Cartafueyos (I): El desaniciu nacional d'Asturies.

Asturies ye un país que va camín d’empezar a dar les boquiaes dende’l puntu vista d’una comunidá diferenciada. Alcuéntrase actualmente nun estáu críticu de pervivencia de la so identidá nacional.

Munchos sieglos y xeneraciones trescurrieron de magar allá pel sieglu octavu entamare a facer galanes una de les naciones más vieyes d’Europa. Pasemos pel feudalismu, pela revolución industrial, per monarquíes absolutes, repúbliques, dictadures, democracies, guerres, tresformaciones sociales bultables… pero’l climen del país yera siempre reconocible.

Y eso cabero ye lo que ta esfaraguyándose güei. Esbarrumbando. Los trazos identitarios asturianos despíntense, esbórriense, van sumiéndose pali que pali nel olvidu ya’l desconocimientu. Y eso ye, precisamente, lo que dixebra la nuestra situación actual de la d'otres dómines. Enfilamos pel camín de dexar de ser, identitariamente, nacionalmente, asturianos.

Hai nietos que nun se reconocen gota na cultura y llingua de los sos güelos. Hai fíos que yá nun falen l’idioma col que los añaron les sos madres. Hai una parte mui importante de la nuestra población que desconoz dafechu hasta los referentes más ñarros en cuestiones territoriales, históriques, culturales y llingüístiques de la tierra onde nacieron y/o onde viven. Too ello ye una evidencia que rescampla.

Tamién hai xente “consciente” de la so asturianidá. Con una idea d’Asturies que va más allá del sentimientu primariu y afectivu. Ven esti esbarrumbe y reconocen que la so patria lleva camín de nun s'estremar de la castellano-española nun plazu de tiempu cada vez más curtiu. Pero’l so llabor, enxaretáu dende yá va tres décades, nun foi quien, enagora y pese a esfuerzos pervalotatibles, a evitar la cuesta abaxo de la identidá asturiana.

Camiento que tornar esa estroza nacional ye una xera prioritaria, urxente ya inaplazable. Una prioridá y una urxencia absolutes nel llabor de trabayar pol y pel país de nuestro porque’l tiempu xuega yá escontra d’una manera qu’aforfuga y estiñaza. Y yá'l güercu empieza a presentase na ventana del nuestru futuru colectivu.

Poro, nun nos queda otra salida qu'axuntar tolos esfuerzos de nuestro enfotándonos nesta auténtica prioridá colectiva si nun queremos dexar de ser, definitivamente, un país con personalidá clara, propia y diferenciada. Porque la sentencia del final de la vieya nación asturiana yá ta redactada y namás que-y falta sellu y firma pa cumplise. Y esi sellu y esa firma yá vienen de camín, acolúmbrense n’horizonte y nun van tardar abondu tiempu más n’aportar a nós.

Comentariu postelectoral del 25M.

En plenu fervor d'una investigación sobre un casu de corrupción que cinca a políticos y altos cargos de l'alministración asturiana con xamones volanderos incluyíos la fuerza más afectada por tola movida va y gana la repetición de les elecciones autonómiques teniendo la posibilidá de formar gobiernu, anque pa ello dependa de los movimientos negociadores postelectorales.

Lo que lleva camín d'afitase otra vuelta con fuerza ye'l réximen clientelar y chiringueru a poco que funcione eso que yá simplificando vien llamándose "El Duernu", comederu singular onde participen dende sectores sindicales, a empresariales, pasando por políticos y medios de comunicación. Talo paez qu'Asturies ye'l país onde nunca pasa nada y, si pasa, mui pronto echen a funcionar los mecanismos pa tornar cualquier intentu de cambiu.

El FAC perdió escaños, pero nun esbarrumbó de la manera escandalosa que dalgunos pensaben que diba asoceder y consiguió caltenese como la segunda fuerza política n'Asturies, incluso cola posibilidá de formar gobiernu de nuevo, anque pa ello ye imprescindible que del enantes citáu Duernu s'aparte ún de los sos principales fozadores.

Sapiazu importante'l del PP. Sigue ensin bicala n'Asturies y paez que lleva camín de perder per munchu tiempu'l pulsu por ser la fuerza mayoritaria del centru-derecha asturianu. Queda per debaxo del FAC y eso ye claramente  un resultáu permalu que xuníu al desgaste que va tener el so valedor nel gobiernu central  pue llevar a la llarga  a  que parte del electoráu que creyó na so remontada por aciu de los bonos resultaos que consiguieren nes xenerales vaya sofitar al so principal rival nesi espaciu políticu nos prósimos comicios autonómicos a la vuelta de tres años.

