La caldera de la sencia

 -A, Patriciu, ¿nun vendrás cola intención de furtiame daqué, hom?

-¡Ca!, Xanu, soi un sumiciu, pero tamién mitu seriu y fáigoles cuando les tengo que facer. Pero hoi nun toca, ho, que vengo esmolecíu buscando una caldera.

-¿Una caldera? ¿Dícesme qu'una caldera? ¡Rediósla, Patriciu, nun soi a entendete, chachu!

-A ver, Xanu, que nun ye una caldera cualquiera. Ye la de la sencia, que la curiaben allá de los tiempos nel templu d'El Milagru, per Cuadonga, y cuantayá que desapaeció y, claro, el beberaxu de la sencia sumióse con ella. Y como tengo esperiencia en sumir coses, voi ver si me val tamién p'atopar ésta...

Entós va Patriciu y echó mano a una fardela que trayía colgada en bandolera, sacó un papel, espurriólu y ponse él:

-Mira, Xanu, esti ye un dibuxu de Cuandonga nel sieglu dieciocho. Si te fixes na ventana d'arriba a la manzorga, hai una roldana y pinga d'ella un reyu que tien por una caldera que ta cabo ún de los tabayones. Pues esa ye la caldera de la sencia. Col agua d'ellí facíase un beberaxu que daba sencia a quien lu tomare. Pero como s'escabarrió la caldera amunchayá, pues la sencia tamién. ¡Y esi ye'l motivu de que la xente asturiano ande al aldu, amomiao, al debalu y ensin enterase de la misa la media!

-¡Arreniego los demonios!. Pero, magar apaeza la caldera y vayamos por agua a Cuadonga, ¡si nun tenemos la receta'l beberaxu poco podemos facer!

-Ehí ta l'aquello del asuntu, Xanu. Nun hai receta. Porque la sencia llévala l'agua y namás qu'apruz si se garra con esa caldera. Por eso ye perimportante atopala. Pa xaguar toa Asturies a calderaes y que la nuestra xente esconsoñe d'una vegada, ¡caso en tal! Que baxamos en barrena ensin xixa nin xacíu que lo torne y, dempués de tantu tiempu n'ayén, yá paecemos más una güestia penitenciando qu'un pueblu arrechu que sabe defendese y, per esi camín,  la nuestra tierra va acabar de mui mala manera...

-Agora sí que t'entiendo, Patriciu. Yá me paecía a min que les llaceries que pasen nesta Asturies de nuestro nun tienen manera razonable pa esplicales y talo paecen surrealistes dafechu.  Pero pa dar con ella va ser cosa de puru milagru. ¡Cualquiera sabe aú pue tar, si ye que ta ayuri...!

-Pues, Xanu, por eso ando yo pequí hoi. Porque esi sitiu onde ta ye per esta rodiada, na Viesca Dayuri. Cuntómelo un monxu vieyu d'aquellos llugares que-y aportare la ñoticia por tresmisión oral de la xente antiguo. Y yera mui de fiar. Dafechu.

-Entós habrá que la entamar aconceyando a la xente de confianza que vien per esta viesca pa qu'echen una gabita nesti llabor tan importante. Hai abondos llugares y requexos onde pue tar la caldera de la sencia y tenemos que nos esguedeyar pa buscala. Un país ensin sencia ye una marioneta remanada por intereses foriatos. Y eso ye lo que vien pasando cuantisimayá n'Asturies...

-Concretamente de magar desapaeció la caldera de la sencia hai yá bien de xeneraciones. Asina que toca ponese a buscar con enfotu y ensin descansu.

-Bono, Patriciu, pues voi tocar el turullu p'aconceyar a la xente amigo d'esta Viesca Dayuri, que toca entainar nesta xera tan importante. Vamos a ello...

                                                                              

                                                                               

Camín del Solsticiu de Branu

Vivimos nos díes con más lluz del añu. Y ello ye pola mor de que vamos camín del solsticiu de branu. Hoi vieno ceo a visitame la mio amiga la neanderthala Guoné. Tráxome una llebre yá esfoyada pa que faiga yo un guisu y xintar xuntos. Tovía me queda lo cabero del pelleyín de vinu y vamos aprovechalo echando unos cachos, que dempués avinagra y piérdese, cóime.

-Bono, Guoné, el solsticiu de branu ta ehí a la vuelta de la esquina como quien diz.

-Sí, Xanu, un resclavu qu'heredemos de les vieyes civilizaciònes que triaron el nuestru suelu.

-Yo esto de les vieyes civilizaciones nunca nun me cayó embaxo. Porque cuando una civilización sume, nun lo fai dafechu y de sutrucu. Siempre puen quedar ñicios, llixos, que trespasen al pelondín el tiempu y algamen mesmamente les dómines de gu.

-Pues sí. Y exemplos tenémoslos a embute. Basta con pescudar la mitoloxía qu'aportó a nós. Les tradiciones y vezos que se tresmitíen nos filandones cabo'l llar. Los solsticios. Tantes coses...

-Miániques que sí, Guoné. Arrepara na cigua, por exemplu. Cliques yá les tenemos representaes nel Pozu'l Ramu. Nes tradiciones populares, una manera d'oxar al demoniu de la casa ye qu'una muyer-y enseñe la fañagüeta. Y esi puñu que bien de xente lleva colgáu al pescuezu pudiere ser la representación d'una clica, precisamente, pa tornar el mal del güeyu. Da too ello pa pensar. Y les mazcaraes d'iviernu, con esos seres marutaos d'animales que yá vemos representaos nos tiempos prehistóricos o en cultures tribales qu'aportaron a los tiempos de nuestro...

-Y mira tu, Xanu, esi bixu cultural que ye'l corri-corri. Xente estudioso del nuestru folklor yá apuntó que pue ser daqué prehistórico, tribal. Pero, pa detrás, podemos arreparar nes pintures de Peñatú. Al llau del que llamen ídolu, hai unes figures humanes. Unes tán casi alliniaes y como caminando. Pero hai otra enfrente d'elles que lleva un cayáu y ta coles piernes y los brazos espurríos como blincando. Aseméyase bien a lo que vemos nesta danza. ¡Menuda coincidencia!. Y danza y pintures tán nun mesmu aruelu cultural d'antiguamente.

-Pues, falando de dances, ehí tenemos la nuestra, garraos en círculu, moviéndonos p'alantre y p'atrás y xirando. Tamién, ente los que s'averaron al estudiu d'ella, piensen que pudiere ser de dómines perantigües, una herencia de maneres de danzar de los nuestros antepasaos ástures. Yo va tiempu que lleí un llibru mui prestosu de folklor de María Xosefa Canellada. Ún de los prólogos cinca l'asuntu de vieyos escatafinos que pudieron pervivir nes sociedaes rurales asturianes. Y diz, nada más y nada menos, que pudiere restrexase nelles comportamientos de cuando les sociedaes yeren cazadores y recolectores. Y plantega que, guapamente, pudo haber una civilización que nos dexó xoyes como Altamira, na vecina Cantabria o'l Pindal, n'Asturies.

-Ten en cuenta, Xanu, que, mesmamente'l bierzu del reinu asturianu tien el so aquello. El llugar, cristianizáu, paez ser un llugar de cultu a la Diosa Deva. L'enterramientu de Pelayu y la so muyer Gaudiosa fixéronlu na ilesia de Santolaya d'Abamia, que taba al llau d'un túmulu dolménicu hoi desaniciáu. Dempués, a Favila, tamién lu enterraron nuna ilesia, la de la Santa Cruz, asitiada enriba d'otru túmulu dolménicu, que conserva  anguaño la so estructura menos la cobertoria. Y hai que sorrayar que la tierra d'esi túmulu considerábalo la xente como con propiedaes curatives hasta tiempos relativamente recientes.

-A too esto, tornando al tema de los solsticios, tenemos ehí la tradición de la foguera. Pescudar hasta qué tiempos remotos podemos recular  con esi ritu que conservamos actualmente venceyáu a la Nueche de San Xuan tien tamién la so migaya.

Y mientres siguíamos dándo-y a la parpayuela, entamé a tresnar el guisu de llebre, empicipiemos a remoyar los gargüelos con un cachu de vinu y punxímonos a naguar pensando na xinta que dábamos a meter pal butiellu...

                                                                         

Oficialidá, Estáu y Discursu Ñacional

Mañana ye 25 de Mayu. Y ye una fecha que rescampla na nuestra historia. Fecha heroica, mialma. Pues yo equí toi, a la entrada del caborniu, arrecostináu nel so tueru y tastiando un cachu de vinu cangués, que m'apurriere ayeri Pachín Boroña un pelleyín d'ello que me traxo d'aquelles tierres de nuestro.

 

Hoi tenemos un bon baturiciu per Uviéu y Xixón con desfiles militares per tierra, mar y aire. Un avisu pa ñavegantes qu'escaecieren qu'equí quedare too "atado y bien atado" al finar l'anterior réxime políticu.

La historia d'Asturies ye la d'un país a la busca del so Estáu ensin ser pa ello. Tuvimos el nuestru biltu col reinu asturianu. Hebo rebeliones ya intentos secesionistes con Félix Agelaci, Gonzalo Peláez, Urraca...Hebo una revolución nel 34 y un Conseyu Soberanu xunto con Llión mientres la Guerra Civil. Pero...

Y, per entemedies, ta la fecha que vamos celebrar. Cuando un 25 de Mayu de 1.808 la Xunta Xeneral proclamóse Xunta Suprema, declaró-y la guerra a Napoleón, creó'l so propiu exércitu y bandera, mandó embaxadores a inglaterra solicitando ayuda...Unes dómines heroiques daveres, miániques, y que presta remembrar con arguyu.

Tenemos estos díes entamáu un alderique sobre la oficialidá del asturianu y eonaviego. Nun va salir alantre, porque la ultradrecha heriede de la dictadura, que ta frayando les llingües propies ellí onde gobierna, nun va ponese a echar una gabita nesti asuntu n'Asturies. Eso pescáncialo hasta un rapacín.

