A mores

Pues ello ye qu'esta mañana entróme'l rixu de pañar mores pelos bardiales. Que los escayos pinchen, pero tamién dan el so regalu prestosu. Que bien que presta machucar mores, echa-yos vinu y zucre, y rellaber con elles los focicos.

 

-¡Ayó, Xanu!. ¡Ten cuidado nun t'escayar, que te veo muy gayoleru escarabicando pel bardial...!

 

La que m'echaba voz yera Espi la Mariñana. Estós  capiela pa que s'averare y póngome yo:

 

-¡Qué tal, Espi! ¡Cuantayá que nun te vía pequí! ¿Pa ónde empobines?

 

-Pues voi camín del castañéu, que va tiempu que nun xubo a echar una güeyada. Y, cola barbaridá d'incendios d'esti añu, nun sé si tengo un castañéu o un borrón afumando...

 

-Bono muyer, paezme que pela Viesca Dayuri llibremos d'eses gafures. Pero, de toles maneres, meyor que vayas a echar un vistazu por si acasu. Y, si ta too bien, ver cómo anda la cosa. Porque, arriendes de los incendios, tamién vieno una seca pistonuda, y puen perdese los plantones nuevos o afeutar a la gueta que pueda haber pela seronda...

 

-Yá lo sé, Xanu, ver veremos qu'atopo per ellí arriba...Y de la que baxo voi coyer yo tamién mores, que viéndote a ti punxístime a naguar. Con esto de les mores, los arándanos y demás pasa un pocoñin como coles castañes. Que se dexen na viesca y dempués va la xente a comprales pelos supermercaos...

 

-Yo, por ver, veo hasta los figos apodreciendo per ende. Pero ye lo qu'hai, Espi. Pa delles coses siguimos enchipaos de grandonismu, magar que, cuantayá, escomencipiemos a cayer en barrena...

 

-A too esto, Xanu, vamos metenos en Setiembre y entamala cola xera que foi quedando apostalgada nos meses centrales de les vacaciones del branu.

 

-Pues sí. Yá me contaréis cuando vengáis a veme de la villa cómo pinten les coses pel mundu alantre. Que ta la cosa bien enguedayada per tolos llaos y cualquiera sabe les llaceries que nos puedan venir. ¡Ah! Y antes de que sigas camín p'alantre, yá sabes lo que te toca facer... 

 

-¡Si, ho! ¡Tranquilu, que nun se m'escaez! Y, yá que s'averen un cientu celebraciones pa esti ocho de setiembre, vamos recordar la romería que se fai nel santuariu de la patrona llangreana.

 

Xubiesti a la romería

de la Virxe del Carbayu.

Llevesti la saya nueva

y el refaxu colloráu.

¡Ixuxú! ¡Viva les romeríes asturianes! 

                                                                               

 

 

 

L'Ayalga del Castiellu del Alba

Va tiempu que tenía pendiente una visita per tierres somedanes. Desque una tarde, charrando con Sidru'l Guirriu, me dixera que per ellí había una ayalga maraviosa. Asina que me punxi en contatu con él y quedemos en venos nuna picorota del cordal de Perl.lunes, onde queden los muruecos d'un castiellu medieval, el Castiellu del Alba. Pues ente ellos ta l'ayalga que me fai rebelgos nel estómagu cada vegada que m'alcuerdo d'ello.

Asina que quedé con Pinín pa que me llevare p'allá nel madreñoxiru'l día señaláu. Cuando aportemos, dexólu amatagáu na viesca y echemos a andar pa la cuguruta onde s'asitien les ruines del castiellu ¡y l'ayalga!.

 

-Pues mira, Xanu, allá pela Edá Media, esti castiellu controlaba'l pasu dende les tierres llioneses, al traviés d'El Puertu, a les asturianes. Tiénense anuncia d'él de magar el sieglu XIII, anque quiciabes seya anterior, escurque de los tiempos del Reinu d'Asturies.

