jueves, 30 de diciembre de 2010

Lo que yo vi... y un apéndiz de fin d'añu.


Yo vi la mar enchipase, ya'l faru allumar pa guiar a los navegantes, y la espuma arruxidar pallabres de Neptunu pelos bufones.

Yo vi pacer nes brañes al ganáu; a los ferres, les aigles y les utres peñerar pelos cumales, y al pastor esconxurar axorizáu nel vientre de la borrina.

Yo vi los valles y les vegues verdes, les viesques de fayes y carbayos, los texos milenarios, ya'l güeyu l'agua de milenta fontes gorgolitiar pente'l mofu ya'l felechu.

Yo vi a Taranis nel Monsacro, a Lug nel Naranco, a Belenos en Ponga, a Deva en Cuadonga, y a los xamanes sidros arreblagando la cogoruta l'Urriellu.

Yo vi al nuberu, a les xanes, a los trasgos, a los diaños, a la güestia, al pataricu, al cuélebre, al busgosu...

Too eso vilo yo y abondo más qu'inda recuerdo, nun vieyu país d'esti mundu onde un osu mató a un rei y onde los xanos buscamos el nuestru postrer abellugu.
....................................................................
(Apéndiz de fin d'añu).

Magar lo que se fai ye celebrar la entrada del añu cuando suenen les doce campanaes el día 31 d'Avientu, yo, como xanu que soi, espero un pocoñín más. Celebro la so entrada cuando'l Guirria sal a facer el so percorríu siguíu de los xinetes aguilanderos allá per San Xuan de Beleño en Ponga. Ye entós cuando salgo a la puerta del mio caborniu y grito al alto la lleva:

"¡Ih.uh.ú!. ¡Salió'l Guirria!. ¡Entró l'añu!."

Asina que casi yá na viéspora de qu'eso asoceda, voi deseavos que l'añu 2.011 vos apurra un bon aguilandu y que vos pinte afayadizu.

¡Heba salú!.

jueves, 9 de diciembre de 2010

Un atracu.


Cuando Xulín recordaba aquella recortada metanes les sos ñarres inda tremaba de mieu. Diba unos cuantos años un amazcaráu atracárelu na güevería onde trabayaba. Amás del sustu y les perres, aquel sucesu costáre-y el puestu trabayu. Nun fuere enxamás a salir de probe.

Tolo contrario que Damián. Esi amigu de so, pasare de malvivir como llimpiabotes a engolase na bayura. En bien pocu tiempu pasare de vivir nuna casuca d'alquiler a facelo nun xalé bien grande, y de movese n'autobús a guiar un haiga de los que facíen de naguar.

Una día invitó Damián a Xulín a cenar nel xalé. Cuando taben col café, la copa ya'l puru, punxéronse a remembrar vieyos tiempos. Salió entós la espirica de cuando ún trabayaba na güevería y l'otru de llimpiabotes, y cómo dalgunos llograben espolletar na vida y otros nun yeren pa salir de probes... Tando nestes, entrugó-y Xulín a Damián cómo s'arreglare pa endrechar la so vida hasta consiguir nalar na bayura. Y entós Damián contestó-y:

-Echándo-y...¡güevos!-.

jueves, 2 de diciembre de 2010

Catando la vaca.


Siendo un xanu rapacín escuché una historiuca o chiste nuna de les nuestres zones ruales y que, anque la tenga un poco despintada, tovía soi a recordar de qué diba la cosa.

Entrugábase'l relatante en qué se diferenciaba'l tratu del estáu en dellos países pa colos ciudadanos y había delles rempuestes:

-En dalgunos sitios si tienes dos vaques llévateles l'estáu y date él la lleche.

-Notros llugares llévate una vaca y déxate otra pa ti.

-Y n'España déxate les dos contigo, pero... ¡cátateles tolos díes!.

El casu ye que, magar los años trescurríos, paezme que siguen viniendo a catanos les vaques puntualmente y qu'hai tantos empeñaos en vivir tirando del tetu que cualesquier día los probes animales escosen.

jueves, 25 de noviembre de 2010

Neanderthales de madreñes.


Dende rapacín siempre me prestaron les coses relatives a la prehistoria. Concretamente a les que fincaben la edá de piedra.

Col descubrimientu hai años de los restos neanderthales de la Cueva del Sidrón y les anuncies que foron surdiendo de los estudios d'aquel descubrimientu foi xorreciendo en min el rixu por esti tema.

El casu ye que taba yo l'otru día repanchingáu contra'l caborniu practicando'l deporte más masoquista qu'esiste, que como tol mundu sabe, ye'l de dedicase a reflexonar sobre la enfilandrada de llaceries que componen lo que conocemos como Asturies.

Y por estes rareces que tenemos los xanos viénome al maxín una relación ente aquella triba del paleolíticu y los asturianos, alcontrando dalgunes semeyances como les siguientes:

-Ellos teníen una tecnoloxía y organización menos afechisca que la del homo sapiens sapiens. Nosotros tenémosles n'inferioridá a la del homo uniformensis uniformensis.

-Ellos entamaron a quedar arrequexaos y a menguar de poblacion al tiempu que los sos competidores facíen lo contrario. Tamién nosotros vamos quedando arrequexaos y en númberu menguante al empar que los otros s'esparden y medren.

-Ellos acabaron empobinando pel camín que los acabó desaniciando como especie. Nosotros empobinamos con pasu arrechu pel camín que nos pue llevar a suminos como país...

Y cuando taba yo rabilando nestes coses quedé apecigañando. Foi entós cuando suañé que pertenecía a un clan de neanderthales con montera y de madreñes...

lunes, 22 de noviembre de 2010

Reculamos y emigramos.


Durante sieglos vivimos como pudimos, básicamente, del campu y la mar. Del ganáu, de les lloses, de la pesca... En condiciones perabegoses. Con munchu sudu y sacrificiu de los antiguos. Emigrando tamién, porque pa toos nun daba. Y, asina y too, fuimos adulces avanzando.

Aportaron les dómines del carbón ya'l fierro. De les mines y los fornos de fundición. Tamién ehí hebo abondu sudu y sacrificiu. Empecemos, adulces, a pasar de ser tierra d'emigrantes a acoyer xente procedente dayuri, acullá de les nuestres llendes, que vinieron a esti país buscando un futuru. Y, otra vuelta, fuimos quien, pali que pali, pa siguir avanzando.

Yá nos tiempos más recientes, entamaron a esbarrumbar delantre les nuestres narices el campu, la pesca, la mina, la industria... Y nun fuimos quien, o nun quiximos, o nun supimos, axeitar nueves estayes de llabor con puxu pa siguir avanzando. Miremos entós pa les instancies europees y estatales esperando poles mampurres que nos sacaren del pasu'l mayor tiempu posible. Y neso siguimos...

Porque'l casu ye qu'anguaño nun somos atopar endagora'l nuestru sitiu, a enxaretar el nuestru país económica, cultural y políticamente, y a empobinar pacia un futuru afayadizu. Y, otra vuelta, emigramos pa buscar fuera lo que nun somos a construir dientro.

Ye murnio comprobar cómo, tres una enfilandrada de sieglos de sudu y sacrificiu de tantes xeneraciones de nuestro, reculamos y emigramos. Nun sabemos hasta ónde nin hasta cuándo. Pero, miániques, el nuestru destín actual apunta nun aldu que nos lleva p'atrás.

viernes, 19 de noviembre de 2010

Les orielles del Atlánticu.


Onde yo avezo a dir a la gueta hai una finca bien grandona zarrada con muria. Nella destaquen dos fayones pervieyes y bien conservaes. Les úniques qu'hai en tol monte. Tamién se ven los muruecos d'una casa vieya de piedra que, pali que pali, va esbarrumbando. Nesa casa contárenme que se casare un hermanu d'un bisagüelu mio con una moza que vivía ellí y emigraron p'América. Nun foi casu únicu. Per dambes rames de la mio familia cruzaron el fontán atlánticu bien de xente a facer les amériques.

Muncha xente asturiano emigró nel so día col envís de buscar un nuevu finxu'l cielu pa les sos vides. Embarcando nos nuestros puertos pa facer una travesía llarga y abegosa que los llevare a un llugar perlloñe onde intentar refacer la so vida y progresar. Dalgunos d'ellos consiguieron empicorotiase na fortuna y tornaron al so llugar de nacencia amosando la so bayura, los sos haigas... construyeron guapes residencies d'indianos y ayudaron tamién a ameyorar el so pueblu de nacencia. Pero otros, la mayoría, quedaron acullá nel continente americanu ensin poder tornar enxamás perdiéndose-yos el rastru colos años. Dellos tamién tastiaron l'agrín del fracasu y de la chancia. Yeren los "americanos del pote".

D'América aportaron tamién a nós dos productos qu'enraigonaron nes nuestres lloses, ayudando a matar la fame, y que llegaron a ser colos años auténtiques señes identitaries de la nuestra alimentación. El maíz y les fabes. El primeru entró pela primer vez na península al traviés del puertu de Tapia ya inda se conserva l'arca nel que vieno na Casona de los Cancio. Alimentó al ganáu, pero tamién a les persones coles sos farrapes, tortos y boroñes. De les segundes yá nos fala Xovellanos cuando nos cuenta que comiere nuna ocasión fabes con tocín, y col pasu los años fueron a convertise nel platu cimeru en reconocimientu de la nuestra gastronomía: la fabada.

La nuestra patria asturiana nun ye a entendese ensin les sos viesques, montañes y valles. Pero tampoco ensin la mariña y la mar. Y ye que la rosa de los vientos apuntó históricamente nel nuestru país en dos direcciones dambes atlántiques. Un aldu lleva a les orielles del norte al traviés del mar Cantábricu. Ellí atopamos les nueses xermandíes culturales europees, verdes y llentes. L'otru aldu apunta al oeste, onde milenta families de nuestro vieron colar parte de los sos fíos cuantayá. Pero nesti postrer casu, navegando pel mesmu océanu que rebautizáu en mar baña les nuestres costes. Porque pal oeste allúguense les otres orielles del Atlánticu.

martes, 16 de noviembre de 2010

Lleche recién.