Pero, magar un día se llograre esa oficialidá, ponese a echar ixuxús sedría andar escabarriaos. Porque la oficialidá abre puertes importantes pa la supervivencia d'un idioma pero, por sigo mesma, nun garantiza esa superviviencia. Arriendes d'ello, apórtenmos ñoticies esmolecedores d'otros países onde los sos idiomes llariegos son oficiales cuantisimayá. Va mal el gallego. Tienen problemes col catalán...

Y ello ye qu'un megollu de la cuestión, que manca al mencionalu, ta n'entruganos hasta qué puntu ye posible la supervivencia d'un idioma minoritariu, de cualquier país, que nun cuente con un Estáu propiu pa sofitala. Porque, vistes les coses a llargu plazu, a lo meyor el problema fondu ta ehí. Paga la pena plantegalo, anque fadie abondo, esgoncie enfotos posibilistes, y nos tiremos de calón nel fontán de lo utópico visto colos güeyos del presente que vivimos.

D'otru llau, tenemos n'Asturies un problema que yá resalvaron notros sitios. Ente nós hai un fuerte discursu ñacional español. Tamién hai un fuerte discursu sociopolíticu d'izquierdes. Pero nun hai un discursu ñacional asturianu. O meyor podría dicivos que sí lu hai, pero que se mueve n'aruelos perminoritarios y nun ye a algamar nin que lu asuman sectores importantes de la población. Y ensin esi discursu, que pertenez a la conciencia oxetiva d'asturianidá y non a la simple afectiva o suxetiva, va resultar casi un imposible sestaferiar un futuru amañosu de nuestro.

Pa detrás, tenemos la llaceria de qu'una parte de la nuestra historia ta remanada pol ñacionalismu español pa xustificase. Ye lo que denominamos "cuandonguismu". Yá persabemos que, como rezaba'l cantar, ensin alcordanza un pueblu nun tien futuru a la llarga. L'únicu camín posible p'afitar esi futuru propiu ye recuperar la nuestra historia robada inxertándola nel nuestru propiu descursu, pero non arrenunciar a  ella, como proponen teóricos asturianistes que, a lo que paez, nun saben de la misa la media.

 

Pues, mialma, tán diseñándonos el futuru xente con enfotos ayenos, amomiándonos con parafernalies d'españolismu alcanforáu y, políticamente, la mayoría de lo que s'entama ente nós acaba zarapicando nel mesmu erru de siempre, acabar al rau de les conseyes que nos sopelexen dende allalantrón.

 

Y esto ye lo que toi referviendo esta mañana mientres siento barrenar al picutorneru, sonar dalguna esquila alluendi y tastiando vinu del país. Facer el propiu camín. Llantar finxos propios. Tresnar el nuestru discursu ñacional. Pensar en términos d'Estáu, de país, de ñación, y non de provincia resignada y apostalgada.

 

Cambiar el bichi de llau na bolera de la historia y enfotanos n'iguar otru futuru perestremáu al que nos tán empobinando. O, como mínimo, tener la valentía y coraxe intelectuales y personales de plantegámoslo.

Que paséis un prestosu 25 de Mayu. Haxa salú.

                                                                                    

Vivimos nuna ximuestra...

Esti mes de Mayu paxarayu vieno con muga. Tal paez que la primavera de nuestro ye la que tien de ser, que según ta esto del clima ye una novedá. Esta mañana garré una foceta y púnxime a rozar un bardial que me taba comiendo un cachu del prau de la llende'l caborniu. Y taba nello cuando vi averase pel camín al trasgu Manfurada col so primu'l sumiciu Patriciu. Saludemonos, paré de facer el mio llabor y punxímonos a da-y un poco a la parpayuela.

-Arriendes de que siempre me presta vevos, ¿sabéis por qué me fuelga atopavos pequí?. Pues porque, como andáis maricando peles cases y tenéis les oreyes argutes, siempre me podéis informar de les coses que pasen perhí p'alantre -dixi yo.

-Pues sí, Xanu, nueves siempre hai per ende. Y la verdá que meyor que nun les hubiere, porque tal paecen un camberu de coses tarrecibles -contestóme Sumiciu.

 

-¡Mialma que ye verdá lo que comenta'l mio primu -permedió Manfurada-. Les coses van mal. Reculamos, cho...

 

-¡Arreniego los demonios!. Tal paez que caminamos pa un finxu'l cielu ñublu y nada prestosu, hom. Pero contái, contái -intereséme yo.

 

-Pues mira, Xanu, voi entamar xurando. Pero non yo. Ello ye que per Xixón axuntáronse un garrapiellu patriotes a facer una xura de bandera civil. Daba perceguera ver a paisanes vestíes de negro con mantiella a la cabeza, como acuantísimayá. Aquello paecía que reculáremos nel tiempu -comentó Patriciu-. Arribó un barcu guerra pal Musel tamién. Y yá sabes que pal branu vien l'aviación a sechar los ciellos xixoneses...

 

-Pero la cosa nun queda ehí -añadió Manfurada-. N'Uviéu, pela Ascensión nun hubo ganáu, pero sí desfile policial. Agora, pal venticinco de Mayu va haber desfile militar. Y, ¡ca!, tampoco nun van ser menos, que va tiempu tamién fixeron la so xura civil de bandera...

-Arriendes de too esto que te contamos tamién pasen coses que faen referver p'hacia ónde vamos -añadió Patriciu-. Verás, l'otru día fixeron un izáu de bandera nun institutu de Xixón, con presencia del exércitu...¡y brindando a asistir a representantes políticos de la ultradrecha!. Y tamos falando d'un centru d'enseñanza públicu...

-Home, yo en too esto que me tais contando veo un enfotu d'adoctrinamientu perbultable. Pero, claro, dempués, los mesmos farfantones qu'entamen estes coses glayen y esparabanen porque se dea asturianu y eonaviego como materies optatives na enseñanza. Y ven nello adoctrinamientos, nacionalismos tarrecibles, separatismos y lo que pinte -dixi yo-. Equí lo que paez bien nidio ye que tamos ante una ofensiva españolizante y casposa.

 

Quedemos un cachu en silenciu y entós Manfurada echando la mano al cazu como pensatible ponse él:

 

-Toi alcordándome agora d'una espirica que sintiere munchayá nuna casa per onde andaba yo maricando. Dicíen ellí qu'aquello de la llamada Transición política entamada a finales de los setenta del sieglu pasáu nun yera má una ximuestra. Que los pegoyos del antiguu réxime siguíen de pies. Y los heriedes d'él siguíen atechaos nes sos llurigues, entepolaos nel poder políticu, remanando los poderes económicos y financieros...Y viendo cómo van anguaño les coses, miániques, qu'igual llevaben la so parte de razón...

 

-Pues sí, recóime. Los aruelos reaccionarios yá nun se molesten en despistar gota'l so pensamientu anticonstitucional, les sos zunes d'empobinar pa un nacionalismu español qu'atufa a dictadura, a desaniciu de llingües y cultures, a tarazar cualquier avance social que s'algamare nes últimes décades. Y nesti panorama, a vegaes camiento qu'Asturies vien a representar un nuevu cuadonguismu y que nos quieren usar como bierzu pa esperimentar reconquistes de sociedaes d'otres dómines. Porque mayores truñonaes contra tolo asturiano y mayores intentos adoctrinadores nel españolismu más ranciu nun lo recuerdo yo en bien de tiempu -comentó Patriciu esmolecíu.

 

-Pues, chachos, atropando tolo que me tais contando toi aportando a la conclusión de que que vivimos nuna ximuestra, nuna democracia que quieren finxala como una simple comedia, un a representación y más nada -añadí yo-. Esto pinta mui feo. Tán tirando los calzones enriba de nuestro d'una manera descarada...

 

-Y yá nun te digo nada col papel que tán desendolcando los medios informativos -amestó Manfurada-. Manipulación, bilordios, llevantos, ocultación, maniobres descaraes d'empobinar a la población pel camín del recorte de drechos y llibertaes individuales y colectivos. ¡Menuda puxarra!. Pa informase con esa esllava val más sentase a sentir gorgolitar a los xilgueros. Polo menos presta y nun acabes engañáu dafechu. A too esto, esti añu'l martes de campu uvieín van facelu...¡ensin campu dalu!. El retorcigañamientu total. De traca.

 

-¡Rediósla!. ¡La vircha!. ¡Parái, parái, amigos, que ta quedándome la cabeza como un bote con tolo que me tais contando!. Vamos dexalo. Voi sacar unes de sidra y, mientres enfrescamos los gargüelos, vamos echar una rocada falando d'otres coses más prestoses, porque esto ye pa esmesar el pelo hasta pelar la cocorota -interrumpí entós yo-

Y saqué les botelluques, echemos unos culetinos y siguimos dándo-y al dengue tratando de falar de coses más melgueres, qu'esto ta poniéndose yá...

                                                                             

Tamién-yos molesten los vasos de sidra...

 Pues qu'empobinamos per Abril güeveril y la viesca yá esconsoñó e embute, magar les castañales tovía anden bociando y dalgún inxertu tarreciendo biltar.

Andaba yo esta mañana madreñando camín alantre, al debalu y namás que pa esansionar, cuando me crucé cola neanderthala Guoné arreblagada nel mamuth Atú.

-Qué tal, ne. ¿Pa ónde envereadáis?.

-Pues pa nenyures en concreto. Vasmos dar un paseín y, de pasu ver qué se pue dir pañando y cazando per estes dómines primaverales. Que yá sabes que yo de la caza y la recoleición, que ye la manera de vivir qu'heredé de los mios antepasaos, nun me poso.

Y, mialma que ye verdá lo que me dixo la mio amiga. Pero nun vos engañar. Magar lleva la  so vida paleolítica nesta Viesca Dayuri, ta enterada de la vida moderna dafechu, y tamién de los asocedíos qu'aprucen na nuestra sociedá, que pequí tol mundu conoz les anuncies que rulen per ende, pela villa. Asina que siguimos echando la nuestra rocada y falando de too un poco.