 

-¿Y consérvase daqué d'esa fortaleza, ho?. Porque dende equí abaxo paez acolumbrase un cachu d'un torrexón y poco más...

 

-Bono, Xanu, anguaño consérvase esi cachu del torrexón, parte de la muralla y del fuexu. Como ta en ruines, va esbarrumbando cada vez más col pasu de los años y pinta feo que puedan llimpialu de maleza, igualu y conservalu. Como pasa en tantos casos, como'l so hermanu, el Castiellu d'Alba de Quirós, o'l de Tudela n'Uviéu...

 

-Mira, Pinín, ehí pa la mano drecha tenemos una fonte. Quiciabes yera la que suministraba notres dómines d'agua al castiellu.

 

-Pues igual sí, Xanu. Amás, la única manera d'aportar a él ye pela zona noroeste, porque, como pues dir viendo ta allugáu nun auténticu gurugú, que tal paez más afayadizu pa ñeru d'aigles o utres que pa llevantar ehí una fortaleza...

 

Siguimos  caminando picu arriba, afanosos y puxando, que xubir ellí nun yera xera fácil. Al final, llogremos entrar a les ruines del castiellu y ellí taba Sidru'l Guirriu esperándonos tan campante.

 

-Redióla, Sidru -dixi yo- yá pue ser l'ayalga qu'hai ente estos muruecos enterrada vien valoratible, porque cola sudada d'aportar equí, esti día soleyeru d'Agostu, ye lo menos que merecemos descubrir...

 

-Pues nada, amigu, dinos ónde tenemos que nos poner a cavar, que me va salir el corazón de la caxa de tantu aforfugu que me entra pensando nos pelleyos d'oru de tienen que tar enterraos nesti llugar -añadió Pinín.

 

-¡Ca!.¡Equí nun hai que cavar nada!.¡L'ayalga ta desenterrada!. Eso sí, namás que la podéis ver, sintir y esfrutar. Y de llevala, dientro de vosotros, en corazón, o nes coraes, porque nun ye un tesoru d'ambozaes d'oru nin nada d'eso.

 

Quedemos empapirotiaos y desasitiaos colo que nos dicía Sidru'l Guirriu. Dempués de quedar un cachu en silenciu, púnxime yo:

 

-¡Cóime, Sidru, pues señálamos pa ónde ta l'ayalga que dices, que toi tremando de ganes de vela.

 

-Pues alendái, llevantái la cabeza y observái la rodiada -dixo entós Sidru arrestiellando la voz-. Ehí la tenéis. El valle, los montes, les picorotes, los fayeos, los carrascos, les castañales, el país del osu, el corzu, la raposa, l'esguil, el faisán, de les abeyes, de les fontes, de los ríos, del mofu, de la rosada pela alborada...y milenta coses más que vais dir descubriendo si dexáis esnalá la imaxinación. Porque dende les ruines allugaes nesta picorota podéis pescanciá la guapura d'esta tierra de nuestro espolletando y rescamplando como en pocos sitios se pue contemplar meyor . ¿Acasu nun ye esa una ayalga descomanada?

 

Entós yo, como rempuesta a lo que mos dicía'l nuestru amigu Sidru, eché un ixuxú como enxamás lo fixera. Y Pinín echó tamién otru. Y l'ecu de los nuestros rinflíos rebotó per milenta requexos de la contorna. Entrónos una allegría enorme d'atopar por fin aquella ayalga. Y de persaber que yera mui nuestra, magar nun se midiera n'oru. Y que la podíemos guardar nos nuestros corazones, nes nuestres coraes y na nuestra alcordanza pa siempre enxamás...

                                                                                 

 

 

 

 

Camín de San Xuan

 Avanzamos pel branu y vamos  camín de San Xuan, que marca'l solsticiu de branu. Pasó esta mañana pela  viesca Don Quixote de Caravia, enfurruñáu él,  y punxímonos a charrar.

-Traes cara de pocos amigos, Quixotín...

 

-¡Ca! ¡Como pa nun la trayer! ¡Colo qu'acaba de pasar na enseñanza asturiana!

