Una llira y unos glayíos

Cuando'l día ta soleyeru y tira'l fresquín sola arboleda, presta echar un pecigañín dempués de xintar mientres sientes el ruxerrux de les fueyes ximielgaes pol aire y el gorgoritiar de los paxarinos.

Pues asina andaba yo esta tarde. Y, xusto cuando los párpagos empicipiaben a zarramicar y el sueñu diba camudar en suañu, un aquello espantible fíxome esconsoñar pegando un respigu y plasmándome dafechu.

Porque, mialma, qué rascar de cuerdes más tarrecible y qué glayíos más desagradables escomencipiaron a furame los tímpanos.

Asina que me llevanté y empobiné pa la carril d'au salíen aquelles llaceries. Y foi entós cuando quedé arremelláu no que taba viendo. Un paisanu vestíu con túnica, con una corona de lloréu na cabeza, y con un bigote revoltiáu yera'l culpable d'aquella estroza. Pero'l puntu en cuestión yera, nada más y nada menos, que'l míticu ¡Fidéu de Mileto!.

Saludélu entós y entamemos a charrar. Asina que póngome yo:

-¡Redioslal! ¡Arreniego los degorrios! ¡Me cago nes pites roxes! Pero Fidéu, ¿Qué faes tu pela Viesca Dayuri, ho?

Y, p'acabar d'ablucame, Fidéu miró pa min y ¡conocíame! porque ponse él:

-¡Nun puedo creyer lo que ven los mios güeyos! ¡Si toi delantre del perfamosísimu Xanu'l Caborniu!

-¿Pero conócesme, ho?

-¡Home, claro! ¿Por qué pienses qu'ando per equí? ¡Vine a costa fecha pa ver si t'atopaba, hom!

Brindé entós a Fidéu que s'averare comigo pal caborniu. Saqué unes de sidra y unes ablanes turraes y siguimos dándo-y a la parpayuela.

-Pero, vamos a ver, Fidéu, nun soi a pescanciar qué faes per estos llugares, por muncho que quixeres faceme una visita.

-Pues sí, Xanu, vine pa inspirame. Porque andaba yo escosu d'idees allalantrones pela mio tierra y resulta que me xuxurió un paxarín que per esta viesca diba atopar la inspiración ¡Y vaya si l'atopé! Cuando diesti enantes comigo taba encoplando un cantar que va da la vuelta a la galaxia, porque'l mundu va queda-y  curtiu pa ello.

Punxi yo la meyor sorrisa que pudi ante lo que me cuntaba Fidéu de Mileto, porque nun me paeció nada cortés dici-y la mio opinión sobre los espantibles ripios y los runfíos de llira que me despertaron del pigazu. Asina que siguimos charrando.

-Pues Fidéu, allégrame enforma que t'afayes nesta viesca y que descubras nella la inspiración que te faltaba alluendi. Nesta tierra asturiana tenemos una tradición bien cantarina, dende cantadores de tonaes hasta coriquinos que faen rebusquinos nel estómagu. Y, cuando la xente s'axunta  alredor d'unes botellines de  sidra, nun sé qué cóime pasa que los cantares salen solos y la folixa xuxe con fuerza.

-Entós acerté dafechu viniendo p'acá, y el paxarín que me lo encamentó nun m'engañó un res polo que veo ¿Y sabes que te digo, Xanu? Pues qu'eso que me cuentes de que la sidra ye cantarina ye una verdá bien bultable. Porque ta emprimando a tremame'l cuerpu, vánseme los deos pa la llira y el mio gargüelu nun aguanta un segundu más ensin ponese a cantar ¡Asina que escucha, escucha!

Entós Fidéu de Mileto entamóla a rasgar la llira y a gargoliar ripios como cuentu risa, que hasta paró'l ruxerrux de les fueyes y los paxarinos quedaron mudos del too.

Y allí quedé yo escuchando aquellos glayíos tremendos, papando sidra pa ver si llograba escaecer lo que taba presenciando pero, ¡ai, amiguinos!, nesti mundu traidor hai que tar preveníos pa les situaciones más revesoses. Asina que, cuando entantes entrara yo a pola sidra, tuvi la precaución de garrar unos cachos d'algodón pa taponar los oyíos y, d'esta manera, pudi llevar con bastante dignidá aquella actuación que duró casi hasta l'atapecer...

                                                                                      

Un campanu ensin mayuelu

Amaneció la mañanuca soleyera y salí del caborniu a esfrutar nortiando un puquiñín pela viesca. Sentí entós como un runfíu allarribón. Púnxime a mirar a ver qué yera y vi que s'averaba'l madreñoxiru de Pinín. Posóse na llende' caborniu y aprucieron el guah.e y el Gaviotu, que m,iániques, suel pasar que vengan xuntos a visitame. Y, el playu, acarretaba una paxa que me fixo poneme a naguar. Saludémonos y entamemos a parllotiar.

-Cóime, Gaviotu, veo que pasesti pela rula abondo ceo -dixi yo.

-Sí, Xanu, tráigote unes xarduques pa que les enfornes, fresquines que da gloria veles.

-Nun te quexes, Xanu, -permedió Pinín- que cuando vengo col Gaviotu y vien con una paxa yá tienes p'afalagá'l butiellu.

-Pues sí que ye verdá -contesté yo-. Y ¿per ónde andáis esta temporada, ho?.

-Pues andamos percorriendo los ríos asturianos a la busca d'un mayuelu -dixo Pinín.

-¡Rediosla! ¡Arreniego los demonios! ¿Chiflásteis, ho? ¡Buscar un mayuelu pelos ríos abúltame más revesoso tovía qu'atopar una aguya nun payar! -estrañéme yo.

-¡Nomenón, que ye una manera de falar, una broma! -contestó'l Gaviotu-. A lo que se refier Pinín ye qu'esta temporada de pesca nun apruz el campanu y, faciendo un xuegu pallabres, a lo meyor ye que nun suena porque nun tien mayuelu...

-¡Ai, hom, agora sí cayí na cuenta! -dixi yo-. Nun me choca un res lo que me comentáis, porque cuantayá los salmones empicipiaron a escasear de los nuestros ríos. Y, como nun se ponga igua a esti asuntu, van acabar sumiendo y entós alón a esta guapura de la nuestra ñatura.

-¡Claro! Pero quien tien que tomar midíes tarrez facelo pa nun s'enfadar colos pesquinos que siguen aneciando en querer pescar salmones y que ponen xides de toa frasca. Que si la culpa ye de los cormoranes, que si de los llondros...cualquier cosa menos encetá la midida que pudiere tornar esti desaniciu y que ye la de la veda unos años pa ver si se recupera la especie -argumentó Pinín.

-Pues nestes tamos -permedió'l Gaviotu-. Y, de siguir asina, va aportar el momentu en que los salmones yá nun remonten los nuestros ríos y acabóse.

-Por siguir col tema de los pexes, pero con daqué más prestoso, tamos a piques d'entrar na costera del bonitu, que namás que con pensar nello ya escomencipio a arranar -comenté yo.

-Y estos díes anden per Quintes y Quintueles dándo-yos a les llámpares, que per esa fastera de la nuestra costa, esos guisos tienen raigañu y querencia -amestó Pinín.

-Pues esto de da-y a la parpayuela ensin más val pa qu'acaben les tripes ruxendo y el gargüelu poniéndose con secañu. Asina que voi sacar unes de sidra y unos cachos de quesu casín con pan de sucu pa que la mañana nos resulte más gayolera y la verba se nos suelte inda más -dixi yo.

Paeció-yos estupenda la idea a los mios amigos, asina qu'entré pal caborniu salí cola sidra, el quesu y el pan y punxímonos a ximielgá les caxaes mientres siguíamos charrando tan guapamente... 

                                                                             

 

- 

Un llondru y una espircha

Presten estos díes soleyeros del aniciu la primavera, magar pela mañanina tean fresquinos y haya que s'abrigar. Andaba yo pela carril esta mañana echando una güeyada a los árboles que van biltando y echando fueya y flores cuando vi que se cozcaba Pachín Boroña col carru rinchando y los esquilones de los gües sonando.

 

-¡Ayó, Pachín! ¿Pa ónde camines, ho? 

 

-Voi ver si acarreto árgoma pa estrar, Xanu. Y de pasu baxar un poco'l bandullu, qu'ayeri anduvi de pitanza.

