Solsticios y Mazcaraes

Voi pañar unes castañes

allá en monte nuna cuerria

pa facer bonos potaxes

nestos díes de La Vieya.

¡Ixuxú! ¡Viva la Viesca Dayuri!

 

A estes altures, nun fai falta que vos diga quién pue andar per ende, nesti monte, si sientes gargoliar a una muyer una cantarada. ¡Ca! Pues equí toi yo esta mañana soleyera, cuando'l mes de Payares y l'añu van camín de dar les boquiaes, acompañáu de Sidru'l Guirriu, que son les dómines d'él y anda pel monte saltando sebes pa entrenar. Y yá se vien averando Espi la Mariñana p'axuntase a echar una rocada con nós. Saludémosla y siguimos dándo-y a la parpayuela. Asina que póngome yo:

 

-Ayeri foi'l solsticiu d'iviernu. Asina que yá entremos nel ciclu onde la lluz va dir, adulces, apoderando a la escuridá...

 

-Pues sí -dixo Espi-, anque tamos escomencipiando l'iviernu, los díes van dir medrando. Esto de los solsticios dexáronmos una güelga bien fonda al traviés de les civilizaciones que triaron esta tierra y otres munches, mialma, y tovía hai xente que los sigue celebrando. La llucha ente la lluz y les tiniebles. Un fitu qu'enxamás cayó embaxo na historia de la humanidá...

 

-Sí. Y estes dómines au tamos son perespeciales na nuestra cultura tradicional. Tiempu de mazcaraes, comedies y aguilandos. De cambiu de lo vieyo polo nuevo. De naguar porque, pali que pali, vaya creciendo la lluz y acercándose los tiempos onde la ñatura empicipie a esconsoñar -apuntó Sidru.

 

-Reises de Tormaleo y Valledor, Mazcaritos de Rozaes, de Villapañada, Zamarrones en L.lena, Guirria y Aguilanderos en Ponga, Mazcaritos n'Uviéu, Sidros per Valdesoto...y más xente que me queda en tinteru y qu'andechen nesto de recuperar les vieyes tradiciones -añadió Espi.

 

-Pues too ello podemos resumilo como l'antroxu, porque lo d'antroxar nun ye namás qu'allá pa Febreru o Marzu. Emprima agora y espúrrese a lo llargo del iviernu -intervine yo.

-Pues sí, miániques, el solsticiu d'iviernu y les mazcaraes van xuncíos col mesmu lloriame -dixo Sidru-. Porque tamos en tiempos que yeren perabegosos pa les vieyes cultures, onde aprucen el fríu y la ñeve, la tierra nun da, desplácense los animales, y la triba veía más amenazada la so supervivencia. Agüeyando p'aquelles venus acutralaes del paleolíticu pescanciamos la ñecesidá de la reproducción y la supervivencia, lo gafo de la esistencia en tiempos remotos. Mirái mesmamente ente nós a la venus de La Riera, pa la fertilidá de la tribu, o a la de Les Caldes, amestadura de muyer y animal y probablemente tallada nun propulsor pa cazar.Y si adicamos tamién pa les pintures de les cueves y l'arte mueble vemos antropomorfos, figures onde s'amiesten los rasgos humanos y animales, que ye lo que nos llegó a los nuestros tiempos en dellos mazcaritos. Hasta la mesma Vieya cola calavera d'un caballu o una burra afatada con rames y ropaxes paez llevanos en pelondín a ritos tribales. Claro qu'anguaño los significaos que pudieren tener, allá de los tiempos, yá tán despintaos na nuestra alcordanza.

-Tamién veo yo una rocea a reconocer d'ú venimos que camiento que tien que ver col enchipamientu que tenemos nes cultures abondo desendolcaes teunolóxicamente, pero que nun lo tán a otros niveles. Ehí tenemos delantre les nuestres ñarices guerres y xenocidios como parte del nuestru día a día. La barbarie en plenu sieglu ventiún. Pensamos que tolo pasao yera poco menos que propio de xente aburrigañao, pero, según vamos pescudando nello, observamos que nun yera asina pa nada -reflexonó Espi.

-A too esto -púnxime yo-, el pesu de les cultures y creencies ancestrales ye tán bultable, que les mesmes relixones actuales sofítense nelles tratando d'averales pa sigo. Rebautícense zones dolméniques o especialmente telúriques, afítense fiestes nos solsticios...Por poner un exemplu namás, ehí tenemos el llugar telúricu de Cuadonga, que rescampla como bierzu de cultu paganu, cristianizáu cuantisimayá. ¿Y sabéis qué vos digo?. Que pa los mitos como yo y pa bien de xente tamién, estes feches son especialmente afayadices, porque nos xunen a vieyes cultures que dexaron el so ñiciu nes actuales. Recordái mesmamente cuando pa quitar el fríu  a la hora d'echase o pa sanar la mancadura d'un neñu usamos la espresión ¡uxa, uxa! Cualquiera sabe d'ónde nos vien esa invocación pa esconxurar lo que consideramos dañible...

-Pues, falando de lo más mundano, equí traigo una goxa castañes qu'acabo de pañar na cuerria. Y como'l Xanu siempre tien sidrina per ende, podemos amagostales y siguir charrando un puquiñín más -brindónos entós Espi.

A Sidru'l Guirriu y a min paeciónos estupenda la idega d'Espi la Mariñana, asina que punxímonos a ello, que comer, beber y echar una rocada son actividaes bien prestoses, miániques...