 

-¡Coime! ¡Cuenta, hom! ¡Cuenta...!

 

-Pues qu'anduvieron los docentes estos díes de fuelga y movilizaciones pa demandar una serie de reivindicaciones, que los del gobiernu tienen el sector fechu una llaceria. Los sindicatos punxéronse a la cabeza, pero acabaron vendiéndolos. Y eso encabrita muncho, ¡rediola!

 

-Ye curioso que'l discursu de les izquierdes nos encamiente que'l dineru que recauden ye pa gastalo en coses como educacion o sanidá, pero dempués anda la xente de lo público enfurruscao...

 

-Sí. Y nesti casu la cosa amuesa lo tracamundiao qu'anda too neso de la política y el sindicalismu. Porque'l gobiernu asturianu ye d'izquierdes. De los cinco sindicatos que dexaron tiraos a los docentes, tres son d'izquierdes. Y, pa rematala, les dreches ofrecieron los sos diputaos p'ampliá'l presupuestu y poder atendé les reivindicaciones del seutor. Y coinciden tamién con bona parte d'él en qu'esti procesu zarrose'n falso y con resultaos bien probes.

 

-Y toi pensando yo que, con esti tipu tracamundios, dempues vienen eleiciones y hai xente de les izquierdes qu'echen les manes a la cabeza porque xuben les dreches y tamién la ultradrecha. Pero ¡rediola! ¡si-yos tán abriendo ellos les puertes de par en par!

 

-Claro, Xanu, porque los fechos canten qu'atorollen y, en casos como ésti, tal paez que los papeles tán cambiaos y les izquierdes frayen a los trabayadores mientres que les dreches ofrécense a echar una gabita...

 

-¡Hai, hom! ¡Cómo anda'l patiu, amigu Don Quixote! A too esto, y por falar de coses más prestoses, vamos camín del solsticiu de branu y de la nueche de San Xuan.

 

-Pues sí, Xanu. Coles fogueres y la so carrapotada de tradiciones. Poque'l solsticiu de branu llévanos en pelondín a tiempos remotos y a civilizaciones que dexaron una buelga qu'aportó a nos al traviés de milenios...

 

-Como tovía tenemos vagar pa ello, tenemos que dir sopelexando pente toles amistaes de la viesca Dayuri que  vengan a aconceyar  p'axuntanos toos na danza alredor de la foguera que vamos entamar per equí. Que ye una manifestación d'hermandá bien prestosa que tenemos que siguir conservando.

 

-Eso ta fecho. Hai qu'echar voz per tolos requexos del nuestru país p'axuntanos na danza. ¡Y p'acabala bien! ¡Qu'otra tradición, vamos llamala asina, yera echar ixuxús, ronques, y acabá la xermandía a palos!

 

-¡Sí que ye verdá, Quixotín!. Pero tenemos que tené xacíu. Los palos, y bien gordos, tenemos que los reservar pa solmena-yos los llombos a tantos fartones y vendíos como tenemos pela nuestra tierra. ¡Qu'esos sí que merecen una bona tundia!

 

-¡Cuanta razón tienes, Xanu!. Y agora voi despidime, que quiero enfilar monte arriba pa espansionar y reponer fuerces, qu'hai enguedeyos que resolver a embute per tolos requexos del país...

 

-Pues ¡hasta la prosima visita, amigu! ¡Y alcuérdate d'avisar p'axuntanos a danzá la nueche de San Xuan...!

 

-¡Nun te preocupes, Xanu! ¡Qu'eso nun lo escaezo...! 

 

25 de Mayu de 1.808 / 28 de Mayu de 722

Somorguiaos dafechu na primavera, la viesca ye un conciertu de grillos, gorgolitiar de páxaros, ruxerrux de fueyes, flores abriendo, y tamién sentir alluendi sonar dalguna esquila o lladrar un perru.