 

-¡Cóime! ¡Y pa ónde foi la fartura, ho?

 

-Pues nuna espircha de les que siempre fiximos per equí. Porque agora llamen espircha a cualisquier cosa, incluyendo que nin siquiera tengan pipa sidra, que yá ye de traca.

 

-Pero, polo que veo, a la que tu fuisti yera de verdá.

 

-Claro, Xanu. Con una pipa de sidra nuevo, acabante facese y antes de corchar. Que ye una sidra qu'inda nun escancia y ehí ta la penitencia nos tiempos que cuerren. Porque la xente yá perdió'l saborgue d'esti tipu sidra y namás que lo pide de botella, fecho del too y qu'escancie. Asina que les pipes de sidra de les espirches queden ehí arrinconaes ensin casi xente que lo prebe. Una pena. Pero esa cultura tán tradicional va quedando, poco a poco, escaecida y por culpa namás que nuestra...

 

-¡Llamentable, mialma! Pero ¿forrasti bien el butiellu, hom?. Porque la sidra hai que lo saber forrar tamién y, por supuesto, mexalo.

 

-¡Si, hom! ¡Como pa nun forrar! ¡Si metí pa dientro cuatro botelles de sidra! Pero había una bayura de pinchos, que podíes garrar una fartura de campeonatu. Asina que bebí y forré, forré y bebí, hasta acabar fartucu como un cura, como se diz de coña...¡Ah! Y, anque dea aquello tener que lo dicir, teníen en chigre puesta de música de fondo sones asturianos, que hai vegaes qu'escuches nes espirches cada cosa...

 

-Pues allégrome que pudieres esfrutar d'una espircha verdá, Pachín.

 

-Pero tengo que te contar tamién otra cosa bien agradable d'ayeri, Xanu. Ello ye que, antes de dir pa la espircha, fui a espurrí les piernes a la vera'l Nalón. Y ellí, a l'altura Sam y p'hacia'l mediu día, ¡había un llondru somorguiando, xubiendo a les piedres y pudi velu hasta comer una trucha curiosina...!

 

-Pues eso ye una ñoticia perbona. Porque onde hai llondros l'agua nun pue baxar mui contaminao, porque entós h.ispien d'ellí. Y mira tu cómo baxaba'l Nalón notros tiempos...

 

-Y lo de ver llondros nun ye tampoco tan fácil, Xanu. Asina que poder observar ún presta más tovía. 

 

-Pues mira, Pachín, como veo que vas ceo a pol estru, de la que baxes pasa pel mio caborniu y echamos unos culetinos de sidra, pa siguir con ello. Y, mientres, voi dir faciendo unos tortucos de maíz pa forrar, recóime.

 

-¡Meca, Xanu! Toi enagora recuperando de la pitanza d'ayeri ¡y yá me punxisti a naguar otra vez, rediola!.

 

-Pues venga, veti a rozar y pa la vueta ya lo tengo too tresnao...

                                                                                   

 

El barrenazu del Unión

 Acuantayá que nun aprucía pela llende'l mio caborniu Lluis de Turiellos. Pero hoi vieno a faceme una visita y llamóme l'atención que llevaba una camiseta con dos colores, azul y encarnáu. Y, dempués de saludanos, póngome yo:

-A, Lluis, esa camiseta que traes ¿de quién ye, ho?

-Ye del Unión Popular de Llangréu, un equipu que, resalvando a los del Real Uviéu y el Sporting, tien ún de los historiales más brillantes del fútbol asturianu, que inclúi varios años na segunda división del fútbol español.

-Cóime, pues eso ta estupendo. A ver si-yos va bien too darréu y tienen bonos resultaos.

-Ehí ta'l problema, Xanu. Tán pasando por una situación enrevesosa.

-¡Rediola! ¿Entós?

-Pues que tienen un furacu económicu importante. Y, por culpa d'ello, cuerren peligru de que l'equipu esbarie pel precipiciu. Asina qu'entamaron una campaña pa que tola xente que-yos pueda echar una gabita que lo faiga. Con una cuenta bancaria, brindando a quien quiera a pasar peles oficines, pagando entrada los socios los partíos que queden...

-Pues entós, amigu Lluis, toca llamar a conceyu a tola xermandía d'esta Viesca Dayuri p'alpurrí lo que se pueda. Y esperar porque la solidaridá seya pa echar p'alantre al equipu y sacalu d'esta fuexa.

-Pues sí, Xanu. Llegáronme ñoticies de que la xente ta respondiendo a la llamada del Unión y tán enfotaos en que la situación consiga iguase y salir p'alantre. Toi recordando agora la carrapotada d'espresiones que tien l'asturiano inxertaes nel ámbitu del fútbol. Y hai una pallabra, barrenazu, que ye cuando-y pegues al balón con toles ganes, que podría aplicase a esti casu. L'Unión tien que soltar un barrenazu qu'entre pela escuadra de la portería de les deudes marcándo-yos un gol de bandera.

-Pues sí. Esti partíu hai que lu ganar sí o sí, miániques, Lluis. Y agora siéntate nesi tayuelu, que de los tiempos que nun veníes a faceme una visita y vamos echar unos culetinos de sidra...  

-Y, a too esto, yá que menciones la sidra, Xanu, yá tamos en Marzu y escomencipien les espirches per ende. A ver si la primavera que yá s'avera nos vien afayadiza pa nós y pal Unión... 

                                                                                 

 

Otru antroxu pa correla

Pues ello ye que tamos pel antroxu. Col domingu'l gordu y el martes d'antroxu. Y, claro, per estes feches suel pasar a visitame Sidru'l Guirriu, xingando los cencerros y blincando cola piértiga. Asina qu'hoi téngolu equí papando unos frixuelos que fixi y dándo-y a la parpayuela comigo.

 

-Andes gayasperu hoi, Sidru, nótase que tas no tuyo.

 

-Sí, Xanu, ando de mazcaraes ivernales y, per estes dómines, antroxando a embute.

 

-Mialma que tienes razón. Anda la xente amazcarao per ende, faciendo moxigangues, asonsañando, armando folixa... 

 

-¡D'eso se trata, hom! ¡D'eso se trata! Y tamién d'andar de pitances, que lo de la comedera ye propio dafechu del antroxu. Potaxes, tortos, picadillu, callos, picatostes, frixuelos...¡meter pal butiellu de tola metralla!

 

-¡Nun me digas nada, Sidru! Que, magar teamos papando unos frixuelucos, namás que con sentite mencionar too eso empicipio a naguar de meter mieu...

 

-¿Y tu nun te marutes, Xanu?

 

-Home, yo avezo a amazcarame d'humanu si pinta que baxo pa la villa, anque cuantisimayá que lo faigo raramente, porque ando en plan vagu y prefiero que me cuenten les novedaes de perdayuri les amistaes que vienen d'allá a visitame.

 

-Pues yo ando yá un poco derrengaú, porque llevo de comedia dende primeros d'añu y de too se cansa. Asina que voi ver si, col entierru la sardina, voi descansando yá, que de blincar y facer sonar los  cencerros yá voi sobráu abondo.

 

-Y dempués del antroxu vamos entrar na Cuaresma y, un puquiñín más alla, va facer galantes la primavera.

 

-Sí, Xanu. Los árboles más primerizos yá escomencipien a echar brotos y a floriar. La viesca va dir, pali que pali despertando y los páxaros a entamala colos ñeros y les puestes. Pero bono, que tovía tamos pel iviernu y esti añu, malaya'l llobu que-y pudo fincá'l diente, como diz el dichu, porque ta viniendo un iviernu a l'antigua usanza y como tien que ser.

 

-Tienes razón, Sidru. Y eso ye perbono. Que les estaciones vengan como tien de ser va en beneficiu de la ñatura y de nós mesmos. A ver si sigue la racha y la primavera vien a selo de verdá. Y agora, como veo que los frixuelos van acabándose, vamos con otra cosa.

 

Entré pal caborniu y salí entós con una pota con picatostes. Y, al veles, ponse Sidru'l Guirriu:

 

-¡Rediósla, Xanu, que con tanto meter pal butiellu nun voi ser pa xingar cencerru dalu nin blinacar gota!

 

-Nun te preocupes, hom, que n'acabando tócate dir cuesta abaxo y va resultate más fácil. Eso sí, ten cuidao nun zarapicar ¿y aportar hasta la villa a arrollicones...!                      