Cuando Pericu Pelís vio cozcase a Ramonzón cola so boina terciada y les madreñes de clavos camentó qué patochada cabera-y andaría esnalando pela cabeza.
-Ayó, Pericu-
-¿Qué cuentes, Ramón?-
-Oi, que venía yo pensando si me podrís dar un pintu lleche recién-
-Si, hom, agora te lu apurro-
-¡Ca!, nun fai falta, gárrolu yo-
Y Ramonzón va y enclícase sol caldar de la vaca y entama zucar d'un tetu como si tal cosa.
-A, Ramón, ¿cómo se t'ocurre ponete a mamar la vaca, manín?- remuñó Pericu enfurruscáu-
-Cóime, ye bien práctico y de pasu nun te doi guerra...-
-Mira Ramón, yes un gochonzón y un puzcalabre. Asina que dexa de facer el tonto y yá tas colando-
-¿Qué ye que vas dicime que ta mas llimpio'l lleche que cates cola to mano que la que mamo yo cola mio boca, ho?-
Pericu Pelís nun gorgutó. Echó-y una güeyada como un rayu a Ramonzón que pescanció nel intre que yera meyor marchar d'ellí aína. Pero cuando s'alloñaba entró-y l'aquello y nun foi aguantase a dar la vuelta y retrucar:
-Amás, a la vaca tanto-y da que la cates tu o que la mame yo. Nun sé si cayerás na cuenta que nengún de los dos somos la so nación...-

jueves, 11 de noviembre de 2010

Selectividá política.


Arriendes de ganar unes elecciones, como ye de caxón, pienso que a los políticos que tuvieren d'ocupar los cargos correspondientes nes respectives conseyeríes había que-yos facer un esaminucu. Coses triviales y básiques pa ver per ónde andaben. Un pequeña preba escurro que podría ser la siguiente nel casu de la nuestra institución cimera d'autogobiernu:

-Economía y Facienda: estremar un mileurista d'un multimillonariu.
-Cultura y turismu: dixebrar una navaya de taramundi d'un portaaviones. Dir de Candás a Xixón ensin GPS.
-Salú y servicios sanitarios: curar un granu nel... fornicu.
-Mediu rural y pesca: cabruñar una gadaña y despegar una llámpara colos dientes.
-Educación y ciencia: un dictáu n'asturianu y otru na fala. Calentar una probeta con chisqueru por falta presupuestu.
-Bienestar social y vivienda: pagar una hipoteca col sueldu un paráu.
-Mediu ambiente, ordenación del territoriu y infraestructures: vivir al llau una incineradora y recitar darréu tolos tramos y obres pendientes de llicitar y d'acabar.
-Industria y emplegu: pasar una mañanina nuna oficina del INEM.
-Alministraciones públiques y portavoz del gobiernu: pasar cinco minutos falando ensin soltar una trola.
-Presidencia, xusticia y igualdá: asomase polo menos una vez al día a la ventana pa ver lo que pasa realmente na cai.

Como se ve un esámen chupáu que de xuro diben aprobar toos cola gorra.

lunes, 8 de noviembre de 2010

Buscando un campanariu.


El mio amigu Don Quixote de Caravia, el madreñeru andante y desfacedor d'entuertos, aprució l'otru día cabo la puerta'l mio caborniu xubíu nel so asturcón Rebalbín y afatáu col traxe tradicional asturianu como suel dir él.

-¡Ayó, Don Quixote!. ¿Qué te trai per equí?. ¡Cuantayá que nun te vía!.-
-Busco un campanariu, Xanu.-
-¿Un qué, ho?. ¿Un campanariu...?-.
-Pues sí, oyisti bien. Necesito un campanariu con una campanona de meter mieu pa garrame a ella y facela sonar hasta qu'atorolle, anque me tenga qu'encolingar d'ella y too.-
-¿Y por qué te dio agora por esa venada, hom?-entrugué-y yo un poco preocupáu pola so salú mental.-
-Pues porque vi ayeri acercase al nuberu con una pinta espantible, arreblagáu nuna nubona más prieta que los coyones d'un burru y más gafa que milenta cuélebres famientos, siguíos per una mar de nubes como enxamás viere.-
-¿Y pacia ónde diba con esi exércitu de rayos y truena?- entrugué-y yo entamando a esmoleceme enforma polo que me taba contando.-
-Pa cubrir Asturies de finxu a finxu ensin dexar nin una regallina de bocana. Vien enberriacáu a descargar tola metralla nubera enriba nós.-
-Pero, ¿por qué nos garró de sópitu esa zuna?. ¿Qué ye lo que-y fiximos?-.
-Pues la zuna garrónosla por xostrones, desdexaos ya inútiles. Y a él nun-y fiximos nada. Cenciellamente nun fiximos, nin facemos, nin llevamos traza de facer. Y esti país fúndese na olla más enllamargada y fonda mientres cruzamos los brazos y xiblamos como si con nós nun fuere la cosa. Esi ye'l motivu del so encabritamientu, sigún me comentó cuando-y echare una voz entrugándo-ylo.-
-Pues amigu madreñeru andante, pámique voi acompañate na busca d'esi campanariu con esa campanona descomanada y encolingame contigo d'ella hasta francer el mayuelu de puru cutir. Porque si esperamos porque la xente esconsone y se ponga con remangu a llevantar esta patria esgoncipliada va vaganos, compañeru. Asina que va ser más rentable y rápido buscar la manera d'esconxurar al nuberu, porque sinón la nube que nos va arreflundir enriba va ser histórica...-

Y p'allá empobinemos Don Quixote de Caravia y yo, entainando tolo que pudimos, pero inda nun atopemos campana lo bastante grande como pa tinglar y esconxurar de manera afayadiza la que se nos avecina...

jueves, 4 de noviembre de 2010

El sincretismu asturianu.


Si dalgo caracteriza'l mundu espiritual asturianu ye'l sincretismu cristianu-paganu. De magar va axeitándose'l reinu asturianu, va tresnándose esi sincretismu relixosu que llega hasta güei ente nós.

Los enterramientos de Pelayu y Favila son una bona amuesa d'ello. En dambos casos escoyeron llugaes sagraos precristianos. La ilesia d'Abamia en Cangues d'Onís, tumba del primeru, ta allugada fuera del pobláu nun campu tumular y a pocos metros d'un dolmen anguaño desapaecíu. Nel casu del segundu, tamién la ilesia de la Santa Cruz ta allugada, nesti casu, enriba un túmulu y dende'l so interior pue vese'l dolmen que facía de cámara funeraria. Tamién hai autores que nun descarten que'l llugar de Cuadonga, cuna del reinu, fuere un llugar de cultru precristianu.

Casos de sincretismu tenémoslos abondos si nos ponemos a xurgar nel nuestru pasáu y cultura. Ehí tenemos tamién el vezu d'allugar los texos al llau de les ilesies, o qu'una manera d'esconxurar al nuberu seya tocando la campana de la ilesia. Si nos ponemos a reparar en mazcaritos como los sidros o el guirria ponguetu tal paez que fueren reminiscencies druídiques o de xamanismu.

Tovía anguaño ye bien corriente la utilización de símbolos cristianos y paganos como protección contra los más diversos males. Ehí tenemos les piedres del rayu o la culiebra, les cigües, pero tamién les cruces y les medalles con santos o vírxenes. Llevamos a bendecir el coche a Cuadonga y prendemos calabaces güeques na viéspora de tolosantos. Porque actualmente'l sincretismu de los primeros tiempos onde foi fraguándose'l calter simbólicu y espiritual asturianu sigue vivu ente nós, magar nun nos demos cuenta d'ello davezu.

Poro, una xera bien importante ye acoricar y curiar tou esi bagaxe cultural, esa guaña identitaria que collabora a defininos como pueblu. Cuando por desdexamientu o por zuna, dalguién esborria un dolmen, una capiella medieval, o acaba con un texu centenariu, ta realizando tou un atentáu cultural pa col pueblu asturianu. Y, desgraciadamente, estes actuaciones tán produciéndose con demasiada frecuencia ente nosotros.

jueves, 28 de octubre de 2010

La güestia... más o menos.


Yera'l mes d'Ochobre un sábadu pel atardecerín. Los tres rapazos esmuciéronse, callandino, pa la güerta Fausta y arrampláron-y con una calabaza dexándola bien escondida pal día siguiente.

Yá de domingu entamaron la xera. Fixéron-y un furacu circular na zona'l rau y empezaron a agüecala. Dempués tarazáron-y tres güecos triangulares, dos pa los güeyos y l'otru pa la nariz. Una media lluna colos cuernos p'arriba yera la boca onde espetaron cachos de paliyos pa igua-y los dientes. Llantáron-y per dientro un cachu vela y yá taba tresnada la calavera.

Col atapecer del día amatagáronse nun requexu'l camín que llevaba a la fonte onde avezaben a dir por agua los del llugar. Aquel día taben de güevu. Un puñáu rapazuques enfilaben camín p'alantre parlotiando gayoleres. De secute, empieza a xiringase una sebe, xube una pantasma redonda echando fueu per güeyos y boca y, ente rinflíos y gufíos, siéntese burbusar aquella vozona d'ultratumba: "¡Andái de día, que la nueche ye mía!".

Faltó-yos tiempu a les guah.aques p'aventar calderos, perder madreñes y, ente glayíos, berríes y dalgún qu'otru raspionazu escontra'l bardial, salir xispiando pa casa. Al poco, aportaren muyeres y homes con palos, fesories y tolo qu'atoparen a mano pa contra'l sitiu onde s'apaeciere l'aquello. Pero nin rastru de gufíos, xorrascaes, nin bisarma dalguna. Total, qu'arredonando pa casa.

Al día siguiente foi mui comentáu en tola rodiada aquel sucesu. Coses de rapacetos, seguro. Tamién dalgún vecín tuvo que sentir los llamentos de Fausta por cuenta unos folganzanes -"¡la cuna que los añó!"- que-y furtiaren de la güerta una calabaza guapísima.

lunes, 25 de octubre de 2010

Viaxe al fondu del mar.


El tiempu pasa. La incertidume sigue esnalando nel aire. Endagora nun apruz nada iguao. Entama a caminase sintiendo l'aforfugu.

Caminar sele y con pasu arrechu siempre foi bono. Entainar a última hora tratando d'arreblagar percima lo non iguao suel llevar a sapiazos tarrecibles.

Entamen los avisos pa navegantes. Na Xunta Xeneral puen acabar sentándose los de siempre a la vuelta d'unos meses. Los movimientos, si daveres los hai, han d'empecipiar a aprucir llueu.

Una flota esgonciada tien igua trabayando a comuña nos astilleros del puertu. Tamos inda a tiempu d'axeitala y facela navegable. Pero yá, porque esi tiempu empieza a correr en contra nuestra.

Val más poner d'una vegada'l güeyu nel cartafueyu. Tar sollertes pa que nun funda esa flota a la vuelta d'unos meses por aciu de nun facer los llabores afayadizos a tiempu. Porque d'esgonciada pue pasar a fundida, y una flota fundida yá nun va tener posibilidá de reflotamientu.

Y si nun s'afiten darréu los alcuerdos polos que bien de xente nagua, podemos enfilar el nuestru últimu viaxe políticu que nos lleve al fondu del mar.

jueves, 21 de octubre de 2010

Seriedá y arguyu.


Echándo-y una güeyada a esta semeya antigua podemos reflexonar sobre lo que dacuando consideramos importante o non al traviés de lo que nos tresmiten los sos protagonistes.

