La nuesa estrella

Tolos años Manfurada y yo dememos unes castañales qu'hai cerca del caborniu y enllenamos d'oricios una cuerria. Esti añu, pa poner el ramu al añu que va camín d'escosar, quedé yo en cocer un par de bonos potes d'elles y él en trayer vinu cangués p'acompañales. Tamién convidemos a un par d'amigos pa que la xornada fuere más entretenida.

Asina que'l día señaláu pela tarde yá tenía yo les castañes cocíes y apaeció'l mio amigu trasgu con un pelleyín de vinu a recostines y un cachu pa bebelo. Dempués, aportó Xuan Moñiz d'Ambás, amigu que diz él que vien de la familia de Marirreguera y aficionáu a la llectura y escritura na nuesa llingua. P'acabar, aprució Pachín de Pacha Pachón, más conocíu pol ñomatu de Don Quixote de Caravia, el madreñeru andante, pola mor del so oficiu, llugar de ñacencia y enfotu por iguar los enguedeyos que la gandaya fai nel nuesu país.

Punxímonos a comer les castañes y a apurrinos el cachu col vinu p'amugar el gargüelu. Hasta que llegó'l momentu de brindar polo que nos pruyía a cadún que pasare n'adelantre. El primeru en llevantase col cachu nes manes foi'l trasgu Manfurada que dixo:

"Brindo por que los asturianos dexen de ser un pueblu empapirotiáu y desdexáu coles coses de so y entamen a sentise más arguyosos y comprometíos cola so tierra."

Dempués garró'l relevu en forma de cachu vinu Xuan Moñiz d'Ambás que dixo él:

"Brindo porque la xente de la república de les lletres asturianes pescancien que los falantes son una fonte perimportante pa deprender l'idioma, que pongan la oreya y que deprendan con humildá pallabres, dichos, refranes y demás bayura que tovía puen sentise en boca d'ellos, desaniciando tracamundios, pallabres forzaes o puros inventos".

Llevantóse en tercer llugar Pachín, Don Quxote de Caravia, que brindó asina:

"Brindo porque aporte un día onde nes nueses instituciones heba xente con sencia y compromisu cola nuesa tierra y esllariguen d'elles a tola xente que ta ellí guariando y ensin bicala dexando abandonáu'l país de nueso".

Y llegóme'l turnu a min. Y resulta que garrar yo'l cachu y quedame la mente en blanco foi too ún. Empezaron los mios amigos a mirame estrañaos y yo a sentime aforfugáu metanos aquella situación. Foi entós cuando sentimos ruxir unos esquilones y d'ente unes castañales salió Sidru'l Guirriu qu'afincando'l rexu de la so pértiga en suelu, blincó penriba de toos nosotros, y yá en suelu sacó del la faxa un papel arrugatáu que m'apurrió. Nél pudi lleer la lletra d'un guapu canciu asturianu. Punxi la meyor voz que se m'entamó y metá cantando, metá recitando dixi:

"Santa María,

nel cielu hai una estrella

que a los asturianos guía..."

 

Y entos, Sidru'l Guirriu, arrestiellando la voz como si fuere un gran xamán d'allá de los tiempos, ponse él:

"¡Y que nunca nun nos muerra, amigos!. ¡Que nunca nun nos muerra!.

Nueche d'Ánimes

Esta nueche voi facer un amagüestu y dempués poner al llau'l caborniu una llábana sofitada en dos rolles. Enriba d'ella voi asitiar un llargueru con castañes y una ferrada col canxilón enllena d'agua de la Fonte'l Güeyu. Tamién voi asitiar una calavera de calabaza cola so vela dientro allumando. Too ello pa que les ánimes de los antiguos atopen el camín y puedan amatagá la so fame y la so sede nesta nueche d'ánimes que ye de so, onde puen tornar a mecese col mundu de los vivos.

Tamién voi pasar tola nueche dientro del caborniu ensin escucar pa fuera nin siquiera, pues ye ésta una fecha preferida pola güestia pa echase a rondar pelos caminos y llugares y nun me gustaría un res alcontrame con ella mentes pasa recitando aquello de:

"Cuando nos yéramos vivos

andábemos a estos figos,

y agora que somos muertos

andamos per estos güertos.

Andar, andar

hasta'l tueru la figar".

O peor entá aquella fras que fai respigase al más trabáu:

"¡Andái de día, que la nueche ye mía!".

 

 Mañana, col riscar del alba, va ñacer un añu ñuevu sigún la manera de midí'l tiempu de los vieyos pueblos y los vieyos dioses. Entós los xanos, ñuberos, cuélebres, trasgos y demás xermandía mítica vamos siguir curiando les ayalgues d'esta tierra milenaria onde los homes pintaren les entrañes de les cueves, llevantaren dólmenes y túmulos, y coronaren con castros cuetos y cantiles... 

                                                                       

L'ayalga de la cueva'l Cuélebre Célebre.

A unos diez minutos d'onde vivo atópase la cueva'l Cuélebre Célebre. Según una lleenda del llugar ellí vivía un cuélebre gafu qu'amedranaba a los vecinos hasta qu'un día matárenlu dándo-y pa comer un boroñu preñáu d'anfileres.

Pero yo conocílu y la cosa nun foi asina. El cuélebre enxamás saliere de la so cueva, pues tenía encamentao que naide nun escaciplare nella porque ocultaba una ayalga pervaliosa de los asturianos. Y asina lo fixo hasta qu'un día, yá mui vieyu, decidió retirase a descansar al olimpu de los mitos.

Siempre tuvi yo curiosidá por conocer esa ayalga que naide nunca consiguiere descubrir, asina que tando un día charrando con Xuan Moñiz d'Ambás y con Sidru'l Guirriu decidimos dir a buscar a un ayalgueru mui famosu de Tinéu pa ver si nos podía asesorar nel tema. Entamó a rebuscar per unos cartafueyos vieyos y apurriónos un dibuxu de la cueva col sitiu onde se suponia que taba l'ayalga.

Empobinemos paciallá y empecipiemos a percorrela según les instrucciones de la gaceta que llevábamos. Nun requexu había un pasadizu estrechu. Como yo yera'l más ñarru y menudu de los tres metíme gatiando per él hasta que llegué a una especie de fornicu onde atopé una caxa.

Saquéla d'ellí y a la lluz de los candiles que llevábamos vimos que yera de texu ferrada con abarcones y clavos. Abrímosla y nel so interior había un pergamín enrolláu. Garrólu Xuan, desendolcólu y lleó unos versos que me sonaben enforma de sentilos siendo un xanu rapacín:

 

"Cuando examen les abeyes

y posen de flor en flor

si les escorren s'espanten

vanse y non facen llabor...

.........................................."

Sidru'l Guirriu tamién reconociere aquellos versos y Xuan Moñiz d'Ambás lloraba como un críu porque yeren d'un antepasáu de so natural del conceyu de Carreño.