 

Y equí siguimos tovía un cachu más dándo-yos a les caxaes y a la llingua. ¡Ah! Y ¡Antroxu fuera! 

                                                                             

Castañes de la cuerria

Na Viesca Dayuri tenemos la nuestra manera de celebrar cuándo entra l'añu nuevu. Nun mos guiamos por campanaes, nin papamos uves, nin nada d'eso. Pa nós entra l'añu en saliendo'l guirria de Ponga aventando ceniza a los homes y dándo-yos chuchos a les muyeres y, con elli, los aguilanderos a caballu colos sos cancios pidiendo l'aguilandu per ende. Y como esti añu, cumplióse esa tradición, pues estrenémoslu y alón. 

 

Pues ello ye que taba yo esta mañana xuta'l caborniu ferrando un tazu a una madreña cuando sentí gargoliar esto:

 

Nuna cuerria con castañes

pañé hoi una cestuca,

voi llevales pa casina

pa manteneme fartuca

¡Ixuxú!. ¡Viva la Viesca Dayuri!

 

Pues sí, mialma, como yá pescanciaríeis, tratábase d'Espi la Mariñana que venía carril p'abaxo. Cuando pasó per delantre la llende'l mio caborniu entró pa faceme una visita.

 

-¡Ayó, Espi! Veo que vienes cantando mui gayaspera.

 

-Pues sí, Xanu. Vengo de pañar una goxa castañes del castañéu que tengo allarribón. Y toma, que voi date unes ambozaduques p'amagostar o facer potaxe, que ta'l tiempu pa ello.

 

-¡Gracies, ne! Lo de tener una cuerria con oricios y tamién dexar castañes mayucando son bonos vezos pa espurrí la temporada castañera bien de tiempu dempués de la gueta.

 

-¿Claro, ho! Arriendes de les que voi garrando na cuerria tamién tengo delles mayucando en casa. Ehí acertesti. Y tu véote qu'andes ferrando la madreña.

 

-Sí. Cayóme una goma a un tazu y toi poniéndo-yla. La verdá ye qu'esti añu al iviernu, per agora, nun ye que nun lu comiera'l llobu, como diz el refrán, sinón que nin siquiera lu golifa, asina que les madreñines hai que les tener curioses. Tamos teniendo un iviernu como tien que ser, con agua, ñeve, fríu...A ver si la primavera bien tamién como debiere y podemos vé la viesca biltando y espoxigando abondo. Que yá sabes que, cuantayá, esto del tiempu anda too tracamundiao y hai vegaes que casi que nun sabes en qué estación t'alcuentres. A, ne, yá que pasesti per equí, ¿cómo van les coses pel mundu alantre?.

 

-Pues anuncies hai a embute. El roxu que manda pa norteamérica garró al mandón de Venezuela, como al pendolín,  y h.ispió con elli pa xulgalu nel so país. Tamién anda encerrizáu en facese con Groenlandia, que trai con ello alloriáu a tol mundu. La verdá ye que'l presidente norteamiericanu nun hai día que nun tea empicorotiáu nel aquello de les ñoticies...Pa Irán armóse la de coyer, cola xente na cai protestando escontra'l réxime teocráticu. Y un protagonismu destacáu nes revueltes tiénenlu les muyeres, que tán fartuques de dir tapaes como momies y nun pintar un res na sociedá. Cuéntense por miles los muertos...Tremendo. Pa Ucrania sigue la guerra. Lo de palestina y Israel nun se sabe si va dir p'alantre o p'atrás...

 

-¡Rediola, cómo ta la cosa, Espi! Y p'acá ¿cómo van les coses, ne?.

 

-Pues anduvieron los médicos de fuelga. Tamién anden encabritaos los pescadores. La xente fartúcase a pagar impuestos y nun acaben de ver pa ónde van les perres. Hai un gobiernu en Madrid ensin presupuestos nin sofitos parllamentarios pa tirar p'alantre...¡pero tira! Tamién fixo'l gobiernu central un alcuerdu de financiación colos catalanes que tien en pie de guerra a les otres comunidaes autónomes. Pero, agora, lo gordísimo ye lo del descarrilamientu del tren.

 

-¡Meca!. Cuéntame eso del tren. ¿Qué pasó?.

 

-Pues que pa Córdoba descarriló un tren d'alta velocidá y estrellóse otru escontra elli. La llaceria foi tremenda. Cuando te cuento esto ya pasen de cuarenta los fallecíos, arriendes d'otra montonera de feríos. Y, col pasu los díes, ver veremos qué foi lo que pasó y qué responsabilidaes tienen los monxures que remanen esti tipu de tresporte nestos fechos tan llamentables...

 

-¡De los coños, de los coños! ¡Déxesme plasmáu, Espi!  La verdá ye que pa llograr que me traigáis bones ñoticies cuando venís a visitame dende la villa ye casi un milagru...

 

-Bono, home, voi date una anuncia prestosa, polo menos. Hai una esposición n'Uviéu relacionada col reinu llionés y, de pasu, tamién col asturianu, que'l reinu de los nuestros vecinos, allá de los tiempos, sucedió al nuestu y hai entrambos vinculaciones clares.

 

-Menos mal, muyer. A too esto, tengo ehí nel caborniu una bota con vinu de Os Ozcos y, de da-y a la parpayuela, ta secándome'l gargüelu. Asina que voi por ella y vamos empinar un poco'l coldu si te paez.

 

-¡Estupendo, Xanu!. Que'l falar y el pimplar xuncen bien, miániques.

 

Asina qu'entré al caboniu pola bota. Amuguemos Espi y yo los nuestros gargüelos col vinín y siguimos tovía un cachu parllando tranquilamente...

                                                                     

Pitances, lluces, ausencies y regalos

Poneme delantre los güeyos un platu percebes y empicipiar a naguar ye too uno. Pues esta mañana vinieron a visitame, montaos en madreñoxiru, Pinín y el Gaviotu. Y resulta qu'el playu traxo una paxuca con percebes. Asina que faltóme tiempu pa sacar unes de sidra y ponenos a espellicales. Y póngome yo:

 

-Bono, chachos, pues que tamos per Avientu y vamos camín de les fiestes  navidiegues.

 

-Pues sí, Xanu -dixo'l Gaviotu-, y con elles la temporada de les pitances. Que más qu'unes fiestes de raigañu relixosu tal paecen unes xornadones gastronómiques.

 

-Antes yeren más cencielles -añadió Pinín-. Aprovechábase pa comer un poco meyor que notres époques del añu, matábase pa la ocasion un pitu si cuadraba, pero ensin munchu más esparabán gastronómicu.

 

-Y agora hai otra cosa aquello que me llama l'atención -dixi yo-. Ye lo de les lluces. Anden a la tema per un llau y otru a ver quién prende más y amuesa más rebilicoque llumínicu, miániques. Y bien de xente queda empapirotiao con esi espectáculu...

 

-Con dicite qu'hasta los hai qu'organicen escursiones pa ver les de Vigo, que tal paez que quieren imitar al mesmu Sol, rediola -comentó Pinín.

 

-To eso de les pitances y lluminaries rescampla d'una manera especial per estes feches -permedió'l Gaviotu-, pero nun hai qu'escaecer que pa otra xente tamos nunes dómines murnies, porque tamién ye'l tiempu onde s'echa de menos a la xente de la familia que yá nun tán ente nós. Van quedando sielles vacíes alrodiu la mesa y ye motivu pa la señardá. 

 

-Otru asuntu bien notable d'esto que comentamos ye'l tema de la rapacería. Son díes de xuguetes, d'arranar por ver realizaes les ilusiones de los pequeños de la casa -puntualicé yo.

 

-Pues sí, Xanu, y equí tamién cambiaron les coses enforma col pasu de los tiempos -recordó'l Gaviotu-. Cuando yo yera guah.e los regalos trayíentelos los Reis Magos d'Oriente, Melchor, Gaspar y Baltasar. Teníen un emisariu qu'anunciaba la so visita, el Príncipe Aliatar, y aprovechabes entós p'apurri-y les cartes onde-yos pidíes los regalos polos qu'olivabes. Porque había qu'escribilos nuna carta que, si lo escaecíes, igual teníes problemes...

 

-Y teníes tamién una cosa que te reconcomía tamién -dixo Pinín-. Porque si pel añu te portares mal, podíes arriesgate a que te cagaren carbón y ceniza. ¡Menudu plar, rediola!.