Ehí tenemos el documentu fotográficu d'un gaiteru y un tamboriteru d'hai bien d'años en blanco y negro. Aprucen delantre de nós colos sos calzones, la so montera y los sos instrumentos musicales. N'apariencia una pareya músicos afataos col traxe tradicional del país namás.

Pero podemos fixanos tamién na so fachenda. La manera en que s'alluguen delantre la cámara ya, sobre too, nel xestu les sos cares. Nin una sonrisa, nin una moxiganga cómpliz. Una total seriedá como si fueren conscientes de la solemnidá del momentu.

Y esi ye l'aquello del asuntu. Tresmítenmos la postura de dos asturianos identificaos cola imaxen que tán dando. Bien lloñe de les folcloraes paxareres y festexeres. La seriedá del so xestu argutu pa la cámara muéstramos que too yera serio pa ellos, dende los traxes que vestíen hasta los instrumentos y la música qu'interpretaben. Nuna pallabra, la seguridá y l'arguyu de ser dos músicos asturianos posando pa la posteridá.

Toa una invitación a los asturianos que güei heredemos esta tierra, esta cultura, esta llingua y, en definitiva, esta identidá, pa que les tomemos en serio dafechu y non como caxigalines afayadices pal divertimentu y la xirigoncia. Sedría tamién una bona manera de tomanos en serio a nosotros mesmos qu'adeprendiéremos, d'una vegada por toes, a miramos con xestu seriu y arguyosu nel espeyu del nuestru futuru.

jueves, 14 de octubre de 2010

Asturiense.


De mañanina, el grupu distribuyóse caún a realizar la so xera. Dellos homes, empobinaron pa la viesca en busca de daqué pa cazar. Allalantre, pal pielgu del ríu, los rapazos prietu y roxu diben echar los anzuelos col envís de sacar dalgún pexe. Pacia'l pedreru, foron un grupu de muyeres coles erbíes de piedra al llabor de mariscar. Los más vieyos colaron ayuri a la gueta de frutes y raigaños...

Na boca de la cueva, quedare namás que l'home reflesivu. Nortiaba pensatible pa u foren unos y otros. Dacuando, pasiaba coles manes garraes atrás, siempre camentando, parando, observando, otra vuelta caminando. Yera la so xera. Tol mundu tenía de respetar el so xacer. Imaxinaba, argutu, cómo desquiñonar lo algamao y axeitar los llabores del siguiente día. Cavilgaba tamién na manera de tornar cualquier niciu d'insumisión que cuestionare'l so sitiu cimeru dientro'l clan.

Cuando aquella tarde, abenayá, s'adentrare sólu nos requexos más solombriegos del abellugu cola so llámpara de cañamina, entendiérelo too. Aquellos grabaos y dibuxos que rescamplaren a los sos güeyos, viaxando en pelondines dende les coraes del pasáu, burbusáren-y que tenía brenga de cabezaleru.

jueves, 7 de octubre de 2010

Sí hai base social.


Una de les entrugues qu'esmolecen davezu a los nacionalistes ye si realmente hai base social pa sofitar nella un movimientu nacionalista n'Asturies. Yo cuento que sí. Otra cosa ye lo revesoso que pueda resultar aportar a ella. Pero, ¿úla?.

Sigún yo lo veo, hai un sector nada despreciable de la nuestra sociedá que ye l'unicu sitiu onde camiento, daveres y sinceramente, que se pue alcontrar un viveru potencialmente granible tanto de militantes como de votantes pal nacionalismu. Ye un sector hetereoxéneu, pero que caltién unes característiques asturianes y/o asturianistes mínimes coles que s'identifica. Podrán abultar a los güeyos d'un nacionalista estes característiques como daqué importante o como caxigalines, depende de les que seyan. Pero la cuestión ye'l grau d'importancia que tienen pa la xente que les vive y comparte y pescancialo, interpretalo, y actuar acordies a ello. Un llabor que requier dexar los prexuicios de llau y les grandes construcciones de nacionalismu cuasi metafísicu allugaes nel sobráu de lo non urxente.

Esi sector o viveru fórmenlu eses persones que conocemos que manden a los rapacinos voluntariamente a clas d'asturianu, qu'escueyen como la profesión del so futuru ser maestros d'esti idioma, que s'axunten en miles de semeyes dando la cara pola oficialidá, que-yos presta espresase ensin renunciar a usar, anque seyan unos pocos rasgos, esti idioma porque se sienten más identificaos al traviés d'ellos cola so identidá d'asturianos. Pero tamién lu formen abonda más xente. Nunos casos, asisten a los sitios onde hai actuaciones de música asturiana de la más diversa mena. Notros, ciudadanos a los que-yos presta facer semeyes a los rapacinos col traxe'l país, participar en grupos folclóricos, en bandes de gaites, en deportes y xuegos populares de nuestro... Asturianos que nun son a entender una primavera n'Asturies ensin espiches o una seronda ensin amagüestos. Que te dicen con arguyu que son del Sporting o del Uviéu, cuando esperes sentir del Madrid o del Barcelona. Que saben quién son Manolo Busto, Chechu, Samu, o'l Biesca Xixón de h.ockey. Ciudadanos que tienen en casa la nuestra bandera, música asturiana, llibros sobre'l país y/o n'asturianu... Y asina podría siguir con una llarguísima enfilandrada de descripciones de lo más hetereoxéneo y ensin entrar a valorar categoríes nin rangos no importante como yá escribí enantes.

Nesti grupu social allúguense tamién los que te dicen que-yos prestaría qu'equí hubiere un partíu "rexonalista", "asturianista", "nacionalista", como tienen los vascos y catalanes pa que mirare un pocoñín polo nuestro, que ta too abandonao. Cuéntente, tamién d'ellos, que si s'axuntaren toos esos grupos "asturianistes" podríen votalos guapamente. Pero... a la hora la verdá queden en casa'l día les elecciones o voten con bien pocu convencimientu a los partíos estatales de siempre. Porque nun acaben d'identificase col nacionalismu/asturianismu políticos. La conexón, a la hora la verdá falla. Y ehí ta otru pilancu fundamental p'arreblagar. Cómo llegar a toa esta carrapotada nada despreciable de ciudadanos de nuestro.

Y enantes de siguir, quiero dexar nidio que nun toi diciendo que cualquier persona d'esos ámbitos vaya aceptar y/o participar del mensaxe nacionalista asturianu, por mui bien iguáu y espuestu que se presente. Habrálos que sí lo faigan. Pero tamién habrá ocasiones en que namás que vamos dar voces en castañéu. Lo que sí digo ye que tenemos que reflexonar a fondo sobre cuálu ye'l castañéu pal que tenemos qu'empobinar y cómo nos tenemos que mover per él si queremos tornar a casa con dalguna gueta, anque seya pequeña, nel zurrón, y non coles manes llastimosamente vacíes que ye, por desgracia pa toos, cásique una constante histórica nel nuestru nacionalismu. Dambes cuestiones son bien estremaes.

Quciabes dende'l puntu vista de la poca xente concienciao nacionalmente nesti país, esti grupu social, o parte d'él polo menos, vese como una folclorada, como ciudadanos escabarriaos políticamente onde nun paga la pena dirixir el discursu nin gastar tiempu. Y ehí ta un de los grandísimos errores, por nun dicir el gran error y fundamental. Porque esa ye la única parte de la ciudadanía asturiana onde se pue intentar sofitar social y electoralmente'l nacionalismu. Porque esa ye la sociedá asturiana real, la qu'esiste, la que se ve na barriada onde vives, nel supermercáu o la tienda la esquina, nel chigre, nel trabayu... Y ye la única a la que se pue dirixir el discursu y pidir apoyu. Porque nun esiste otra sociedá asturiana nenyures, si acasu namás que nos suaños o na mente de los que viven de contino trancaos voluntariamente nes sos llurigues, nel so guetu nacional químicamente puru.

Y nun queda otra qu'enfotase d'una vez por toes en trabayar con esi sector social. De mano, esguedeyándose por entender cómo funciona realmente, cuálu ye'l so bagaxe simbólicu real respetándolu escrupulosamente, refugando dafechu mancorniar cualquier sentimientu de la mena que seya: dende la ufrienda d'un ramu a la Cruz de la Victoria, dende los vezos llariegos al folklor tradicional. Fuxendo como de la güestia de cayer en despotismos ilustraos queriendo axeitar un futuru pa los asturianos dexando de llau les sos opiniones y sentimientos, otra zuna mui espardida ente nós los que nos allugamos -o eso creemos-nun grau mayor de consciencia y conciencia nacional. Si dacuando se fala de la necesidá de facer una inmersión llingüística p'adeprender bien la nuestra llingua, equí habríamos de falar d'entamar una inmersión social y cultural na sociedá asturiana real, na idiosincrasia asturiana real.

Dempués del respetu, queda una xera revesosa y abegosa. Adaptar el discursu nacionalista a esi sector social importante como pasu previu p'algamar a tola sociedá. Saber qué coses puen guañar en cada momentu y la manera afayadiza y entendible de plantegales. Decatase, definitivamente, que se mueven en coordenaes sociales y polítiques moderaes y qu'hai qu'entamar perhí. Porque una escalera tien peldaños y ye mester dir percorriéndolos toos pa llegar al caberu, por muncho que nos afale l'ansiedá de llegar arriba darréu. Y como punxi va tiempu nun exemplu, un paisanu pue dir guiando un carru unos pasos per delantre de los armentíos y éstos síguenlu. Pero si sal xispiando escopetáu acaba sólu. Dir unos pasos per delantre de la sociedá plantegando alternatives novedoses ye una cosa, y pretender que siga y atalante discursos perellaboraos otra mui estremada.

En definitiva, y pa dir acabando, como dixi al principiu sí cuento qu'hai una base social onde semar l'ideariu nacionalista y consiguir resultaos. Pero hai que saber ú ta y empobinar pa ella. Con abonda humildá, respetu, y enfotándonos en perconocer la realidá dixebrándola dafechu de los nuestros xuicios preconcebíos, y siendo conscientes de que si refugamos esi sector y buscamos sofitar el nacionalismu notros que nun esisten, o qu'esistiendo son yá bien ayenos a esta ideoloxía (militantes y simpatizantes concienciaos dafechu de les formaciones españolistes), tenemos munches probabilidaes d'acabar por nun llegar nenyures.

jueves, 30 de septiembre de 2010

Les fases de la fola.


Los movimientos sociales y les inclinaciones ideolóxiques de la xente vense afectaos, a vegaes y a lo llargo del tiempu, por procesos cíclicos. Puen asemeyar como les fases d'una fola. Dende'l so mayor grandor hasta llegar a ruxir donda como espuma esnidiando na superficie del agua.

