Caminamos Marzu alantre. Hoi vinieron a visitame'l trasgu Manfurada y el so primu, el sumiciu Patriciu. Punxímonos a charrar al llau del caborniu mientres pimplábamos d'una bota vinu de Pezós pa entoná'l gargüelu y afalá l'ánimu.
-Pues yá andamos nel mes de los ñeros -dixo Patriciu-. Y yá sabéis lo que nos diz la sabencia popular no que se refier a ellos y al ciclu de los páxaros. Un dichu fálamos de Marzu nialarzu, Abril güeveril, Mayu paxarayu, per San Xuan esnalarán y per Santa Marina buscarán la vida. Y otru cuenta que, en Marzu faigo'l niarzu, n'Abril, pongo'l güevín, en Mayu guaro, en Xunu plumo, en Xunetu écholos a pidir con un cestu, y n'Agostu si los veo nun los conozo...
-Guapo daveres -puntualizó Manfurada-. Y, arriendes del trepe que traen los páxaros iguando ñeros, tamién vemos cómo va espolletando, adulces, la ñatura. Dalgunos árboles, como les cerezales entaínen a florecer, otros van engordando los biltos pa qu'empicipien a abrir...La viesca emprima a esconsoñar. Porque yá escuca ehí cerquina la primavera.
-Pues tenéis razón -punxime yo-. Y, diendo a xeres más humanes, ehí tenemos averándose'l día de San Xosé, que suel tomase como finxu de referencia pa entamala cola temporada de les espiches. Yo yá toi naguando por dir a dalguna pa tastiar la sidra nuevo del añu. Y, si se m'entama, el vinu nuevo tamién, que de too tenemos na nuestra tierra...
Y, nesto, sintimos que nos saludaben. Yera Don Quixote de Caravia que venía pa la llende'l caborniu.
-Ayó, xente. Veo que tais dándo-y a la parpayuela con ganes -dixo él.
-Y pimplando tamién con ganes -contesté yo-. Asina que pues axuntate al aruelu. ¿Hai novedaes pel mundu alantre, hom?
-Haber hailes a embute y males. La llaceria de Gaza sigue ehí. Lo d'Ucrania ensin iguar. Con chiflaos perdíos mangoniando'l mundu...Y ya, en plan más llariegu, con ocurrencies que nun sé si son pa tomales a risa o pa respigase de llercia.
-¡Cóime, eso de les ocurrencies nun me cayó embaxo! Cuenta dalguna, Don Quixote. Pero primero vamos echar unos tragos, nun vayamos a empapizanos colo que nos digas -comentó Patriciu.
-Pues, pasáu l'antroxu, sigui la comedia na Xunta Xeneral. Debió vaga-yos poco l'antroxada y ellos siguen. Agora escurrieron aconceyar a un grupu que bautizaron como espertos pa ver si paga la pena oficializar o non l'asturianu y eonaviego.
-¡Arreniego los degorrios! -glayó entós Manfurada-. Lo de la oficialidá pertenez a bagaxe de los drechos llingüísticos. Y entós agora, reconocer los drechos llingüísticos de la xente asturiano ¿depende d'un puñáu d'espertos, ho? Yo taba na cuenta que los drechos nun se daben o quitaben siguiendo'l petite d'un grupu de persones. Son drechos, reconócense, protéxense, y puntu redondu.
-Pues, miániques, que tien migaya la cosa -comenté yo-. Nun imaxino yo tratar d'esa manera drechos como'l de votar, opinar, manifestase, o los de cualquier persona por razones de raza, sexu o relixón, como nos encamienten los cartafueyos internacionales...
-Ya, Xanu. Pero los drechos llingüísticos siempre son secundarios pa los monxures que nos gobienen n'Asturies y pa los cabezaleros d'esos partíos qu'esberriden conseñes favoratibles a la oficialidá, pero que, a la hora la verdá, nin tán nin se-yos espera. Por más que nos pongan la cabeza como un bote, siempre va haber daqué más prioritario pa ellos. Por eso, nesti casu, entamen propuestes que nun tendríen sen si fuere p'aplicales a drechos d'otra mena...-comentó Don Quixote de Caravia.
-Pues vamos daos viendo cómo ta'l personal mundu alantre y cómo anden les coses na antoxana de casa...-dixi yo-. A too esto, la caldera de la sencia nun hai manera d'atopala, redióla. A lo meyor hai que llamar a espertos pa buscala. Pero como quexándolo bien tampoco nun vamos 'iguar nada, vamos siguir amugando'l gargüelu y voi sacavos una garulla pa picar daqué y entoná'l butiellu...
Y los mios amigos y yo siguimos pasando la mañana a la nuestra manera y espansionando un pocoñín, que los asocedíos d'esti mundu traidor son p'alloriar too darréu...