-Agora que te veo mangada nel to amigu mamuth vienme a l'alcordanza lo de AVE asturianu. Porque tal paez que monxures y xente llano anden enfotaos n'aportar al embeligru del reinu español como si nun hubiere más nada nel mundu a onde dir.

-Bono, Xanín del Alma, yo casi que lo veo al revés que tu. Figúraseme que anda'l personal naguando porque aporten como una lexón descomanda la xente de per ende p'acullá y qu'atarraquiten les nuestres costes y viesques pa empicorotianos asina como los reis de la masificación turística mundial.

-Tamién pudiere ser, tamién. Yo quedo que yá nun sé si reíme o llorar cuando pienso que va llegar un momentu onde va tardase lo mismo en dir de Xixón a Madrid en tren que facelo de Llaviana a Xixón.

Porque lo prioritario paez que ye salir h.ispiando pa la meseta o que nos venga p'acá xente como cuentu risa, pero tar bien comunicaos per tren ente nós, eso yá, pa otru día y tal -contesté yo.

-¡Qué tal xente!. ¡Bien que vos gusta da-y a la parpayuela!. Pues ehí voi yo a da-y tamién al dengue.

Quien nos falaba asina yera Don Quixote de Caravia, que se cozcare pa onde tábemos ensin que nos diéremos cuenta. Entós pòngome yo:

-Pues equí tábemos Guoné y yo cola espirica del AVE y les cercaníes ferroviaries asturianes, pero tu que vienes de la villa camiénto que pues apurrinos dalgunes ñoticies más...

-¡Meca!. Ñoticies hailes a embute. Claro que podemos entamar con daqué venceyao a esti mes que tamos. Ya anden per ende entamando feries d'Abril los magüetos de turnu, porque equí tolo que seya emponderar y promocionar lo de fuera entámase-yos bien a dellos. Y tamién ponen munchu remangu en fayar lo de casa, que nueves d'eso tamién hai.

-Cuenta, cuenta, Quixotín, que'l xanu y yo tamos con secañu de saber les coses que pinter perhí p'alantre -comento Guoné.

-Pues voi contavos tamién -dixo Don Quixote de Caravia- la última pascaxada que se-yos ocurrió a dellos cosmopaletos de Xixón. Pues ello ye que'l patronatu de deportes quier entamar una carrera popular y escurrieron apurri-yos a los participantes un vasu sidra como premiu. Pues resulta qu'hai xente protestando poque diz qu'eso ye afalar al consumu d'alcohol. Paez ser que nun cayeron na cuenta de que bien de veces regálase una copa y nun pasa nada. O hasta botelles de champán y too. Tampoco paez que nun cayeron na cuenta de que'l vasu sidra úsase pa beber más coses que d'alcohol nun lleven nada. Pero, nada, ellos a puñar contra tolo que se-yos presente com asturiano, que bona zuna que-y tienen...

-Bono -permedié yo-, lo que ta detrás d'esta mazcayada vo esplicávoslo yo. Tien dos causes que van xuncíes tirando del carru del so cosmopaletismu provincianu. D'un llau, la cultura asturiana nun ye la de so. Y si lo fue dacuando arrenunciaron a ella. Asina que la ven como daqué distante, ayeno, prescindible y sustituible. D'otru llau, confunden en tocín cola velocidá y quieren ser tán políticamente correutos que trespasen toles llendes de lo razonable y zarapiquen nel más ridículu papanatismu, garrulismu, na patochada discursiva y na indixencia mental.

-¡Arreniego los demonios!, sí que lleves razón, Xanu, -dixo Guoné-. Tatu procuru en turriar contra un simple vasu sidra y dempués nun gorguten coles feries d'Abril o con cualquier otra manifestación cultural foriata...Claro eso otro considérenlo representativo de lo español y entós, españolísimos que son ellos, venlo  bien y nun-yos molesta.

-A too esto -intervino Don Quixote-, tal paez que quieren camudar Asturies nel bierzu de les esencies patries españoles. Hai xures de bandera, desfiles militares, festivales aéreos, feries d'Abril, toros...Y, al empar, a torgar y frayar tolo propio de la nuestra cultura pa evita-yos competencies. A too esto, tamién va ser casualidá que faigan eses actividaes d'esa mena coincidiendo con una fecha histórica de nuestro como la del 25 de Mayu...

-Pues yá veis el panorama que tenemos delantre les ñarices. Ente unes coses y otres, enfilamos pela camín de ser un país dafechu a una provincia acomplexada. De curiar y puxar porque espoxigue lo nuestro a convertinos nun parque temáticu pa turistes estrozones y a ser la mapa del nacionalismu español más ranciu y alcanforáu -añadí yo.

 

Y asina siguimos charrando un bon cachu más hasta que-yos fixi'l brinde de dir enfrescar los  gargüelos con unos culetinos, porque na Viesca Dayuri los vasos de sidra préstenmos pola vida y usámoslos cuando cuadra'l facelo...    

                                                                          

                                                                       

Marzu nialarzu

De tolos seres que moramos na Viesca Dayuri'l más vieyu ye'l busgosu Potrosu. A lo llargo la so vida percorrió abondos llugares de nuestro hasta acabar nesta viesca. Vive allá pa la picorota'l monte, porque se siente más guarecíu na so vieyera. Diz él que ñació y crióse como llangreanu y conoz bien de coses d'esti conceyu. Tamién anda'l probe bien tronáu. Ta coxu desque, allá de los tiempos, un cazador furtivu-y aperrillare nuna pierna y tarabica sofitándose nun cayáu. Tien medio mochu un cuernu. Tuse y resolla cuando s'esfuerza y tien que poner procuru colo que come pa que nun-y pinte mal. Pero aguanta como un campeón y anda perhí moviéndose tovía pel monte y poniéndo-yos enagora trampes a los furtivos, que nun ye la primer vez nin va ser la última que pasa glayando dalgún d'ellos pol sapiazu que se metió al zarapicar con dalguna de les sos engataes.

Pues ello ye que taba yo esta mañana sentáu cabo'l caborniu poniendo unes canteses a unes madreñes cuando sintí tusir. Miré p'allá y vi a Potrosu sentáu nuna piedra descansando mientres me capiaba. Entós eche-y voz y averóse pa min resollando y echando les manes al renaz y ponse él:

 

-Qué tal, Xanu. Escurrí hoi venir a visitate pa echar una rocada contigo, que cuantayá que nun te veía. Pero cansé abondo pel camín, y pa detrás, empicipió a doleme'l renaz. Siempre sintí de rapacín a los mayores dicir que la vieyera ye mui mala, ¡y mialma qué razón teníen, rediós! Nun para ún de tener goteres.

Entós apurri-y un tayuelu pa que se sentare y tamién una escudiella con caldín de pita pa qu'entonare'l butiellu. Y dixi-y yo:

-Bono, Potrosín, pues como aportasti pequí voi aprovechar pa que me fales un pocoñín del conceyu llangreanu, que pa conocer los sitios de la nuestra tierra asturiana, poca xente ye más afayadiza que tu que te tienes movío per tolos requexos, hom.

 

-Pues mira, anuncies escrites del llugar yá tenemos de magar les dómines del rei asturianu Ordoño I. Fixo naquel entós delles donaciones y fala, por exemplu, d'una  en Santolaya, nel conceyu de Llangréu, onde yá había devoción por esta santa que foi patrona d'Asturies y tamién de la diócesis au sigue siéndolo anguaño. Hai quien asitia per estes tierres nel llugar d'Olalies, que nun ye otra cosa má Olaya, la derrota de Munuza cuando fuxía buscando la meseta tres la batalla de Cuadonga. Nel sieglu XI hubo un pleitu ente unos infanzones del llugar y el mesmu rei Alfonso VI, que lu acompañó'l Cid nello, porque donare'l conceyu al obispáu y ellos nun queríen, pero nun fueron pa tornar qu'asocediere. Por ello nel escudu llangreanu figuren la cruz de los ánxeles nun de los cuarteles y unos yelmos notru. Pero, cuando yo yera  guah.ucu tocóme vivir un fechu perimportante. Foi cuando-y concedieron a esti conceyu, la so carta puebla, allá pel añu de mil trescientos trenta y ocho. Daquella, como te dixi, yeren tierres del obispáu y apaecen mencionaos datos perinteresantes. Por exemplu, los montes, celleros, préstamos y yugueríes de Frieres, Amena, San Pedro de Vivallo, San Antonio de Riañu, Santolaya de la Puente d'Oturiellos, Barros, la Veiga de Ciañu, San Miguel de Lada, San Martino del rei Orellán, Santo Estevano de Ciañu, Santa María de Vimel...Y otru fechu que rescampla ye que tenemos anuncia de que los vecinos aconceyaben, a toque de turullu, na Puente d'Oturiellos o Turiellos pa escoyer xueces, alcaldes, tratar de los temes que-yos fincaben...y venía a aconceyar tamién con ellos dacuando, nesi llugar, el propiu Obispu o quien él mandare pa representalu. Esa puente, de seis güeyos y más de cien metros, considerada la mayor d'Asturies naquel entós, yera un llugar de pasu mui importante pa los que veníen dende la meseta, camín d'Uviéu o de la costa, como asina lo afitó nel so tiempu la propia Xunta Xeneral cuando mandó iguala. Una riada qu'esvió'l ríu nel sieglu XVII dexóla ensin función y sumióse col tiempu

 

-¡Arreniego del demoniu! -dixi yo interrumpiendo al mio amigu busgosu- yes como una enciclopedia andante, cho. Tiénesme ablucáu. 