Hoi aprució per equí Espi la Mariñana que venía de echa-y una güeyada al castañéu que tien allarribón. Saqué-y un tayuelu pa que se sentare y tamién unes de sidra pa remoyá'l gargüelu mentes charrábemos.

 

-Bono, Xanu, avanzamos pel mes de Mayu y camín de dos celebraciones históriques prestoses.

 

-¿De dos? Yo contaba qu'había una pal día venticinco...

 

-Pues non. Hai una pal  venticinco y otra pal ventiocho. Verás, esplícotelo. Como persabes, el venticinco de Mayu de mil ochocientos ocho foi'l llevantamientu del pueblu asturianu y la Xunta Xeneral escontra la invasión napoleónica. Renombramos la declaración de soberanía de la nuestra institución cimera sobre'l territoriu asturianu, les Asturies d'Uviéu y les de Santillana que yeren daquella. Mandar embaxadores a Inglaterra. Crear la nuestra bandera a propuesta de Xovellanos, que ye la que tenemos hoi...Una fecha histórica que rescampla y que presta recordar y rindir homenaxe. Pero hai otra fecha que ta amatagada pol desconocimientu y porque nun hai consensu dafechu ente los estudiosos na materia arriendes de tarrecimientu bastante xeneralizáu d'encetar el tema, que ye la causa principal.

 

-Cóime, Espi, pues ta pruyéndome saber a qué fecha histórica te refieres, porque yo figurábaseme qu'esti mes namás que teníamos la que me comentes.

 

-Pues verás, Xanu. Ello ye qu'hai una corriente historiográfica, que se sofita nos estudios fechos nel so día por Claudio Sánchez Albornoz, historiador de prestixu y con una biografía que relluma. Pues bien. Esi estudiosu, ente otros temes, de la nuestra historia de les dómines del reinu asturianu, anduvo pescudando nes fontes árabes que fincaben el tema de la Batalla de Cuadonga. Y acabó concluyendo, con datos como'l de la fecha  de la muerte, a manes cristianes, d'un personaxe llamáu Nu'aym Ben Abd-al-Malik, que la batalla asocedió un ventiocho de Mayu del añu setecientos ventidós. Ye bien cierto qu'hai historiadores que discrepen d'ello, pero tamién lo ye qu'esa fecha acéutase per otros y ye la que se suel manifestar cuando s'entruga en qué feches pudo dase esi acontecimientu históricu tán relevante pa  nós por ser l'aniciu del posterior Asturum Regnum que, colos sieglos, empobinó pa l'Asturies de los nuestros antepasaos y de nosotros mesmos, claro.

 

-¡Rediósla, Espi! ¡Acabes de dexame claváu! Porque mira tu qu'hai xente aprofiando dende cuantayá que nun-yos cuaca como fiesta autonómica la festividá del ocho de Setiembre, que anque s'amiesten nello lo relixoso colo identitario, asitiar ellí el fechu de la victoria de la xente de Pelayu y los anicios del nuestru reinu nun cuadra nada bien. 

 

-Pues esta fecha que te digo ta bien sopelexada per dayures. Bien de páxines l'apunten y dan datos de por qué l'estudiosu Sánchez Albornoz la sacó a la lluz. Vamos, que nun ye nada tapecío nin difícil d'atopar. Tolo contrario. Mesmamente nel añu dos mil ventidós el gobiernu asturianu entamó unos actos onde s'arrecoyía'l tema de Cuadonga y asitiáronlos, precisamente, ente los díes ventisiete y ventiocho de Mayu. ,Vamos, nada difícil de descubrir, anque seguro que bien de xente arremielle los güeyos al enterase como te pasó agora a ti.

 

-Pues chócame a embute que nun-y diere a naide por facer alcordanza dala d'esa fecha vinculada con un fechu tán importante de la nuestra historia como ye la Batalla de Cuadonga, Espi.