Durante la transición al actual sistema políticu y durante bastantes años desque echare a andar la Constitución la reivindicación de les identidaes nacionales de los pueblos qu'igüen l'Estáu vivieron una época d'esporpolle y viéronse con bonos güeyos per abondos ciudadanos, medios de comunicación y clas política. Foi la fase cimera de la fola qu'unos supieron aprovechar y otros -nós por exemplu- non.

Pero nestos últimos años obsérvase un cambiu de tendencia. Les andanaes condenatories hacia les reivindicaciones nacionalistes "perifériques" medraron en númberu considerable. Aperríllase contra elles ensin contemplación dala dende los medios de comunicación más potentes y organizaciones de toa mena. El discursu d'una parte importante de la clas política tiróse de calón a participar nesta cruzada de descalificaciones y demonizaciones. Bucando los apoyos y sopelexando'l so discursu fundamentalmete naquellos países más fuertemente venceyaos al ideariu centralista y uniformizador dientro de los que formen l'Estáu y ensin renunciar a qu'espollete lo más posible naquellos otros onde la mentalidá nacionalista llariega tien más raigañu. De resultancies d'elli, l'efectu sobre la población entama a medrar y dar los sos frutos.

Aportemos asina a los tiempos d'anguaño au la fola va perdiendo puxu y menguando de tamañu. Nos llugares onde nunca tuvo un desarrollu curiosu tal paez que ye un simple fervor d'espuma ensin mayor importancia. Les circunstancies más afayadices pal desendolcu nacional d'años pasaos camudaron nun terrén onde se multipliquen los pilancos y les dificultaes de toa frasca.

Tamos nestos tiempos empozaos nuna dinámica negativa pa les reivindicaciones nacionalistes. Aquelles naciones que nel so día llograren facer, anque fuere en parte los sos deberes, reciben les truñonaes d'aquellos que con bayura de medios puxen por convertir esti Estáu de nuevo na mapa del centralismu y l'uniformismu. Pero les erbíes coles que llograron dotase años atrás sírven-yos pa poder enfrentase al procesu ya inda pa garrar más conciencia de resistencia pa colos enviones a que les tan sometiendo. Nel casu de la nuestra, onde nunca consiguimos afitar un movimientu de defensa del país con brenga y qu'algamare a implicar a grandes capes de la población, la situación vuélvese casi dramática.

Nel nuestru casu, tamos yá somorguiaos nunes dómines onde se trata de valtar definitivamente cualquier pegollu que tenga pola identidá nacional asturiana. Intenten col mayor descaru achaplar la nuestra cultura camudándola descaradamente pol flamenquismu, la tauromaquia ya'l casticismu españolista. Desaniciar definitivamente la llingua llendando los drechos de los sos usuarios mui per baxo de los qu'utilicen el castellanu. Convertir la histórica Xunta Xeneral nuna ximuestra de lo que debiere ser una institución respetable d'autogobiernu que namás que paez tar pa estrincanos a impuestos pa caltener chiringos y enchufes y casi más nada, consiguiendo asina llevantar el refugu de la xente en vez del so apoyu. Y asina un llargu etcétera.

Nestes circunstancies, nun queda otra salida que mentalizase en qu'hai que trabayar n'andecha por consolidar lo poco que consiguimos nestos últimos años axeitar, atropando les poques fuerces y recursos que tenemos pa tornar lo que nos vien encima. Echar una gabita a les organizaciones que trabayen nes diverses estayes de la nuestra cultura. Blindar lo poco que tenemos avanzao nel camín de la normalización y recuperación de la nuestra llingua. Siguir enfotándonos en construir los nuestros propios ámbitos d'acción social y política, pero siempre abiertos a los sectores más dinámicos y argutos de la sociedá asturiana.

Y tener bien presente que toca resistir con más enfotu que nunca. Porque van venir unos años abegosos, con unos emburriones descomanaos pa esbarrumbar lo poco que llogremos construir hasta güei. Vamos atravesar la parte gafa del ciclu. La fase baxa de la fola. Pero nun va durar siempre y dalgún día va volver a xorrecer. Entrín y non, a ver si somos a salir airosos d'estos tiempos visiegos.

miércoles, 15 de septiembre de 2010

Morriere de mieu


Nel colexu, los cures axorizábenlu con degorrios y fueos onde amburar eternamente.

En casa faláben-y de cocos, paparresolles, y manones que-y podíen facer mal abondo na escuridá del cuartu.

Aquella nueche achucóse y nun foi a zarrar güeyu. Toles bisarmes que-y inxertaren nel cerebru entamaron a danzar espantibles alredor de la so cama.

Sudorientu y tremando salió del cuartu y acurrucóse fuera la casa engurrionáu escontra la parede. Yera'l mes de xineru.

Col alborecer alcontrárenlu muertu. Dalgunos vecinos xuxuriaben que'l probe neñu morriere xeláu de fríu.

Pero equivocábense: morriere de mieu.

miércoles, 8 de septiembre de 2010

Misión de salvapatries.


La semeya qu'ilustra esta entrada ye d'un grabáu del sieglu XVIII tituláu Topografía Devota de Cuadonga. Nél rescamplen dos datos.

El primeru'l topográficu informándonos cómo yera'l llugar naquelles dómines y la capiella en forma d'arca madera que s'engolaba na cueva y qu'amburó en 1.777.

El migoyu ta na parte devota. Apaecen afinoxaos cabo la virxen, Pelayu y Favila afataos con armadures fuera d'época.

Xuncir el llugar marianu a la monarquía asturiana nun tien nada raro. Col pasu'l tiempu'l Reinu Asturianu perteniciere al corriellu de reinos cristianos y ye normal. Hasta equí tamos moviéndonos dientro de la nuestra propia historia y del nuestru pasáu.

L'enguedeyu ta en que pudiéremos alcontranos tamién énte una representación del mitu'l cuadonguismu, perconocíu dayuri y que nun fai falta describir. Los asturianos como salvapatries ayenes. Un mesmu raigón que pue pasar de nutrir l'árbol de la nuestra identidá colectiva a facelo d'otru ayenu y hasta contrapuestu al nuestru propiu ser identitariu. Cuestión de quién escriba y con qué intereses la historia.

Esa misión de salvapatries ye un ropiellu qu'endolca tola nuestra historia. Resalvando a Gonzálo Peláez d'imposible encaxe na mesma y a Urraca. Pero pa eso esiste cuantayá una melecina afayadiza: l'escaezu ya'l tapecimientu.

Reculando más allá de los sucesos de Cuadonga hai una época que me fai últimamente rir pola so ridiculez. Ye esi enfotu perpolíticu y marutáu d'arqueolóxicu que fai rescamplar lo romano en tolos llaos. Das-y una patada a una piedra y salte un romanu con cascu, espada y sandalies.

Como equí cada vegada que s'avanza na investigación arqueolóxica afítase la importancia de lo prerromano, otra vuelta a tapecer y escaecer. Paralízase La Carisa, mándase pa un mechinal lo atopao na Campa Torres, etc.

En cualquier etapa que pescudemos, el finxu que guía les actuaciones siempre ye'l mesmu. Los asturianos pasemos de ser unos romanizaos exemplares a salvadores tamién exemplares de la gran patria mesetaria. La nuestra misión sagrada ye la de ser unos salvapatries irredentos de lo ayeno.

Y si too ello tuviere la contestación amañosa por parte de la xente que se supón esmolecío por caltener los pegollos d'esti vieyu país, tovía podría llevase arrecostines hasta ciertu puntu. Pero lo que fai empozar a ún nes tenebres más fondes ye'l camientu de que paez ser bien ñarru'l grupu de xente a la que realmente-yos preocupen estes cuestiones.

jueves, 2 de septiembre de 2010

Una sociedá de cómic.


Dicen dayuri que cuando ún pierde una vaca y atopa un cuernu nun lo perdió too. Y esti dichu abúltame como un bon traxe a midida pa definir la nuesta sociedá.

Somos fáciles de contentar. Con cualquier caxigalina yá guirriamos pente ixuxús. Y la realidá más cruda escondémosla nel requexu más bisiegu del nuestru maxín.

Puen paranos infraestructures, pesllanos empreses, empobinar a miles de rapazos pa la emigración, esfarrapar la nuestra natura, facer xirigoncia de la nuestra cultura y llingua. Porque, magar nos dean como panzorru, miramos lo que nos pasa per delantre les narices con una indiferencia y desdexamientu qu'asusta.

Vivimos nuna sociedá de cómic... cómicu. Afayámonos con ser un simple oxetu de risión permanente. Con unes viñetes dibuxaes por manes foriates que nos igüen un futuru llastimosu dándonos, empara, unes migayines dacuando, sabedores de lo perfáciles que somos de conformar.

jueves, 26 de agosto de 2010

L'orpín cala adulces.

Cuando una colonización se fai militarmente, con presencia física y bélica tol mundu la presencia. Ye posible entós que surda una resistencia ante ella.

Cuando una colonización se fai sele, ocultando o camudando la historia, convenciendo a los falantes de que la so llingua ye inferior y una torga p'avanzar na vida, la so presencia marutada pue consiguir que nun guañe resistencia dala.

Ye, a fin de cuentes, esti últimu casu'l que resulta más efectivu y eficaz p'algamar el propósitu de xuncir a los anexionaos al xugu de los colonizadores. Y resulta una erbía perutilizda dayuri mesmamente nestes dómines.

L'orpín cala adulces. De mano pue paecer un afalagu pal peyellu. Pero al final acabes caláu hasta la caña'l güesu.

Porque cuando nun te das cuenta de que te tan cambiando la historia, la llingua y , en definitiva, la identidá de la tierra a la que perteneces, al final acabes siendo otru ser distintu al que yeres y perteneciendo a otra tierra estremada a la que pertencecieres.

lunes, 23 de agosto de 2010

De calzaos de madera.


La bayura actual que tenemos en mercáu a la hora de protexer los pies ye bien reciente. Antiguamente poques posibilidaes tenía la xente a la hora de vestir y calzar. Nel nuestru país, por aciu de la muga, espoxigaron los calzaos de madera llegando dalgunos hasta güei mesmamente.

Nun voi descubrir nada nuevo nel tema les madreñes. La protección por escelencia durante abondes xeneraciones pa triar per praos, caleyes enfolleraes, etc. La versión que conocemos anguaño con tres tazos y pa calzar con zapatielles ye la más moderna. Y como resulten afayadices pa tener a la puerta casa nes zones rurales o nes cases con corrada onde nun precises cambiar de calzáu pa salir de casa, valió-yos p'aguantar endagora'l tirón de los tiempos modernos y nun desapaecer. Magar les consideremos mui nuestres tamién les usen gallegos, cántabros y lleoneses, ente otros sitios.

Enantes d'elles hebo otres, güei yá en desusu que yeren les llamaes d'escarpín por ser esta zapatiella blanda y tradicional la que se calzaba con elles. Teníen la boca más estrecha y abrigaben más el pié, y en vez de dos tazos alantre llevaben ún sólu en forma de barra corrida.