Ésitu de la UPyD que consigue entrar na Xunta Xeneral con un representante y que, dependiendo del recuentu del votu emigrante -datu que desconozo al escribir estes llinies-, pudiere incluso convertise na llave del prósimu gobiernu.

A la coalición IU pintáron-yos les coses realmente bien. Xuben un escañu y consolídase como primer fuerza a la izquierda del PSOE dempués d'una época en que bien de xente camentaba que podría entamar un ciertu esboroñamientu. La salida del sector que representaba'l Bloque vese que nun-yos afectó un res. Tamién paez que ye la fuerza a onde van parar los votos del asturianismu d'izquierda, comparando los sos resultaos colos de les fuerces que, dende fuera de la representación na Xunta Xeneral, esbrexaben por ocupar esi espaciu.

Son precisamente eses fuerces qu'acabo de mencionar otres de les más perxudicaes nestes elecciones con una pérdida perbultable de votos que dexa nesti momentu ente dolco y la media manga les espectatives de crecimientu social y electoral y prácticamente nuna utopía llograr la entrada na institución cimera del autogobiernu asturianu a la vuelta de tres años.

Y, en llinies xenerales, asina ye como veo yo lo asocedío nesta convocatoria electoral. Queda por saber daqué tán importante como qué xuntanza de fuerces va ser la que nos gobierne nestos años vinientes. Pero too paez indicar que la política asturiana nun va sufrir mayores cambios en comparanza colo que veníamos observando hasta güei.

Sólo me queda finalizar esti comentariu copiando y pegando la particular felicitación electoral que colgué del mio muru en facebook. Porque, si bien se presenten les coses bastante enguedeyaes anguaño, polo menos l'humor que nun nos falte...

[FELICITACIÓN ELECTORAL.
"Señor don Pedro Solís,/el que tien é nes corades/un macón de sacaberes/y un camberu d'allacranes;/el del Mayuelu con zunes,/si non quier que i lo llame,/pieza de Baldeburón/que sal bien , pero ye tarde;/alferi mayor d'Uviedo/q'anque pese á quien pesare,/puede metese á conceyu/sin quitar les sos polaines..."
("El Caballo". Francisco Bernaldo de Quirós. Sieglu XVIII).]

Desertores del llar.

Acoyendo la pareya caleya alantre canta'l carru. Acullá ruxen esquilones. Allalantrones siéntese cabruñar. Esparde'l so ruxerrux la viesca. Siéntese'l chóquele-chóquele d'unes madreñes. Y ayures la xera diaria: catar, llendar, sechar... Nun ye un pasáu remotu dalu. Casi que ye l'ayeri mesmu de nuestro, d'abondes families de nós.

Hai un pasu qu'abonda xente nun ye pa dar. Camuda pa ellos nun reblagu que los esbraga. Preséntase-yos como un abismu tarrecible que los atarraquita de medrana. Entós acurúxense. Nun escaecen pero puxen por aparentar qu'escaecieren. Que nun diba con ellos. Que son puros urbanites. Villandiegos, polos y amnésicos a costa fecha.

Aporta entós el refugu de l'alcordanza y l'escaniellu. De la lleche que cataron y de lo que mamaron. De la llingua que falaron ya inda sedríen a falala si la llerza a revelase como lo qu'en realidá son nun fuere una güestia espantible, una manona que los aforfuga na nueche quitándo-yos la fala materna, la cultura de los suyos y la vergoña.

Ente los que lo vivieron y anguaño-yos da perceguera tresmitilo a los fíos arrenegado d'ello y los que yá nun lo vivieron pero heredaron esi autoodiu son una lexón, una brañada espantible, un ensame gafu que s'abelluga no foriato arrenegando de lo propio. Desertores del llabiegu, del somantu que los añó, de la tierra que los alimentó, de la llingua llariega, de la fonte que solivió'l so secañu.

Una historia murnia que taraza les vides y enfotos d'enforma xente nesti país. Porque vivimos nel país de los avergonzaos de lo propio y acomplexaos pol rescamplar falsu de los bixos que-yos xiringuen ante los güeyos los espertos en tresnar suaños falsos y realidaes podres.

Y perende abeyen n'ayén, voltiando'l llombu a los sos raigaños, naguando por fundir otros raigones nuna tierra que quixeren fuere anovada esborriando tou escatafín del pasáu, pero que sigue alitando, porque sigue siendo endagora la de los antiguos, magar col pusu yá mui feble. Y esa ye la so conderga y penitencia. Podrán enchipase y presumir de guiar un coche pimpanudu, falar "fino" y aparentar ringorrango,  pero no fondero de la so conciencia persaben que dayures, nun requexu verde y afalagáu pel sonsón de pimpanes y regatos, foron unos de tantos que caminaron  sintiendo cantar un carru.