 

-Claro que los rapacinos d'anguaño xueguen con ventaxa con relación a los d'otros tiempos. Porque agora, arriendes de los Reis Magos, hai otros personaxes, que vienen antes, y que tamién-yos traen regalos. Ehí tán Papá Noel, Santa Claus y otros más autóctonos d'apocayá como l'Anguleru -recordé yo.

 

Entós el Gaviotu, dempués de beber un culín de sidra, sonrió, guiñónos un güeyu, y ponse él:

 

-Pues vamos dir al granu. A vosotros ¿van dexavos munchos regalos estes fiestes, ho?.

 

-Home, yo siempre me dexen coses na casería de Paxumal de los mios tíos Telva y Pinón -dixo'l guah.e.

 

-Colos xanos funciona d'otra manera -comenté yo-. A los que so ma dexó nuna casa pa ver si colaba y los criaben, puen caga-yos los Reis Magos daqué, pero los que yá somos vieyos y andamos peles viesques, tenémoslo más difícil...

 

-Pues yo tócame regalar, que soi paisanu y pasé cuantayá d'escribir cartes pidiendo regalos a facer de paxe de los Reis Magos y repartilos -dixo'l Gaviotu.

 

Y, d'esta miente, siguimos saborgando les percebes y enfrescando'l gargüelu cola sidra mientes sentíamos barrenar a un picutorneru que, mialma, sintir siéntense perbién, pero velos, ¡arreniego los demonios lo complicao que resulta...!.  

                                                                             

 

 

La corona'l rei

Vamos caminando per Ochobre. Escomencipien los montes a vistise con una gama de colores guapa enforma que fai d'esta estación una de les más guapes del añu pa ver la viesca. Y equí, na d'Ayuri, empicipiamos a naguar pensando que ta ehí yá la gueta.

Hoi vinieron a visitame Xuan Moñiz d'Ambás y Don Quixote de Caravia. Saqué-yos unes de sidra y unos torrendos pa alegrá l'estómagu y punxímonos a dar la parpayuela.

 

-Hai coses que nos pasen per delantre de los güeyos ensin danos cuenta hasta que, un día, cayemos nelles -dixo Xuan-. Mirái, tuvi echando una güeyada al Liber Testamentorum y decatéme d'una cosa curiosa que siempre se me pasare per alto. Resulta que na famosa miñatura del rei Alfonso II la corona paecióme rara. Yo conocía les corones abiertes, les zarraes y les murales. Pero nesti casu, la corona del monarca tien tres altures. Cosa que me chocó. Desconozo si esistíen daquella o si ye una ramalada que-y dio al artista. Tampocu nun sé  si tendría dalgún significáu. Pero resultóme curioso, mialma.

 

-Pues falando de la monarquía de nuestro -intervino Don Quixote- yo tuvi l'otru día visitando la Catedral, onde ta'l panteón real onde reposen bien de restos reales incluyíos los del rei que menciones, Xuan. Pero, claro, nun paré ehí namás. Fixi una visita llarga. Vi los retablos, la imaxe d'El Salvador, la capiella de Santa Olaya, la Cámara Santa...y, pa la mio desgracia, xubí la montonera peldaños de la escalera caracol de la torre. Y resulta que, de la que baxaba dempués de ver les campanes y, más en concreto, la Wamba, zarapiqué y di un testarazu contra la parede, que ¡mirái qué gurullu traigo na cabeza, rediola! 

 

Quitó entós el nuestru amigu'l sombreru y póngome yo:

 

-¡Rediósla, Quixotín! ¡Nun te matesti de milagru! ¡Menudu golpazu que traes na tiesta! Pero bono, es casu ye que teas escorniáu pero bien, que ye de lo que se trata. Yo ando yá arranando por dir a la gueta. Equí, pela Viesca Dayuri,  empieza dobláu'l mes d'Ochobre y yá tamos bien cerquina. Tengo que manda-y avisu a Espi la Mariñana pa quedar un día pa dir a pañar al castañéu que tien p'allá arriba.

 

-¡Ah! ¡Y alcuérdate d'avisanos en quedando con ella, que dir a la gueta ye una de les tradiciones más prestoses que tenemos pela seronda! -contestóme Xuan.

 

-Y con esto de la gueta toi escomencipiando a naguar, porque toi alcordándome de los amaguestos, la sidra'l duernu y les folixes que se monten con too ello -añadió Don Quixote.

 

-Yo les castañes préstenme tamién cocíes con sal y acompañaes con llechi, meyor pela nueche y, si ta frío, aprovechar pa escalecer con elles. Y si ye pa xintar con un bon potaxe, otro tanto. Con patates, o ñabos, con berces y , por supuesto, con un bon compangu...-comenté yo.

 

-¡Ai, Xanín! Magar tamos comiendo estos torrendinos, tán emprimando a ruxime les trimes con tou esti asuntu de la comedera de castañes -dixo Xuan. 

 

-¿Sabéis qué toi pensando, ho? Pues que podíamos acabar de rucar los torrendos y de papá la sidra y enpobinar pal castañéu d'Espi pa ver como ta l'asuntu. ¡Que, almeyor, yá hai daqué pa guetar y podemos esmorgá los primeros oricios de la temporada! -apunté yo.

 

Paeció-yos estupenda la idea a los mios amigos, acabemos los torrendos y la sidra y echemos a andar monte arriba a ver que tál pintaba la cosa...

                                                                                   

 

A mores

Pues ello ye qu'esta mañana entróme'l rixu de pañar mores pelos bardiales. Que los escayos pinchen, pero tamién dan el so regalu prestosu. Que bien que presta machucar mores, echa-yos vinu y zucre, y rellaber con elles los focicos.

 

-¡Ayó, Xanu!. ¡Ten cuidado nun t'escayar, que te veo muy gayoleru escarabicando pel bardial...!

 

La que m'echaba voz yera Espi la Mariñana. Estós  capiela pa que s'averare y póngome yo:

 

-¡Qué tal, Espi! ¡Cuantayá que nun te vía pequí! ¿Pa ónde empobines?

 

-Pues voi camín del castañéu, que va tiempu que nun xubo a echar una güeyada. Y, cola barbaridá d'incendios d'esti añu, nun sé si tengo un castañéu o un borrón afumando...

 

-Bono muyer, paezme que pela Viesca Dayuri llibremos d'eses gafures. Pero, de toles maneres, meyor que vayas a echar un vistazu por si acasu. Y, si ta too bien, ver cómo anda la cosa. Porque, arriendes de los incendios, tamién vieno una seca pistonuda, y puen perdese los plantones nuevos o afeutar a la gueta que pueda haber pela seronda...

 

-Yá lo sé, Xanu, ver veremos qu'atopo per ellí arriba...Y de la que baxo voi coyer yo tamién mores, que viéndote a ti punxístime a naguar. Con esto de les mores, los arándanos y demás pasa un pocoñin como coles castañes. Que se dexen na viesca y dempués va la xente a comprales pelos supermercaos...

 

-Yo, por ver, veo hasta los figos apodreciendo per ende. Pero ye lo qu'hai, Espi. Pa delles coses siguimos enchipaos de grandonismu, magar que, cuantayá, escomencipiemos a cayer en barrena...

 

-A too esto, Xanu, vamos metenos en Setiembre y entamala cola xera que foi quedando apostalgada nos meses centrales de les vacaciones del branu.

 

-Pues sí. Yá me contaréis cuando vengáis a veme de la villa cómo pinten les coses pel mundu alantre. Que ta la cosa bien enguedayada per tolos llaos y cualquiera sabe les llaceries que nos puedan venir. ¡Ah! Y antes de que sigas camín p'alantre, yá sabes lo que te toca facer... 

 

-¡Si, ho! ¡Tranquilu, que nun se m'escaez! Y, yá que s'averen un cientu celebraciones pa esti ocho de setiembre, vamos recordar la romería que se fai nel santuariu de la patrona llangreana.

 

Xubiesti a la romería

de la Virxe del Carbayu.

Llevesti la saya nueva

y el refaxu colloráu.

¡Ixuxú! ¡Viva les romeríes asturianes! 

                                                                               

 

 

 

L'Ayalga del Castiellu del Alba

Va tiempu que tenía pendiente una visita per tierres somedanes. Desque una tarde, charrando con Sidru'l Guirriu, me dixera que per ellí había una ayalga maraviosa. Asina que me punxi en contatu con él y quedemos en venos nuna picorota del cordal de Perl.lunes, onde queden los muruecos d'un castiellu medieval, el Castiellu del Alba. Pues ente ellos ta l'ayalga que me fai rebelgos nel estómagu cada vegada que m'alcuerdo d'ello.

