Quiciabes nun esperáremos la dicisión tan llueu, pero lo cierto ye que la situación política u se llegare tenía una salida perabegosa. Con un parllamentu con mayoría pa refugar les propuestes del gobiernu y l'enfotu demostráu por facelo, con devolución de presupuestos incluida, les salíes que s'albidraben yeren dos.
La primera d'elles, una moción de censura con sustitución del actual gobiernu por otru surdíu d'un alcuerdu ente les fuerces de la oposición. Magar la clara intención de facer piñu contra'l gobiernu forista, el pasu pa sustituilu por otru a comuña ente les citaes fuerces nun paecía nada claro de que tuvieren dispuestes a dalu. D'esta miente y colos precedentes de les dificultaes pa formar gobiernu na Xunta y los problemes surdíos en dellos ayuntamientos la situación d'atascu institucional rescamplaba como'l camín per onde se podía empobinar nos prósimos meses.
La otra solución yera la de disolver el parllamentu y convocar nueves elecciones. Y mui ceo esta foi l'alternativa que nos anunciaba'l presidente. Quiciabes nun la esperáremos tan aína, pero acolumbrábase nel finxu'l cielu como una posibilidá vidable si non se quería perpetuar una situación d'empatonamientu institucional permanente.
Afayámonos asina nuna situación pindia y mui revesosa de resolver. Tenemos ende bien fitu l'antiguu réximen clientelar cola so rede de chiringos que, como pudimos observar estos meses, ta dispuestu a dar una batalla ensin cuartel pa defender los sos privilexos y prebendes. La pérdida del poder na Xunta Xeneral encontó inda más una alianza, aparentemente contra natura, pero que de manera amatagada venía funcionando de los tiempos: Uviéu pa la drecha, la Xunta pa la izquierda plural y a tirar del tetu tan guapamente. Agora, coles nueves elecciones van tener la oportunidá de recuperar el terrén institucional perdíu, anque'l resultáu que se vaya dar nun ye mui predecible ya'l repartu d'escaños pudiere nun variar enforma col actual.
Na mio opinión lo meyor que pue pasar cuando una fuerza gana unes elecciones ye que tenga la oportunidá de llevar hasta'l final la llexislatura pa poder arromanar los llogros y los erros y sacar asina les conclusiones afayadices. Nun va ser esti'l casu asturianu onde nin siquiera vamos llegar al añu del nuevu gobiernu. Nun foi asina y vamos quedar coles ganes de saber hasta ónde podía dar de sí'l llabor de gobiernu d'un partíu que cumple agora l'añu d'esistencia y nel qu'entraron a participar xente procedente del asturianismu políticu.
Pero esta ye la situación real de la nuestra política, la marcación na que nos movemos y onde se va desendolcar la batalla social ya institucional. El camín que se derrompa a partir de la cita nes urnes el prósimu mes de Marzu ye enagora desconocíu y pola mio parte -anque lo visto hasta agora na curtia acción d'esti gobiernu me provocare lluces y sombres- sólo espreso'l mio deséu de que nun volvamos a empozanos otra vuelta nel tarrecíu llamargal corruptu, clientelar y etnocida de les últimes décades. Esiste esa posibilidá y de reactivase y garrar nuevu puxu la estroza que pudiere ocasionar nesta perfrayada tierra de nuestro podría algamar un puntu de non retornu y de casi imposible igua.