Motivación.

Aquella mañana onde ponía'l güeyu allugaba'l banzón d'aceru. Nel concursu de tiru con gomeru, Vicente acertábales toes. Les bases teníen un aquello que les facía atractives pa él. Tirábase a unes lates de cerveza vacíes, y cada una que valtares yera pa ti en forma de lata enllena.

Y Vicente enxareyaba gomerazu tres gomerazu y lata tres lata. La xente plasmaba arreguilándose naquel fenómenu de la puntería. Los xueces del concursu mirábense con cara empapirotaos ante aquella exhibición. Al final, de diez tiros otres tantes lates llevaba con él de troféu, arriendes d'otres diez más de mampurra y d'una xarra de cerveza alemana policromada y con tapa metálica que-y correspondiere por ser el ganador.

Enxamás naide nun diba imaxinar que cuando practicaba na corrada de la so casa malpenes yera a raspiar una lata o un miserable tiestu colos que practicaba y mira que los tenía grandonos. Entrenando, Vicente yera malu hasta velo y dexalo.

Pero dempués de la descomanada demostración de puntería acabante  realizar nel concursu "Latina que tires, cervecina que bebes", quedaba bien claro que lo de so yera un cenciellu problema de motivación.

Un Home Gayasperu.

Siempre fuere un home gayasperu pa coles muyeres. Gayasperu y bragueteru. Presumía de que nun hubiere moza a la que se cozcare y cola que nun consiguiere... l'aquello.

Pero como a los mozos galantiadores tamién-yos llega'l so samartín acabó casándose. Eso sí, cola moza más galana y que facía de naguar a tolos mozos de la rodiada. Y nun sólo se casó, sinón que tuvo hasta siete fíos con ella.

Esto tovía lu enchipaba más porque presumía de ser un sementalón pistonudu. Cuando se cruzaba con dalgún vecín dicía-y farrucón:

"Manín, l'ala de la montera y la minga d'un home tienen que tar siempre bien p'arriba".

Poro, una de les coses que más chocaben a un foriatu cuando aportaba al pueblu y conocía les andances y'l potencial amorosu d'aquel auténticu gallu de la quintana yera que lu conocieren pela contorna col nomatu de: "el de los fíos del sacristán".

La herencia que perdimos.

La historia contemporania de nuestro ufiertónos trabayu col espoxigue mineru, siderúrxicu ya industrial, pero con un pesu bien bultable inda del campu,un caltenimientu de l'actividá pesquera y crecimientu del sector servicios. Atopar trabayu n'Asturies yera posible pa los llariegos y acoyíamos mano d'obra d'otros llugares.

Al empar y, xunío principalmente al trabayu nes estayes del carbón ya'l fierro, esporpolló una conciencia reivindicativa y una capacidá de resistencia bultable que fixeron, con munchu esfuerzu y llaceries, dir algamando unes condiciones llaborales y salariales cada vegada más dignes. Y con ello una cultura de la reivindicación y resistencia a les engataes y inxusticies nel mundu del trabayu.

Tábemos nun va tanto moviéndomos dientro d'estos finxos cuando entamó un esbarrumbe xeneral, con tala capacidá d'entainar, que, casi nun Xuasús me valga, dexónos el nuestru texíu productivu fechu una llaceria. Los nuestros puertos foron dexando los espigones p'acutar abellugu a embarcaciones deportives, el sector de la lleche quedó esfelpeyáu, la minería y la industria entamaron a esnidiase picu abaxu hacia'l desmantelamientu. La tarrecida pantasma del paru y la emigración facíase visible día a día y entamaba a facer estragos pente la nuestra xente.

Y too ello casi ensin que fuéremos a retrucar un res. Como si aquella cultura reivindicativa del mundu de trabayu asturianu se sumiere de sópitu. Camudando l'actitú combativa y movilizadora d'antaño nun conformismu onde fuimos engurriándonos y quedándonos viendo como nos frayaben talo que si tuviéremos empapirotiaos.

Enfilemos asina a la situación de güei onde, pa detrás, tocónos ser una parte más de los munchos pueblos afectaos por esa estafa descomanada mal llamada, a costa fecha, crisis.