 

-Tamién me paez bien raro a min, Xanu.  Magar nun haya un consensu científicu nel tema, yo nun duldaría un res en facer alcordanza daquellos fechos en llegando a esa fecha señalada. Por tolo que me molesté en lleer del tema, tamién tien bastante aceptación. Tenemos ehí un auténticu bixu históricu p'averanos a él y pa estremar la festividá relixosa de Setiembre cola más política de Mayu. Pero'l personal anda embizcáu namás col venticincu de Mayu, fecha perimportante pa facer alcordanza y qu'usen dellos pa contraponelu col ocho de Setiembre. Y d'esi enguedeyu nun los saques, miániques.

 

-Pues, ¿sabes que te digo, Espi? Que na Viesca Dayuri vamos entamar a celebrar les dos feches. Y, como pa detrás, namás que tán separtaes per tres díes, pues la folixa que podemos enxaretar pue ser bien sonada. Asina que vamos dir echando voz a tola xermandía que nos movemos per esti monte pa ponenos con ello. Axuntar nun mesmu mes les alcordances de la batalla que foi'l bierzu del nuestru reinu col llevantamientu onde nos declaremos soberanos al traviés de la nuestra institución histórica d'autogobiernu nun ye cosa menor precisamente...

 

-Pola mio parte yá entamo a llamar a xente pa les celebraciones, Xanu. Qu'esto va resultanos prestoso a esgaya.

 

-¡Estupendo, Espi! Y agora yá sabes polo que toi esperando, ¡echa una cantarada, ne!

 

-Pues ehí va esta, que nos bien como aniellu al deu colo del Papa qu'acaben d'escoyer...

 

Vengo de Roma descalzu

de cumplir una promesa.

Agora que vengo santu

¡dame un abrazu, Teresa!

¡Ixuxú! ¡Echa un culetín, Xanín!

¡Viva la Viesca Dayuri! 

                                                                         

 

 

Infanzones, birusos, y un cañón de madera

 Cuantayá que no venía a visitame Lluis de Turiellos. Pero esta mañana aprució pequí y punxímonos a charrar mientres pimplábamos d'una bota con vinu de Pezós que traxere'l mio amigu.

 

-Bono, Lluis, ¿qué tal van les coses per ende, hom?

 

-Pues ando matando'l tiempu caleyando perhí y deprendiendo coses de cerca casa, que tenemos el mal vezu de dir allalantrones a visitar sitios y dempués desconocemos lo que tenemos equí mesmamente delantre les ñarices.

 

-Mialma que ye verdá lo que me dices. Asina que cuenta, cuenta, que yo tamién quiero saber coses de lo que mos arrodia...

 

-Pues tuvi lleendo sobre un pleitu famosu qu'hubo allá pel sieglu XI ente diez infanzones llangreanos y otros vecinos con propiedaes nel conceyu escontra'l rei llionés Alfonso VI. Dicíen qu'aquelles tierres yeren d'ellos y nun podíen pasar pa la ilesia, que yera la intención del monarca, nin pagar tributos. De mano'l rei decidió que la cuestión tenía que s'aclarar con un duelu ente un combatiente qu'elli elixera y otru de parte de los llangreanos. Pero ellos dixeron que non, nin por duelu nin pol Fueru Xulgu. Proponíen que cada parte escoyere un representante p'argumentar y algamar un veredictu. Cuenten que na comitiva real diba'l famosu Cid. Al final la balanza piló pal llau de rei, cosa esperable, y el conceyu de Llangréu pasó a depender del Obispáu uvieín al traviés d'una donación. Por eso, nel escudu llangreanu figuren dos cuarteles relativos a aquellos fechos. Nún figuren diez yelmos, n'alcordanza de los infanzones, y notru la Cruz de los Ánxeles, pa referise a la dependencia del obispáu. Por cierto, que'l llugar onde aconceyaben los vecinos col obispu, o pa resolver problemes del conceyu, yera La Puente de Turiellos, onde había una ponte medieval, de los que popularmente se conocen como romanes, y que cuenten que yera la mayor d'Asturies, hoi desapaecida. Queda inda nel llugar una casa medieval con una ventana con un escudu de la casa Bernaldo de Quirós, que va acabar esbarrumbamdo si nun echen les autoridaes manes nel asuntu...

