles mores inda verdes, llenden el camín. Nuna finca, ta pastiando un mulu. Pasa un vecín nun touterrén que s'ofrez a llevanos. Agradecémos-ylo, pero queremos llegar al oxetivu caminando.Vense les finques curiaes, muries y dalguna cabaña. Tamién un colmenar con caxellos modernos d'alces. Magar la distancia a percorrer nun ye llarga, lo pindio del trayectu failu dificultosu, y más enagora si calca'l sol. Les picorotes de los montes, les vistes del fayéu na montaña d'enfrente, l'ambiente de la natura, suponen tou un afalagu pa los güeyos. Y l'aire llimpio anima a alendar fondo pa llimpiar los pulmones.

Cuando, allarribón, les cuestes dexen pasu a una parte más llana del camín, una cabana de teitu asitiada a mano izquierda danos la bienvenida a la braña de La Falguera. Un poco más allá, a mano drecha, hai una fonte col so barcal. Una xaronca pequiñina nala pa guardase de la que m'asomo a él. Mana poco agua y tien puesta nel güeyu una fueya aguantada por una piedrina pa facilitar el garrar l'agua. Esti branu hai abonda seca. Nótase abondo nos praos roxos, en dellos árboles que frutien mui mal y amuesen les cañes seques. Y nótase tamién nes fontes escoses o camudaes en pimpanes febles y nos regatos secos o ríos con poco agua culebriando pente peñes y regodones.

Siguimos caminando unos metros más y yá tamos nel corazón de La Falguera. El paisaxe que se nortia a mano izquierda ye impresionante. Los montes y la fondura de los valles dibuxen una estampa espectacular. Garro los prismáticos y llego a sintir vérigu al ver aquel paisaxe más de cerca. El pueblu caltién tovía dalgunes construcciones con teitu. Avérome a una d'elles y arródiola. Ta bien conservada. Na puerta, una pila cuchu indica que la usen como corte. Observo más lloñe otres más, tamién de cubierta de teitu que paecen bien conservaes. Arriendes d'elles, unes cuantes cases colos sos techos de teya vense bien curiaes por tar habitaes, polo menos dalgunos meses del añu.

Aporta'l momentu de tornar pa Veigas onde quedare aparcáu'l coche. Pero antes hai que dase un gustazu. Cuando llegamos otra vegada a la fonte, agospiaos na solombra d'aquel requexu, echo mano a la mochila y saco la bota vinu. Echo un tragu perllargu escanciáu dende bien alto mientres miro de regüeyu pa los montes qu'apunten pal cielu. Enfrescáu'l gargüelu, entós sí llega'l momentu d'entamar la baxada. Al llegar a Veigas entramos nel bar a tomar unes cervecines bien fríes. Garramos el coche y empobinamos pa La Pola Somiedu. Acércase la hora de xintar. Pero del tema gastronómicu nun voi tratar equí. Sedría una crueldá pola mio parte facer de naguar al llector con un recuentu de la bayura gastronómica que se pue disfrutar per estos llares...
                                                                                   

miércoles, 9 de agosto de 2017

Fútbol, retrocesu social, y humanoides bípedos

La sociedá asturiana recula d'una manera más qu'alarmante. Apunta pa una colectividá desarticulada onde cada vuelta va imperando más el too val, siempre aplicao nel sen negativu del términu.

Exemplos d'ello tenémoslos a embute a diario. Hoi voi apurrir un casu, que fui testigu presencial d'él, va unes hores. Ta relacionáu col mundu del fútbol. Pudiere paecer, nuna güeyada superficial, una anecdota ensin mayor importancia. Pero camiento que, xurgando nel tema, pue ser un niciu más ente milenta, de pa ónde reculamos nesta tierra social y culturalmente.

Ello foi que taba esti mediu día tranquilamente tomando una pinta nun bar. Entró entós un humanoide bípedu d'esos que tienen como norma cultural falar al alto la lleva pa que tol mundu s'entere de lo que piensen (el verbu pensar ta aplicáu con gran arrogancia pola mio parte al especime en cuestión). Trátase d'un xubiláu o prexubiláu que gasta'l tiempu y les perres pelos chigres del conceyu a falta de daqué meyor que faer. Ye futboleru d'un equipu de los grades del fútbol español, d'esos que tienen drechu de pernada sobre los demás y que cuenten con famosísimos xugadores que, amás de facese multimillonarios con esti cada vegada menos deporte, anden últimamente sentaos nos bancos de los xulgaos por furtiar dineros a la facienda pública.