-Ye que sabe más el busgosu por vieyu que por busgosu, imitando al dichu. Y que nun se m'escaeza una cosa más. Va unos años valtaron una casa nel actual barriu d'El Puente y apaeció una ventana perguapa d'otra casa que tien un dintel blasonáu coles armes de Bernaldo de Quirós, a los llaos una cruz y una aspa y, nes esquines, dos xarrones con flores.Vinieron a datalo y camienten que la edificación ye de los sieglos XIV o XV, lo que l'asitiaría nes domines de la carta puebla y la puente romana que te dixi enantes, puente que pudiere ser del sieglu II según dellos, pero tamién medieval, qu'eso de romano ye una denominación popular pa referise a pontes antigües de piedra y con arcos.Y lo de la cruz y l'aspa a los llaos del escudu coincide con otru dintel talláu con un otru escudu y estos dos elementos nel pueblu llangreanu de Pozobal, nesti casu l'aspa asemeya a dos güesos cruzaos. Desconozo a qué se debe esa coincidencia. Sobra que te diga qu'anguaño, esa ventana ta atarraquitada de maleza, col bistechu esgonciáu y ensin que nenguna autoridá ponga nin un rispiu d'interés en conservala.Y pa poner el ramu a la mio parrafada, voi dicite que'l topónimu Pozobal ta relacioáu con un sitiu onde, antiguamente, facíen trampes pa tornar a los llobos. Pero, Xanu, agora tócate a ti da-y a la parpayuela. Como nun soi pa moveme como notros tiempos, gustaríame que me contares cómo van les coses pela Viesca Dayuri, qu'hai bien de sitios onde yá tarrezo a embute empobinar p'allá.

 

-Pues pequí empobinamos, pali que pali, pa la primavera, como yá persabes tu, que pa eso yes busgosu. Emprimen a espertar los árboles, salen los brotos, guañen los nuevos, los más madrugadores yá floriaron. Y tamién ta l'aquello de que tamos en Marzu niarzu, y los páxaros igüen los ñeros pa poner los güevos y entamala a guariar.Yo hai un recitáu mui prestosu que fala del ciclu de les aves y que diz asina, atiendi: Marzu nialarzu, Abril güeveril, Mayu paxarayu, per San Xuan esnalarán, y per Santa Marina buscarán la vida. A too esto, qué prestoso y interesante diba ser qu'a los escolinos-yos deprendieren estes coses de la nuestra cultura popular, que desgraciadamente, tamos criando neños ayenos a la so cultura, a la so historia y a la so llingua.Y per esti camín, el futuru asturianu pinta mui prietu, miániques.

 

-Pues sí, Xanu, siguimos cayendo en barrena y ensin que s'acolumbre igua dala. Pero vamos charrar de coses más prestoses, qu'ehí tenemos la temporada de les espirches picando a la puerta...

 

-Picando a la puerta unes y otres yá entamaes. Una tradición prestosa a esgaya. Romper una pipa de sidra nuevo, pone-y un nome con clarión, orniala con lloréu, y acompañala con bien de coses pa forrar como conceyales, güevos cocíos, oricios, centollos, pinchos de tortiella, embutíos...y tola carrapotada que se nos pueda ocurrir. Y nun dedicase namás qu'a comer y beber, ¡ca! Hai qu'aprovechar tamién p'axuntase nun coriquín y cantales toes. Pa sintir gargoliar una tonada, p'armar una folixa prestosa, recóime. Que tamién, por desgracia, tán enxaretándose per ende espirches que de tales namás que tienen el nome, porque'l conteníu da pena y dolor. ¡Ah!, y ta bien encamentar a munchu que presume de sidreru que'l corazu d'una espircha ye la pipa de sidra nuevo, que por selo inda nun s'echa porque tien qu'acabar de facese na botella y non lo que yá ta embotellao d'otru añu pa escanciar. Que nesti tema ta la cosa bastante esmanganiyada, ¡caso en tal!

 

-Tienes tola razón, Xanu. Sacar a la lluz la nuestra historia, puxar poles nuestres tradiciones, emplegar la nuesta llingua...too ta cayendo en sucu baxeru. A vegaes, dame la impresión de que damos voces en castañéu de contino, que la xente asturiano tal paez afáyase guapamente viviendo n'ayén y aculturizao., Pero son les dómines abegoses que nos toquen vivir. Eso sí, de dase nada.

 

-Bono, Potrosu, pues como yá acabé d'encantesar estes madreñes, y a ti paez que te pintó bien el caldín de pita pa recuperar, voi acompañate un cachu pela sienda de vuelta a la to morada. Y, como nos queda de camín, vamos lleva-y unes floriquines a la Venus de La Riera nel so abellugu de la Fonte'l Güeyu, que l'antoxana de la primavera ye una época perafayadiza pa ello, recitámos-y un esconxuru pa que nos eche una gabita pa curiar la nuestra viesca, y aprovechamos pa descansar un pocoñín y enfrescar el gargüelu col agua fresquino qu'esquita ellí. Upa y vamos p'allá.

 

Y, d'esta manera, el mio amigu'l busgosu Potrosu y yo enfilemos monte alantre dándo-y a la parpayuela tan guapamente mientres esfrutábemos del remanecer de la primavera... 

                                                                                 

                                                                               

Pañando na cuerria

 Esta mañana presentóse escamplada y escucando'l solín. Tiempu afayadizu pa caleyar pel monte. Quedare va unos díes con Espi la Mariñana, el trasgu Manfurada y el so primu'l sumiciu Patriciu pa dir a una cuerria que la nuestra amiga tien nel castañéu pa pañar unes ambozaes. Asina que, cuando nos axuntémos, empobinemos p'allá a la xera.

-Munches fames quitaron les castañes nel so tiempu -dixi yo.

-Pues sí -contestóme Espi-. Notres dómines les castañes xugaben un papel bien importante na dieta de la xente y había toa una cultura alrodiu d'elles.

-Yo tovía m'alcuerdo del trepe que llevaven con elles en dalgunes cases onde viví -comentó Manfurada-. Teníen que rozar el castañéu, inxertar les castañales, demer, echar na cuerria, andar a la gueta...

-Y dempués -permedió Patriciu- comeles cocíes, amagostaes, en potaxe...

-Claro -intervini yo- y otra parte importante del asuntu yera la manera de conservales, porque nun se coyíen namás que pa consumir fresques. Asina que, nel mesmu monte, echábense a la cuerria, con oriciu y too, y tapábense con felechu pa qu'aguantaren pel iviernu. Tamién se poníen a mayucar, que yera otru sistema pa qu'aguantaren bien de tiempu.

-Anguaño tamién les meten nel conxelador de la nevera, pero yo esti sistema nun me cuaca gota. Cuando les saco pa comeles nun me saben igual que les mayucaes o les de la cuerria -puntualizó Espi.

-Una cosa que pasó coles castañes foi l'abandonu de los castañeos cuando entraron les patates, fabes y otros productos de les amériques -añadí yo-. Ñabos y castañes quedaron apostalgaos y, nel casu les castañes, hasta demonizaes. Dicíen que comeles yera como comer madera, refugábenles. Y los castañeos empicipiaron a quedar abandonaos.

-Pero mirái les vueltes que dan les coses -comentó Manfurada-, dende hai años diose un remanecer de la cultura gastronómica basada nes castañes y, arriendes de facer amagüestos, qu'eso nunca nun se perdió, recuperáronse los potaxes y yá se ve na hostelería ufiertalos con normalidá. 

-Claro que siguimos cola nuestra zuna d'abandonar lo nuestro. Porque, na temporada de les castañes, tenemos los nuestros supermercaos y comercios atarraqulitaos de les que nos traen de fuera, mientres que los nuestros castañeos siguen abandonaos, les castañes en suelu pa los xabalinos, y les cuerries esbarrumbando comíes pol morgazu -dixo Espi.

Y, mientres dábamos la parpayuela, díbamos pañando de la cuerria y enfonilando nes nuestres fardeles. Entós póngome yo:

Á, xente, toi pensando que, como entamemos col llabor bien ceo y tovía queda tiemu a embute, podíamos empobinar dempués pa la llende'l mio caborniu, saco yo unes de sidra y facemos un amagüestín, que ta la mañana pa escalecer con ello, mialma. Y tu Espi, yá tas tardando en echar una, ne, que si nun cantes a esto fálta-y daqué...

Entós la Mariñana, que nunca se fai de rogar cuando de cantar se trata, gargoliónos esta:

Yá nun puedo dir pa Sama,

que llevó la ponte'l ríu.

Hai una chalana nueva,

pásala, galán, comigo.

¡Ixuxú! ¡Echa un culetín, Xanín!

Tapémos entós otra vuelta col felechu los oricios qu'inda quedaben nel fondu la cuerria y enveredemos camín de la llende'l mio caborniu, mientres el picutorneru barrenaba ayuri, chiaba'l raitán, esnalaba allaribón el ferre, y el xuxuriar d'otros páxaros endolcaben la viesca colos sos sones prestosos acompañándonos...

                                                                             

Mazcaritos, comedies y bederres alloriaos

Al iviernu nunca lu comió'l llobu. Y esta vegada paez que, per agora, vieno un iviernu como los d'antaño. Y eso ye bono pa la ñatura. Y si ye bono pa ella, tamién lo ye pa los seres que vivimos nel somantu de so.

Hoi salí a dar una vuelta y atopéme con Xuan de la Borrina, la muyer barbuda y la perra llanuda, que per estes dómines tienen xera pelos nuestros montes, que posa la ñublina y siempre hai daquién esconxurando pa que-y echen una gabita. Asina que punxímonos a charrar de coses mundanes, que Xuan ta bien enteráu de lo qu'asocede per ende, porque-yos lo escucha a la xente qu'anda pastoriando pela viesca.

-Pues, amigu Xuan, tamos metanos l'iviernu y siéntense lloqueros perhí. Pero non namás que del ganáu, porque tamién tamos nes dómines de les mazcaraes y les comedies.

-Esautamente, Xanu. Yá salió'l Guirria de Ponga pa danos anuncia de la entrada del añu, besar a les moces y echar ceniza a los homes. Y anden caleyando bien de mazcaritos más, pidiendo tamién l'aguilandu, vezu prestosu per estes feches.