Asina que quedé con Pinín pa que me llevare p'allá nel madreñoxiru'l día señaláu. Cuando aportemos, dexólu amatagáu na viesca y echemos a andar pa la cuguruta onde s'asitien les ruines del castiellu ¡y l'ayalga!.

 

-Pues mira, Xanu, allá pela Edá Media, esti castiellu controlaba'l pasu dende les tierres llioneses, al traviés d'El Puertu, a les asturianes. Tiénense anuncia d'él de magar el sieglu XIII, anque quiciabes seya anterior, escurque de los tiempos del Reinu d'Asturies.

 

-¿Y consérvase daqué d'esa fortaleza, ho?. Porque dende equí abaxo paez acolumbrase un cachu d'un torrexón y poco más...

 

-Bono, Xanu, anguaño consérvase esi cachu del torrexón, parte de la muralla y del fuexu. Como ta en ruines, va esbarrumbando cada vez más col pasu de los años y pinta feo que puedan llimpialu de maleza, igualu y conservalu. Como pasa en tantos casos, como'l so hermanu, el Castiellu d'Alba de Quirós, o'l de Tudela n'Uviéu...

 

-Mira, Pinín, ehí pa la mano drecha tenemos una fonte. Quiciabes yera la que suministraba notres dómines d'agua al castiellu.

 

-Pues igual sí, Xanu. Amás, la única manera d'aportar a él ye pela zona noroeste, porque, como pues dir viendo ta allugáu nun auténticu gurugú, que tal paez más afayadizu pa ñeru d'aigles o utres que pa llevantar ehí una fortaleza...

 

Siguimos  caminando picu arriba, afanosos y puxando, que xubir ellí nun yera xera fácil. Al final, llogremos entrar a les ruines del castiellu y ellí taba Sidru'l Guirriu esperándonos tan campante.

 

-Redióla, Sidru -dixi yo- yá pue ser l'ayalga qu'hai ente estos muruecos enterrada vien valoratible, porque cola sudada d'aportar equí, esti día soleyeru d'Agostu, ye lo menos que merecemos descubrir...

 

-Pues nada, amigu, dinos ónde tenemos que nos poner a cavar, que me va salir el corazón de la caxa de tantu aforfugu que me entra pensando nos pelleyos d'oru de tienen que tar enterraos nesti llugar -añadió Pinín.

 

-¡Ca!.¡Equí nun hai que cavar nada!.¡L'ayalga ta desenterrada!. Eso sí, namás que la podéis ver, sintir y esfrutar. Y de llevala, dientro de vosotros, en corazón, o nes coraes, porque nun ye un tesoru d'ambozaes d'oru nin nada d'eso.

 

Quedemos empapirotiaos y desasitiaos colo que nos dicía Sidru'l Guirriu. Dempués de quedar un cachu en silenciu, púnxime yo:

 

-¡Cóime, Sidru, pues señálamos pa ónde ta l'ayalga que dices, que toi tremando de ganes de vela.

 

-Pues alendái, llevantái la cabeza y observái la rodiada -dixo entós Sidru arrestiellando la voz-. Ehí la tenéis. El valle, los montes, les picorotes, los fayeos, los carrascos, les castañales, el país del osu, el corzu, la raposa, l'esguil, el faisán, de les abeyes, de les fontes, de los ríos, del mofu, de la rosada pela alborada...y milenta coses más que vais dir descubriendo si dexáis esnalá la imaxinación. Porque dende les ruines allugaes nesta picorota podéis pescanciá la guapura d'esta tierra de nuestro espolletando y rescamplando como en pocos sitios se pue contemplar meyor . ¿Acasu nun ye esa una ayalga descomanada?

 

Entós yo, como rempuesta a lo que mos dicía'l nuestru amigu Sidru, eché un ixuxú como enxamás lo fixera. Y Pinín echó tamién otru. Y l'ecu de los nuestros rinflíos rebotó per milenta requexos de la contorna. Entrónos una allegría enorme d'atopar por fin aquella ayalga. Y de persaber que yera mui nuestra, magar nun se midiera n'oru. Y que la podíemos guardar nos nuestros corazones, nes nuestres coraes y na nuestra alcordanza pa siempre enxamás...

                                                                                 

 

 

 

 

Camín de San Xuan

 Avanzamos pel branu y vamos  camín de San Xuan, que marca'l solsticiu de branu. Pasó esta mañana pela  viesca Don Quixote de Caravia, enfurruñáu él,  y punxímonos a charrar.

-Traes cara de pocos amigos, Quixotín...

 

-¡Ca! ¡Como pa nun la trayer! ¡Colo qu'acaba de pasar na enseñanza asturiana!

 

-¡Coime! ¡Cuenta, hom! ¡Cuenta...!

 

-Pues qu'anduvieron los docentes estos díes de fuelga y movilizaciones pa demandar una serie de reivindicaciones, que los del gobiernu tienen el sector fechu una llaceria. Los sindicatos punxéronse a la cabeza, pero acabaron vendiéndolos. Y eso encabrita muncho, ¡rediola!

 

-Ye curioso que'l discursu de les izquierdes nos encamiente que'l dineru que recauden ye pa gastalo en coses como educacion o sanidá, pero dempués anda la xente de lo público enfurruscao...

 

-Sí. Y nesti casu la cosa amuesa lo tracamundiao qu'anda too neso de la política y el sindicalismu. Porque'l gobiernu asturianu ye d'izquierdes. De los cinco sindicatos que dexaron tiraos a los docentes, tres son d'izquierdes. Y, pa rematala, les dreches ofrecieron los sos diputaos p'ampliá'l presupuestu y poder atendé les reivindicaciones del seutor. Y coinciden tamién con bona parte d'él en qu'esti procesu zarrose'n falso y con resultaos bien probes.

 

-Y toi pensando yo que, con esti tipu tracamundios, dempues vienen eleiciones y hai xente de les izquierdes qu'echen les manes a la cabeza porque xuben les dreches y tamién la ultradrecha. Pero ¡rediola! ¡si-yos tán abriendo ellos les puertes de par en par!

 

-Claro, Xanu, porque los fechos canten qu'atorollen y, en casos como ésti, tal paez que los papeles tán cambiaos y les izquierdes frayen a los trabayadores mientres que les dreches ofrécense a echar una gabita...

 

-¡Hai, hom! ¡Cómo anda'l patiu, amigu Don Quixote! A too esto, y por falar de coses más prestoses, vamos camín del solsticiu de branu y de la nueche de San Xuan.

 

-Pues sí, Xanu. Coles fogueres y la so carrapotada de tradiciones. Poque'l solsticiu de branu llévanos en pelondín a tiempos remotos y a civilizaciones que dexaron una buelga qu'aportó a nos al traviés de milenios...

 

-Como tovía tenemos vagar pa ello, tenemos que dir sopelexando pente toles amistaes de la viesca Dayuri que  vengan a aconceyar  p'axuntanos toos na danza alredor de la foguera que vamos entamar per equí. Que ye una manifestación d'hermandá bien prestosa que tenemos que siguir conservando.

 

-Eso ta fecho. Hai qu'echar voz per tolos requexos del nuestru país p'axuntanos na danza. ¡Y p'acabala bien! ¡Qu'otra tradición, vamos llamala asina, yera echar ixuxús, ronques, y acabá la xermandía a palos!

 

-¡Sí que ye verdá, Quixotín!. Pero tenemos que tené xacíu. Los palos, y bien gordos, tenemos que los reservar pa solmena-yos los llombos a tantos fartones y vendíos como tenemos pela nuestra tierra. ¡Qu'esos sí que merecen una bona tundia!

 

-¡Cuanta razón tienes, Xanu!. Y agora voi despidime, que quiero enfilar monte arriba pa espansionar y reponer fuerces, qu'hai enguedeyos que resolver a embute per tolos requexos del país...

 

-Pues ¡hasta la prosima visita, amigu! ¡Y alcuérdate d'avisar p'axuntanos a danzá la nueche de San Xuan...!

 

-¡Nun te preocupes, Xanu! ¡Qu'eso nun lo escaezo...! 

