Mañana ye 25 de Mayu. Y ye una fecha que rescampla na nuestra historia. Fecha heroica, mialma. Pues yo equí toi, a la entrada del caborniu, arrecostináu nel so tueru y tastiando un cachu de vinu cangués, que m'apurriere ayeri Pachín Boroña un pelleyín d'ello que me traxo d'aquelles tierres de nuestro.
Hoi tenemos un bon baturiciu per Uviéu y Xixón con desfiles militares per tierra, mar y aire. Un avisu pa ñavegantes qu'escaecieren qu'equí quedare too "atado y bien atado" al finar l'anterior réxime políticu.
La historia d'Asturies ye la d'un país a la busca del so Estáu ensin ser pa ello. Tuvimos el nuestru biltu col reinu asturianu. Hebo rebeliones ya intentos secesionistes con Félix Agelaci, Gonzalo Peláez, Urraca...Hebo una revolución nel 34 y un Conseyu Soberanu xunto con Llión mientres la Guerra Civil. Pero...
Y, per entemedies, ta la fecha que vamos celebrar. Cuando un 25 de Mayu de 1.808 la Xunta Xeneral proclamóse Xunta Suprema, declaró-y la guerra a Napoleón, creó'l so propiu exércitu y bandera, mandó embaxadores a inglaterra solicitando ayuda...Unes dómines heroiques daveres, miániques, y que presta remembrar con arguyu.
Tenemos estos díes entamáu un alderique sobre la oficialidá del asturianu y eonaviego. Nun va salir alantre, porque la ultradrecha heriede de la dictadura, que ta frayando les llingües propies ellí onde gobierna, nun va ponese a echar una gabita nesti asuntu n'Asturies. Eso pescáncialo hasta un rapacín.
Pero, magar un día se llograre esa oficialidá, ponese a echar ixuxús sedría andar escabarriaos. Porque la oficialidá abre puertes importantes pa la supervivencia d'un idioma pero, por sigo mesma, nun garantiza esa superviviencia. Arriendes d'ello, apórtenmos ñoticies esmolecedores d'otros países onde los sos idiomes llariegos son oficiales cuantisimayá. Va mal el gallego. Tienen problemes col catalán...
Y ello ye qu'un megollu de la cuestión, que manca al mencionalu, ta n'entruganos hasta qué puntu ye posible la supervivencia d'un idioma minoritariu, de cualquier país, que nun cuente con un Estáu propiu pa sofitala. Porque, vistes les coses a llargu plazu, a lo meyor el problema fondu ta ehí. Paga la pena plantegalo, anque fadie abondo, esgoncie enfotos posibilistes, y nos tiremos de calón nel fontán de lo utópico visto colos güeyos del presente que vivimos.
D'otru llau, tenemos n'Asturies un problema que yá resalvaron notros sitios. Ente nós hai un fuerte discursu ñacional español. Tamién hai un fuerte discursu sociopolíticu d'izquierdes. Pero nun hai un discursu ñacional asturianu. O meyor podría dicivos que sí lu hai, pero que se mueve n'aruelos perminoritarios y nun ye a algamar nin que lu asuman sectores importantes de la población. Y ensin esi discursu, que pertenez a la conciencia oxetiva d'asturianidá y non a la simple afectiva o suxetiva, va resultar casi un imposible sestaferiar un futuru amañosu de nuestro.
Pa detrás, tenemos la llaceria de qu'una parte de la nuestra historia ta remanada pol ñacionalismu español pa xustificase. Ye lo que denominamos "cuandonguismu". Yá persabemos que, como rezaba'l cantar, ensin alcordanza un pueblu nun tien futuru a la llarga. L'únicu camín posible p'afitar esi futuru propiu ye recuperar la nuestra historia robada inxertándola nel nuestru propiu descursu, pero non arrenunciar a ella, como proponen teóricos asturianistes que, a lo que paez, nun saben de la misa la media.
Pues, mialma, tán diseñándonos el futuru xente con enfotos ayenos, amomiándonos con parafernalies d'españolismu alcanforáu y, políticamente, la mayoría de lo que s'entama ente nós acaba zarapicando nel mesmu erru de siempre, acabar al rau de les conseyes que nos sopelexen dende allalantrón.
Y esto ye lo que toi referviendo esta mañana mientres siento barrenar al picutorneru, sonar dalguna esquila alluendi y tastiando vinu del país. Facer el propiu camín. Llantar finxos propios. Tresnar el nuestru discursu ñacional. Pensar en términos d'Estáu, de país, de ñación, y non de provincia resignada y apostalgada.
Cambiar el bichi de llau na bolera de la historia y enfotanos n'iguar otru futuru perestremáu al que nos tán empobinando. O, como mínimo, tener la valentía y coraxe intelectuales y personales de plantegámoslo.
Que paséis un prestosu 25 de Mayu. Haxa salú.