Decidimos aquel día que l'ayalga de la cueva'l Cuélebre Célebre debiere pervivir a lo llargo de los sieglos nel so abellugu y dar anuncia a tolos nuberos, cuélebres, xanes, busgosos y demás xermandía del olimpu de los mitos pa que tuvieren siempre sollertes col envís de que nengún lladrón nin manguán pudiere nunca enxamás esfarrapar esti tesoru de tolos asturianos.

                                                                                                                                                

El baille del rabileru Mederu.

El mio amigu'l trasgu Manfurada y yo somos unos fartones, tengo que lo reconocer. Los xanos y los trasgos siempres tuvimos bon saque, mialma. Ello ye qu'apocayá tábamos esbillando unes panoyes pa moler los granos pa fariña. Cuntábamos facer unos tortos de maíz enriba una llábana en caldia y acompangalos con unes bones escudielles de lleche recién catao de cabra bermeya como pa tar rellambiendo los focicos una selmana.

Tábamos asina entreteníos nesta xera cuando aportó perellí'l rabileru Mederu. Ye ésti un músicu ambulante ciegu qu'echa cantares a la manera antigua acompañándose con una gaita de rabil. Vienen siempre con él un par d'esguilos que lu guíen como llazarinos pa que nun zapique con nengún raigón de la viesca nin tenga percance dalu.

Averose a onde nosotros y apurrímos-y una bona caciplada de vinu y un cachu curiosu de quesu pa él y un par d'ambozaes de bellotes pa los esguilos. Entós Mederu sentóse y entamó a tocar unos sones prestosos a esgaya y los esguilos punxéronse a baillar bien gayasperos. Al pocu tiempu empecipiaron a llegar más esguilos, melandros, pegues y otra carrapotada más d'animales de la viesca qu'axeitaron ellí una folixa de lo más prestosa. Recuerdo qu'hebo un momentu en que Mederu púnxose solemne y tocó un son de tastu medieval que tolos presentes danzaron garraos pel moñín a la manera d'una danza prima. La lletra dicía asina:

Toca'l xuglar,
trasiega'l rei,
trebeya'l conde,
blinca'l bufón
ya'l pueblu vive por nada
en pernada.
Canta'l xuglar,
refalfia'l rei,
revicia'l conde,
galde'l bufón
ya'l pueblu muerre en pernada
por nada.

Dempués tornaron toos a la pandorga y yo voi cuntavos tola verdá. Manfurada y yo nun fuimos a aguantar el pruyiciu d'axuntanos al baille y entremos de calón allá. Al día siguiente, col amanecerín, desperté y ellí yá nun había naide. Empobiné a cuatro pates hasta'l caborniu y comprobé que nun quedare gota de sidra, nin de vinu, nin de resquemín. Esbarrumbéme otra vuelta y tuvi dormiento y rinflando nun sé cuántos díes más...                                                                            

Del autoodiu y cosmopaletismu asturianos.

Cuando nuna sociedá hai una parte importante de ẍente atarraquitao d'autoodiu, esa sociedá tien mui difícil afayase nel futuru.

Na sociedá asturiana apréciase cuantisimayá un componente bultable de tirria hacia lo propio. Al empar, esa parte de la sociedá qu'arreniega del bierzu y llar propios allampa por tolo procedente de fuera.

L'autoodiu y el  cosmopaletismu son dos cares de la mesma moneda. Una cara representa l'enfotu por valtá lo llariego. La otra, por sustituilo polo foriato.

Pero cuando esa enfermedá del autoodiu s'asitia nes instituciones y nos aruelos de poder, les consecuencies qu'algamen les sos actitúes agrávense inda más. Y tanto'l nuestru patrimoniu material, como l'inmaterial y llingüísticu cuerren un pelligru claru de desaniciu.

Y nun mos engañemos. Ensin autoestima y valoración de lo propio'l finẍu'l cielu del nuestru futuru va tar ñublu de contino. Basta con agüeyar pa cómo avancen otres sociedaes qu'aprecien lo suyo y cómo recula la nuestra.

Y son precisamente esos patrimonios que mencionaba enantes una herencia de tola ẍente asturiano d'hoi. Tresmitiénonmoslos los antiguos y tenemos el deber y la obligación de preservalos y tresmitilos nós a les ẍeneraciones vinientes. Un llabor difícil de tresnar na sociedá cambiante d'anguaño y qu'algama la categoría de casi utópica naquelles sociedaes que, como la nuestra, ta abirugada poles gravísimes enfermedaes del autoodiu y el cosmopaletismu.

Poro, el turullu que llame a aconceyar a la  parte más mentalizada de la nuestra sociedá na defensa del nuestru patrimoniu material ya inmaterial nun tien de deẍar de sonar darréu. Ye necesario tar siempre sollertes contra los ataques que'l nuestru llegáu cultural sufre de contino. Y combatí la pelona que cute a la nuesta sociedá asturiana actual col caltenimientu, recuperacion, difusión y  respetu d'esi llegáu qu'afortunadamente inda conservamos.                                           

                                                                         

                                                                             

Ayalgues y moros.

Na nuestra cultura de tresmisión oral perviven rellatos qu'atribuyen les ayalgues o dellos xacimientos arqueolóxicos a los tiempos de los moros.

Con esti términu pudiere tar faciéndose referencia a unos habitantes que triaron el nuestru territoriu antes que nós, los xentiles, xente antiguo d'antes de la cristianización a los que s'atribuyen construcciones como los dólmenes. Tamién hai quien los confunde colos moros de cuando la reconquista que colaren dexando abandonaes construcciones y ayalgues.

Esta vinculación de dalgunos restos arqueolóxicos a les ayalgues fexo qu'hubiere pelos pueblos ayalgueros, xente que se dedicaba a buscales y que, por culpa d'ello, furaben y estrozaben bastantes xacimientos au se suponía que les había. Circulaben pente la xente les llamaes gacetes, que yeren planos o informaciones onde s'indicaba'l sitiu en que poder descubrir una ayalga.

Anque la mayor riqueza vinculada a too ello que podemos tener actualmente ye la de conservar, estudiar y difundir toos esos xacimientos del pasáu, y arrecoyer y tresmitir les histories y lleendes de tradición oral vinculaes con ellos.

La guaña de lo cotidiano

Endolcámonos davezu en discursos abstractos, plantegamientos xenéricos y corpus ideolóxicos onde tratamos d'encaxar la realidá diaria ya'l futuru imaxináu. Ye bono tratar de ver les coses na so complexidá y totalidá, el razonar, l'espiricar sobre modelos sociales, cuturales o nacionales.

Pero tamién tenemos delantre de nós una guaña, unos ámbitos onde aposentar y desarrollanos, au realizanos ya interactuar de siguío. La nuestra vida real trescurre nel día a día y somorguámonos nél. Lo cotidiano pue abultanos secundario o hasta tarrecible a vegaes, pero tamién pue ser fonte d'esperiencies arriquecedores.