 

25 de Mayu de 1.808 / 28 de Mayu de 722

Somorguiaos dafechu na primavera, la viesca ye un conciertu de grillos, gorgolitiar de páxaros, ruxerrux de fueyes, flores abriendo, y tamién sentir alluendi sonar dalguna esquila o lladrar un perru.

Hoi aprució per equí Espi la Mariñana que venía de echa-y una güeyada al castañéu que tien allarribón. Saqué-y un tayuelu pa que se sentare y tamién unes de sidra pa remoyá'l gargüelu mentes charrábemos.

 

-Bono, Xanu, avanzamos pel mes de Mayu y camín de dos celebraciones históriques prestoses.

 

-¿De dos? Yo contaba qu'había una pal día venticinco...

 

-Pues non. Hai una pal  venticinco y otra pal ventiocho. Verás, esplícotelo. Como persabes, el venticinco de Mayu de mil ochocientos ocho foi'l llevantamientu del pueblu asturianu y la Xunta Xeneral escontra la invasión napoleónica. Renombramos la declaración de soberanía de la nuestra institución cimera sobre'l territoriu asturianu, les Asturies d'Uviéu y les de Santillana que yeren daquella. Mandar embaxadores a Inglaterra. Crear la nuestra bandera a propuesta de Xovellanos, que ye la que tenemos hoi...Una fecha histórica que rescampla y que presta recordar y rindir homenaxe. Pero hai otra fecha que ta amatagada pol desconocimientu y porque nun hai consensu dafechu ente los estudiosos na materia arriendes de tarrecimientu bastante xeneralizáu d'encetar el tema, que ye la causa principal.

 

-Cóime, Espi, pues ta pruyéndome saber a qué fecha histórica te refieres, porque yo figurábaseme qu'esti mes namás que teníamos la que me comentes.

 

-Pues verás, Xanu. Ello ye qu'hai una corriente historiográfica, que se sofita nos estudios fechos nel so día por Claudio Sánchez Albornoz, historiador de prestixu y con una biografía que relluma. Pues bien. Esi estudiosu, ente otros temes, de la nuestra historia de les dómines del reinu asturianu, anduvo pescudando nes fontes árabes que fincaben el tema de la Batalla de Cuadonga. Y acabó concluyendo, con datos como'l de la fecha  de la muerte, a manes cristianes, d'un personaxe llamáu Nu'aym Ben Abd-al-Malik, que la batalla asocedió un ventiocho de Mayu del añu setecientos ventidós. Ye bien cierto qu'hai historiadores que discrepen d'ello, pero tamién lo ye qu'esa fecha acéutase per otros y ye la que se suel manifestar cuando s'entruga en qué feches pudo dase esi acontecimientu históricu tán relevante pa  nós por ser l'aniciu del posterior Asturum Regnum que, colos sieglos, empobinó pa l'Asturies de los nuestros antepasaos y de nosotros mesmos, claro.

 

-¡Rediósla, Espi! ¡Acabes de dexame claváu! Porque mira tu qu'hai xente aprofiando dende cuantayá que nun-yos cuaca como fiesta autonómica la festividá del ocho de Setiembre, que anque s'amiesten nello lo relixoso colo identitario, asitiar ellí el fechu de la victoria de la xente de Pelayu y los anicios del nuestru reinu nun cuadra nada bien. 

 

-Pues esta fecha que te digo ta bien sopelexada per dayures. Bien de páxines l'apunten y dan datos de por qué l'estudiosu Sánchez Albornoz la sacó a la lluz. Vamos, que nun ye nada tapecío nin difícil d'atopar. Tolo contrario. Mesmamente nel añu dos mil ventidós el gobiernu asturianu entamó unos actos onde s'arrecoyía'l tema de Cuadonga y asitiáronlos, precisamente, ente los díes ventisiete y ventiocho de Mayu. ,Vamos, nada difícil de descubrir, anque seguro que bien de xente arremielle los güeyos al enterase como te pasó agora a ti.

 

-Pues chócame a embute que nun-y diere a naide por facer alcordanza dala d'esa fecha vinculada con un fechu tán importante de la nuestra historia como ye la Batalla de Cuadonga, Espi.

 

-Tamién me paez bien raro a min, Xanu.  Magar nun haya un consensu científicu nel tema, yo nun duldaría un res en facer alcordanza daquellos fechos en llegando a esa fecha señalada. Por tolo que me molesté en lleer del tema, tamién tien bastante aceptación. Tenemos ehí un auténticu bixu históricu p'averanos a él y pa estremar la festividá relixosa de Setiembre cola más política de Mayu. Pero'l personal anda embizcáu namás col venticincu de Mayu, fecha perimportante pa facer alcordanza y qu'usen dellos pa contraponelu col ocho de Setiembre. Y d'esi enguedeyu nun los saques, miániques.

 

-Pues, ¿sabes que te digo, Espi? Que na Viesca Dayuri vamos entamar a celebrar les dos feches. Y, como pa detrás, namás que tán separtaes per tres díes, pues la folixa que podemos enxaretar pue ser bien sonada. Asina que vamos dir echando voz a tola xermandía que nos movemos per esti monte pa ponenos con ello. Axuntar nun mesmu mes les alcordances de la batalla que foi'l bierzu del nuestru reinu col llevantamientu onde nos declaremos soberanos al traviés de la nuestra institución histórica d'autogobiernu nun ye cosa menor precisamente...

 

-Pola mio parte yá entamo a llamar a xente pa les celebraciones, Xanu. Qu'esto va resultanos prestoso a esgaya.

 

-¡Estupendo, Espi! Y agora yá sabes polo que toi esperando, ¡echa una cantarada, ne!

 

-Pues ehí va esta, que nos bien como aniellu al deu colo del Papa qu'acaben d'escoyer...

 

Vengo de Roma descalzu

de cumplir una promesa.

Agora que vengo santu

¡dame un abrazu, Teresa!

¡Ixuxú! ¡Echa un culetín, Xanín!

¡Viva la Viesca Dayuri! 

                                                                         

 

 

Infanzones, birusos, y un cañón de madera

 Cuantayá que no venía a visitame Lluis de Turiellos. Pero esta mañana aprució pequí y punxímonos a charrar mientres pimplábamos d'una bota con vinu de Pezós que traxere'l mio amigu.

 

-Bono, Lluis, ¿qué tal van les coses per ende, hom?

 

-Pues ando matando'l tiempu caleyando perhí y deprendiendo coses de cerca casa, que tenemos el mal vezu de dir allalantrones a visitar sitios y dempués desconocemos lo que tenemos equí mesmamente delantre les ñarices.

 

-Mialma que ye verdá lo que me dices. Asina que cuenta, cuenta, que yo tamién quiero saber coses de lo que mos arrodia...

 

-Pues tuvi lleendo sobre un pleitu famosu qu'hubo allá pel sieglu XI ente diez infanzones llangreanos y otros vecinos con propiedaes nel conceyu escontra'l rei llionés Alfonso VI. Dicíen qu'aquelles tierres yeren d'ellos y nun podíen pasar pa la ilesia, que yera la intención del monarca, nin pagar tributos. De mano'l rei decidió que la cuestión tenía que s'aclarar con un duelu ente un combatiente qu'elli elixera y otru de parte de los llangreanos. Pero ellos dixeron que non, nin por duelu nin pol Fueru Xulgu. Proponíen que cada parte escoyere un representante p'argumentar y algamar un veredictu. Cuenten que na comitiva real diba'l famosu Cid. Al final la balanza piló pal llau de rei, cosa esperable, y el conceyu de Llangréu pasó a depender del Obispáu uvieín al traviés d'una donación. Por eso, nel escudu llangreanu figuren dos cuarteles relativos a aquellos fechos. Nún figuren diez yelmos, n'alcordanza de los infanzones, y notru la Cruz de los Ánxeles, pa referise a la dependencia del obispáu. Por cierto, que'l llugar onde aconceyaben los vecinos col obispu, o pa resolver problemes del conceyu, yera La Puente de Turiellos, onde había una ponte medieval, de los que popularmente se conocen como romanes, y que cuenten que yera la mayor d'Asturies, hoi desapaecida. Queda inda nel llugar una casa medieval con una ventana con un escudu de la casa Bernaldo de Quirós, que va acabar esbarrumbamdo si nun echen les autoridaes manes nel asuntu...

 

-Pues bien interesante me paez esto que relates, Lluis, asina que vamos amugá'l gargüelu y sigue contándome coses, venga...