Pero nun escosen equí les alternatives del calzáu de madera. Tamién hubo ente los nuestros antepasaos el usu del zuecu d'una pieza de madera ensin tacones alantre. Y tamién s'usaron los zuecos fechos a manera de bota o zapatu de cueru con suela de madera, mui tradicionales na vecina comunidá gallega y de los qu'hai tamién referencies en llugares zamoranos.

El "Diccionario General de la Lengua Asturiana" de García Arias muéstranos na entrada "galocha" un significáu atopáu en Llangréu pa referise a un zuecu con suela de madera y empeine de cueru con una argolla metálica que nos recuerda, en cierta manera, a los escandinavos.

P'acabar recuerdo apocayá navegando per internet tener lleío la noticia de qu'un coleccionista pagare unos miles d'euros en Os Ozcos por unes pieces que vendríen a ser un "eslabón perdíu", yá que sedríen una especie de pasu intermediu dende'l zuecu a la madreña.

Herencies gastronómiques


Cuando echamos una güeyada dende la nuestra cultura a otres, delles veces nun pescanciamos lo que vemos y abúltanos raro. Cuando falamos de cultura gastronómica, lleguen a paecenos gochaes lo que comen notros sitios. Y al revés tamién, claro. A nosotros pue paecenos una porconzada rucar inseutos turraos, xintar llargatos asaos y, hasta los cascoxos, nun acaben d'entranos pel güeyu y pel butiellu. Pero al revés tamién pasa, y hai vezos gastronómicos de nuestro que pa dalgunos foriatos resúlten-yos raros y chocantes. Yo decateme d'ello cuando comemos esos productos de la mar polos que tenemos una especial querencia: llámpares, oricios y bígaros. Nos dos primeros casos, polo menos, nun se da esti vezu en tolos llaos. Hai zones onde los refugen simplemente, notres consúmenlos como escarrapios a falta de daqué meyor, y casi en nengún llugar tienen l'enfotu por consumilos que se da n'Asturies.

Y, ¿d'ónde nos vendrá eso?. Pues yo soi de los que piensa que na historia hai ocasiones en que, cuando una cultura s'esfarrapa y pasa a ser sustituida por otra, nun lo fai dafechu. Queden, anque seyan unes pingarates, que consiguen asitiase na cultura viniente y entren a formar parte d'ella. El casu ye qu'hai unos milenios allugóse na nuestra fastera centru-oriental una cultura que, arriendes de cazar y recoleutar, prauticaba enforma'l marisquéu. Les entraes de les cueves u s'abellugaben quedaron cásique tapaes pol balagar de cáscares y restos de les llámpares, oricios, bígaros, etc. que consumíen. Conozse como la cultura "asturiense" por mor d'una arbía qu'inventaron, el picu asturiense, que munchos consideren que valía pa desprender les llámpares de les roques. Hasta se fixeron esperiencies nesti sen y paez que ye un aperiu perafayadizu. Dempués fervíen l'agua echando nello regodones en caldia, cocíen lo mariscao y... a xintar.

Asina que, cuando entramos nun chigrín pa celebrar el ritual, que ye como hai que lo llamar falando acordies, de sentanos a la mesa, cola botellina sidra a un llau y la potina llámpares tresnada pola mano afechisca d'una guisandera de les que nun consideren l'aire como un manxar comestible, destapámosla y echamos unes cuyaradines en platu, y volvemos a tapala pa que nun s'esmuzan nin los vafos nin el calor, tamos repitiendo un vezu ancestral y prestosu a esgaya. Anque a los güeyos d'un turista en bermudes, chancles y gafes na tenyera que nos mira ablucáu dende la barra, pueda paece-y que tamos prauticando una gochada y tuerza'l focicu. Diferenciámonos de los padres del inventu nel sitiu onde comemos y de los instrumentos qu'utilizamos pa enllenar el papu. Pero coincidimos con ellos no fundamental: acabar rellambiendo los deos y el focicu. Y, a lo meyor tamién, y con perdón, n'echar un rutiu confirmando l'aprobación del nuestru estómagu ante'l regalu recibíu.

domingo, 15 de agosto de 2010

Xixón, les sardineres, y l'alcordanza pesllada.

El recuerdu que tengo más afitáu nel maxín de cuando, yá dende neñu, diba a Xixón ye'l del vieyu puertu pesqueru de Cimavilla. Los barcos y les llanches de los pescadores. L'arrecendor a salmoria. La rula col so traxín. Y les sardineres asitiaes cabo d'ella vendiendo'l pescáu recién rulao.

Pero los tiempos cambien y eso que llamen la modernidá fixo que nun primer momentu prohibieren la venta ambulante de pescáu desaniciando'l vieyu oficiu de les sardineres. Dempués treslladaron la rula pal puertu d'El Musel. Y dende entós dalgo fondo cambió na mio manera de ver el barriu pixuetu xixonés. Hasta tal puntu que, magar el tiempu trescurríu, entá nun soi afayame del too cuando caleyo pel actual puertu deportivu. Faltame daqué.

Afortunadamente, una parte d'esi daqué atopélu hai bien d'años cuando visitaba'l muséu allugáu na Cá Xovellanos. Nel so sobráu pudi ver la obra escultórica de "El Retablu del Mar" de Sebastián Miranda. Delantre los mios güeyos espolletaron con tol so esplendor les imáxenes d'antaño. Ellí taben de nuevo la rula, los pexes, les sardineres, la xente... los propios vecinos del barriu fixeren de modelos pal autor. Sí, delantre mio tenía l'alcordanza más playa pesllada naquel cuartu d'esposiciones.

Asina que cuando dalgún foriatu m'entruga ónde pue ver dalgo típico de Xixón siempre-y contesto:

-Pues dir a dar una vuelta per Cimavilla pa ver los oríxenes de la ciudá. Y dempués pues visitar na Cá Xovellanos El Retablu del Mar pa entender la so esencia, el so corazón y la so alma-.

domingo, 8 de agosto de 2010

La Pantoja estrella central nel Día d'Asturies.


La tonadillera Isabel Pantoja va ser la estrella central de les actuaciones que'l Gobiernu Asturianu tien previstes pa festexar la celebración del Día d'Asturies qu'esti añu va celebrase en Ribeseya.

Na celebración onde debiere ensalzase lo autóctono, la nuestra identidá colectiva y la nuestra personalidá cultural como pueblu, los nuestros gobernantes escueyen esta actuación y otres más ayenes dafechu a los raigaños identitarios del nuestru país como resumen afayadizu de too ello. Y conste que nun critico a los cantantes en sí, sinón al marcu escoyíu pa les referíes actuaciones.

Esti proceder rocambolescu y esperpénticu pue debese a varies motivaciones. A botaboléu ocúrrenseme dos:

La primera, que ye tala la ignorancia xunida al despreciu de lo que ye Asturies que tienen los nuestros gobernates que-yos paez de lo más normal y natural tresnar la fiesta d'esa manera.

La segunda, que quieran facer arrémente una provocación y una ofensa polo menos a aquella parte de los asturianos más sensibilizada cola defensa de la so identidá cultural y llingüística. Nesti casu nun soi a entender qué beneficiu puen sacar de too ello.

De toles maneres, y seyan les que fueren les razones, tamos ante una auténtica mofla que de xuro va ferir les sensibilidaes d'abondos asturianos.

jueves, 5 de agosto de 2010

La Batalla Opositora.


La tripulación a les órdenes del capitán Aspirante observaba esmolecida cómo'l barcu dirixíu pol almirante Tribunal avanzaba hacia ellos dispuestu a esñizalos.

Con una maniobra artera, el barcu de Tribunal púnxose-yos a estribor y, de sutrucu, cuspió-yos unes andanaes d'entrugues que a piques tuvieron de desarbola-yos el barcu.

Pero lloñe d'acuruxase, la marinería d'Aspirante respondió con otra andanada de rempuestes que dexó unos desperfectos nel buque enemigu asemeyaos a los qu'él fixere nel de so.

Foron hores dures y heroiques nun día qu'amaneciere soleyeru pa dir camudando en nublu por aciu de tanta pólvora entruguera y fueu rempuesteru. Y tamién hores de sudu amatagáu baxo cares d'aparente valentía como sacaes d'una partida de campeones de póquer.

Al final de la xornada, les víes d'agua repartíense pelos cascos de dambes flotes, los palos valtaos igualaben aquel macabru xuegu de bolos y l'agotamientu facía estragos ente les tripulaciones.

Y entós foi cuando permedió na batalla'l mercante del grumete Bedel que tres una vibrante pedricazaña convenció a los bandos combatientes pa retirase a puertu y reanudar la batalla al día siguiente...

viernes, 30 de julio de 2010

El "bolu berza".

Antiguamente había boleres dayuri. A esgaya. Había delles nes corraes de los chigres. Boleres, xuegos de llave o de rana, yeren l'entretenimientu enantes qu'entraren de trebolén les máquines tragaperres.

Una tarde soleyera del branu y, a falta de daqué meyor que facer, un grupu mozacos empobinemos pa ún d'estos chigres que a lo último acababa en corrada con bolera. Pidimos unes bebides y dalgo pa merendar y entamemos a xugar a los bolos. (Entamaron, que yo nun participé pensando que podía mancorniar a daquién).


El casu ye que nengún tenía muncha idega de tirar a la cuatriada. Asina que si una bola nun algamaba'l castru, diba pa delláu, pa onde fuere, y mui poques baltaben dalgún bolu, que ye lo normal cuando se ta como un xo nesto como en cualquier otra cosa.

Pero si nun quedare namás que neso... Lo peor ye que la bolera llendaba con una güerta bien curiosuca naquél mes del añu. Y tamién foron boles a embute pacia ella. Y entós sí que s'armó una bona estroza. Esnalaben les berces, glayaben les fabes ya imploraben perdón les llechugues.

Yo miraba de regüellu pa la barra'l chigre por si a la dueña y daba por dir pa la corrada, pero por suerte eso nun pasó.


Asina que, al final, paguemos, salimos y, de sutrucu, entainemos a carrenderes lloñe d'ellí. Los mios collacios acababen d'inventar el "bolu berza", una modalidá qu'enxamás llegó a federase. Coses de los tiempos. Si ye güei a lo meyor entra pela puerta grande de la xermandía de xuegos y deportes autóctonos.

jueves, 29 de julio de 2010

Toros y nacionalismu.


Fierve estos díes el tema de la prohibición de los toros en Catalunya. El bombardéu mediáticu ye descomanáu y la xente na cai y nes tertulies trata del tema.

Llámame l'atención el númberu de xente que, de sópitu, se fixo taurino n'Asturies. Dalgunos toi por apostar que nun vieron una feria d'estes na vida. Tando nuna tierra como ye la nuestra onde esta actividá nun tien vezos afitaos y que siempre dexó bastante de llau'l tema, anque sí tien places de toros au celebrar corríes.