Los que pertenecemos a los ámbitos de les cultures y llingües minoritaries arrecostinamos cola llábana d'una globalización que trata d'emburrianos pal uniformismu. La xente que nos decatamos d'ello tratamos d'escurrir discursos alternativos, d'asitianos nel grau d'abstracción necesaria pa ver les coses en conxuntu y analizales p'apurrir tamién soluciones xenerales.

Pero ye una xera revesosa y abegosa que pue producir la contradicción de que, enguedeyaos n'análisis y llendes conceptuales, escaezamos sacar provechu de la cotidianidá na que vivimos, nel día a día, y de les vivencies que nos arrodien y finquen.

Tovía queda bagax cultural y llingüísticu nesa cotidianidá, nesi vivir diariu. D'equí y d'allá puen dir apilucándose trazos culturales y llingüísticos qu'enagora aliten ente nós, incluso n'aruelos tremendamente aculturizaos y aculturizadores. Convién tener siempre los sentíos argutos pa nun perder nin migaya d'ello.

Y tamién ye una postura perimportante nun camudar nel nuestru propiu país y delantre de la nuestra propia xente, a la primer ocasión que se nos presente, de rexistros culturales y idiomáticos que tovía llevamos con nosotros. Y amosar esa diferencialidá, de manera parcial y solidaria, al restu'l mundu, pues el respetu ente les cultures ye de lo más arriquecedor que podemos axeitar pa la convivencia pacífica y granible nél. Asina que tenemos que mos avezar a  zampuxanos nos ámbitos identitarios de nuestro, compartir esos vezos, sofitar colos nuestros comportamientos y actitúes lo ermuno del país que tovía se tien de pies.

No cotidiano nun too ye esbarrumbe y desastre total, magar vivamos unos tiempos abegosos pa la pervivencia de les cultures y llingües minoritaries. Tamién hai ayalgues pa buscar, pa compartir, y pa ufiertar. El país inda non aculturizáu dafechu ye daqué pa vivir nel día a día. El plantegase upar esi país participando nél, resistiéndose a dexase apoderar por modes y cancios de serena que nos afalaguen a dexar lo propio por otro ayeno presentao como meyor, ye un llabor que forma la base sobre la que llevantar cualquier discursu ideolóxicu y abstractu.

Vivir el país dende l'arrogancia del pensamientu positivu. Facer cada cual la so buelga col comportamientu cotidianu, asoleyando, compartiendo y utilizando, ensin llerza nin prexuicios, esos trazos culturales y llingüísticos que, en mayor o menor midida, muncha xente asturiano conservamos anguaño, ye un camín básicu y fundamental p'algamar un futuru onde'l bagax identitariu asturianu tenga un sitiu visible y dignu.

Xunta Xeneral: de Suprema a Posafuelles

Tres camudar la Xunta Xeneral en Xunta Suprema d'Asturies con plenos poderes nel nuestru país, de resultes del llevantamientu escontra Napoleón el 25 de Mayu de 1.808, nel mes de Xunu d'esi mesmu añu, a propuesta de D. Xuan Argüeles Toral, decídese crear una Guardia d'Honor de la institución encargáu de la seguridá de los integrantes de la mesma.

Pa entamar esi cuerpu del exércitu asturianu, nómense a los soldaos del primer batallón del Reximientu d'Hivernia como guardies d'honor. Esti reximientu entrare n'Asturies, de mano, pa mardomar la sublevación asturiana, pero remontáronse escontra les órdenes recibíes y punxéronse del llau de los asturianos. Dempués axuntárense-yos fuerces del cuerpu de cazadores hasta algamar dafechu'l númberu d'efectivos de la guardia. Desendolcaron el so llabor hasta'l mes d'Abril de 1.811, que foi cuando se disolvió la Guardia d'Honor.

Al ser D. Xuan Argüelles quien anició'l procesu pa dotar a la Xunta Suprema d'aquella guardia, conocióse a los integrantes de la mesma como "Los Argüellinos". Pa nun entrar en descripciones minucioses, pa dase una idea del uniforme que llevaben pue echase una güeyada al santu qu'ilustra esta entrada y que correspuende a un soldáu de la Guardia d'Honor  de la Xunta Suprema d'Asturies.

Cuando ún repara nel pasáu de la nuestra institución, lo que foi y la brenga que tuvo nel so tiempu, y la compara con esta ximuestra en que la convirtieron güei, nun pue dexar de sentir estrañedá d'otros tiempos. Sólo con imaxinar cómo actuaríen una mayoría de los actuales diputaos de la nuestra institución cimera si tuvieren que s'enfrentar a un poder foriatu dafechu da perceguera. De xuro que s'amusgaríen ensin gorgutar a lo que dende allalantrón-yos mandaren. Ye lo que vienen faciendo dende la preautonomía, miániques, nun descubro nada nuevo escribiendo esto. La so principal seña d'identidá política.

Si agüeyamos con una prespectiva histórica'l devenir de la nuestra Xunta Xeneral, podemos concluir guapamente que pasemos de tener una institución con raigones fondos nel nuestru país a otra que, magar tenga'l mesmu nome, ta a años lluz d'aquella. Una institución onde s'asitia bien de xente -nun voi dicir que too, pero sí una clarísima mayoría- que nun cree nesta tierra (entamando pol propiu gobiernu), y que se mueve embizcao no que-yos dicten dende l'embeligru madrilanu. Pero nun nos vamos autoengañar. Tamién una institución que los propios asturianos nun tienen en cuenta, pasando d'ella y viéndola como daqué ayeno o inventao apocayá, al ser el fondu y descomanáu desconocimientu de la nuestra historia ún de los rasgos distintivos de la nuestra xente, y al ser tamién el cosmopaletismu una característica bultable d'una parte perimportante de la población asturiana actual. Una institución, en resumíes cuentes, que cayó arrollicones picu abaxo pela historia pasando de ser nel so día Xunta Suprema pa la defensa del país a ser anguaño Xunta Posafuelles mangoniada por intereses ayenos.

Camiento que lo simbólico ye perimportante na nuestra condición de seres humanos y una constante histórica. Los símbolos son tou un llinguaxe que nos val pa comunicanos y reconocenos. Puen significar prestixu o puen amosanos lo que se considera un refugayu. Ya'l másimu muérganu d'autogobiernu d'un país, a parte de les sos funciones y atribuciones, tien un calter simbólicu innegable. Asina que voi dir poniéndo-y el ramu a esti post con una imaxe de pura ficción anguaño yá impensable de que se dea nel nuestu país (notros ocurre tolo contrario, y pa comprobalo nun fai falta arreblagar les llendes  del Estáu onde vivimos). Tirando metafóricamente del aniciu d'esti artículu,voi imaxinar qu'un día caleyen un grupu d'asturianos per Uviéu y pasen per delantre de la Xunta Xeneral. Ellí, un par de soldaos de la Guardia d'Honor asturiana curien la entrada dando toa una imaxe de solemnidá institucional al edificiu onde s'asitia. Porque ellí ta la institución cimera del autogobiernu asturianu, una institución histórica, onde s'alluguen los representantes elixíos polos asturianos pa defender el so país y los sos drechos, y que los propios asturianos almiren, respeten y sienten como de so...