 

-Pues bien interesante me paez esto que relates, Lluis, asina que vamos amugá'l gargüelu y sigue contándome coses, venga...

 

-Hai un nomatu que me llama l'atención. Nomatos per Llangréu hai dellos, los gatos de Lada, los pozaricos de Barros, los salmerones de Sama y, el que te voi comentar, los birusos de La Felguera. Esti apodu caberu suelen escribilu con uve, pero yo fáigolo con be, que ye como apaez nel diccionariu. Verás, d'ónde vien esa pallabra lleva a equívocu, pámidea. Hai años La Felguera tenía fama por ser la capital de los fumos, según se contaba. Había tala contaminación que pa contemplar un día nidiu costaba trabayu, porque vehíes p'arriba como una capa de borrina davezu. Asina que pue pensase que lo de birusos vien por virus, pol aquello de la puxarra que s'alendaba. Pero esos términos la xente antuguo nun los conocía, virus, bacteries...¡ca!. Pues ello ye que yo escurro que'l nomatu tien que ver cola fábrica que fundó Pedro Duro y que foi dándo-y sonadía al llugar onde s'asitiaba, La Felguera, hasta apoderar el topónimu parroquial que yera'l de Turiellos. Un birusu n'asturianu ye una persona que presume, que gasta fachenda. Y cuando tienes una fábrica nel llugar y los demás, non, cuando igual pues trabayar nella, metes otros anden llindiando vaques per ende, pues pues dexate llevar pol grandonismu. Asina que, quiciabes, cuando la xente del valle coincidía nuna romería o en chigre y aportaben los de La Felguera, los que presumíen de tener fábrica, pues diríen qu'ellí llegaben los birusos felguerinos...En fin, acierte yo o ande escabarriáu, esa ye la mio opinión sobre l'asuntu...

 

-Pues sí que guapamente podría venir dehí, hom...Y ente los piques de salmerones y birusos tamién los habría, camiento yo... 

 

-Claro, Xanu. Anque esa rivalidá  foi quedando amatagada col pasu de los años y les xeneraciones, pero rivalidá sí que l'había, como hoi tovía la hai ente Uviéu y Xixón, por poner un exemplu. Yo, arriendes de los xareos futbolísticos ente los aficionaos del Racing de Sama y el Círculo Popular de La Felguera, que se fusionaron pa formar l'actual Unión Popular de Langreo, recuerdo agora, a botavoléu, un par d'anécdotes que nun sé si sedrán ciertes o non, pero sí que rulaben per ende hai tiempu. Verás, contáronme que cuando había fiestes en Sama o La Felgura, había vecinos de la villa  cecana que diben afataos como si fuera a llover, con paragües y too, anque fixere sol. Cómo acabaría la cosa si llograben d'estes traces atrayer al Nuberu, eso yá nun lo sé. Tamién me contaron qu'una vez, una xente de La Felgura escurrieron, nada menos que montar una pieza d'artillería pa cutir a los vecinos salmerones. Asina que la iguaron, buscaron un sitiu amañosu y dispararon. Pero'l cañón estampló y acabóse ellí l'asuntu. Claro que bona parte de que fracasare la operación debió tenela que'l cañón taba fechu...¡de madera!

 

Eché yo una carcaxada con aquelles ocurrencies de les rivalidaes y, como siempre que tengo visita me pruye la curiosidá por saber les noticies que circulen pel mundu alantre, entrugué-y al mio amigu polo que pasaba nel so conceyu. Y entós va y ponse él:

 

-Pues mira, Xanu, hai un fechu qu'acaba cola paciencia del más pintáu. Ello ye que llevaben abondos años p'acabar col soterramientu, d'un quilómetru de les víes del tren del antiguu y históricu Ferrocarril de Llangréu. Y cuando, por fin, ponen el ramu a la obra, pues queda una bona estensión de terrén pa acuriosar y urbanizar. Pero, entós...¡atopemos col Gobiernín, manín!. Y resulta qu'agora, por nun sé qué sides, dicen que van tardar meses en echar a andar tol asuntu. Y la yá sabemos, por esperiencia, que cuando una alministración echa'l frenu y diz que van tardar tiempu en quitalu empicipien a temblanos les piernes cola que nos pue cayer...