Detrás d'esti alderique hai dos cuestiones. La prohibición fíxose na comunidá catalana per aciu d'una votación parllametaria. Una votación democrática. Ganaron los contrarios a esi espectáculu y puntu. La otra cuestión ye'l xaréu montáu alrodiu del tema. Porque detrás de tou esti baturiciu ta lo que munchos consideren l'acosu y derribu d'un de los buques insignia del nacionalismu español: la "fiesta nacional".

Y ye dende esa perspectiva dende la que m'encaxa'l fervor taurín que a bien d'asturianos-yos entró de sutrucu estos díes. Catalunya ye una de les besties negres del nacionalismu español y l'aquello de les corríes de toros ye un tema en bandexa pa mete-yos dialécticamente como panzorru. Nun país tán políticamente españolizáu como'l nuestru nun ye nada difícil entós entrar a esi trapu.

De toles maneres, pienso que lo importante ye dir algamando ámbitos onde la bautizada "fiesta de los toros" vaya reculando. Un espectáculu sangrientu que yá refugaren asturianos ilustres como Xovellanos o Tiadoru Cuesta. Pero ún espectáculu que, apoyáu con fondos públicos, sigue potenciándose n'Asturies, magar seya deficitariu.

Tamién quiero recordar pa los más desmemoriaos que l'enemigu más gafu de la nuestra llingua y cultura -incluyida la potenciación de los toros nel nuestru suelu- nun ye'l nacionalismu catalán, sinón el nacionalismu uniformista y escluyente español. Nun se trata d'andar con mimetismos nin al rau de naide. Simplemente saber estremar del llau de los que debemos tar en casos tán concretos y puntuales como'l que nos ocupa.

miércoles, 28 de julio de 2010

Odisea playera.


Salir de la viesca pa dir pa la mariña tien les sos complicaciones. Pasen coses curioses y a manera d'anécdotes podríamos apelucar dalgunos prototipos de la xente que va ún atopando perende.

Podría entamar pol aquello de la xingadera. Hai xente que debe pasar un secañu de les partes baxes pel añu de meter mieu. Tal paez que-yos entra'l rixu cuando tán nun cuartu d'un establecimientu hoteleru. Asina, a les tantes de la nueche entamen los iñíos, ruxir de metálicos, xuxurios... al alto la lleva, ruios de grifos que s'abren, pisaes ensin final, la televisión echando fumu... Y, claro, el resultáu ye que te dan una nueche de velea.

Dempués podemos siguir pola xente enfotao nos comportamientos gregarios. Baxes abondo ceo a la playa y tas como nun ermu tu solu. De sutrucu, apaez una tribu de güelos, padres, fíos, amigos de los güelos, amigos de los padres, amigos de los fíos. Y toos acarretando un badaxe increyible: artiluxos hinchables de toa mena, tables, hamaques, sombrilles, calderos, abellugos tipu cámping... ¡la de coyer, hermanu!. Y como tienen tola playa pa ellos solos van y arródiente a ti, chísquente, échente arena, tienes qu'aguanta-yos toles babayaes qu'escurren y, al final, fáente fuxir en retirada pa otru sitiu mas tranquilín, que ye cualquier otru porque como dixi la palya taba erma.

Una variante curiosa de los gregarios tenémosla nel restaurante. La xente amontónase nél a partir de les tres de la tarde. Entós vas tu a les dos y tas solín y tán guapamente. Siénteste onde te peta a tomar una cervezuca y lleer el periódicu mientres escurres el menú a pidir. Pero, ¡rediósla!, sientes una voz que te diz: "Perdón, un momentín". Y ante la to incredulidá tienes delantre al tontu l'argoma que tien tol comedor pa él solu y que nun atopa otru sitiu onde ponese que espalda con espalda contigo na mesa d'al llau, asina que nun te queda otru remediu que correte p'alantre hasta menter el bandullu pel cantu la tuya...

Tamién hai individuos percuriosos. Como esi trasuntu del yosoiespañolespañolespañol que, por aciu del triunfu de la selección española de fútbol, va siempre con una camiseta collorada del equipu. Fíxeste que na espalda lleva un númberu col nome d'un xugador. Hasta ehí too bien. Pero coincide que'l puntu aveza a parar pel mesmu sitiu ondu vas tu a tomar pela tarde una caipiriña y cayes na cuenta que siempre lleva esa camiseta con esi númberu y esi nome a la espalda. La conclusión ye cenciella. O tien varies camisetes iguales, o'l porconzón nunca cambia de camiseta. La manera de comprobalo ye acercándose a él pa ver cómo arreciende. Pero yo niégome en redondo y quedo cola dulda pal restu la mio vida.

D'otru llau tan los folixeros gochonzones. Tas tranquilamente cañicándote nes sensaciones d'un atapecer perguapu cuando llega un coche. Salen unos cuantos d'él y abren el portón traseru cola música al alto la lleva a manera de discoteca ambulante. Entamen entós a rular les botelles y los bocadiellos y la fiesta, baratina y apañada, yá ta iguada. Marches pa otru sitiu y al cabu d'un bon tiempu tornes y yá tán acabando la xarana. Dexen abandonaes, bolses, lates, botelles, vasos... de la que marchen avienten pela ventana otru par de bultos más en dirección al pedreru. Repares entós que a unos venti metros onde taben había una papelera nueva del paquete allumada mui bien por una farola. Pero percorrer esa distancia debe ser un sacrificiu enorme pa cierta xente y prefieren semalo too de puxarra.

Al final ente estes y otres milenta peripecies vas caminando un día per una zona onde reconstruyeron ún d'esos fortinos antiguos qu'habia nos nuestros puertos a manera de defensa colos sos cañoninos vieyos y too. Éntrate la ramalada y abráceste a un cañón gritando como un posesu:" ¡fueu a los tufadores d'hotel , a los gregarios de playa, a los gochonzonos, a los...!". Y ye entós cuando va arremolinándose la xente cabo tas tu d'esa traza mirándote con cara pena como pensando:" ¡mirái, el probín chifló!". Dempués llega'l coche los municipales y etc., etc., etc.

El restu del relatu queda ente'l mio siquiatra y yo...

miércoles, 21 de julio de 2010

Le Tourmalet


Nunca foi pa escecer aquel primer día de xineru cuando fixo d'aguilanderu a caballu tres del guirria en Beleño. Sobre too la última parte del percorríu cuando diba yá frayáu de tantes hores enriba la siella y nun alcontraba manera dala de siguir montáu nella. Fuere tou un supliciu que-y costó andar dellos díes escocíu, doloríu y esbragáu. Una auténtica fazaña.

Tampoco nunca nun escaeció cuando pocos meses dempués participó en Le Tour de France. Como ciclista mediu y en llabores de gregariu, acabar esta gran preba yá lo consideraba un triunfu. Pero lo que nunca imaxinó ye que se diba convertir nel héroe de la etapa reina. Porque aquel añu ganóla nuna galopada en solitario pa escontra'l cumal de Le Tourmalet.

Pero'l sacrificiu mayor de la etapa foi nos dos últimos quilómetros que-y probecieron toa una vida. Entamó a sentir cómo se-y aformigaba y machucaba tol aquello y nun yera pa sentase de manera dala nel sillín. Tenía que pedalear de pies na bicicleta ensin ser pa sofitase nél. Recordó entós lo que-y pasare cuando l'aguilandu y tomó una decisión heroica, acordies col altor de les circunstancies y de la etapa: diba aportar a la meta sí o sí, y se se tenía de sentar facíalo y puntu. Como si en llegando teníen que lu llevar en parigüeles. Taba dispuestu a apechugar con ello. Arreventáu, resquemáu y fechu una llaceria ganó la etapa reina en Le Tourmalet y coronóse como rei consorte del ciclismu esi día llogrando facer historia.

Anguaño, yá retiráu, tien colgaes nuna parede de la so casa una siella de montar a caballu y la bicicleta cola que llograre la so xesta. Cuando dalgún conocíu o hasta dalgún periodista-y entrugen por aquella parexa tán chocante qu'espón con arguyu, siempre-yos arrespuende:

-Con esa bicicleta corrí Le Tour de France. Y con esa siella gané la etapa reina en Le Tourmalet.-

domingo, 11 de julio de 2010

La cofradía.


La historia del asturianismu modernu ye la d'una constante dixebra en cofradíes nalando y puxando por convertise en referentes. Referentes de toa mena, lliterarios, políticos, culturales, etc...

Cada cofradía entámase de manera que resulta abondo impermeable a los que son ayenos a ella , anque nun heba per entemedies nenguna engarradiella nin enemistá manifiesta. Asina si la cofradía ye del mundu la cultura, los non cofrades tienen la puerta pesllada con cualquier xida. Si ye d'escritores, esbrexen por atropar los sos sofitos y subvenciones pa dir publicando les sos obres y lleéndose ente ellos. Si finca na estaya política, yá rescampla dende antiguo como funcionó y funciona'l tema.

La primer consecuencia d'ello ye lo pindiu que se-y pon el camín a tou aquel que nun perteneza a cofradía dala. Camuda entós nun vagarientu que si tien enfotu en trabayar en dalguna xera namás que-y queda intentar entrar nuna de les cofradíes qu'andechen nella o dar el picu rabucu nel aire d'intentar montáselo por llibre, teniendo nesti últimu casu que procurar andar col güeyu argutu por si l'aquello de les truñonaes de los que ven nel so llabor competencia pudieren valtar el so proyectu.

La segunda consecuencia ye convertir l'asturianismu nuna llosa cuchada onde xorrez con bon xeitu'l noxu. Un noxu, un tarrecimientu terrible, que fai a los que zarapiquen nellos qu' acaben por abondonalo too y colando pa casa dexando por buelga un borrón afumando d'ilusiones y trabayu qu'enxamás van llegar nenyures.

Y la tercer consecuencia abondo previsible ye que l'asturianismu como movimientu tien torgaos tolos ramales. Al final tantos referentes nun lo son en realidá de nada. Y los filos culturales, llingüísticos y políticos siguen remanándolos los de siempre cola apegadiella de que cualquier proyectu integrador y anovador choca col estatus establecíu y acaba quedando ente dolco y la media manga.

sábado, 10 de julio de 2010

El Clan Tatomal.

Abenayá escribía yo nesti pergamín d'esa xente que piensa que vive nun país llamáu "Tatobién" pola mor de que too-yos abulta tar guapamente anque les nubes echen obleros en vez d'agua.

Pero esos individuos tienen el so contrariu. Porque tamién abeyen pente nosotros otra xermandía a la que-yos resulta imposible que-yos guste daqué, puñen escontra cualisquier propuesta de la mena que seya, y pasen tol día reburdiando y, si cuadra, tola nueche tamién.