Y esta ye la situación pergafa u tamos. Con un camín atarraquitáu de caminantes mozos que ye'l de la emigración. Con unes rutes pa esparder y espurrir les piernes que talo paecen escurríes pa dir desamando nelles una auténtica lexón de paraos qu'envereden como n'ayén. Con unes posibilidaes casi utópiques d'atopar un trabayu yá nun digo dignu, sinón hasta perroneru, y comprobando cómo'l nuestru mundu llaboral y reivindicativu foron de la mano a tostar guiaes.

Observando lo que yera esti país hai unes décades y lo que ye güei resulta casi imposible de reconocer de que se trata del mesmu. Paez increyible que nun plazu tan relativamente curtiu de tiempu pudiéremos dar esti reblagón p'hacia atrás que podemos calificar, guapamente, d'históricu. Esi retrocesu pa peor impresionante. Esi esboroñamientu nacional talo que si un argayu xigantescu nos cayere enriba casi de sópitu.

Nun supimos reaccionar y con ello marafundiemos una herencia que, magar nun yera la maraviya del mundu, polo menos dábamos la oportunidá de trabayar y tratar de sacar alatre les nuestres vides y proyectos. Camudómos too ello por esti presente murniu que tenemos actualmente delantre les narices. Una Asturies esmanganiyada llaboralmente, empapirotiada socialmente y que nun acaba de dar muestres d'esconsoñar pa tratar de tornar lo perpoco qu'inda queda de pies y de sestaferiar dalgún camín que nos lleve a  construir y salir p'alantre. Porque too apunta a qu'empobinamos resignaos hacia'l nuestru particular samartín.

El güeyu la ballena.

Andrés fuere dende bien rapacín un cho de llancha nel puertu d'Entrellusa. La so familia siempre viviere de la pesca y de la caza la ballena dende los tiempos de los antiguos.

Aquellos díes taba nerviosu y con rebelgos nel butiellu. Yera normal. So padre prometiéra-y dexalu empuñar un arpón pela primer vegada nel siguiente avistamientu que vieren na mar. Hasta qu'aquella mañana hacia les once dieron voz dende la talaya de que columbraren un grupu ballenes soplando cerca la costa.

De sutrucu varies llanches echáronse a la mar. Nuna d'elles diba Andrés, dándo-y vueltes al arpón nes manes impaciente. Consiguieron aisllar a un exemplar. Yera raro, taba mui quietu, como flotando y esperando. Cozcáronse bien a él y Andrés púnxose arrechu arremangando l'arpón contra'l cetáceu.

Entós quedó como clisáu. Fixóse naquel güeyu argutu, serenu y triste con que la ballena lu miraba entientes. L'acorviar del restu la tripulación y un xiringón de so padre fíxolu esconsonar. Llanzó entós l'arpón y espetólu nel cuerpu l'animal xunto a otros más que-y aventaren dende les llanches. La ballena somorguióse y allá una vegada salió a flote cuspiendo un chorru sangre, agonizando. Lleváronla al puertu y entamaron el despiece p'aprovisionase de carne, saín, barbes, güesos...

Aquella nueche Andrés anduvo de velea. Tenía aquel güeyón que viere de la ballena como espetáu na mente y nun yera pa escaecelu. Al día siguiente siguió igual. Andaba como empapirotiáu, n'ayén, y nun atinaba a facer un llabor curiosu. Y asina les siguientes nueches y díes nuna enfilandrada interminable.

Col tiempu acabó dexando  Entrellusa pa dir a una casuca tierra adientro onde cultivaba una llosa y curiaba dalgún ganáu. Namás que de xemes en cuando baxaba al puertu a saliase pensatible o a echar l'anzuelu pa llevar dalgún pexe pa comer en casa. Y más nada.

Hasta qu'un día viéronlu sentáu pa la mano d'arriba de la rampla del puertu pela que xubíen les llanches pa reparar o protexer de la vagamar. Tenía en cuellu un güesu grande de ballena. Miraba pa la mar y poníase a dibuxar nél con una navaya como si copiare daqué que taba viendo allalantrones. Cuando-y entrugaben polo que taba faciendo, contestaba qu'un orniatu pa la tabierna onde se reunía la xente allá en Candás.

Una mañana poco antes del mediu día garró'l güesu y empobinó pa la tabierna. Hores dempués la xente arremolinábase xunta una paré. Ellí, aguantáu por dos gabitos, taba'l güesu dibuxáu por Andrés. Podía vese  Entrellusa, les llanches na mar, la ballena...

Y, sobre too, aquel güeyu descomanáu pal so tamañu real que, argutu, serenu y triste, mirábalos entientes.

Antroxando.