Pero, evidentemente y como rescampla ensin falta de facer  prácticamente esfuerzu dalgún, lo escrito nel párrafu de suso ye eso que dixi: pura ficción anguaño impensable. Y asina-yos va a otros pa los qu'una situación equivalente de ficción nun tien nada y sí de motivu d'arguyu. Y asina nos va a nós, enfotaos en que siga siendo ficticio tolo que suponga dignificar y sofitar lo nuestro, mentes día a día vamos fundiéndonos un poco más nesta  llamarga que tenemos iguada a comuña de desdexamientu, autoodiu y renuncia suicida a un futuru vidable.

                                                                   

El tótem Urriellu

Somos un pueblu vieyu. El nuestru bierzu vien de les dómines del reinu asturianu. Pero reculando
más nel tiempu llevamos llixos de civilizaciones anteriores.

Porque esta tierra que nós triamos tuvo habitada de los tiempos. Hasta tenemos un perimportante xacimientu neanderthal en El Sidrón.

Rescamplen les nuestres cueves con representaciones rupestres. Escatafinos d'una civilización atlántica, abellugu d'una humanidá fuxendo de les glaciaciones. Dexó la so buelga'l neolíticu. Coronaron los nuestros cuetos los castros...

Y tenemos el nuestru tótem. O el nuestru gran menhir. El gran finxu onde los nuestros güeyos clávense ya'l nuestru corazón respígase: L'Urriellu. De xuro que lu vieren les civilizaciones que nos precedieron. Los nuestros güelos del reinu astur. Y nós.

Seique por esi tirón telúricu de tiempos remotos que dexen el so biltu nel nuestru ser, el Marqués de Pidal sintió nel so día que diba ser un sacrilexu qu'un pie foriatu triare per vez primera la cuguruta del gran menhir asturianu. Y col Cainejo esguilando descalzu algamáronla y evitaron la violación del llugar sagráu de nuestro y de los antiguos.

Enxamás nos cayeron embaxo les fontes, los ríos, la mar, los cumales, les foces y escobios. La natura siempre foi xuncida con un sobéu imposible de francer colos habitantes d'estes tierres atlántiques. Cuéstanos a embute, tovía güei, ser urbanites perfechos. Resquémanos siempre dientro un rescaldu rural que nos emburria a buscar esa natura, esta tierra, esa viesca y esa mariña.

Nun ye entós d'estrañar un res que seyamos un pueblu esteláu nun tótem que s'aldovina nos díes d'orbayu y borrín y que s'alza impresionante cuando'l sol alluma cola fuerza del so discu doráu talo que si tuviere forxáu col mesmu y llexendariu oru de los ástures.

Tenemos tótem. Tenemos menhir. Tenemos un gran finxu nacional. Tenemos l'Urriellu. Porque inda somos, tamos y esistimos.

                                                          

Wamba

[De manera piadosa, y voluntariamente, sueno n'honor de Dios y pa lliberar la mio patria. Inscripción na campana Wamba, añu de 1.219]

Atroneya. Refocila. Xarabatia. Atapez.

La Catedral rescampla solemne notra tarde afayadiza p'acuruxase. Les paxarines tres la ventana. La llerza. El respigu.

Pigacen ente solombres los escatafinos reales nel panteón de la Capiella del Rei Castu. Les estatues de los Reis Caudiellos custodien el templu sol burbús del agua.

Reposen  na so urna de plata les cenices de Santolaya, la primer patrona. Trayida pol rei Silo. Rescatada. Abellugada.

Anubre'l silenciu la cripta de Santa Leocadia. La Cámara Santa acorica les reliquies, les vieyes cruces, los resclavos del reinu. Y la Torre Vieya curia inda la tarrecible llegada de los pirates de la mar.

Retrañen los ecos de 1.808 na Sala Capitular. Otra vuelta, la defensa de la tierra. De los ancestros. De los raigones fondos.

Les puertes rebilicoquiaes de ñozal piesllen el templu a les gafures de l'alcordanza. Na antoxana cute con fuerza'l bastiazu. Arrecien la truena y los rellampios.

Dayures queda la güelga d'un país vieyu, apostalgáu, vivu. Dayures alita. Dayures pecigaña.

Allarribón, na torre gótica qu'afala'l bandullu les ñubes buscando'l cielu, Wamba permanez sele. Esperando paciente poles manes que la faigan tinglar pa esconxurar al Nuberu.

                                                                     
                                                              

De xigantes y cabezudos

Hai tradiciones que se puen allugar en pueblos o países concretos. Y hailes tamién que se dan perdayures en milenta sitios. Pero nesti últimu casu, nun dexen por ello de ser tradiciones, y en cada llugar venles como propies y cúrienles con ciñu.

Un casu típicu d'esto dabero son los perconocíos desfiles de xigantes y cabezudos. Danse per toa Europa y notros continentes tamién. Los que s'averen a esta tradición dan-y un aniciu medieval. Y n'Asturies formen parte de la más vieya alcordanza festexera autóctona. Como ye natural, en cada comunidá estos mazcaritos puen adoptar la figura de personaxes conocíos nella, tanto reales como de ficción. Por exemplu, ente nós tenemos xigantes representando los mui conocíos personaxes del dibuxante Alfonso Iglesias, Telva y Pinón.

Afortunadamente, enagora los xigantes y cabezudos perviven ente nós y nun tán desaniciaos. Hai bien de fiestes onde tovía salen pa prestancia de los mayolonos y plasmu de los rapacinos qu'arremellen los güeyos ante eses apariciones y que tamién puen garrar un bon ataque de mieu.

Recuerdo yo de rapacín estos desfiles. Viénenme como refocilos d'istantes a la vista d'ellos. Recuerdo a los cabezudos llevando vares de volador con un corchu espetáu na pica a manera de martiellu. Si te veíen dábente col corchu y quedabes, como nos versos de Tiadoru Cuesta, plasmáu, pensatible, silenciosu...Otra anécdota que recuerdo ye cuando un cabezudu se coló en ca mio güela p'asustame (yera un familiar vecín nuestru) con tan mal aquello que dio cola cabezona nun cristal y franciólu.