-Dicen que la memoria ye la intelixencia de los burros, asina que, como yo toi falando de memoria, de xuru que voi dexar mazcaritos en tinteru. Viénenme a l'alcordanza, asina de botavolén, mazcaraes que salen, de magar finales d'añu hasta l'antroxu. Arriendes del Guirria, aprucen los Reises, los Sidros cola comedia, los Mazcaritos d'Uviéu, Los Zamarrones, los de Rozaes, de San Xuan de Villapañada...Y más xente enfotao en recuperar unes tradiciones con abondu raigañu na nuestra tierra...

-Pues yo, Xanu, tuvi falando l'otru día col diablu d'una comedia, que son aruelos mui afayadizos pa solmenar a los monxures gobernantes y pa facer xirigoncia de los asocedíos cotidianos. Y cuntóme una cosa que m'afitó nel mio aquello de que vivimos nunos tiempos onde anda too tracamundiao y au cada vez tenemos gobernando a más pazguatos -permedió la muyer barbuda, mientres la perra llanuda lladraba mirándomos como sofitando lo que dicía ella.

-Pues cuenta, cuenta, ne, qu'ando secañosu de ñoticies -afaléla yo.

-Mira Xanín, ello ye que, como paez ser que nun hai problemes a magüeyu pa iguar, pues resulta qu'agora anden a la tema los mandones pa ver quien la tien más grande.

-¡Rediosla!. ¿Qué anden, enseñando perhí les mingues y les fañagüentes pa ver quien lo tien más vistoso, ne?. ¡Mialma qu'esa si que nun la vi venir! -contesté yo arremellando los güeyos como dos platos.

-¡Nomenón! -intervino entós Xuan echando una carcaxada, mientres la muyer barbuda y la perra llanunda s'arrollicaben tamién de la risa-. Lo que quier dicite la mio collacia nun ye cosa braguetera, sinón de banderes y mástiles. Verás, agora quieren imitar en Xixón lo que yá fixeren n'Uviéu y llantar una banderona descomanada nun mástil vien altu pa que la vean esventolexar dende bien lloñe.

-¡Ai, hom!. Ya cayí na cuenta. Otra banderona española pergrandísima pa encamentar a los que tríen la ciudá que nun tán n'Australia o Filipines, o en Marte o Xúpiter pa los más galácticos -respondí yo.

Entós la muyer barbuda carpió echando la mano al cazu, llevantó un deu y ponse ella:

-Yo camiento qu'esto de sopelexar banderones xigantesques per dayures amuesa abonda inseguridá y un complexu d'inferiorida en quien les pon. Necesiten afitase ante peligros imaxinarios que ven pingar perriba les sos identidaes nacionales y llevanten banderes xigantes como p'abellugase y defendese d'esos peligros.

-¡Arreniego los demonios!. ¡Cuántu bederre alloriáu abeya per esta Asturies!. ¡Cuántu tontorolo, bocayón, escerebráu y faltosu dafechu añera nes nuestres instituciones!. ¡Cuántu espantayu refalfiáu y con serrín na cabeza! ¡Rediósla, cho, menuda tropa! -esberridé yo echando les manes a la cabeza.

-¡Cóime, Xanu, van fichate pa echar una d'eses comedies onde solmenten con remangu a monxures y mandones!. Qu'eso y les moxigangues son l'antroxu verdá, y non los desfiles de modelos en que lu tienen camudáu va tiempu con aculturaciones de toa mena -comentó Xuan de la Borrina.

Entós, echando mano al zurrón y sacando una bota vinu, póngome yo:

-Bono, xente, equí traigo un vinu bien prestosu de Pezós. Asina que podéis amugar el gargüelu con él mientres caleyamos per ende y seguimos dándo-y a la parpayuela. 

Y asina pasemos la mañana, caminando, empinando'l coldu, esbillando les burraes que se-yos ocurren a los gobernantes, y esfrutando del monte nun día d'iviernu verdá, que pa espansionar de tantu despropósitu ye xera afayadiza y tamién presta abondo...

                                                                              

Ufriendes, regalos, engañifes y mazcaraes

Yá tenemos l'añu nuevu faciendo galanes. Y, como avezo a facer per estes dómines, voi llevar una ufrienda p'allalantrón, na llende de la Viesca Dayuri, a un vieyu dolmen conocíu como la Mesa Los Antiguos. Llevantéme abondo ceo, col riscar l'alba, encamenté a Masgallu que curiare bien el caborniu, y púnxime a esperar  por Espi la Mariñana y Lluis de Turiellos que quedaren en dir comigo. Metí en zurrón un ramu lloréu, unes ablanes y unes mayuques pa dexar allá. Bien llueu, aportaron los mios amigos. Saludémonos y echemos a andar.

-Bono, pues, arriendes d'estrenar añu, vamos camín d'unes feches bien prestoses, sobre too pa la rapacería. Yá anda per ende'l Príncipe Aliatar arrecoyendo les cartes de la reciella de casa p'apurrí-yosles a los Reis Magos d'Oriente. Claro que tamién pa los mayores nos puen cagar daqué...-dixo Lluis.

-Eso siempre y cuando se portaren bien pel añu, porque sinón puen dexar carbón y ceniza -comentó Espi.

-¡Meca!,  entós a min van cagame regalos abondo. Fui bonísimu esti añu que pasó -contesté-yos yo ensin aguantame a echar una carcaxada.

-Yo tovía m'alcuerdo de dalgunos  regalos de cuando yera rapacín -dixo Lluis-. El primeru que recuerdo foi un tambor de latón pintáu con escenes béliques alredor. Conservélu en casa bastantes años y taba perabolláu. Nun sé con qué pudi acutir aquel tambor pa dexalu d'aquella manera. Paecía que-y cayere enriba un elefante...Tamién recuerdo un castiellu de madera, con dos torres, una puerta encarnada y les ventanes pintaes como d'estilu góticu. Venía con soldaos con armadures y plumes  y caballos afataos. De la soldadesca nun conservo un res, pero'l castiellu ¡téngolu tovía!. Claro que cuando dexé una güelga fonda que sirvió siempre de chanza nos aruelos familiares ye cuando se me ocurrió pidir una escopeta y un páxaru pa matalu. ¡Y mirái qu'agora refugo abondo lo de la caza, rediola!. ¡Qué ocurrencies tenemos de rapacinos!.

-Pues yo cuando falo de regalos siempre me bien un refocilu a la cabeza con aquella engañifa que nos soltaben y que siempre acababa de mala manera. Cuando daquién diba fuera, pedíes-y un regalu y contestábente aquello de que te diben trayer un curriverás con cascabelinos atrás. Cuando tornaben, el dichosu curriverás enxamás aprucía. Hasta que dibes creciendo y decatándote de qu'aquello yera pura comedia -comentó Espi.

Entós Lluis, ximielgó la cabeza como ñegando y ponse él:

-Agora qu'Espi menciona lo de les engañifes pa colos rapacinos, alcuérdome d'una que me tuvo aforfugáu y apolmonáu una temporada cuando neñu. Ello ye que diba yo con mio ma y un paisanu miróme entientes y sentenció mui seriu: ¡Tu fuisti'l que-y robó les ferradures al perru'l cura!. Y, ¡recóime!, que menudu axorizu que llevé cola acusación, que yá veía yo venir a prindame pol asuntu, hasta que, claro, fui cayendo en que los perros nun tienen ferradures...

Y charrando amigablemente aportemos hasta'l dolmen de La Mesa Los Antiguos. Posé ellí la mio ufrienda, fiximos renombranza de los antepasaos que yá nun tán con nós. Paremos un cachu pa descansar, picar daqué  y amugar el gargüelu, y tornemos pa casa llueu, nun fuere a echásenos la nueche encima. Y ello foi que, cuando tábemos cerca de la llende'l mio caborniu, sentimos sonar unos campanos y atopemos a Sidru'l Guirriu.

-¡Cóime, Sidru, camiento que tarás bien en forma pa estes feches!. Que tamos en tiempu de guirrios, comedies, agilandos y mazcaraes de toa mena -dixi yo.

-Pues sí -contestóme Sidru mientres nos apurría la garapiña qu'arrecendía bien prestosa-, tamos somorguiaos nes mazcaraes d'iviernu y los guirrios y les comedies tenemos muncha xera per delantre...

-Pues si d'echar comedies se trata, l'añu que coló tuvo asocedíos a embute pa comentar, mialma, -comentó Espi. 

Siguimos el nuestru camín, Lluis, Espi y yo andando y Sidru'l Guirriu blincando hasta qu'aportémos a la llende'l mio caborniu. Y yá díbamos a despidinos cuando sentimos xuxuriar a un raitán na picorota d'un abeduriu. Y entós va Espi y ponse ella:

-¿Qué ye, que nun echáis en falta nada antes de  despidinos, hom?.

 

-¡Meca, sí, ne! -respondí yo-. ¡Falta que nos eches una!.

 

Y entós la nuestra amiga la Mariñana gargoliónos, cola so voz prestosa, aquella de:

 

"Si quieres que vaya a vete

echa al to perru cadena, eueee,

que me lladra cuando vengo

a cortexate, morena, eueee"

¡Ixuxú!. ¡Viva la Viesca Dayuri! 

                                                                                 

                                                              

La risotada del llondru

Entróme'l rixu esta mañana de dir a sentame cabo'l ríu. Asina qu'empobiné p'allá. Per estes dómines los caminos de la viesca cúbrense de fueyes y los árboles formen un cuadru con una pintalarrama de colores prestosos a embute. Mialma que la seronda ye una estación guapa verdá. Pues taba yo ellí, al llau del ríu estelándome cola ñatura, cuando vi que daqué baxaba pel agua. Yera'l madreñoxiru de Pinín que venía ñavegando. Cuando s'acercó más comprobé que, nesta ocasión, nun venía'l guah.e acompañáu del Gaviotu, que suel ser lo más corriente cuando nun vien solu. La so compañía yera Lluis de Turiellos, cola so montera y guedeyes asomando so ella. Saludémonos y entamemos a da-y a la parpayuela.