Da igual lo que-yos propongas. Nunca s'acampen con nada. Refúguenlo too, porque pa ellos ye too puxarra. Si lo qu'hai ye xota, enfocíquense. Si-yos ofreces fandangu, enfurrúsquense. Si-yos averes moñica pónente la mesma cara que si-yos apurres boroña. Nunca nada nun-yos val. Nos casos más engrifaos, militen activamente por valtar cualquier proyectu constructivu que se-yos ponga a la vista. Y formen el correosu y puzcalabre Clan de Tatomal.

Construir con esta xente ye tán abegoso, por nun dicir tán imposible, como colos ababoriaos del país de "Tatobién", anque nesti casu pertenezan al clan xustamente contrariu al de "Tatomal". Al final unos y otros tóquense ya'l resultáu de la so actitú ye ximielgu: nun hai manera posible de cambiar un res les coses. La única diferencia ye que mientres unos sonríen impasibles, los otros enfurruñen y echen gafures pela boca.

Claro que nel casu de los "Tatomal" muestren un comportamientu contradictoriu a manera d'apegadiella que los distingue. Cuando les coses pinten mal, nun caen en nengún estáu de complacencia o conformismu, sinón tolo contrario: glayen, espatuxen, quéxense y afuéguense en mares de llárimes ante la impotencia de camudar un res les coses. Porque quexalo fáenlo bien, miániques. Eso sí.

Pero lo que nun quieren entender, o nun son realmente a ello, ye que'l so posicionamientu d'aperrillar tolo que se-yos pon per delantre ye precisamente'l que favorez que les coses sigan siempre igual, y que los que nos mancornien a unos y otros, sigan faciéndolo tranquilamente. Porque a esos que tán ehí arriba dándonos a diario como panzorru, tanto los sos refugos como les sos llárimes y llamentos, en casu de da-yos dalgo, ye la risa.

jueves, 8 de julio de 2010

Axustar el pasu.



Siempre recuerdo esa imaxen, cuando nos pueblos xuncíen, de ver al carreteru dir unos pasos per delantre la parexa acoyéndola. Nin enriba'l xugu nin allalantrones. A la distancia xusta y axustando'l pasu. Nin parando los armetíos nin saliendo a la carrera onde nun lu diben siguir. Y cuando pienso cuála sería la manera más afayadiza de realizar un trabayu novedosu, cabezaleru , y llograr que te sigan vienme a la memoria esta semeya del carreteru.

Camiento yo que tou proyectu que a títulu individual o colectivu s'entame col envís d'ufiertar dalgo vanguardista y novedoso nuna sociedá, requier dir unos pasos per delantre de la mesma procurando que vaya moviéndose adulces nel sen que lleve a los oxetivos plantegaos nél. Pero ye ésta una xera bien difícil y que requier dosis grandes de sabiduría, conocimientu de la realidá y saber trabayar nel somantu d' una colectividá. Ye mester acertar cuándo se pue entainar y cuándo hai que ralentizar el pasu. Cuándo se pue arriesgar y cuándo parase a consolidar les posiciones algamaes.

Y ehí reside la cara amarga de la utopía y de los plantegamientos más nobles. Delles veces sucede que, enfotaos nes nuestres meyores intenciones, marafundiamos los nuestros proyectos al nun ser a tornar que'l corazón nos cuerra per delantre de la razón y a querer marcar un pasu que los demás nun siguen. Acabamos asina poniendo'l carru delantre los gües y comprobando cómo los nuestros esfuerzos acaben en sucu baxeru.

Saber atopar el pasu adecuáu pa que la demás xente nos pescancie y acompañe, y tener el xacíu y sabiduría necesarios pa saber empobinar xunto col nuestru entornu nel sen que lleve a la realización d'unos proyectos de vanguardia que vayan en porgüeyu de toos, ye una de les asignatures pendientes de los qu'inda nos esmolecemos por acutar un futuru a esti esgonciáu país.

lunes, 5 de julio de 2010

Llevanto'l mio cachu y brindo...


Apocayá escribía nesti blogue alrodiu de les torgues que-y punxeren dende la Conseyería de Mediu Rural a una bodega canguesa pa etiquetar un vinu de so n'asturianu. Pese a ello, Bodegas Obanca sacare al mercáu'l so productu con etiquetación namás na nuestra llingua.

Pero agora los palos vinieron d'otru llau. Nada menos que'l Conseyu Regulador del Vinu de Cangas vetó a esta bodega la so asistencia a la IV Feria del Vinu de Cangas. Esixía-yos que taparen les etiquetes n'asturianu pa poder asistir, cosa pola que nun quixeron pasar estos viticultores quedando fuera de la muestra.

Ún de los llabores d'esi Conseyu debiere ser potenciar los vinos cangueses tanto dientro como fuera d'Asturies. Pero tamos delantre del típicu casu onde dalgunos prefieren perxudicar intereses comerciales, económicos y d'imaxen, enantes qu'aceptar l'usu de la llingua asturiana. Porque lo único que ta consiguiendo'l citáu Conseyu Regulador ye perxudicar gravísimamente la imaxen del vinu cangués a los güeyos de munchos asturianos favoratibles al emplegu normal del idioma asturianu.

Hasta tal puntu tán consiguiendo engafentar, tanto la Conseyería como'l Conseyu, esta situación que yá hai xente declarando públicamente que si nun-y ufierten el vinu represaliáu "L.lumés" prefieren consumir otru foriatu (rioxa, ribeiro, etc.). Camiento que por bien de tol sector tendríen que tomase les midíes afayadices pa iguar y reconducir esta situación tan grave como esperpéntica.

P'acabar ye de destacar l'actitú de la citada bodega enfotándose en sacar el so productu etiquetáu n'asturianu porque "nun tenemos nada qu'esconder" sigún comenten. Asina qu'alzo'l mio cachu y brindo por ellos y por tola xente que se niega a dar el brazu a torcer cuando-yos quieren poner pilancos nel so drechu democráticu d'usar esta llingua que dellos quieren desaniciar del usu normal y cotidianu, absurdamente, en plenu sieglu XXI.

martes, 29 de junio de 2010

Entamu, santu Pidrín...

Entamu, santu Pidrín,
nesta fecha siñalada
relatánduti con pena
dellus temas que nun paran
de frayanus ya condena
tal paez que nus tocara.
Col asuntu de lus peixis
quiaru agora escomenzar,
pos a la flota pesquera
nus la quixerun deixar
comu llanchonas baleras,
todu por mor que las cuotas
emperrárunsi en menguar
y cozcábasi la fami
a lu zorru pela mar.
Sigu agora cola crisis,
esa bisarma fadiada
que nus cuti de continu
ya la facienda nus cata
hasta deixala a la probi
comu una vaca escosada.
Dicin lus que d'estu intiandin
que ya culpa de monxuris,
d'oligarquías financiaras
que nus roin comu muris.
Peru dispuás tamián dicin
que pa matar la foguera
la xanti más probi tienin
qu'acostanciar cola xera.
Ya paizmi, con perdón,
que nun ya cousa axustada
que lus que nun tianin culpa
acarritin la sapiada.
Noutru sen acontecéu
na política, entamada
la espirica d'esti llau,
que... ¡nun acontecéu nada!,
pos la rutina de siampri
aquí ordena ya manda.
Lus de la izquierda plural
siguin faciendu'l badanas
ya'l país peresgonciáu
ensin igua nin aidanzas,
que naidi nun quier garrar
las riandas pa enderechalla.
Estus días de p'atrás
truxerunnus la disgracia
de milenta inundacionis
de llosas, cais ya casas,
qu'outra vuelta deixóu xanti
na mesma ruina fincada,
¡tal paicía que'l Nuberu
nus la tuviari xurada!.
Agora qu'abocanóu
a ver si l'ayuda algama
apaciguar la llaceria
a la tola xanti afeutada.
Muchas más cousas, Pidrín,
podría enriastrar de llau,
peru de xuru yá qu'iba
deixati abondu cansáu.
Asina que vou finandu
si ti paez esti escritu
ya vou a facellu echandu
a della xanti'l gabitu.
Rifiárumi a lus collacius
que naguan pola xuntanza
qu'andan de cutiu enfotáus
n'algamala, ya si cuadra
qu'asocidiari'l milagru
(camiantu asina llamalla
polu mal que pinta'l tratu)
na Xunta entrar pola puarta
xuntinus ya de la manu.
Escaicíasimi tamién
didica-y unas pallabras
al aquellu de la llingua
de nuastru, llingua asturiana.
Mira ver, santu patrón,
si hai manera d'ayudalla
porqui políticu dalu
lleva trazas d'entamalla
d'una vegada con xeitu
pa curiosina deixalla.
Ya agora sí que yá acabu
esta riestra mal rimada,
desiandu de guai nun añu
que tornemus tar en danza.

miércoles, 23 de junio de 2010

Les amapoles.

Pachu siempre foi más de pueblu qu'una amapola. En pueblu nació y en pueblu se crió. Y yá un poco mayolón empobinó a vivir pa la City.

Desque trió la urbe y cambió de residencia camudó él tamién de personalidá. Entamó a dir d'aquello que los sos vecinos en pueblu llamaben "finu", refugó la manera que tuviere siempre de falar, pasó a llamase de siguío Don Francisco, y trató en toles ocasiones de que nun se-y notare procedencia dala que nun fore la villandiega. Asina que cuando dalguién-y entruga d'ú ye siempre respuende que de la City.

Hai ocasiones en que lo pasa realmente mal. Porque esmuzse-y dalguna espresión llariega, o dexa escapar dalgún niciu que lu delata como nacíu fuera del sitiu del que presume ser y del que s'enchipa, como si fuere asina superior al restu la plebe.

La última vez que lu atoparon nun renunciu foi durante'l pregón de La Regalina. Ellí taba Pachu ente'l públicu sintiendo falar na faliel.la y aplaudiendo a rabiar. Foi entós cuando lu picaron pela espalda y al volvese vio al so vecín del pisu d'al llau. Cuando-y entrugó qué facía ellí respondió colloráu y apapiellando que venía namás que a pasar el día de turismu.

A les poques hores, pel atapecer, salió Pachu como a escondidielles de casa so madre, nun pueblín cercanu al llugar onde-y dixere al so vecín que fuere de turista, camín de la City. Diba mirando pel retrovisor como roceanu de que daquién lu siguiere descubriendo, d'esta miente, que les amapoles fueren les sos compañeres de xuegos de cuando neñu.

jueves, 17 de junio de 2010

Los tres artesanos.


Ello yera una vegada un cuélebre gafu hasta velo y dexalo. Tenía axorizaos a tolos habitantes de la contorna. Dacuando, desapaecía dalgun papáu pol animalón y la so cadarma apaecía espreganciada díes dempués peles caleyes.

Un día la xente del llugar aconceyó y decidió escoyer a tres vecinos pa que-y dieren un boroñu preñáu d'alfileres al cuélebre y desaniciase asina d'él. Escoyeron pa ello a tres artesanos:

El primeru yera un gran tallador de bilordios.