Cuando, desgraciadamente, avanzamos p'hacia fiestes despersonalizaes y ensin sustancia, presenciar esta vieya tradición de los desfiles de los xigantes y cabezudos presta pola vida. Anque a los rapacinos, nesi momentu, quiciabes nun-yos faiga muncha gracia. Pero de xuru que, en creciendo, van recordalos con ciñu y prestancia, como nos pasó a los que fuimos ñeños cuantayá...

                                                                 
                                                                  

Conciencia d'Asturianidá

Esiste ente bien de xente asturiano una conciencia subxetiva o emotiva d'asturianidá. Identifíquense con rasgos culturales del país, folclóricos principalmente. Sienten pertenecia a esta tierra y puen llegar a empapiellar ante delles manifestaciones d'ella que conocen y coles que s'identifiquen.

Pero, d'otramiente, hai ente la población asturiana una carencia bultable d'una conciencia oxetiva, racionalizada, política d'asturianidá. Ello fai que la so actitú a la hora de defender esos mesmos rasgos que consideren de so vaya dende la vergoña a manifestalos, al autoodiu o al desdexamientu, arriendes de nun s'implicar na defensa de la propia autonomía y autogobiernu y, en xeneral, calteniéndose al marxe de les reivindicaciones de toa frasca que cinquen al país asturianu.

Hai tamién una ausencia de conocimientos n'estayes fundamentales que posibiliten que pueda esporpollar esa conciencia política d'asturianidá. Un finxu tan importante como la historia ta por afitar. El conocimientu de los asturianos de la so propia historia ye mui ruin, casi inesistente.

Pa detrás, lo poco que conocemos d'esa historia vienmos tracamundiao por aciu d'interpretaciones polítiques ayenes ya interesoses. Un acontecimientu que rescampla nesti sen ye'l de Cuadonga. Convertíu'l llugar y los asocedíos históricos que se vinculen a él como bierzu del más ranciu españolismu centraliegu y uniformista, esta interpretación supón una auténtica torga que reduz la conciencia d'asturianidá política de nuestro a consideramos una triba de salvapatries centraliegues y que tenemos qu'arrenunciar a ser nós mesmos si fai falta pa llograr tal fin. Ye un discursu xeneralmente asumíu, anque tien les sos mayores sofitancies y focos de difusión nos sectores  ideolóxicos más conservadores de la nuestra sociedá.

Pero hai otru cuadonguismu soterrániu, que nun se reconoz como talu, pero que vien a ser una derivación del anterior nel terrén de les idioloxíes polítiques y que s'asitia xusto nel polu ideolóxicu opuestu al anterior. Trátase del irredentismu proletariu asturianu. Pasamos entós de ser el trubiecu español pa camudar nun faru descomanáu que rescampla pente la xermandía proletaria internacional. Pa bien d'asturianos, ser d'izquierdes ye'l mayor rasgu identitariu d'esta tierra, ta mui penriba de cualisquier otra consideración y, en resultancia, si fai falta arrenunciar a lo propio o sacrificalo pa nun perder esi calter, pues arrenúnciase.

Al final, cuadonguismu conservador ya irredentismu proletariu, dende'l puntu de vista de llograr una conciencia oxetiva, política y reivindicativa na nuestra sociedá, son cares opuestes d'una mesma moneda y lleven a un fitu final compartíu, anque aparentemente son posiciones que se truñen: el d'arcoxar esa conciencia oxetiva d'asturianidá impidiendo qu'espoxigue.

Pa francer esta situación que nos tien somorguiaos nuna conciencia d'asturianidá suxetiva y emotiva, prácticamente ensin posibilidá dala de salida y cada vez más feble por mor de la fonda aculturación qu'entaína ente nós, y pa consiguir que guañe d'una vegada por toes una conciencia oxetiva, reivindicativa y política asturiana, ye mester iguar y esparder pente la ciudadanía asturiana otru tipu de discursos, especialmente nel terrén políticu. Unos discursos basaos na defensa de lo propio, de la propia identidá, de la propia sociedá y de la propia tierra.

Unos discursos que dexen pernidio que los asturianos nun somos bierzos de nada nin faros de naide. Somos un pueblu más d'esti ensame de naciones que formamos el mundu. Que podemos y tenemos que ser solidarios colos demás pueblos del estáu y de dayures. Que podemos y tenemos que participar n'andeches que busquen la xusticia social más allá de les nuestres llendes. Pero que pa ello, nun tenemos que siguir arrenunciando, nuna constante histórica suicida, a ser nós mesmos y a defender la nuestra tierra, inmolándonos de contino y ñegándomos a construir el nuestru propiu futuru como país, talo que si esa renuncia fuere l'unicu destín posible y colectivu de nuestro.

                                                                        

                                                                 
                                                           

Un pleitu güevudu

Cuenten qu'un paisanu d'un pueblu decidió un día marchar p'América. Fixo la maleta y empobinó pa Xixón u sacó un pasax col envís d'embarcar nel puertu del Musel. Pero cuando taba nel cai esperando pel barcu empezó a sentir muncha fame y pensó que diba metese nuna travesía mui llarga como pa entamala col estómagu vacíu. Echó una güeyada alredor, vio un barucu y enfiló pa él.

Cuando entró atendiólu una señora.

-Qué tal, ne, ¿podría poneme dalgo pa comer?.

-Pues la verdá ye qu'agora mesmo namás que-y puedo freir un par de güevos.

-Venga, pues con eso valme.

Metióse la muyer a escaciplar pela cocina y al cachu salió con un platu con un par de güevos y un riche. Púnxose'l paisanu a comer aquello y, cuando taba acabando, alcordóse que gastare toles perres nel pasax y que nun tenía con qué pagar. Asina qu'esperó que la muyer volviere pa la cocina a maricar y fuxó ensin abonar lo que debía.

Anduvo peles amériques unos años hasta qu'un día decidió tornar p'Asturies. Cuando desembarcó otra vuelta nel Musel vio'l barucu onde comiere años atrás y paeció-y que yera un momentu afayadizu pa saldar la deuda. Entró y volvió a atendelu la mesma muyer que la otra vegada.

-Qué tal, señora, ¿nun s'alcuerda usté de min?.

-Pues la verdá -contestó ella- ye que nun caigo...

-Pues yo tuvi equí va unos años comiendo un par de güevos fritos y nun-y los pagué, asina qu'hoi vengo dispuestu a saldar la deuda.

-Paezme mui bien -dixo ella arrascando'l cazu- vamos a echar cuentes.

Y les cuentes entamó a echales d'esta manera:

"Vamos a ver, si una gallina guariare los güevos qu'usté comió al cabu de ventiún dies sacaría dos pitinos. Si entamare otra vegada a güarialos al cabu d'otros tantos díes sacaría otros dos pitinos. Y teniendo en cuenta'l tiempu que me diz que tuvo usté per allá ñaceríen... tantos pitinos. Y al preciu que tán nel mercáu débeme usté...tantes pesetes".