-¡Qué tal, chachos!. ¿Pa ónde enveredáis ríu abaxo?.

-Pues equí vengo con Lluis, Xanu, qu'anda envizcáu en ver a dalgún llondru pa sentir la so risotada. Mira qué venaes-y dan al nuestru amigu de montera, palu y madreñes -comentó Pinín.

-¿Y entós, Lluis?. ¿A qué se debe esi aquello que t'entró, hom? -entrugué yo.

Entós el nuestru amigu, alendó fondo, apretó los llabios, xubió les ceyes, y ponse él:

-Pues quiero ver y sentir reíse a un llondru pa espansionar y nun acabar alloriando dafechu colo que ta pasande per esti mundu alantre. Porque la cosa ta como pa montar nel madreñoxiru y colar pa otra galasia, si fuere posible.

-¡Cóime!. Pues cuenta, cuenta, ho. Que tengo pruyiciu por ver que ye lo que t'afala tanto -contesté-y yo.

-Pues verás, Xanu. Hai una entamada nesti Estáu onde tamos inxertaos de meter mieu. Formaron gobiernu nuevu un garrapiellu de fuerces polítiques. Ún de los puntos de los alcuerdos algamaos foi enxaretar una amnistía pa tratar d'empicipiar a iguar el problema catalán. Y, claro, a los ultres de la drecha y del ñacionalismu español escluyente viéno-yos la cuestión como aniellu al deu. Manifiéstense de contino, glayen conseñes a favor de la dictadura, rispen por un güelpe d'estáu, piden sopla-yos tiros a los contrarios...Tou un despropósitu, emburriáu tamién por unos medios informativos manipuladores y que dan noxu y vergoña. Y, pa rematala, el propiu rei, cuando'l presidente garró'l cargu, aprució con cara enfurruñada, amosando que nun-y gusta gota'l gobiernu formáu, dexando pa prau la so supuesta imparcialidá y asitiándose del llau ranciu ya involucionista.

-¡Rediosla!. ¡Pues menuda la qu'hai entamanada perhí p'alantre! -plasméme yo col relatu.

-Por suerte -dixo Lluis- tol xaréu ta concentráu per Madrid. Pero, como tal paez qu'esa autonomía ye l'equivalente a la España en xunto, da la impresión de qu'en tolos llaos los xareos son iguales. Pero, ñon. Por suerte notros sitios, como n'Asturies, manifestaciones hailes, pero ensin algamar les barbaridaes de la capital del reinu. Pero perhí alantre pasen tamién coses pertarrecibles. L'Estáu d'Israel ta masacrando a la población palestina de Gaza. Bombardea hospitales, cases y lo que cuadre. Unes barbaridaes que faen resfregar los güeyos pa creyeles. Y la comunidá internacional alcagüetando eses actuaciones. ¡Menudu mundu en que vivimos, Xanu!. Esto ye una llocura.

Entós Pinín, que taba en silenciu escuchándonos, arrascó la cabeza so la boina y ponse él:

-¡Coyona!. Pues acabo d'entender por qué Lluis aneciaba tanto en sentir la risotada d'un llondru. Ye una manera d'entrar notru mundu, d'escaecer tanta llaceria y de ver y sentir a un animal que figúraseme que ye ta más cepilláu que nós los humanos. ¡Ah!. Y tamién sentí dayures que la risa tien daqué de revolucionario, de francidor de la fosquedá. Y, pal casu concretu del andanciu facista que ta anubriendo esti Estáu, igual ye bona melecina p'alendar y garrar fuelgu. ¡Pero mirái, mirái!. ¡Un llondru!. ¡Ta adicando pa nosotros y echando risotaes!. 

Pues sí, lo que dicía Pinín yera cierto. Un llondru taba agüeyando pa nós enriba una piedra y gargoliando eses carcaxaes propies d'él. Dempués tiróse de calón al agua y sumióse somorguiando.

-Bono, Xanu, agora vamos montar en madreñoxiru y dir volando pa Paxumal a visitar a los mios tíos Telva y Pinón, que quedé con ellos l'otru día -dixo'l rapaz.

-Y vamos ponenos cola mayanza cabera. Que yá pañaron les mazanes más serondes d'esti añu. Y, de pasu, echar unos paparaos de sidra'l duernu pa rellambé los focicos -amestó Lluis.

-Paezme estupenda la xera que vai facer, hom. Pero teo que vos encamentar que tengáis cuidáu con nun embutiellar muncha sidra'l duernu, nun vayáis a escagalurciavos toos...-díxi-yos yo.

Asina que, como asonsañando al llondru qu'acabábamos de ver, Pinín y Lluis echaron una risotada, montaron nel madreñoxiru y alloñáronse per allarribón. Y yo quedé a la vera'l ríu pensatible cola espirica de Lluis y mirando pal agua pa ver si aprucía otra vuelta'l llondru p'allegráme la mañana con dalguna risotada más de les suyes...

                                                                                

L'aire les castañes

 Paez qu'entró la seronda...per agora. Dempués d'un tiempu braniegu fuera d'época que frayó árboles, escosó fontes y dexó la tierra seco y duro, paez qu'esti clima alloquecíu que padecemos diomos una tregua. Asina qu'enfrescó y llovió, que falta facía. Y aportó pela Viesca Dayuri l'aire les castañes, que valta oricios y fai que la rebusca pueda ser provechosa. Magar esti añu figúraseme que la gueta va ser probe. Cayeron oricios antes de tiempu. Dellos coles castañes inda ensin madurecer. Otros, con elles dientro esturniaes por falta d'agua...

Tamién dicen que l'aire les castañes alloria a la xente. Y, miániques que debe ser verdá, porque yo, cuando sopla, viénenme a la tiesta les ocurrencies más rares que tengo. El casu ye qu'esta mañana aprució pequí Don Quixote de Caravia. Sentémonos cabo'l caborniu, saqué unes castañes amagostaes pa espellicar y sidra'l duernu pa pimplar y punxímonos a da-y a la parpayuela.

-Bono, Quixotín, ¿qué te trai gu per esta viesca, ho?.

-Pues que, como sopló l'aire les castañes, paecióme un bon momentu pa ver si paño daqué. Amás, avérense la Nueche d'Ánimes y el Día de Tolosantos que, arriendes de facer alcordanza de los que yá nun tán con nós, son feches con bayura de tradiciones que paga la pena conservar y participar d'elles. Yo siempre afuraco una calabaza y préndo-y dientro una vela p'allumar el camín a los difuntos que tornen a los sos llares. Y col atapecer de la Nueche d'Ánimes faigo un amagüestu y déxo-yos una ambozada d'elles con sidra'l duernu pa que les tastien y remueyen los gargüelos. Asina qu'hoi voi ver si gueto daqué, anque esti añu la cosa pinta fea.

-¡Sí, hom!. Daqué sí que vas guetar de xuro. Y yá que menciones estes feches de difuntos que s'acerquen, hai que facer finca en tener cuidao pela nueche. Porque tola xente que-y gusta andar de candonga y corrigüela cola escuridá convién que nun-yos caiga embaxo que per estes dómines anda la Güestia de remandela per dayures. Y atopase con ella ye bien tarrecible y pue trayer consecuencies bien gafes...

-¡Yá lo sé, Xanu, yá lo sé!. Pero descuida, que yo nun me prinda la Güestia por andar de pandorga nocturna. Eso pa los gatos, los bohemios y les curuxes. Yo pela nueche na camina bien enropielláu escaleciendo y alón.

-Pues tornando a lo de la gueta, sigue siendo vezu que, los que prefieren mercales qu'andar a elles, van atopales de fuera de les nuestres llendes. Porque equí sigue la xente dexándoles apodrigañando en monte o pa los xabalinos. Bono, por consolanos, tamién puen valir pa que focen los nuestros gochos d'oreya llarga, que de llandes y castañes tamién se fartuquen. Y dempués dan una carne sano y que ye un manxar...

-Sí, Xanu. Dexando de llau los de los gochos, la vedá ye que cuéstanos trabayu encetar el sacar rendimientu a lo nuestro. Tal paez que les dómines onde l'Estáu yera'l gran creador d'emplegu nel nuestu país valumben abondo entá, y tovía hai quien piensa que van venir d'allalantrón a sacanos les castañes del fueu, nunca meyor dicho. Somos un pueblu mui poco entamador. Y, al empar, mui de naguar polo que vien de fuera y de despreciá lo llariego. Zunes perafitaes ente nós y que cuesta un trabayu descomanáu dir esborriando de la nuestra sociedá.

-Claro, Don Quixote, claro. Mira, nesti mundu hai pueblos qu'esbrexen y s'esguedeyen por conservar lo de so y otros que lo refuguen. Y nel casu asturianu, llamentablemente, tamos nesti segundu exemplu. Va unos díes que celebreron eses xornaes de la pleitesía y vasallexe que tolos años per Ochobre entamen pequí. Dígote, falando de papu sanu, que siento una vergoña perfonda cuado m'entero del nivel descomanáu d'humildación, complexu d'inferioridá y vocación de llambeculos que tien una parte de la nuestra sociedá asturiana. Y, si daquién piensa que vamos empobinar ayuri per esi camín, que lo vaya esceciendo. Pal únicu sitiu onde podemos dir ye pal precipiciu. La xera qu'hai qu'entamanar ye la contraria, facer país con proyeutos de nuestro, enfotanos en llabores propios, y sapiar de la nuestra tierra los montaxes de los monxures y porgüeyos de per ende p'acullá.

-Sí, Xanu. Yo, cuando llega esi eventu principescu, procuro aislame de tolos medios informativos cosmopaletos, porque pónente la cabeza como un bote coles sos espiriques bixorderes y alcanforaes. Tal paez que, per unos díes, tornamos al pelondín pa la Edá Media.