Yá llega l'antroxu faciendo ruxir los esquilones. Yá aprucen los guirrios saltando sebes y portielles y los mazcaritos faen xirigoncia de les convenciones sociales del restu l'añu. Ye l'antroxu. El festexu que la relixón nun foi a homologar con nada y que'l poder nun sólo nun baltó, sinón qu'acabó subvencionándolu. Vamos, como si los gochinos s'apautaren en financiar el samartín.

Yo, al llegar estes feches, vienme dacuando a l'alcordanza un anécdota que me pasó siendo un xanu rapacín. Ello foi que baxaba per una caleya un mes de branu con una montera de papel na cabeza. Crucéme entós con un paisanu d'unos noventa años, que fuere tamboriteru de mozu y andaba entreteníu fustacando col cayáu los cascoxos qu'atopaba pelos bardiales. Al veme d'aquella traza (xanu y con montera papel) va él y ponse: "¡antroxu fuera!". Pensé entós que quiciabes me lo dixere por veme enforma moxigangueru y que-y recordare la época del antroxu. Pero tiempu dempués, tando un día pescudando en coses de la nuestra cultura, decatéme qu'esa frase úsase tamién col significáu de "perder el mieu, salir albintestate". Y paecióme un dichu afayadizu pa recordar neses ocasiones que tamos gachos, aseñaldaos y col ánimu esgoncipliáu. Amás, al antroxu síguelu l'ermu de la cuaresma, pero al final siempre acaba rescamplando la primavera.

Por cierto, l'otru día, tando pámpana arriba asoleyándome arrecostináu nel mio caborniu, entróme'l rixu del bardu que llevo dientro ya igüé estos versos colos que me voi despidiendo güei:

Febreru traxo l'antroxu,
los guirrios y la comedia.
Mazcaritos, goxu ardiendo,
pitances, trebeyos, fiesta.
Darréu, vien entainando
el desiertu la cuaresma.
Y, nun bierzu cerezales,
tresalez la primavera.

¡Un saludín y que corráis bien l'antroxu!.

La Gran Mazcarada.

Si salimos con esteres o pelleyes, xingando esquilones y blincando, con cuernes o capiruchos na tiesta, con dalgún guirriu tocando'l turullu, vexigueros solmenando, mazcaritos aventando ceniza, comedies, etc. podemos pasar por ser una mazcarada de zamarrones, zaparrastros o lo que pinte. Y pue resultar una esperiencia bien prestosa y deseable.

Si salimos axorizaos, escorríos por otros que nos espanten coles sos moxigangues, que nos acorvien y amenacen con facenos la vida  más imposible cada día y que nos dexen bien claro quien son los amos y quien los probetayos esfelpeyaos nun ye que que podamos, sinón que somos realmente una comparsa de zamarros. Y de xuro que resulta una esperiencia tarrecible y gafa.

Ye curioso les distintes utilidaes que pue tener un mesmu aperiu. Asina, un cencerru pue valinos pa xingalu nuna moxiganga repitiendo'l ritual d'oxar los malos espíritus y los animales que nos estrocen la collecha. Pue servinos tamién pa saber ú ta un animal de la nuestra cabaña. Pero tamién pue valir pa que nos lu cuelguen del pescuezu,  tenenos controlaos y recordanos que somos el ganáu particular de los que tienen, manden y deciden.

Yo, préstame abondo somorguiame pente guirrios, zamarrones, mazcaritos y comedies. Sentir cómo atorolla'l xingar de los esquilones, recular acullá nel tiempu y ver remanecer tradiciones vieyes. Pero nun m'encartia un res que me xunzan, que me cuelguen los lloqueros y que m'afalen hacia la probitú y la escasez unes xermandíes reviciaes de poder y de recursos mientres s'esmocayen de risa amasando cada vegada más dineru y bayura.

Y esta cabera ye la gran mazcarada de los tiempos que cuerren. La del poder y les monxures que lu remanen. Un antroxu cruel que nin siquiera ye talu, porque l'enchipamientu y la seguranza na so xera pela parte de los que nos emburrien pal caleyu ye tala que nin siquiera yá se preocupen de marutar les sos azaríes espetándonosles ensin más a cara descubierta. La mazcarada de vendenos la salida d'esa estafa marutada de crisis qu'ellos mesmos axeitaron per aciu de la sustitución de los nuestros drechos y futuru pola barbarie y la nueva esclavitú.

El corru qu'escalez.

La nuestra danza cimera, facémosla en corru. Xunímonos al traviés d'ella y, de los tiempos, afitámonos, hermanámonos y reconocémonos.