Y claro, el númberu de pitos que salíen echando númberos d'esta manera yera descomanáu, ya'l de pesetes más. Asina que va'l paisanu y diz:

-Oiga, por favor, yo toa esa burrada de perres nun-y la pago.

-Pues si d'esta tampoco nun me paga voi y demándolu.

Y demandólu. Dexóse'l paisanu aconseyar por un xitanu mui arteru en pleitos de caleyes que-y encamentó lo que tenía que facer. Y llegó'l día del xuiciu y ellí taben el xuez, la demandante, l'abogáu d'ella...y naide más. El demandáu nun apaecía nenyuri.

Y allá una vegaona cuando taben a piques de suspender la vista, llega'l paisanu tou sudorientu, afanosu y aforfugáu, que casi-y tienen que dar fuelgu. El xuez al velu d'aquelles traces, va y entrúga-y:

-Pero home, por Dios, ¿d'onde vien usté tan tarde y apolmonáu que cásique suspendemos el xuiciu?.

-¡Ai, señor, xuez!, -respondió'l demandáu apapiellando- ye que me regalaron ayeri una ambozada de fabes pa semar y túviles cociendo pa qu'ablandaren. Y ente esto y aquello fíxoseme tarde...

-Pero home, ¡por favor!, -contestó'l xuez- ¿nun sabe usté que les fabes cocíes nun valen pa semar porque nun dan?.

Y el paisanu que nun veía la hora d'afinca-y el canil a aquel asuntu va y contesta:

-A, señor xuez, si les fabes cocíes nun sirven pa semar porque nun dan, entós un par de güevos fritos tampoco nun darán pitos.

                                                            

Antroxos y carnavales

Ayeri cellebrábemos el martes d'antroxu, una fecha que vien a  ser el finxu final d'un camín qu'entama, siguiendo'l calandariu de les tradiciones asturianes, a últimos del mes d'Avientu, cuando les mazcaraes y los aguilandos salen a percorrer los nuestros llugares.

L'antroxu asturianu tien los sos componentes propios y estrémase de cellebraciones foriates, mui respetables, pero que nun son gota propies de nós.

Antaño yeren dómines de facer trastaes pela rodiada, como garrar el carru que taba sol horru y colgalu allalantrón d'un árbol. D'invitar a participar a los vecinos, llegando hasta a aventar un cacíu escontra una puerta y gritar "¡antroxu fuera!", espresión que tien un significáu tamién bien guapu de perder el mieu y salir albintestate. En dalgunos pueblos retábense unos mozos a otros enllenando un goxu con paya, prendiéndo-y fueu y echándolu a rodar caleya abaxo. Salíen los rapacinos a pidir los aguilandos. Per dayures facíense manceos de paya y quemábense pelos eros dando al atapecer una imaxe de milenta lluminaries, yeren los payones del antroxu. En fin, nun se trata equí d'enxaretar una riestra interminable de datos sobre'l nuestru antroxu, pero valga lo anterior a manera de dalgunes pincelaes.

Pero hai dos elementos del antroxu asturianu que rescamplen nél y que son güei, xunto con otros de los conseñaos nel párrafu de suso, perfectamente realizables. Ún d'ellos ye'l de les llacuaes. Miániques, les fartures, el forrar bien el butiellu, ye una de les característiques del antroxu asturianu. En pasando estos díes de folixa entrase na cuaresma y hai que lo facer fartucos. El domingu'l gordu, que ye xusto l'anterior al martes d'antroxu, ye fecha afayadiza pa entamar les pitances. El comer de manera abondante y fuerte -na midía de les posibilidaes de cadún, evidentemente- ye la manera de facer la xinta d'estes dómines. Ensin escaecer la importancia de les llambiotaes pa poner el ramu a la bayura alimentaria: picatostes, casadielles, frixuelos, arroz con lleche, etc.

L'otru elementu, central y cimeru nesti casu, ye'l del antroxu propiamente dichu, que ye lo que vamos poner pa salir marutaos de corrigüela. La manera tradicional d'amazcarase pa la ocasión yera echar mano de lo que s'atopare per casa, dende sábanos a ropa vieyo, sacos, etc. Pa la cara podía valir guapamente entafarrala con un corchu quemáu. Vistise los homes de muyeres y al vies. Amazcarase los mozos de vieyos. Poner lo que-y cuacare a ún con tal de llamar l'atención y participar na chancia y la folixa. Poque la xirigoncia, la moxiganga y andar per ende de candonga y comedia yera de lo que se trataba, eso yera l'antroxar. Buscando lo estrambótico y estrafalario, lo feo, lo que da risión. Y lo participativo, hai que se xuntar a la pandorga y non quedar como un simple espectador d'un desfile. Arriendes de la salida de mazcaraes que yá lo veníen faciendo dende selmanes atrás. Nada que ver col antroxu compráu pa dir de guapos y compitir en tal o cual concursu, nin pa participar en desfiles de modelos o naguar coles xermandíes a lo brasileño. Un pintor que reflexó la manera de vistise y axuntase na folixa antaño foi Evaristo Valle coles sos percélebres carnavalaes (semeya del post).

Anguaño recuperóse bastante'l nome del antroxu pa referise a les celebraciones d'estes feches anteriores a la cuaresma. Pero non el conteníu. Lo que davezu agüeyamos per ende son carnavales ensin más iguaos a base d'imitar modes foriates, calcos de lo que se fai per ende p'acullá -vuelvo a repitir que mui respetable- pero que nun tienen un res que ver col antroxu asturianu. Ello nun ye otra cosa qu'una amuesa más del procesu fondu d'aculturación que padecemos per estes tierres en milenta ámbitos.

De toles maneres, abenayá qu'hai xente trabayando y bien na recuperación y potenciación de les nuestres mazcaraes d'antiguamente y nel nuestru antroxu. Rescátense vezos escaecíos y va amosándose a la xente asturiano lo que son los mazcaritos y vezos de nuestro nestos díes del añu. Delles veces escucando pente toa una carrapotada de manifestaciones importaes. Y ye nesi enfotu por recuperar la nuestra manera d'antroxar onde hai que facer finca. Nesos ámbitos tan los caricós culturales que convien tizar pa llograr qu'allumen cada vegada más fuerte y más lloñe. Apoyar a los grupos que vienen desendolcando esi llabor y animase a participar nél son la manera más afayadiza de consiguir la recuperación presente y futura tanto de les mazcaraes ivernales como d'un antroxu asturianu popular, participativu y con raigaños tradicionales. 

Cuando voi al baille de gaita y tambor...

"Cuando les fiestes, pasaben el gaiteru y el tamboriteru y salíen dalgunes vecines al sentilos, parábenlos y echaben un baille o un cantar".

"Cuando yera mozu baillaba mui bien. Diba a baillar a les romeríes, desplazándose hasta les qu'había notros conceyos pa baillar ellí tamién".