Coincide entós que na tv autonómica asturiana entamen la sección dedicada a los deportes y empecipien dando les últimes anuncies relatives al Sporting de Xixón. Ye entós cuando l'humanoide bípedu futboleru sentencia a voces, pa que tol mundu lu sienta, que'l ye d'equipos grandes y qu'esos pequeñacos que s'axunten ente ellos pa competir meyor o que desapaezan y puntu.

Una teoría deportiva que fai respigase a ún. D'un llau, porque cabruña una vuelta más sobre la mesma yuncla de siempre. Esa gran lexón d'humanoides bípedos que viven n'Asturies, que gracies a esta tierra tienen la fortuna de nun tener cosa meyor que facer que gastar les sos xubilaciones en vinos, fartures y folgances varies y que, como agradecimientu, desprecien y traten de valtar cualquier cosa propia de la tierra, del tipu que seya.

D'otru llau, afálame la pregunta de si esa ideoloxía de claru nazismu deportivu qu'amuesen una gran cantidá  d'estos humanoides bípedos que tienen aguaño conquistada Asturies queda namás que trancada en facetes concretes (nesti casu futboleru) o si la podemos enxertar n'ambitos más xenerales y tamién s'espurre a les relaciones home-muyer, supremacíes raciales, culturales, llingüístiques y vete tu a saber.

Porque llueve sobre moyao. Va pocos díes tuvi qu'aguantar a otru grupu d'estos humanoides bípedos insultar a voces, pa que tol mundu los sintiera, a la xente que s'asitia escontra de los espectáculos taurinos. Ayeri mesmo otru grupu d'estos especímenes turriaba contra los que nun ven nada clara la cruzada entamada escontra osos y llobos. Y nunos y otros casos tienen un denominador común: esprésense en sitios públicos a voces, insultando, amosándose agresivos y, en resumíes cuentes, nun sé cómo podría acabar la cosa si daquién se-y ocurre lleva-yos la contraria.

En resumíes cuentes, abúltame que la indecencia social, el retrocesu na convivencia, y l'avance del totalitarismu reveníu, aplicáu a les más variaes estayes de la nuestra vida cotidiana, tán imponiéndose más cada día na Asturies d'anguaño. Y si dexamos que na nuestra sociedá los ciudadanos acaben sustituyéndose por esta tropiella cada vegada más abundante d'humanoides bípedos, apaga y vamos. Porque entós esto acabóse, nin.
                                                                 




martes, 1 de agosto de 2017

El romanu y la peregrina

A vegaes imaxino que va un día un paisanu caminando per ende. De sópitu, tropieza nuna piedra y sal de debaxo d'ella un romanu con sandalies, espada, cascu y faldorios.

Va tiempu caleyaba yo per Uviéu. Nes cercaníes de la catedral atopéme con un rapaz marutáu de romanu qu'ofrecía a los turistes visites guiaes pela ciudá y rodiada. Podía dir vistíu d'ástur, rei asturianu, artesanu medieval, monxu, col traxe tradicional, etc. Pero non, diba de romanu como si Uviéu fuere hermana ximielga de les mesmísimes Roma o Pompeya.

Cuéntenme qu'estos díes anda tamién pela capital asturiana una rapaza marutada de peregrina ofreciendo tamién los sos servicios de guía pal turista. Nesti casu'l traxe nun me paez desafortunáu pol aquello de la importancia asturiana na creación del camín norte nes peregrinaciones a Compostela, que foi'l rei asturianu Alfonsu II quien anició tol procesu, y tamién de la importancia de la catedral consagrada a San Salvador na ruta xacobea. Pero resulta que la peregrina va diciendo a quien se-y acerca qu'Uviéu foi capital del Reinu d'España. Pero ye qu'esti reinu tardó en nacer varios sieglos dempués de que dexare d'esistir l'asturianu del que yera, esta vegada sí, una de les sos capitales.