 

-Hai un nomatu que me llama l'atención. Nomatos per Llangréu hai dellos, los gatos de Lada, los pozaricos de Barros, los salmerones de Sama y, el que te voi comentar, los birusos de La Felguera. Esti apodu caberu suelen escribilu con uve, pero yo fáigolo con be, que ye como apaez nel diccionariu. Verás, d'ónde vien esa pallabra lleva a equívocu, pámidea. Hai años La Felguera tenía fama por ser la capital de los fumos, según se contaba. Había tala contaminación que pa contemplar un día nidiu costaba trabayu, porque vehíes p'arriba como una capa de borrina davezu. Asina que pue pensase que lo de birusos vien por virus, pol aquello de la puxarra que s'alendaba. Pero esos términos la xente antuguo nun los conocía, virus, bacteries...¡ca!. Pues ello ye que yo escurro que'l nomatu tien que ver cola fábrica que fundó Pedro Duro y que foi dándo-y sonadía al llugar onde s'asitiaba, La Felguera, hasta apoderar el topónimu parroquial que yera'l de Turiellos. Un birusu n'asturianu ye una persona que presume, que gasta fachenda. Y cuando tienes una fábrica nel llugar y los demás, non, cuando igual pues trabayar nella, metes otros anden llindiando vaques per ende, pues pues dexate llevar pol grandonismu. Asina que, quiciabes, cuando la xente del valle coincidía nuna romería o en chigre y aportaben los de La Felguera, los que presumíen de tener fábrica, pues diríen qu'ellí llegaben los birusos felguerinos...En fin, acierte yo o ande escabarriáu, esa ye la mio opinión sobre l'asuntu...

 

-Pues sí que guapamente podría venir dehí, hom...Y ente los piques de salmerones y birusos tamién los habría, camiento yo... 

 

-Claro, Xanu. Anque esa rivalidá  foi quedando amatagada col pasu de los años y les xeneraciones, pero rivalidá sí que l'había, como hoi tovía la hai ente Uviéu y Xixón, por poner un exemplu. Yo, arriendes de los xareos futbolísticos ente los aficionaos del Racing de Sama y el Círculo Popular de La Felguera, que se fusionaron pa formar l'actual Unión Popular de Langreo, recuerdo agora, a botavoléu, un par d'anécdotes que nun sé si sedrán ciertes o non, pero sí que rulaben per ende hai tiempu. Verás, contáronme que cuando había fiestes en Sama o La Felgura, había vecinos de la villa  cecana que diben afataos como si fuera a llover, con paragües y too, anque fixere sol. Cómo acabaría la cosa si llograben d'estes traces atrayer al Nuberu, eso yá nun lo sé. Tamién me contaron qu'una vez, una xente de La Felgura escurrieron, nada menos que montar una pieza d'artillería pa cutir a los vecinos salmerones. Asina que la iguaron, buscaron un sitiu amañosu y dispararon. Pero'l cañón estampló y acabóse ellí l'asuntu. Claro que bona parte de que fracasare la operación debió tenela que'l cañón taba fechu...¡de madera!

 

Eché yo una carcaxada con aquelles ocurrencies de les rivalidaes y, como siempre que tengo visita me pruye la curiosidá por saber les noticies que circulen pel mundu alantre, entrugué-y al mio amigu polo que pasaba nel so conceyu. Y entós va y ponse él:

 

-Pues mira, Xanu, hai un fechu qu'acaba cola paciencia del más pintáu. Ello ye que llevaben abondos años p'acabar col soterramientu, d'un quilómetru de les víes del tren del antiguu y históricu Ferrocarril de Llangréu. Y cuando, por fin, ponen el ramu a la obra, pues queda una bona estensión de terrén pa acuriosar y urbanizar. Pero, entós...¡atopemos col Gobiernín, manín!. Y resulta qu'agora, por nun sé qué sides, dicen que van tardar meses en echar a andar tol asuntu. Y la yá sabemos, por esperiencia, que cuando una alministración echa'l frenu y diz que van tardar tiempu en quitalu empicipien a temblanos les piernes cola que nos pue cayer...

 

-¡Rediósla, Lluis! ¡Vaya llaceria que nos cayó nesti país colos mandones!. Pero, bono, voi sacar unos cachos de choscu y pan de sucu pa saborgalo col vinu mientres siguimos dándo-y a la parpayuela, que nos va venir bien forrá l'estómagu con daqué... 

                                                                                 

                                                                           

Ñeros, biltos y espiches

Caminamos Marzu alantre. Hoi vinieron a visitame'l trasgu Manfurada y el so primu, el sumiciu Patriciu. Punxímonos a charrar al llau del caborniu mientres pimplábamos d'una bota vinu de Pezós pa entoná'l gargüelu y afalá l'ánimu.

-Pues yá andamos nel mes de los ñeros -dixo Patriciu-. Y yá sabéis lo que nos diz la sabencia popular no que se refier a ellos y al ciclu de los páxaros. Un dichu fálamos de Marzu nialarzu, Abril güeveril, Mayu paxarayu, per San Xuan esnalarán y per Santa Marina buscarán la vida. Y otru cuenta que, en Marzu faigo'l niarzu, n'Abril, pongo'l güevín, en Mayu guaro, en Xunu plumo, en Xunetu écholos a pidir con un cestu, y n'Agostu si los veo nun los conozo... 

-Guapo daveres -puntualizó Manfurada-. Y, arriendes del trepe que traen los páxaros iguando ñeros, tamién vemos cómo va espolletando, adulces, la ñatura. Dalgunos árboles, como les cerezales entaínen a florecer, otros van engordando los biltos pa qu'empicipien a abrir...La viesca emprima a esconsoñar. Porque yá escuca ehí cerquina la primavera.

 

-Pues tenéis razón -punxime yo-. Y, diendo a xeres más humanes, ehí tenemos averándose'l día de San Xosé, que suel tomase como finxu de referencia pa  entamala cola temporada de les espiches. Yo yá toi naguando por dir a dalguna pa tastiar la sidra nuevo del añu. Y, si se m'entama, el vinu nuevo tamién, que de too tenemos na nuestra tierra...

 

Y, nesto, sintimos que nos saludaben. Yera Don Quixote de Caravia que venía pa la llende'l caborniu.

 

-Ayó, xente. Veo que tais dándo-y a la parpayuela con ganes -dixo él.

 

-Y pimplando tamién con ganes -contesté yo-. Asina que pues axuntate al aruelu. ¿Hai novedaes pel mundu alantre, hom?

 

-Haber hailes a embute y males. La llaceria de Gaza sigue ehí. Lo d'Ucrania ensin iguar. Con chiflaos perdíos  mangoniando'l mundu...Y ya, en plan más llariegu, con ocurrencies que nun sé si son pa tomales a risa o pa respigase de llercia.

 

-¡Cóime, eso de les ocurrencies nun me cayó embaxo! Cuenta dalguna, Don Quixote. Pero primero vamos echar unos tragos, nun vayamos a empapizanos colo que nos digas -comentó Patriciu.

 

-Pues, pasáu l'antroxu, sigui la comedia na Xunta Xeneral. Debió vaga-yos poco l'antroxada y ellos siguen. Agora escurrieron aconceyar a un grupu que bautizaron como espertos pa ver si paga la pena oficializar o non l'asturianu y eonaviego.

 

-¡Arreniego los degorrios! -glayó entós Manfurada-. Lo de la oficialidá pertenez a bagaxe de los drechos llingüísticos. Y entós agora, reconocer los drechos llingüísticos de la xente asturiano ¿depende d'un puñáu d'espertos, ho? Yo taba na cuenta que los drechos nun se daben o quitaben siguiendo'l petite d'un grupu de persones. Son drechos, reconócense, protéxense, y puntu redondu.

 

-Pues, miániques, que tien migaya la cosa -comenté yo-. Nun imaxino yo tratar d'esa manera drechos como'l de votar, opinar, manifestase,  o los de cualquier persona por razones de raza, sexu o relixón, como nos encamienten los cartafueyos internacionales...

 

-Ya, Xanu. Pero los drechos llingüísticos siempre son secundarios pa los monxures que nos gobienen n'Asturies y pa los cabezaleros d'esos partíos qu'esberriden conseñes favoratibles a la oficialidá, pero que, a la hora la verdá, nin tán nin se-yos espera. Por más que nos pongan la cabeza como un bote, siempre va haber daqué más prioritario pa ellos. Por eso, nesti casu, entamen propuestes que nun tendríen sen si fuere p'aplicales a drechos d'otra mena...-comentó Don Quixote de Caravia.