"De guah.e tabes en prau la fiesta o na xira y veíes un corru xente, sonaben la gaita y el tambor y una pareya espatuxaba y castañolaba los deos al son d'un xiringüelu...".

El baille. Tenemos una tradición rica de cantares, de música de percusión, de gaites, de coros. Y tamién de bailles. El gustu por ximielgase a lo suelto al son de panderetes, panderos, gaita, curdión...

Una manera de divertinos heredada de los antiguos y qu'hoi talo paez qu'espolleta y algama siguidores. Nos concursos de folklor, atrócase-yos sitiu a les pareyes de bailladores. Los grupos folklóricos siguen con puxu echando los bailles d'antes. Y tamién dende va un tiempu tenemos unes actividaes que baxo'l títulu "nueche en danza" axunten a bien de xente pa divertise baillando asturiano d'una manera abierta y participativa pa quien quiera averase a elles.

Cuando a una cultura popular se-y quiten los prexucios que la enarten y torguen relluma con toa una carrapotada de posibilidaes pa quien quiera participar d'ella. La música y los cancios son bona muestra d'ello. Les dances rituales (danza prima, corri-corri, pericote...) algamen picorotes como xuntanza y vivencia colectives. Y los bailles aconceyen a la xente con ganes de pasalo bien, espansionar y pasar unos momentos prestosos de folixa.

Pues que siga'l baille, l'ixuxú, y el ximielgase al traviés d'ellos. Que la modernidá tamién se fai coles blimes de lo tradicional. Tan válides como cualesquier otres. Miániques que sí. 

 

    

Los Sidros, Les Comedies, El Nuberu, y L'Enfotu

Empobinar pela carretera que pela Gargantá lleva de Llangréu a Valdesoto presta. Vas viendo montes y vegues, guíes casi solu y reláxeste.

Na corrada de la ilesia de Valdesoto va axuntándose la xente. Empecipies a ver cares conocíes. Esa xente irreductible que puxa, dende les sos estayes de llabor, porque alite la nuestra cultura. Abondes cares más anónimes, xente del pueblu que-y presta l'eventu ellí organizáu. Son los que-y dan correa al llabor, a fin de cuentes.

Apaez en Nuberu y miramos al cielu a ver si se decide a echar l'agua qu'acarreta. Pasaes les doce y media del mediu día, acabante la misa, toca echar les Comedies de los Sidros na corrada de la ilesia.

La primera ye la de los rapacinos. El Nuberu empecipia a soltar agua. Dempués la música de gaita y tambor anuncia la comedia de la xente mayor. Y el Nuberu decide siguir echando agua dende'l minutu primeru al caberu.

Pero da igual. Les comedies desarróllense neto a si fixere un día soleyeru. El públicu que tien paragües atéchase so ellos, y los que non siguen les actuaciones papando la chupa correspondiente como la papen los actores y actrices.

Hai vegaes que la rutina ye la meyor de les noticies. La bona asistencia de públicu a les Comedies de los Sidros ye, perafortunadamente, una rutina anguaño. Faiga sol, tea ñublo o llueva como ocurrió hoi. Presta ver cómo se consolida al traviés de los años esta mazcarada ivernal tradicional de nuestro.

L'últimu protagonista d'esta entrada del blog ye l'enfotu. Esi componente básicu y fundamental que tien que tener cualquier proyectu que quiera tener futuru. Y esi componente tiénenlu a golfaraes la xente que vien trepando dende va unos años por sacar alantre les tradicionales Comedies de los Sidros. Y mentes esi enfotu siga de pies nun hai mieu a que la cosa decaiga. Tamos de norabona.

Nun puestiquín allugáu na corrada de la ilesia de Valdesoto merqué una camiseta prestosísima con unos guirrios estampaos. Regaláronme con ella una chapa d'ellos tamién. Esti branu bien que me voi enchipar con ella puesta perdayures. Porque voi tar faciendo proselitismu de daqué que paga la pena sofitar.

La cultura popular con mayúscules escríbese, por exemplu, un domingu buxu y d'agua. Pero presidíu pol enfotu. Porque l'enfotu ye tamién una de les maneres afayadices d'esconxurar al Nuberu.

El capiruchu de los guirrios o sidros.

Una de les característiques del paxellu de los nuestros guirrios o sidros ye la de llevar la cabeza cubierta con un capiruchu llargu y cónicu.

Nun ye un atributu d'estos personaxes de nuestro namás. Tanto notros llugares d'España como d'Europa hai mazcaritos con vestimentes asemeyaes a les de los guirrios.

Son los mazcaritos blancos. Representen lo candial, guíen, protexen. Dacuando tienen actitúes que recuerden ritos vieyos de fecundidá y purificación.

Como dixi enantes, la so presencia espárdese per ende y perlloñe. En sitios alloñaos de nós miles de quilómetros, como países del este européu, esisten estos personaxes colos sos capiruchos, esquilones, etc.

Ello da pa pensar nun sustratu perantiguu européu que se manifiesta nes dómines ivernales al traviés de milenta antroxos.

Llámame l'atención qu'en representaciones del percoñocíu magu Merlín preséntenlu con esi capiruchu na cabeza. Les fades de los cuentos infantiles tamién lu lleven. ¿Ye'l capiruchu un resclavu mui vieyu propiu d'antiguos xamanes o druides?. Ehí queda la entruga.

Nun llugar onde la Inquisición tuvo asitiada per cuatro sieglos, como ye España, el capiruchu puntiagudu algamó tamién otru significáu estremáu de los anteriores. Yera'l que llevaben los penitentes, los condergaos, o los nazarenos procesionales. 

Asumir lo pagano reinterpretándolo  y, en dellos casos, rebaxalo ridiculizándolo ye un procedimientu corriente na historia del cristianismu. D'esta miente, el capiruchu pierde'l so papel xamánicu pa camudar en risión y oxetu tarrecible de llevar.

Nes romeríes del Monsacro quemaben un meñacu, el Tararu, que nos recuerda abondo al dios Taranus. De dios... al fueu.

Nestes dómines tamos somorguiaos nes mazcaraes o antroxos ivernales. Unos fechos culturales que rescamplen cuando agüeyamos en xunto la nuestra cultura tradicional.

Asina que cuento que procedía dedica-yos estes llinies a los tradicionales guirrios o sidros pa publicar nesta bitácora. Y escrites queden.

Les fazañes de los derrotaos

Entamamos un nuevu añu arrecostinando coles llaceries bien conocíes que se repiten al travies del tiempu. Un bagaxe abegosu que nos dibuxa un futuru gafu y prietu.

Cierto ye que vivimos embarbiaos por un réxime qu'esglamia la nuestra nación como una guaxa tarrecible. Y cierto ye que remamos a retranca y probes d'arbíes.