Teníemos y siguimos teniendo una cultura popular que diba, adulces, quedándose como un paxarín. De magar unos años, xente dayures fai corru pa dir trabayando pol alitar de les manifestaciones estremaes d'esa cultura.

D'esta miente, pali que pali, entamen a escucar sele y a rescamplar dempués aquelles manifestaciones que talo paecíen condergaes a sumise pente la povisa del olvidu.

Ye perimportante que mos mentalicemos pa participar nel corru qu'acorica, afalaga y mima les nuestres manifestaciones culturales populares. Les nuestres tradiciones. Toa esa bayura pergrande que mos dexaron los antiguos.

Y, al traviés d'ello, tornar a sentinos pueblu, comunidá hermanada, xente con raigaños que foi quien a esmucise de la despersonalización y la vida buxa del que se siente estranxeru dayures nel so propiu llar.

Sedría perimportante enfotamos en facer cada día un corru más grande au escalecer el ferial cultural de nuestro, remanecelu y, per aciu d'ello, escalecer y remanecer nós.

Metanos l'iviernu, cuando la nieve apruz nos cumales ya'l cutu taraza'l pelleyu, ye un momentu afayadizu pa la reflexón y pa sentir dientro de nuestro esi rixu por facer corru, aldea, pueblu, país.

La llocura de Siora.

Pachu llevárala a munchos médicos hasta que, por fin, dieren col tratamientu afayadizu pa la so llocura. Tantos años penitenciando coles sos tochures, con aquellos allorios, que talmente llegó a creyer que la teníen qu'ingresar en dalgún llau.

Y ye que Siora llevaba cuantisimayá viendo de too: cuélebres, xanes, trasgos, diaños burllones, pegues falando, árboles xugando a les cartes... Pero quedaba too en casa y podía llevase. La cuestión entamó a enguedeyase enforma cuando-y dio por sentase darréu a la puerta a esperar pol esperteyón. Naguaba dende rapacina por esnalar y, por fin, diba poder facelo, pues el nuberu col que falare díxéra-y qu'esperare a la puerta que cualquier día mandába-y un nuberín a pasiala pelos aires nun esperteyu xigante con gafes... Y entós ella salía de casa y sentábase a la puerta fuere branu o iviernu, fixere fríu o calor. Y entós Pachu desesperábase...

Pero aquel día desgraciáu l'home tuvo que dexala sola y cuando tornó yá nun taba ellí. Pensó de too: que se perdiere na viesca y quedare pa los llobos, que la llevare dalgún mangullón, que zapicare dayuri cayendo a dalgún tabayón y escentellándose... Pachu sentíase alloquecer per momentos. Culpábase de dexala sola, de baxar la guardia, de ser un xostrón... Pensó hasta en suicidase él tamién, porque ensin ella yá nun quería vivir más pa nada... Entós picaron a la puerta. Abasando los pies foi y abrió. El médicu que la trataba viniere a vela y siguir el tratamientu y la malura. Pachu echó entós tolo que lu amburaba per dientro y esplicó-y  la gran llaceria que cutía'l so alma. El doctor escuchólu sollerte y silenciosu. Dempués faló:

-Nun t'esmolezas más, Pachu. Siora ta bien. Vila yo mesmu dando una revolada nun esperteyón xigante con gafes guiáu por un nuberín. Saludóme y díxome que la esperare equí contigo, que tornaba llueu...-

Esproña la nieve.

Un de los primeros post d'esti blog dedicáre-ylu a la nieve. Esi fenómenu meteorolóxicu que fai posible tener meyores reserves d'agua pa cuando'l sol entame a calcar de magar la primavera.

Encamiéntennos dayures dellos medios d'información de lo sollertes que tenemos que tar cuando s'avecina una nevada. Nun voi retrucar al tema de la prudencia nesti asuntu, pero paezme que dacuando talo paez que nos animen a refugar esos falopos que cubren la nuestra tierra de blanco cuando'l nuberu trai la ivernada.

Y non. Que nieve ye bono y necesario. Porque, cenciellamente, ye'l ciclu temporal del llugar onde vivimos que tien les estaciones bien marcaes. Lo gafo y tarrecible ye esi tiempu que nos cute a vegaes y que nos invita a andar en mangues de camisa en plenu iviernu. Eso sí que fraya árboles, reserves d'agua y hasta la nuestra propia salú.

Porque esto ye Asturies, una tierra de la que presumimos davezu pol so verdor. Pero que bien de xente arreniega del so clima poque llueve o nieva escaeciendo que ye precisamente eso lo que la fai verde y con toa una bayura vexetal anubriendo'l so paisaxe. Asina que cuando toque dir escolforiáu y n'alpargates vase y cuando cuadre andar bien abrigáu y con barayones pues tamién.

