"Vaqueirina, vaqueirina/la tua braña óndi queda/allá arriba naquel altu/metida pa La Falguera".El pueblu somedanu de Veigas resúlta-y al visitante afayadizu. Unes cases de teitu bien conservaes, horru, una bolera, con merenderu detrás pa la otra mano de la carretera, un bar pa beber o comer, llavaderu y fonte con barcal...Ambiente tranquilu qu'afalaga al visitante. Dende esti llugar ñaz una xubida empluna y acuriosada con una pista hormigonada qu'empobina pa La Falguera. Ablanos, carbayos, o escayos coles mores inda verdes, llenden el camín. Nuna finca, ta pastiando un mulu. Pasa un vecín nun touterrén que s'ofrez a llevanos. Agradecémos-ylo, pero queremos llegar al oxetivu caminando.Vense les finques curiaes, muries y dalguna cabaña. Tamién un colmenar con caxellos modernos d'alces. Magar la distancia a percorrer nun ye llarga, lo pindio del trayectu failu dificultosu, y más enagora si calca'l sol. Les picorotes de los montes, les vistes del fayéu na montaña d'enfrente, l'ambiente de la natura, suponen tou un afalagu pa los güeyos. Y l'aire llimpio anima a alendar fondo pa llimpiar los pulmones.
Cuando, allarribón, les cuestes dexen pasu a una parte más llana del camín, una cabana de teitu asitiada a mano izquierda danos la bienvenida a la braña de La Falguera. Un poco más allá, a mano drecha, hai una fonte col so barcal. Una xaronca pequiñina nala pa guardase de la que m'asomo a él. Mana poco agua y tien puesta nel güeyu una fueya aguantada por una piedrina pa facilitar el garrar l'agua. Esti branu hai abonda seca. Nótase abondo nos praos roxos, en dellos árboles que frutien mui mal y amuesen les cañes seques. Y nótase tamién nes fontes escoses o camudaes en pimpanes febles y nos regatos secos o ríos con poco agua culebriando pente peñes y regodones.
Siguimos caminando unos metros más y yá tamos nel corazón de La Falguera. El paisaxe que se nortia a mano izquierda ye impresionante. Los montes y la fondura de los valles dibuxen una estampa espectacular. Garro los prismáticos y llego a sintir vérigu al ver aquel paisaxe más de cerca. El pueblu caltién tovía dalgunes construcciones con teitu. Avérome a una d'elles y arródiola. Ta bien conservada. Na puerta, una pila cuchu indica que la usen como corte. Observo más lloñe otres más, tamién de cubierta de teitu que paecen bien conservaes. Arriendes d'elles, unes cuantes cases colos sos techos de teya vense bien curiaes por tar habitaes, polo menos dalgunos meses del añu.
Aporta'l momentu de tornar pa Veigas onde quedare aparcáu'l coche. Pero antes hai que dase un gustazu. Cuando llegamos otra vegada a la fonte, agospiaos na solombra d'aquel requexu, echo mano a la mochila y saco la bota vinu. Echo un tragu perllargu escanciáu dende bien alto mientres miro de regüeyu pa los montes qu'apunten pal cielu. Enfrescáu'l gargüelu, entós sí llega'l momentu d'entamar la baxada. Al llegar a Veigas entramos nel bar a tomar unes cervecines bien fríes. Garramos el coche y empobinamos pa La Pola Somiedu. Acércase la hora de xintar. Pero del tema gastronómicu nun voi tratar equí. Sedría una crueldá pola mio parte facer de naguar al llector con un recuentu de la bayura gastronómica que se pue disfrutar per estos llares...
