Matá la fame. Esa esmolición diaria de la xente al traviés de los sieglos.Y ente nós una compañera que llevaron los antiguos atravesando les xeneraciones hasta tiempos bien recientes p'ayudalos a alimentase en tiempos abegosos: la castañal.
La bayura nunca foi bagax de la xente de les nuestres aldees y pueblos. La precariedá, el mirar polo poco que se tenía, el sacrificiu, yera xera cotidiana. Y achisbando ehí cerquina, siempre l'amenaza de la fame.
Les castañales foron a lo llargo de la historia una guaña d'alimentu pa tranquilizar el ruxir de les tripes esfamiaes. Dimir, echar na cuerria, andar de gueta o a la rebusca. Amagostar les castañes, coceles, facer potax, mayucales...
Les castañes tuvieron per munchu tiempu un papel perimportante na nuestra alimentación. Un elementu necesariu y que nun se podía prescindir d'él. Y qu'anició toa una cultura tradicional alredor de la esplotación de los castañeos.
Dempués, ayeri como quien diz, salimos un poco del aforfugu de la fame, remanamos daqué más de perres y fuimos a algamar mayores posibilidaes alimenticies. Y les castañes dexaron de ser aquel elementu importante na nuestra dieta. Colgóse-yos hasta'l so propiu sambenitu calificándoles de madera poco amañoso pa comer.
Y los castañeos quedaron, pali que pali, abandonaos. Y les castañes pa los gochos o nin siquiera pa eso, simplemente dexales apodrigañando o, si acasu, pa los xabalinos que pasen fozando per ende.
Muncho crió la boroña, dicen. Y ye cierto. El refalfiu fai ver coses ridícules, como a la xente mercando castañes foriates y nada barates mentes dan el llombu hasta a los castañeos propios. Y eso que n'Asturies tenemos una de les mayores mases forestales d'esti árbol de tol Estáu. Pero ¡ca!, d'esplotar esa riqueza nin un res, que pa grandonos nosotros.
Ye corriente atopar los castañeos formando viesques mistes xunto a los carbayos. Dambos árboles combinen guapamente. Antaño aprovechábense les frutes de dambos y la madera ye de lo más preciao que tenemos. Podemos atopar nelles tamién a exemplares centenarios camudaos bien de veces en cabornios que tal paecen ofrecenos l'abellugu del so tueru güecu.
Dacuando camines pel monte y agüeyes castañales que sobrevivieron a incendios, pervieyes, camudaes en cabornios como dixi enantes, y con cañes inda vives que dan la so collecha prestosa. Ye toa una gozada atopase con estes supervivientes d'otres dómines. Güeles venerables de la viesca.
Anguaño siguen faciéndose amagüestos n'entrando la seronda. Hasta nos colexos los faen pa los rapacinos y ye prestoso qu'asina seya. Cola sidra'l duernu p'acompañar, claro. Tamién hai un remanecer de la ufierta del potax de castañes, o pa dicilo meyor, de los potaxes que se puen tresnar con elles. Contrasta ello col pocu ciñu que ponemos en curiar los castañeos y col envizcamientu por comprar les d'otros sitios. Son eses contradiciones onde nos movemos dacuando, como nesti casu.
Camiento que cuando penetramos nun castañéu entramos nun vieyu santuariu onde los nuestros antepasaos anduvieron trepando pa consiguir un alimentu que collaboró, en cierta midida, a que nosotros teamos anguaño nesti mundu. Un alliviu nel so día pa la fame, que nun ye poco.
Paga la pena curiar de los abondos castañeos qu'inda tenemos na nuestra tierra. Recuperar la cultura vinculada a ellos, que ye como recuperar tamién una parte de les nuestres raíces. Y paga la pena tamién echase al monte pela seronda a esfrutar d'ellos y a guetar de pasu pa saborgar, por exemplu, unes castañes calentines nes nueches cuando'l fríu yá se dexa notar y fai qu'andemos con ganes d'escalecer.