 

-Pues vamos daos viendo cómo ta'l personal mundu alantre y cómo anden les coses na antoxana de casa...-dixi yo-. A too esto, la caldera de la sencia nun hai manera d'atopala, redióla. A lo meyor hai que llamar a espertos pa buscala. Pero como quexándolo bien tampoco nun vamos 'iguar nada, vamos  siguir amugando'l gargüelu y voi sacavos una garulla pa picar daqué y entoná'l butiellu...

 

Y los mios amigos y yo siguimos pasando la mañana a la nuestra manera y espansionando un pocoñín, que los asocedíos d'esti mundu traidor son p'alloriar too darréu... 

                                                                                

 

El país imaxinariu y los dos cuadonguismos

Andaba yo esta mañana dando una vueltuca pela carril cuando vi averáse tarabicando al busgosu Potrosu y acompañáu pol trasgu Manfurada. Saludémonos y entamemos a da-y a la parpayuela.

-¿Pa ónde empobináis, ho?

 

-Pues pa nenyuri en concreto, tamos dando un paseín pa espansionar -respondió Manfurada.

 

-Y yá de pasu aprovecho pa echar una güeyada pa ver cómo tán les coses per esta zona de la viesca -añadió Potrosu.

 

-Pali que pali, va avanzando l'iviernu camín del antroxu. Supongo qu'un día d'estos va aprucir pequí Sildru'l Guirriu -dixi yo.

 

Y, rediola, si primero lo digo, primero se llanta al nuestru llau Sidru d'un blincu cola piértiga y xingando los cencerros. Entós va y ponse  él:

 

-Pues, mialma, que yá tenemos a la vuelta de la esquina l'antroxu. Asina qu'ando pequí entrenando un pocoñin. Anque ando bien en forma, porque l'antroxu en realidá yá empicipió allá per Avientu y pa lo que vamos ye pal finxu final d'estes dómines de mazcaritos, comedies y aguilandos...-comentó Sidru.

 

Entós sintimos como una héliz y vimos que venía a posase cerquina'l maderñoxiru de Pinín. Posáronse el guah.e y el Gaviotu, que venía con él. Saludémonos toos y axuntáronse a parlotiar.

 

-Pues venimos a visitate, Xanu, porque esti añu yá se puen pañar oricios de nuestro, dempués d'abondos años de veda, y equí'l Gaviotu tráxote una paxa d'ellos pa que los cuezas y dar bona cuenta d'ellos. Asina que yá tardes en descorchar unes de sidra p'acompañar... -dixo Pinín.

 

-Mirái qué bixos de la mar. Velos y ponese a naguar ye too uno -comentó'l Gaviotu mientres nos enseñaba la paxa colos oricios.

 

Nun perdimos nin un segundu más. Enfilemos pa la llende'l mio caborniu, punxi una potona a ferver agua, eché p'allá los oricios y descorché unes de sidra mientres siguíamos echando una rocada.

 

-Esto de movese pela viesca Dayuri, alcontranos pa charrar de les nuestres coses y ponenos a arranar mientres cuecen los oricios sí que ye un país, mialma...-dixo Potrosu.

 

-¿Y por qué t'entró esi rixu patrioteru de sutrucu, Potrosu? -entrugué yo pruyéndome la curiosidá.

 

-Pues porque alluendi de la nuestra viesca hai millones de persones viviendo nun país imaxinariu. Una patria que namás que ta nes sos cabeces y que ye icompatible cola historia, la cultura y les llingües que los arrodien y que consideren gafures pa esi país de so.

 

-¡Hai, hom, ya sé per ónde vas! -respondió Sidru-, tu tas refiriéndose a toa esa xermandía que puña contra tolo que nun concase col so idioma, que consideren l'únicu posible, nin colos sos discursos culturales, que tamién consideren los únicos valoratibles. Ensin escaecer l'enfotu que tienen de mardomar a tolo demás y a remanalo pa frayalo políticamente tamién...

 

-Pues yo camiento qu'estes coses van por folaes. Y anguaño tamos nunes dómines onde los encerrizaos nos sos respeutivos países imaxinarios tán nel cumal de la fola, asina qu'a los demás tócanos ñavegar escontra'l vientu y tratar de nun nos fundir antes d'arribar a puertu cuando, allá de los tiempos, podamos atopar la mar bella -coméntó entós el Gaviotu.

 

Y, entrín y non charrábemos d'estes coses, noté que Manfurada taba entreteníu pasando piedriquines pel furacu de la mano. Entós póngome yo:

 

-A, Manfuradina, véote como n'ayén y despistaducu ehí a lo tuyo... 

-¡Ca!. Nun pienses que nun m'interesa lo que tais diciendo, Xanu. Toi sintiéndovos lo que faláis y pensando tamién. Yo qu'ando caciplando per ende peles cases de la villa adico cómo anda la xente alloriao siguiendo a cabezaleros que tan como auténtiques maniegues. Papando discursos que meten mieu. Ta too tracamundiao enforma y tal paez qu'enveredamos pa tiempos abegosos y pindios...

 

-Coincido colo que diz Manfurada, chachos. Yo que me muevo pel agua y pel aire visitando sitios a magüeyu puedo dicivos qu'hai bien de xente qu'anda envizcao con eses espiriques que nos lleven a un mundu au'l desaniciu de los pueblos y l'arcoxar a la xente son les metes a algamar pelos monxures políticos y económicos de turnu. Una llaceria -amestó Pinín.

 

-Y equí, n'Asturies, la cosa nun pinta diferente. Vamos camín d'acabar estrapayaos por esa folada tarrecible. Siguimos picu abaxo, por nun dicir que cayendo en barrena, simplemente. Tiénenmos bien xuncíos al rumbu del país imaxinariu qu'enxarenten xente foriato y ayeno, pero que cuenta con toles sofitancies posibles ente nós -puntualizó Sidru.

 

-Y empapirotiaos con esi discursu de la amabilidá llingüística, que nun ye má una garduña pa cazar boborolos. Y colo de los cuadonguismos p'acabar de frayanos -dixo Manfurada.

 

-¿Los cuadonguismos? ¿Pero qué ye qu'hai más d'ún, ho? -entrugó entós Pinín.

 

-Pues sí. Concretamente hai dós -respondió Manfurada-. D'un llau'l cuadonguismu de dreches que sopelexa que la nuestra tierra ye'l bierzu d'esi país imaxinariu del que falamos, y que'l nuestru destín históricu ye sacrificanos por él a cosa del nuesru propiu desaniciu. Pero hai otru cuadonguismu d'izquierdes que considera que somos el faru qu'alluma al proletariáu del mundu y la nuestra misión ye tamién sacrificanos pa tener siempre encesu esi faru como prioridá absoluta, arrenunciando a lo nuestro por ser  siempre secundario y perdiendo les madreñes p'andar  al rau de lo que se cuez na capital del reinu, al empar que se refuga cualquier poryeutu fechu con arbíes propies. Al final, dambos cuadonguismos coinciden nuna cosa y que ye andar siempre estelaos y remanaos polo qu'otros entamen per ende p'aculla...

 

Tando nestes, sentimos retumbar en tol monte una voz arrecha y melguera inconfundible que cantaba:

 

"Camín del futuru enfilo

col fatu bien añudáu, 

col enfotu por bandera

y el palu pintu terciáu.

¡Ixuxú! ¡Viva la viesca Dayuri! ¡Puxa Asturies!"

 

Yera Espi la Mariñana. Capiémosla pa onde tábemos nós y entrugué-y yo:

 

-Con tola que ta cayendo, ¿hai enfotu pol nuestru país, Espi?

 

-Si llevamos en fatu otra manera abondo estremada de facé les coses, si nos enfotamos nello, y si camudamos tanta  amabilidá por más palu pintu, igual hai un ventanucu pa l'enfotu, Xanu, quién sabe. Peridfícil lo tenemos, pero...

 

Y ello foi que los oricios acabaren de tresnar. Asina que fiximos posa na nuestra parrafada y entamémosla a saborgalos mientres amugábemos el gargüelu con unos culetinos de sidra, que yá sabéis lo que nos encamienta'l dichu de qu'oveya que berra, bocáu que pierde...