Viniéronme estes llinies a la cabeza porque mirando al traviés de la ventana observé qu'entamaben a esproñar unos falopinos neto a gotes d'agua blanques. Aportó güei la nieve, adulces, sele, feble, como nun queriendo meter ruíu col so aprucir a la vallada. Arreciará abondo más fuerte pal monte, los collaos y los mayaos. Ye bono que nieve. Fai falta que temos precavíos nes zones onde trapie fuerte, pero persabiendo que les molesties que pueda ocasionanos agora va devolvénoslo n'agua y verdor a la vuelta d'unos meses.

Elecciones anticipaes.

Esta selmana llegábanos l'anuncia de la convocatoria d'elecciones autonómiques anticipaes por parte del presidente del gobiernu asturianu, Álvarez Cascos.

Quiciabes nun esperáremos la dicisión tan llueu, pero lo cierto ye que la situación política u se llegare tenía una salida perabegosa. Con un parllamentu con mayoría pa refugar les propuestes del gobiernu y l'enfotu demostráu por facelo, con devolución de presupuestos incluida, les salíes que s'albidraben yeren dos.

La primera d'elles, una moción de censura con sustitución del actual gobiernu por otru surdíu d'un alcuerdu ente les fuerces de la oposición. Magar la clara intención de facer piñu contra'l gobiernu forista, el pasu pa sustituilu por otru a comuña ente les citaes fuerces nun paecía nada claro de que tuvieren dispuestes a dalu. D'esta miente y colos precedentes de les dificultaes pa formar gobiernu na Xunta y los problemes surdíos en dellos ayuntamientos la situación d'atascu institucional rescamplaba como'l camín per onde se podía empobinar nos prósimos meses.

La otra solución yera la de disolver el parllamentu y convocar nueves elecciones. Y mui ceo esta foi l'alternativa que nos anunciaba'l presidente. Quiciabes nun la esperáremos  tan aína, pero acolumbrábase nel finxu'l cielu como una posibilidá vidable si non se quería perpetuar una situación d'empatonamientu institucional permanente.

Afayámonos asina nuna situación pindia y mui revesosa de resolver. Tenemos ende bien fitu l'antiguu réximen clientelar cola so rede de chiringos que, como pudimos observar estos meses, ta dispuestu a dar una batalla ensin cuartel pa defender los sos privilexos y prebendes. La pérdida del poder na Xunta Xeneral encontó inda más una alianza, aparentemente contra natura, pero que de manera amatagada venía funcionando de los tiempos: Uviéu pa la drecha,  la Xunta pa la izquierda plural y a tirar del tetu tan guapamente. Agora, coles nueves elecciones van tener la oportunidá de recuperar el terrén institucional perdíu, anque'l resultáu que se vaya dar nun ye mui predecible ya'l repartu d'escaños pudiere nun variar enforma col actual.

Na mio opinión lo meyor que pue pasar cuando una fuerza gana unes elecciones ye que tenga la oportunidá de llevar hasta'l final la llexislatura pa poder arromanar los llogros y los erros y sacar asina les conclusiones afayadices. Nun va ser esti'l casu asturianu onde nin siquiera vamos llegar al añu del nuevu gobiernu. Nun foi asina y vamos quedar coles ganes de saber hasta ónde podía dar de sí'l llabor de gobiernu d'un partíu que cumple agora l'añu d'esistencia y nel qu'entraron a participar xente procedente del asturianismu políticu.

Pero esta ye la situación real de la nuestra política, la marcación na que nos movemos y onde se va desendolcar la batalla social ya institucional. El camín que se derrompa a partir de la cita nes urnes el prósimu mes de Marzu ye enagora desconocíu y pola mio parte -anque  lo visto hasta agora na curtia acción d'esti gobiernu me provocare lluces y sombres-  sólo espreso'l mio deséu de que nun volvamos a empozanos otra vuelta nel tarrecíu llamargal corruptu, clientelar y etnocida de les últimes décades. Esiste esa posibilidá y de reactivase y garrar nuevu puxu la estroza que pudiere ocasionar nesta perfrayada tierra de nuestro podría algamar un puntu de non retornu y de casi imposible igua.

La intelixencia y los gochos.

La economía nuestra basada nos grandes sectores de la minería y la industria cayó en barrena hai bastantes años y, d'entós p'acá, debatímonos na busca de nueves alternatives económiques onde afayar trabayu.