-Pues bono, Quixotín. Vamos dar bona cuenta d'estes castañines y esta sidra y dempués voi acompañate a dar una vuelta pelos castañeos per ende pa ver si guetamos daqué curioso, que yo tamién toi escosando la mio goxa de castañes y necesito dir por más.

-¡Venga!. Pues a ello, Xanu, pues a ello...

                                                                     

                                                                             

Tresalez la seronda

Qué guapa ye la seronda

cuando vien bona collecha,

pa pañar nes pumaraes

y dir pal monte a la gueta.

¡Ixuxú!. ¡Yá tresalez la seronda!.

 

Cuando sientes cantar, rinflar y gritar ye qu'anda pela viesca Dayuri Espi la Mariñana. Y cuando sientes madreñar y ves asomar perriba los bardiales el picu d'una montera, ye que caleya pequí Lluis de Turiellos.

 

-¡Ayó!. ¿Pa ónde  caminais, ho?. 

-¡Qué tal, Xanu!. Pues pequí ando yo gargoliando y rinflando, pa nun perder la costume.

-¡Hola, cho!. Pues, como fai un día soleyeru, garre'l palancu y salí a espansionar pel monte.

-Veo que apruciestis los dos a la puerta la seronda...

-¡Yo muncho me presta la seronda. Yá dende rapacín. Los colores conque se viste la viesca per estes dómines son inigualables. Toa una pintalarrama de matices. Prestosísimo pa ver y pa zampuxase nello -dixo Lluis.

-Y yo, como teo un castañéu p'allá arriba, préstame ver cómo van quedando los oricios pa ver si pue haber bona gueta -puntualizó Espi.

-Pues sí. Empobinamos pa coyer la collecha. Y yo hai dos coses que rescamplen pal mio gustu. Una ye la pañada nes pumaraes, el mayar, tastiar la sidra'l duernu, y meter el zusmiu nes pipes pa que vaya tresnado la sidra. La  otra, andar a la gueta pel monte. Facer amagüestos, o cocer potaes de castañes, iguar potaxes...¡Préstame pola vida, cóime! -comenté yo.

-¿Y nun nos entrugues por nada de lo que pinta pela villa, hom? -díxome Lluis chisgándome un güeyu.

-¡La vircha, claro! -contesté-y yo.

-Pues mirái, voi entamar yo -permedió Espi-. Pues ello ye qu'enagora nun s'apagaron los rescaldos de la espantayada del arzobispu nel Día d'Asturies. Esti señor, aprovecha la pedricazaña que da en Cuadonga pa turriar escontra too y toos. Pero dende un asitiamientu  ranciu y ultramontanu. 

 

-Claro. Y como Barbón anecia en dir a esa pedricazaña como representante institucional, pues déxanos a toos humildaos a los pies del ensontanáu esi. Y, pa rematala, lo que rescampla per dayuri d'esi día ye esto que comentamos, porque acaba atapeciendo a tolo demás -añadió Lluis.

 

-Esto que pasa n'Asturies ye digno d'estudiu -comenté yo-. Pámidea nun hai nenguna autonomía que, al celebrar el so día, pase lo d'equí. Y destacar a los güeyos de tol mundu como la risión autonómica nun ye nada bono, miániques.

 

-Otru fechu que ta amechando estos díes ye lo de poder espresase nes llingües estatales non castellanes nel Congresu. Pal catalán, eusquera y gallegu van pone-yos traductores. Pa les que nun son oficiales, como l'asturianu o l'aragonés, lo qu'intervengan van tener que gastar parte del so tiempu n'autotraducise, lo que fai que tengan menos tiempu d'intervención y, polo tanto, una discriminación clara -dixo Lluis.

 

-Y güeyu que, nesti casu caberu, el que nun seyan oficiales ye una sida que lleva una xigomencia. Porque, si quixeren, podríen axeitar el reglamentu de manera que funcionare como les llingües oficiales -puntualizó Espi-. Bono y casi sobra dicivos que pa  la drecha  españolísima too esto d'usar otru idioma que nun seya'l castellanu nun son má caxigalines y pasen d'ello dafechu.

 

Quedé  yo empapirotiáu colo que me taben contando Espi y Lluis. Y referviendo sobre ello, póngome yo:

 

-Usar idiomes minoritarios como'l nuestru nes instituciones da-yos reblanea. Como usalos nos medios d'información, nos centros educativos y la universidá...Y toi atalantando yo que diba ser un tanto aquello sentir falar n'asturianu nel Congreru y nun lo facer na Xunta Xeneral o nos ayuntamientos de nuestro. Barrer la nuestra corrada sedría prioritario. Pero yo en too esto que se cuez na nuestra tierra alrodiu del asturianu veo munchu posturéu y colleches mui ruines, por dicilo asina, yá que vien la seronda.

 

-Y el finxu central hai que lu tener siempre presente, que ye la fala na cai, nel trabayu, nel mercáu...en tolos sitios au desendolcamos la nuestra vida cotidiana. Ehí ye onde, a la postre, va decidise'l futuru del idioma. Y dígo esto porque davezu asocede que los discursos reivindicativos céntrense nes picorotes sociales, pero la base, los aruelos de los falantes, queden apostalgaos -dixo Espi.

 

-Estos díes pasó otru fechu que sirve pa exemplificar guapamente'l desastre qu'acute a l'Asturies d'anguaño -comentó Lluis-. Ello ye que'l gobiernín nun quier competencies ferroviaries. Nada nuevo, siempre fueron los nuestros gobiernos roceanos p'asumir competencies. Yá se sabe, si nun faes nada nunca nun t'equivoques. Y resulta que Renfe quitó trayectos col perxuiciu bultable pa los usuarios. Entós el nuestru gobiernu dixo que nun podía facer nada, porque ¡nun tenía competencies!. ¡Nun me digáis que nun ye pa espeyalo nuna película de risa!. ¡Por favor!.

-Bono. Pues calienta un poco yá'l solín y figúraseme que ye un momentu afayadizu pa tomar unos culetinos so aquel carbayu, ¿qué vos paez? - brindé yo a Espi y Lluis.

Sobra dicivos que-yos prestó pola vida la propuesta. Asina que punxímonos a ello mientres siguíamos charrando y esfrutando d'esta mañana tán prestosa...

                                                                                

Patochaes, abellugos y perles cultivaes...

Cuando Agostu da les boquiaes, tal paez que'l Ñuberu y Xuan de la Borrina vinieren de les vacaciones. Porque, dempués d'aguantar una seca descomanada y temperatures pa derritir l'untu, enfrescó y púnxose a echar agua.

Pero hoi tuvi una visita que me presto pola vida. Vinieron a veme Pinin y el Gaviotu, montaos nel madreñoxiru. Y el playu tráxome una paxa con cosuques de la mar y ente elles...¡ostres!.

-Bono, chachos, ¿qué tal van les coses pel mundu alantre, ho?.

-¡Meca, Xanu! -dixo Pinín-. Pel mundu alantre tenemos na nuestra casa una invasión turística de meter mieu. Allá pela montaña yá nun hai xente faciendo senderismu. Ye una lexón qu'anubre tolos requexos del país. Y cuando la ñatura s'enllena de xente, malo. La estroza ta asegurada.

-Pues pa la mariña otro tanto, maninos. Con esti riqui-raque de que somos un abellugu climáticu la xente h.ispia p'acá pa nun s'afogar de calor perhí abaxo. Y eso que na nuestra tierra tamién calca'l sol a embute y la seca amagüestalo too -comentó'l Gaviotu.

-Díxome apocayá un paxarín que nun para de perdese la xente. Los rescates que tienen de facer d'escursionistes escabarriaos mete mieu. Claro, el personal piensa que tán nun parque temáticu y dempués pasa lo que pasa -añadí yo.

-Hai una cosa que me fadia a embute -dixo'l Gaviotu-. Cualisquier persona que quiera mariscar pelos pedreros tien que tener la so correspondiente llicencia. Asina que si baxes p'allá a escarabicar y nun la tienes, puen llantate una multa si te pillen. Pero pel branu esto cambia pa la turistada. Enfilen pa los xigales families enteres armaos de redes, calderos, coses pa fustacar...y dedíquense a tratar de pañar o a molestar a tou bichu viviente que viva pellí. Y, por supuesto, nun pasa nada, ¡ca!, qu'al turismu hai que lu mimar, hom...

-Y otra cosa que yá da perceguera de lo repetitiva y cargante ye los de los récor. Que si récor de visites, d'agospios, de lo que seya. Venga batir récor darréu. A esi pasu, va aportar el momentu en que tengamos qu'andar engolaos unos enriba d'otros, rediosla -comentó Pinín-. Nun vamos coyer toos...

-Pues cambiando d'espirica, equí traigo hoi una paxa con ostres del Eo  pa rellamber un poco los focicos. ¡Y almeyor facémonos ricos y too!. ¡Como vengan atarraquitaes de perles...! -dixo'l Gaviotu arremellando los güeyos y echando una risotada.

-Ñon. Nun vos preocupar -añadió Pinín-. Equí, n'Asturies, les úniques perles que tenemos son eses cultivaes que suelten personaxes de toa mena y medios informativos de toa frasca. Porque lo qu'hai que sentir y lleer tolos díes...Hai una cosa que yá va más allá del ridículu. Ello ye que, cada vegada qu'un personaxe de per allalantrón ye ñoticia, yá s'arreglen los periódicos p'atopa-y dalguna vinculación con Asturies. El garrulismu que nos arrodia ye de traca.

 

-¡Arreniego los demonios! -dixi yo empobinando pal barcal de la fonte-. ¡Vamos dexanos de perles empalagoses y a esfrutar un poco, cóime!. Veníi p'acá coles ostres y asitiáivos onde vos afayéis,  que yo voi trayer unes botelluques de sidra pa dar remoyar los gargüelos...

 

Y de lo que pasó dempués nun necesito dicivos nada, que ya lo podéis imaxinar de sobra...