Axuntando dambos casos tenemos una ilustración clavada de dos de los principales pegoyos que sofiten a la versión particular del nacionalismu español n'Asturies. Les nuestres etapes históriques más antigües despáchense clasificándoles en prerromanes, romanes y tardorromanes. Y del medievu p'alantre somos España y lo demás tierra conquistada, como reza'l perconocíu eslogan del fenómenu idiolóxicu y cultural conocíu como cuadonguismu.

Sorpréndeme que a estes altures teamos tovía asina. Que nun haya evolución discursiva dala dientro del conceptu que tenemos d'esti país. Que la única imaxe que vemos reflexada nel espeyu seya la del españolismu grandonista, ranciu, preconstitucional y faltosón pa col restu de los pueblos colos que compartímos l'estáu. Y sorpréndeme sobremanera que tovía nun haya un grupu social col pesu y puxu suficientes pa semar y facer que guañen otros discursos y otres güeyaes d'esti país nuestru.

Pero la realidá ye la que ye. Y esta ye la nuestra. Como dixo va tiempu daquién, Asturies pue definise como un sitiu onde nunca pasa nada. Y nestos temes, miániques que l'inmovilismu y el nunca pasar nada son una seña distintiva y repetitiva hasta la repunancia.
                                                                               

miércoles, 19 de julio de 2017

La bota minera

Los resclavos de l'actividá minera n'Asturies vienen d'antiguo. Por poner un exeplu, ehí tenemos les mines prehistóriques, del neolíticu, nel Aramo, onde estraíen mineral de cobre.

Magar na nuestra tierra la minería fincó a esplotaciones pa sacar varios tipos de minerales, la qu'algamó mayor presencia y de más recién foi la del carbón.

Vinculao cola actividá minera surdieron aportaciones llingüístiques que, col tiempu, pasaron a formar parte del corpus idiomáticu del asturiano. Por poner una pallabra perconocida y mui utilizada anguaño, podemos referinos a la voz "guah.e", que camiento que nun requier esplicación dala.

Antiguamente les condiciones de trabayu na mina yeren más precaries qu'anguaño. Los mineros diben pal trabayu vestíos con ropa propio. Cubríen la cabeza con boines, calzaben madreñes, y llevaven con ellos les sos llámpares. Nun hai qu'escaecer tampoco a les muyeres, les carboneres, pañando carbón tamién calzaes coles madreñes, el pañuelu a la cabeza y les sayes.

Naquel entós podía llevase vinu al pozu. Esto traxo que'l vezu de la utilización de la bota como recipiente pa tresportar el vinu garrare un impulsu bultable n'Asturies por mor de lo amañosa que resultaba pa llevalo. Hebo boteros ente nós qu'abrieron negocios dedicaos a la so fabricación.

Precisamsente venceyao col vezu de dir a la mina cola bota vinu por parte de los mineros, non sólo asturianos, sinón del restu la península, surdió una variante de la mesma que se conoz como bota minera. Yeren unes botes de collor negro, d'una capacidá que non superaba los 3/4 de llitru y más estilizaes que les otres, con menos culu y más llargues, a manera d'una botella de pelleyu. N'Asturies tamién s'utilizaron estes botes y podía vese a mineros nes romeríes con elles. La so forma facíales amañoses pa llevales, por exemplu, nel bolsu la chaqueta a manera de petaca grande.

La boina, les madreñes, la camisa, el pantalón y la chaqueta, la llámpara, la bota, la xíriga minera... La manera de dir pal trabayu de los mineros d'otres dómines que formen parte de la nuestra historia económica, pero tamién cultural, y de la nuestra alcordanza colectiva. 
                                                                                  

viernes, 7 de julio de 2017

Ayalgues y moros.

Na nuestra cultura de tresmisión oral perviven rellatos qu'atribuyen les ayalgues o dellos xacimientos arqueolóxicos a los tiempos de los moros.