Dalgunos volvieron los güeyos al sector rural y, dientro d'esti, a a la recuperación de races autóctones qu'aporten una doble utilidá. La primera, la satisfacción por recuperar esti particular patrimoniu de nuestro. Pero tamién ufren la posibilidá d'enxertar los sos productos nel mercáu agroalimentariu consiguiendo, per aciu d'ello, abrir nuevos corriellos económicos na nuestra esgonciada economía.

Ún d'esos corriellos ta relacionáu cola recuperación del gochu astur-celta, raza porcina autóctona nuestra que, de magar unos años p'aca, pasó de tar casi desaniciada a entamar un procesu de recuperación y medría, arriendes de dir entrando, adulces, na cadena alimentaria al traviés de la comercialización de los sos productos.

Poro, ye casi surrealista enterase per redes sociales de que dende cierta prensa cosmopaleta editada n'Asturies (confieso que yo va años que dexé de lleela, resalvando dalguna güeyada qu'echo dacuando a les ediciones dixitales) puedan lleese ataques sobre esti tema caberu. Apocayá sectores políticos y culturales cosmopaletos entamábenla contra boines, madreñes, llingua y lo que pinte. Agora tamién-yos estorben les nuestres races autóctones. ¡Vaya por dios, hom!.

Poque, polo que se llee, pa esta xermandía asturfóbica (permítaseme'l pallabru) pa comer un bon pitu caleya talo paez que nun pue ser de pita pinta, pa facer un bon quesu nun ta nada claro catar una  cabra bermeya, oveya xalda o vaca casina, y pa saborgar un bona tayada d'adobu pue valir cualquier gochu menos l'astur-celta. Y ye que la capacidá de facer el ridículu albentestate de los sectores cosmopaletos ye casi infinita.

Allá pela seronda ye vezu ver comercializaes dayures castañes de fuera d'Asturies (que tan nel so perfectísimu derechu, por supuesto)  mientres les nuestres apodrenten nos castañeos. Hasta hai poco nun mirábamos por tratar de saca-yos rentabilidá a los productos que tenemos en casa. Y agora, cuando hai grupos de xente que se ponen a ello, en vez de recibir l'apoyu lóxicu y de caxón como lu recibiríen en cualquier otru llugar del estáu -y más col esbarrumbe económicu, paru y emigración que sufrimos-, hai medios y persones que se dediquen a tratar de desprestixalo y torgalo encabezaos pol sector asturfóbicu y cosmopaletu que tenemos que padecer, neto a una condena,  nesta esmanganiyada Asturies.

Ye lo que pasa cuando la intelixencia de los que se mueven en ciertos ámbitos nun ye a sobrepasar a la que podemos atopar nun grupín de gochos d'oreya llarga fozando na quintana. Y vuelvo a facevos otra confesión: prefiero una y mil vegaes la compañía d'estos últimos a la de los primeros.

Asturianos Errantes.

Camiento que los collacios que pasáis dacuando per esta viesca yá tendréis reparao abondo na semeya qu'ilustra'l mio aspeutu de xanu.

Pues bien, esti dibuxu nun ta puestu ehí a voléu, nin porque me paeciere simplemente simpáticu o afayadizu, que me lo paez, pero hai inda más. Ye una calicatura que fixo David Shankbone en 1.852 pa ilustrar la lleenda del "xudíu errante".

Y ye qu'atalanto yo que ye un dibuxu con un títulu amañosu pa facer un xuegu pallabres colo que nos ta pasando anguaño a aquellos que deseamos, una cosa tán simple y tán cenciella, como la d'usar la llingua asturiana en cualquier sitiu y circunstancia dientro del nuestru propiu país: Asturies.

Porque lo cierto ye que los que queremos usar davezu y con tola normalidá esti idioma camudamos por ello nuna xermandía d'asturianos errantes, de vagarientos na nuestra propia tierra, en busca d'un sitiu onde poder afayanos y ser unos ciudadanos normales, y non un colectivu de segunda, marxináu y que tien qu'entamar tou un esfuerzu diariu d'arreblagar pilancos si queremos ser, llingüísticamente, nosotros mesmos.

Poro, arrano como tantes collacies y collacios namoraos d'esta vieya llingua, por que col esfuerzu arrogante acordies coles posibilidaes de cadún (tolos graninos de sable qu'apurramos son igualmente importantes), llogremos dalgún día, y d'una vegada por toes, pasar de ser asturianos refugaos y errantes na nuestra propia casa a ciudadanos y ciudadanes d'Asturies con plenos drechos llingüísticos.