 

Mayu paxarayu

 "Marzu nialarzu, Abril güeveril, Mayu paxarayu, per San Xuan esnalarán, y per Santa Marina buscarán la vida".

Pues sí, yá tamos en Mayu paxarayu. Y tal paez que La Vieya afaló al Ñuberu y a Xuan de la Borrina a trabayar, trayendo la muga y l'agua, que yá yera hora y falta facíen.

Nun sé si vos comenté ayuri que'l mio amigu, el trasgu Manfurada, cuando anda aburríu, dedícase a pasar con una mano granos de semiente pel furacu de la otra. Pues d'esta traza taba hoi nun requexu del camín.

-¡Cóime, Manfuradina!. ¿Xugando al baloncestu con semiente, ho?.

-¡Qué tal, Xanu!. Pues pequí ando matando'l tiempu.

-¿Per ónde aduviesti esta temporada, hom?.

-Pues dediquéme a facer trastaes pela morada de Lluis de Turiellos. Pero voi dexalu un poco en paz, que bastantina tien el probe con agüeyar pa tantes llaceries qu'acuten esta tierra de nuestro.

-Pues va vaga-y esta temporada. Porque empicipió la campaña electoral y van ponemos la cabeza como un bote tirios y troyanos.

-Bono, a min ñon. Y a Lluis de Turiellos pámique tampoco. Porque tenemos una solución pa tornar a los charranes electorales.

-¡Adepuxa, cuenta, cuenta, Manfuradina, qu'igual m'interesa a min esi remediu!.

-Pues veras, la cosa ye mui cenciella. Yá sabes que la mayoría de les fuerces polítiques, unes refuguen direutamente l'asturianu y otres dicen defendelu y tar pola oficialidá, pero a la hora la verdá, cuando lu habríen d'usar,  apliquen aquello de "habla tu en asturiano, que a mi me da la risa". Asina que dedíquense, unos y otros a sopelexar mensaxes electorales namás qu'en castellanu como cuentu risa. Entós nosotros, mientres esta campaña, namás que vaos a ser pa entender los mensaxes que vengan n'asturianu, y pa los otros, tenemos una amnesia llingüística tremenda.

-¡Ai, hom!. ¿Pues sabes qué te digo?. Que a estes altures de la historia, nun usar con ñormalidá l'asturianu, y concretamente nuna campaña eleutoral, ye una clamorosa y rescamplante falta de respetu. Sí, miániques. Una falta descomanada de respetu pa cola xente asturianu falante, incluyendo tamién a los que falen davezu n'amestáu, que bien d'asturianu inclúi tamién, mialma. Asina que yo tamién voi faceme amnésicu pa con cualisquier mensaxe que nun venga nel nuesu idioma.

-Pues sí, Xanu. Porque esa xente, en realidá, piensa que l'asturianu ye un idioma menor, poco importante, que, como la mayoría de los sos falantes son quien a entender el castellanu, pues fálen-yos nesti idioma, y el de so que lu usen en casina y que nun fadien con él.

 

-Esáutamente. Dedíquense namás que a facer un paripé, una comedia. Notros llugares del Estáu, esos mesmos partíos usen con total ñormalidá les sos llingües llariegues. Pero equí ñon. Porque, en realidá, equí nun creen nello. Y toa esa carrapotada xente que s'enfota nellos tán echándo-yos una gabita nel so paripé falsu y fuin. Allá ellos cola so conciencia.

 

-Claro, Manfurada, claro. Esi movimientu social en favor del asturianu acoxa d'un tema básicu, fundamental y que, ensin él, tola reivindicación llingüítica namás que pue acabar ente dolco y la media manga. A esi movimientu social fálta-y un sofitu fundamental, que ye tener una fuerza política perpotente asitiada nes instituciones, qu'use davezu l'asturianu ensin dase, y que tenga la oficialidá d'esti idioma como una de les exes centrales de la so política asturiana y ñon como un llaveru d'adornu pa colgar del pantalón porque queda mui progre, que ye lo que faen agora.

 

-Ehí ta'l megollu la cuestión. La mayoría dafechu de la xente que reivindica un futuru pal nuestru idioma, son cotrarios a enxaretar fuerces polítiques propies, y anecien una y otra vuelta, en querer qu'eses otres fuerces foriates con sucursales ente nós, que reivindiquen l'asturianu ensin enfotase un res nello, seyan les que tiren p'alantre cola reivindicación llingüística. Y eso ye como querer que suene una campana ensin mayuelu. Nun lo va facer. 

-Pues asina tamos, Xanu. Cola xente dando voces en castañéu y naguando por unes polítiques llingüístiques que nin les hai, nin les va haber. Pa botón d'amuesa ehí tenemos el desastre monumental d'esta llexislatura. Nun s'avanzó un garrapu. Pero nin siquiera quedó la cosa empatonada. ¡Ca!. ¡Reculóse!. ¡De traca!. ¡Reculóse!.

-¡Claro, hom!. Y esa raxa va ser la que, na prósima llexislatura, va trayemos la cacarexada oficialidá. ¡D'ilusiones vivía'l tuntu los coyones!.

-Pues, bono, Manfuradina. Cuando veas a Lluis de Turiellos da-y recuerdos de la mio parte y bríndalu pa que pase pela llende'l mio caborniu a echar unos culetinos. Y agora voi tirar camín p'alantre aprovechando qu'abocanó un poco. ¿Y tu qué vas facer, ho?.

-Yo voi siguir equí un cachín más pasando semiente pel furacu de la mano. Que me paez más práutico y útil que dedicame a sentir promeses llingüístiques de quien nun les va cumplir y, pa rematala, nun idioma que nun ye'l míu...

Ramos, pegarates y espirches

Pinchéme con una espina

por coyer pa ti una flor.

La sangre quedó na rama

y el pinchu en mio corazón.

¡Ixuxú!. ¡Echa un culetín, Xanín!.

-¡Guo!. Cóime, Espi, veo que vienes mui gayaspera gue. Y con secañu, que yá me tas pidiendo unos culetinos...

-Sí, Xanu, tengo gana de remoyar el gargüelu con sidra, qu'esta mañana soleyera de primavera brinda pa ello.

-Pues agora saco una botelluca. ¿Pa ónde empobines, ne?.

-Voi pal castañéu a echar una güeyaduca. Ando inxertando, pañando cañes seques que cayeron, fradando...vamos, que tiempe hai pa trepar pellí.

-Pela villa camiento qu'andarán los padrinos y madrines acarretando pegarates. Yá foi'l domingu de ramos y agora toca llevar el bollu a los afiaos. ¿Tienes tu, ne?.

-Sí, ho, tento una afiada allá pa la mariña y precisamente mañana enfilo p'allá a lleva-y la pegarata, qu'esti añu yá me traxo la palma y el ramu lloréu.

-Sí, ye una tradición guapa esta d'apurrir palmes y ramos  a los padrinos y recibir empara la pegarata. Y, a too esto, tamos pel tiempu d'otra tradicion bien prestosa. La de les espirches.

-Ye verdá, Xanu. Ye prestoso ver a la puerta d'un chigre llantáu un ramu de lloréu. Dempués entrar y adicar pa la pipa bautizada col so ñome y arrodiada de bien de coses pa comer. Y si hai daquién que s'anima a echar una asturianada o un grupín de sente que monte un coriquín, la prestancia medra enforma...Pero tampoco nun vamos a engañanos. La cultura les espirches tamién ta arregallando. La xente ta avezao a la sidra yá fecho, embotellao y d'echar. Entres nuna espircha y ves poca xente tastiando la sidra ñuevo de la pipa, que nun s'echa porque fálta-y un pocoñin p'acabar de facese. Nun saben mui bien a qué van, mialma.

-Ye que, alrodiu les espirches, hai toa una cultura tradicional. La so función ye la de prebar la sidra ñuevo del añu. Y el so sabor nun ye como lo de lo que yá ta fecho, embotellao y pa echar. Dir percorriendo les espirches pa prebar la sidra recién d'esti o aquel llagar ye toa una cultura tradicional que, como tantes otres coses na nuestra tierra, va quedando apostalgao.

Sentimos entós sonar unos esquilones y cantar un carru. Y eso ye señal de qu'anda per ende Pachín Boroña. Aportó aonde nós y ponse él:

-¡Rediósla!. Tan ceo y yá-y tais echando mano a la sidrina. Pues podíeis apurrime un culín, que'l mio gargüelu tamién ta pa ello.

-¡Claro, hom! -dixi yo mientres y echaba un culete-. ¿Y pa onde vas col carru y los armentíos, Pachín?.

-Voi por árgoma pa estrar y lleña pa tizar.

-Pues nós tábemos falando de ramos, pegarates y espirches -dixo Espi la Mariñana-. ¿Tu yes padrín, ho?.

-Sí, ne, tengo un afiáu que yá me traxo la palma y el ramu. Agora tócame a min lleva-y la pegarata. Y, del tema les espirches, yá entamé la mio pelegrinación añal pelos chigres a tastiar la sidra de les pipes y a forrar tamién l'estómagu de pasu.

-Pue d'eso tábemos charrando, Pachín, de que ta perdiéndose la cultura de prebar la sidra de la pipa y la xente va a les espirches a beber sidra embotellao y yá tresnao -dixi yo.

-Pues, na última espircha que tuvi, la pipa tenía un ñome mui prestosu, "La Soberana" -dixo entós Pachín chisgándome un güeyu como si esperare qu'Espi saltare echando una.

Y acertó, porque namás sentir esi ñome, Espi alendó, carpió, y arrestellando la voz gargoliómos esta:

¡La Soberana!.

La que va pela Pedrera

cómo ximielga la saya.

Como yo fuera con ella

muncho más la ximielgara

¡Ixuxú!. ¡Viva la viesca Dayuri!.

 

Y asina siguimos charrando y bebiendo un cachín más, que recibir visites de los amigos na llende del mio caborniu siempre ye prestoso y d'agradecer...