Pero si siempre consiguieren los sos oxetivos los que remanen el poder en cada ciclu históricu nun tendríemos algamao munchos de los avances que tenemos hoi. Y ye que la historia ta finxada de fazañes llograes polos, a priori, teóricamente derrotaos.

Poro, quiero entamar esti añu que fai galanes refugando'l derrotismu.

Porque tenemos gargüelu pa rinflar, brenga p'arruxidar, manes pa trabayar y enfotu p'avanzar. Y nun ye poca cosa, miániques.

Cuento que ye mester que nos convenzamos dafechu que depende de nós dir faciendo, día a día, esti país. Reconstruyéndolu cola nuestra actitú personal y colectiva. Cada cual dando al dengue na estaya u meyor s'afaye. Apurriendo'l so granu pervaloratible de sable, pues toos son igualmente necesarios.

Convién recordar qu'equí hai xera a embute pa toos y toes. La llosa asturiana ta n'abertal pa quien quiera entrar y arremangase. Nin una sola persona sobra. Porque l'oxetivu de llevantar esti país rique pola xermandía nel llabor. Pero encamentando qu'ensin renunciar enxamás a la utilización de la crítica y l'analís como ferramientes imprescindibles p'algamar una andecha participativa y vidable.

Tócanos anguaño llevantanos de la postrer xostrada y ponenos, per enésima vegada, de pies y caminar. Tornando a sestaferiar el camín que nos lleve a valtar el réxime clientelar y antiasturianu que nos arcoxa. Arrogantes y parciales. Buscando fitos d'alcuentru frente a un enemigu común. Encarando'l futuru ensin mieu.

Asina que vamos encetar l'añu faciendo un brinde a escaecer derrotismos y quexumes inútiles, a buscar a comuña un futuru afayadizu, y a enfotanos por plasmar en realidá'l gritu pixuetu: ¡Avanti, Asturies!.

Camín d'otru añu nuevu

Cozcámonos adulces a otru añu. Nel doble sen de términu. Dientro del añu que tamos, vamos pal cambiu añal pel calandariu cristianu. Allá per Payares les calabaces enceses recordábennos el cambiu d'añu paganu cristianizáu.

Arriendes de belenes, árboles allumaos y regalos de pápas noeles y reis magos, tamos en dómines d'aguilandos y mazcaritos. Una d'eses manifestaciónes au se xunce l'aguilandu col mazcaritu va aprucir bien lluéu. El día ún de xineru ye'l día del Guirria per tierres ponguetes. Una manera prestosa y ancestral d'entamar l'añu.

Ye vezu facer recuentu de lo asocedío nel añu cuando va dar les boquiaes. Esta actividá n'Asturies lleva poca xera, porque nesta tierra talo paez que'l tiempu lleva deteníu cuantayá y la repetición xunida al desdexamientu paecen ser los finxos onde nos movemos darréu.

Si acasu, dalgo de llabor amecha dientro de la xente que trabaya n'ambitos culturales. Arriendes de los aguilandos y mazcaraes propios d'estes feches, hai un trabayu notres estayes culturales como la etnografía o la música que convién destacar y sofitar. Nel tema del bable, pienso qu'usalu ye la meyor melecina pa que perviva y qu'esa ye la única base sólida sobre la que se tien d'encontar cualquier reivindicación llingüística. Hai que facer finca especialmente nel fomentu de la utilización de la llingua falada, pues un idioma que se fala y nun s'escribe ta vivu, pero si s'escribe y nun se fala ye un fósil llingüísticu. Asina qu'anímovos a que lu empleguéis ensin complexos, que nesti tema toos tenemos el nuestru granín d'areña qu'apurrir y toos son pernecesarios.

Total, y resumiendo, nun espero por novedá nenguna importante pa esti añu que ta picando a la puerta. Asturies ye anguaño un país embarbiáu nun réxime clientelar onde nunca nun pasa nada, onde too se repite, y onde lo novedoso o innovador tien que resalvar pilancos a embute. Francer esa tendencia lleva un trabayu descomanáu, pero nun queda otra que puxar por realizalu. Nel tema personal, siguiré tando colos mios llectores al traviés de les mios bitácores -El Xanu'l Caborniu, El Güeyu l'Agua y El Copilotu de Pinín- mientres el cuerpu y el maxín aguanten. Aprovecho pa davos les gracies a los que coles vuestres visites a elles m'afaláis pa siguir escribiendo nesti idioma prestosu y maltratáu d'esta arrogante y maltratada Asturies.

Espero qu'entrareis con bon pie l'añu celta nel mes de Payares. Y, si nun foi asina, a ver si con esta nueva entrada d'añu vos salen les coses meyor. Magar lo dicho nos párrafos anteriores, nun quixere despidime dexando una güelga de desánimu o derrotismu. Asina que tamién quiero recordar que mentes hai vida hai esperanza, como reza'l dichu. Y tovía queda vida nesta tierra de nuestro. Enagora queden caricós encesos que, quién sabe, quiciabes seyan daqué día a prender una foguera grande que nos permita enxareyanos nuna gran danza colectiva d'enfotu y futuru. Asina que, anque nel finxu'l cielu amenacen ñublones prietos, invítovos a siguir trepando y nun aflacar.

Asturies ambura

Dende va unos díes una folada d'incendios forestales espárdese per Asturies. Milenta focos de fueu qu'enagora nun foron a sofocase dafechu. Del monte a la marina nada se llibra. Viesques y cases afectaes. Y una desgracia humana que llamentar pente la xermandía qu'intenta matar les llames.

Buscar les causes d'esta estroza ye obligatorio. Y tenemos varies enxareyaes que puen dar como resultáu la llaceria que padecemos agora. Montes comunales que pasaron a l'alministración. Amenorgamientu de les competencies parroquiales. Abandonu de les viesques comíes pol rozu y la maleza. Mengua de medios a los servicios d'estinción. Llexislación que permite recalificar terrenos quemaos...

Y, miánica, el factor humanu. El dañu fechu por neglixencia o arrémente. Per agora nun detuvieron a nengún responsable. En pasando los díes veremos. Va ser la única manera de persaber les razones principales d'esta barbarie ecolóxica.

Tamién asocedió que, talo que si tuviéremos ciguaos, el tiempu nun ayudó migaya. Una seca grande en plenu iviernu y temperatures altes. Pa detrás, rabaseres d'airón qu'aviven los rescoldos y aceleren les llames. Too escontra na desgracia.

Nun sólo los incendios afectaron al nuestru país. Les comunidaes vecines norteñes tamién sufren incendios estos díes. Esperemos que tanto nel so casu como nel nuestru se llogren desanciar los fueos.

Asturies ambura. De paraísu natural a ermu quemáu en bien de sitios. Son les llaceries que tendremos que curar col pasu de los años nel nuestru somantu verde. Oxalá lo superemos y, en pasando'l tiempu, too quede nun recuerdu gafu y tarrecible.