Con esti términu pudiere tar faciéndose referencia a unos habitantes que triaron el nuestru territoriu antes que nós, los xentiles, xente antiguo d'antes de la cristianización a los que s'atribuyen construcciones como los dólmenes. Tamién hai quien los confunde colos moros de cuando la reconquista que colaren dexando abandonaes construcciones y ayalgues.

Esta vinculación de dalgunos restos arqueolóxicos a les ayalgues fexo qu'hubiere pelos pueblos ayalgueros, xente que se dedicaba a buscales y que, por culpa d'ello, furaben y estrozaben bastantes xacimientos au se suponía que les había. Circulaben pente la xente les llamaes gacetes, que yeren planos o informaciones onde s'indicaba'l sitiu en que poder descubrir una ayalga.

Anque la mayor riqueza vinculada a too ello que podemos tener actualmente ye la de conservar, estudiar y difundir toos esos xacimientos del pasáu, y arrecoyer y tresmitir les histories y lleendes de tradición oral vinculaes con ellos.

lunes, 26 de junio de 2017

Cuideiru ya'l Valli d'Arán

El Valli d'Arán pertenez a la provincia catalana de Lleida. Con pocu más de dos mil habitantis, tian un idioma propiu, l'aranés, que ya un dialectu del occitán. Esi dialectu ya oficial nesti llugar. Un bixu llingüísticu nalandu na mar de milenta llinguas del planeta y enxertáu ente idiomas tan potentis como'l francés ou'l castellán.

Cuideiru ya un conceyu asturianu mariñán. Dientru d'él atóupasi la villa pixuata del mesmu nomi. Un puartu mariñeiru abellugáu a la veira del Cantábricu. Nesti puartu sobrevivi un dialectu del asturianu qu'algamóu sonadía ya prestixu hasta lus nuastrus días, el pixuatu, que relluma de manera especial na fiasta de San Pedru au fain un pregón  pernomáu nél, L'Amuravela. Outru bixu llingüísticu que sobrevivi a la presencia del castellán que va apoderandu, d'una manera imparabli al asturianu. Nesti casu, dixebrándulu del casu aranés, nun si trata de nengún idioma oficial.

Tamus, comu dixi entantias, ante dous exemplus de llinguas sobreviviandu metanus idiomas de gran puxu ya pesu, qu'apoderan y aforfugan a lus más minoritarius que tan diantru de la so redolada. Dous superviviantis, comu lo son tamián la llingua occitana, berciu del aranés, y l'asturiana, cuna del pixuatu.

Nel casu asturianu diousi un fechu llamativu. Faltóu poucu pa que se sintiera nada menus que nel parllamentu européu apocayá. Al final nun si llogróu, peru nun deixa de llamar l'atención qu'un dialectu perminoritariu del asturianu tuviera a puntu de deixase güir nas más altas instancias europeas.

Tolu anterior llévami a facer una reflexón. Lus caminus de las llinguas son revesosus ya resulta mui difícil aldovinar pa óndi empobinan. Sigún apuntan las cousas, tou paez dirixisi p'hacia un puntu au las llinguas minoritarias van acabar desaniciándusi anubridas polas mayoritarias. Peru nun puadi afirmasi rotundamenti, por más que lus nicius apuntin nesi sen. Y, comu contraargumentu a esi presumíu esbarrumbi, ehí tenemus lus casus del aranés ya'l pixuatu. Lu esperabli ya que desapaecieran, peru lu real ya que si resistin a facelu ya que siguin alendandu y ruxendu. Porque en dambus casus, nin siquiera tamus refiriándunus a lus dominius llingüísticus más amplius ondi s'inxertan.

Asina que la conclusión final ya clara. Comu diz el dichu, miantras hai vida hai esperanza. Ya lu que nus tenemus qu'entrugar anguañu lus usuarius de llinguas minoritarias ya si estas tán vivas, por mui mancorniadas que s'alcuentren, ou si nun lu tán. Yá si la rempuasta ya que sí lu tán, l'actitú amuásasi clara. Lus depositarius d'ellas tenemus que siguir usándulas, oralmanti ya por escritu. Ya, al empar, reivindicándulas tratandu d'enanchar lus aruelus ondi s'usan hasta llevalas a las mayoris cumis d'emplegu. Nun queda outra. Hai que siguir.