El segundu yera un gran texedor de llevantos.


El terceru yera un iguador arteru de ximuestres.

Reuniéronse los tres escoyíos y decidieron tresnar el boroñón preñáu d'alfileres y desquiñonalu en tres partes iguales que repartiríen pa ente ellos, col envís de que nengún mosquiare de la so misión contra'l cuélebre.

Cuando taben na so casa, acuruxaos pol mieu a la xera que teníen encamentada, escurrieron mandar caún el so cachu de boroñu marutáu como una sabrosa llambionada a otru d'ellos p'añusgalu. Dempués simularíen que los matare'l cuélebre y que namás que sobreviviere ún como un auténticu valiente, magar nun algamare'l so oxetivu.

Fixérenlo asina y morrieron los tres. El cuélebre pudo d'esta miente siguir cola so actividá sanguinaria per munchos años ensin que naide nun-y punxere pa ello torga nenguna. Sicasí, dalgo camudó nel comportamientu del espantible ser. Sigún cuenten los más vieyos, enantes del sucesu de los tres artesanos, el cuélebre avezaba a xiblar pela nueche de manera que facía respigase a tolos vecinos. Pero dempués cambió los xiblíos por unes carcaxaes descomanaes que facíen tremar a les mesmes coraes de la tierra.



miércoles, 9 de junio de 2010

Sobre un vinu cangués.


Cuando escribo estes llinies falten unes hores pa que se presente un nuevu vinu cangués de nome L.lumés. Ellaboráronlu nuna empresa familiar llamada Bodegas Oubanca. Arriendes de tar tresnáu con una variedá d'uva autóctono lo que rescampla curioso ye que'l so etiquetáu ta dafechu en llingua asturiana.

La parte negativa d'esta anuncia ye que dende la Conseyería de Mediu Rural punxéron-yos torgues pa etiquetar na nuestra llingua esixendo que lo fixeren billingüe. Pero l'enfotu d'estos viticultores llogró la denominación namái en llingua asturiana. Qu'una conseyería del gobiernu asturianu anteponga les sos zunes llingüístiques al tema económicu y de difusión d'un productu asturianu ye pa nun lo creyer, pero cierto.

Queda entós da-yos la norabona más candial a los productores y esperar qu'entamen a rular les botelles comercializaes pa mercales y prebar un bon vinu de la tierra de xuro.

domingo, 6 de junio de 2010

Trabayar, comer, vivir.


Cuando'l cachicuernu de les monxures berra ye pa echanos a tremar. Nel so día atorolló pal sector del lleche y a pesllar. Apuntó pa les mines y a trancar. Más recién tocó pa les pymes y bolera desarmada. Agora mesmo apunta pa los pixuetos del pinchu y flota a pique.

Pero tranquilos. Los milenta chiringos clientelares siguen de pies. Los amiguetes colocaos a deu contemplen cómo-yos xorrez el bandullu enfilandrando fartures. La castra de vividores de la política marafundiando les perres que nos caten hasta escosanos la corexa y refalfiando na bayura.

Dempués allóriennos con qu'hai crisis y tenemos qu'apechugar con midíes xabaces que nos van dexar esglamiaos económicamente (¡más entá...!). El mundu'l trabayu nun ye'l responsable del esbarrumbe xeneral, reconocen, pero ye'l que tien qu'escorniase pa iguar la situación. ¡Claro, hom!. ¡Yá t'oyí, navaya!.

Díba cuantayá que nun se cotizaben tán a la baxa ciertos drechos. El drechu a trabayar tomáu a moxiganga. El drechu a comer peñerando como una bisarma d'un pasáu que contábamos fináu. El drechu a vivir dignamente camudáu nuna cruel y auténtica risión.

jueves, 3 de junio de 2010

El síndrome Pintaius.


Lo nuestro por defender intereses ayenos vien de vieyo. Yá la estela de Pintaius, signifer ástur al serviciu de Roma, paez que nos marcare'l camín.

Unes vegaes enrólennos en causes ayenes y nun gorgutamos. Otres somos nosotros los que nos enrolamos, a costa fecha, en proyectos foriatos.

Ta claro que carecemos de falta d'enfotu en nosotros. Cada vez qu'intentamos tresnar daqué propio ponemos los güeyos lloñe esperando qu'otros nos lo faigan o guíen.

Tal paez que nos diere una enorme llerza sacar los nuestros proyectos coles propies fuerces de nuestro. Y asina vamos. Siempre a remolque de lo qu'entamen los demás.

viernes, 21 de mayo de 2010

Un país surrealista


Entrugábame unos post atrás nesti blogue si había país. Si realmente la xente de nuestro taba pol llabor de participar en dalguna andecha na defensa de lo propio.

Escribía tamién nesti blogue apocayá sobre la posibilidá de facer un 25 de Mayu unitariu reduciendo l'esfuerzu a convocar a la xente nel mesmu llugar, día y hora ensin roblar manifiestu dalu y cásique ensin necesidá d'aconceyar pa llamar a la concentración.

El resultáu d'esto último yá lu sabemos. Caún pel so llau faciendo oyíos sordos al deséu de bien de xente. Y una contradicción clara. Porque una de les enseñances d'eses dómines que se remembren ye la de la capacidá de xuntanza de los asturianos frente a un enemigu común.

Sigo entrugándome güei si hai país como va poco. Tengo dulda de si la nuestra ciudadanía taría dispuesto a apoyar proyectos bien axeitaos y unitarios. Claro que mientres nun se dea la posibilidá d'igualos y presentalos dayuri nun voi atopar la rempuesta.

Onde yá entamo a afitame ye nel convencimientu de que de manera organizada non, nun tenemos país. Namás qu'un garrapiellu d'actitúes afondando cada día más nel surrealismu.

miércoles, 19 de mayo de 2010

Democracia


Quiciabes enantes de teorizar sobre abondos de los temes que nos tienen enartaos de contino y sobre los que construimos auténticos castiellos na playa y axeitamos increibles discusiones bizantines, vendríanos bien reflexonar sobre la base: el conceptu que tenemos de democracia y de demócrata.

Porque nesti país de nuestro, hailos que piden abiertamente'l pieslle de blogues porque refuguen lo que lleen nellos y considérense demócrates. Otros recurren al insultu porcaz pa defender los sos planteamientos ya idegues y tamién se consideren demócrates. Tamién hai dellos qu'alcagüeten y difunden gayoleros el bilordiu, la calumnia y tou tipu d'integrismos escluyentes siempre que los que los llancen seyan de "los míos".

Pienso que cuantisimayá'l nacionalismu asturianu carez d'un claru déficit democráticu. A lo meyor tamos enguedeyándonos no secundario y escaeciendo lo principal, en finxu de partida. Y nun descarto qu'esa seya una de les razones de pesu a la hora d'analizar por qué esi nacionalismu nun espoxiga.

Escurque arriendes de planteganos xuntances y pasar día tres día estremando y discutiendo sobre nacionalismu, asturianismu, izquierda, derecha... vendríanos perbién facer un altu nel camín y entamar pol principiu: dixebrar ente lo que ye ser demócrata y totalitariu. Y miranos al espeyu pa ver en realidá de qué llau tamos realmente más cerca toos y ensin esclusiones.

viernes, 14 de mayo de 2010

Que nun nos echen la comedia.

Hai comedies prestoses y qu'animen a dar la mampurra y too. Por exemplu les que salen a representar precedíes polos sidros. Tamién se puen presenciar comedies prestoses nos teatros pa esfrutar d'elles y pasar un cachu entreteníos.

Pero la xera comediante nun escosa nos casos anteriores. Hai dayuri otres comedies que nun cuaquen gota. Son les que s'empeñen n'echanos esos que s'afayen como gatos del fornu dientro'l réximen clientelar que padecemos. Nun fai falta dir lloñe pa presenciar esti tipu moxigangues. Tenémosles y abondes equí, a la puerta casa.

Xente amagando contra'l réximen de contino pa nun dar nunca. Esprecetándose y arruxidando contra él puntualmente pa dempués nun gorgutar hasta la siguiente comedia que toque echar. Arrogantes solidarios qu'ufierten el so cuellu amorosiegu a los mancorniaos pa dempués esfrutar de les prebendes de los solmenadores. Atechaos varios en chiringos clientelares vendiéndonos grandes llogros que namás qu'ellos son a ver... Unes comedies que yá dan noxu de puru repetitives ya falses. Que cafien y empalaguen.

Y yá va siendo hora de dir dexando les mázcares pal antroxu. Equí o flin o flan. O xota o fandangu. O trabayar pa facer país y ponese daveres del llau de tantos ciudadanos asturianos que lo tán pasando realmente mal, o alcagüetar a los que los frayen. Falar con fechos alto y claro y siendo coherentes d'una vegada por toes. Dexase de comedies y patagüeyos pa la galería y muncha más seriedá y compromisu verdá pa cola tierra y los ciudadanos de nuestro.

sábado, 8 de mayo de 2010

Conocer pa reconocenos.


Conocer y recuperar la nuestra historia ye un trubiecu afayadizu pa qu'espollete la conciencia d'ú venimos y de quien somos.

Neto a lo que podemos consiguir si conocemos y ponemos procuru en conservar la nuestra cultura material ya inmaterial.

Porque historia y cultura son dos armentíos que tiren pel carru au llevamos el nuestru bagaxe indentitariu.

Y como fitu que rescampla d'una manera especial ehí ta la nuestra llingua. Esa manera propia ya intresferible de ver el mundu y d'espresalu.

Afondar nel conocimientu de lo ferial de la nuestra tierra ye la manera más afechisca de reconocenos. Y, en reconociéndonos, ser pa llantar los pegollos que nos lleven a remanar los destinos del nuestru país, que son los nuestros.

El nuestru mañana pue entamar guapamente un día como güei. Escaeciendo aquello que nun lleva nenyures. Faciendo borrón coles vieyes zunes y tracamudios. Escoyendo un finxu'l cielu pa onde podamos toos, ensin esclusiones, empobinar.

Enfotándonos en que nun futuru, de la collecha surdida del más fondu y arrogante conocimientu de lo nuestro y de nosotros, seyamos a iguar una andecha con tiez qu'enconte y garantice la pervivencia futura d'esta vieya nación.

viernes, 7 de mayo de 2010

El pan que se fala

El pan que se sema.
El pan que na andecha s'amesoria.
El pan que se muel y fai fariña,
que s'amasa y formienta na masera.
El pan que se tresna
arroxando con carbayu'l fornu.
El pan que s'ornia y ufierta nel ramu.
El pan del llar y de los antiguos.
El pan que se vive.
El pan que se fala.
Porque, ensin fala,
nun hai pan.

(Nel XXXI Dia de les Lletres Asturianes)