 

-¡Rediósla, Lluis! ¡Vaya llaceria que nos cayó nesti país colos mandones!. Pero, bono, voi sacar unos cachos de choscu y pan de sucu pa saborgalo col vinu mientres siguimos dándo-y a la parpayuela, que nos va venir bien forrá l'estómagu con daqué... 

                                                                                 

                                                                           

Ñeros, biltos y espiches

Caminamos Marzu alantre. Hoi vinieron a visitame'l trasgu Manfurada y el so primu, el sumiciu Patriciu. Punxímonos a charrar al llau del caborniu mientres pimplábamos d'una bota vinu de Pezós pa entoná'l gargüelu y afalá l'ánimu.

-Pues yá andamos nel mes de los ñeros -dixo Patriciu-. Y yá sabéis lo que nos diz la sabencia popular no que se refier a ellos y al ciclu de los páxaros. Un dichu fálamos de Marzu nialarzu, Abril güeveril, Mayu paxarayu, per San Xuan esnalarán y per Santa Marina buscarán la vida. Y otru cuenta que, en Marzu faigo'l niarzu, n'Abril, pongo'l güevín, en Mayu guaro, en Xunu plumo, en Xunetu écholos a pidir con un cestu, y n'Agostu si los veo nun los conozo... 

-Guapo daveres -puntualizó Manfurada-. Y, arriendes del trepe que traen los páxaros iguando ñeros, tamién vemos cómo va espolletando, adulces, la ñatura. Dalgunos árboles, como les cerezales entaínen a florecer, otros van engordando los biltos pa qu'empicipien a abrir...La viesca emprima a esconsoñar. Porque yá escuca ehí cerquina la primavera.

 

-Pues tenéis razón -punxime yo-. Y, diendo a xeres más humanes, ehí tenemos averándose'l día de San Xosé, que suel tomase como finxu de referencia pa  entamala cola temporada de les espiches. Yo yá toi naguando por dir a dalguna pa tastiar la sidra nuevo del añu. Y, si se m'entama, el vinu nuevo tamién, que de too tenemos na nuestra tierra...

 

Y, nesto, sintimos que nos saludaben. Yera Don Quixote de Caravia que venía pa la llende'l caborniu.

 

-Ayó, xente. Veo que tais dándo-y a la parpayuela con ganes -dixo él.

 

-Y pimplando tamién con ganes -contesté yo-. Asina que pues axuntate al aruelu. ¿Hai novedaes pel mundu alantre, hom?

 

-Haber hailes a embute y males. La llaceria de Gaza sigue ehí. Lo d'Ucrania ensin iguar. Con chiflaos perdíos  mangoniando'l mundu...Y ya, en plan más llariegu, con ocurrencies que nun sé si son pa tomales a risa o pa respigase de llercia.

 

-¡Cóime, eso de les ocurrencies nun me cayó embaxo! Cuenta dalguna, Don Quixote. Pero primero vamos echar unos tragos, nun vayamos a empapizanos colo que nos digas -comentó Patriciu.

 

-Pues, pasáu l'antroxu, sigui la comedia na Xunta Xeneral. Debió vaga-yos poco l'antroxada y ellos siguen. Agora escurrieron aconceyar a un grupu que bautizaron como espertos pa ver si paga la pena oficializar o non l'asturianu y eonaviego.

 

-¡Arreniego los degorrios! -glayó entós Manfurada-. Lo de la oficialidá pertenez a bagaxe de los drechos llingüísticos. Y entós agora, reconocer los drechos llingüísticos de la xente asturiano ¿depende d'un puñáu d'espertos, ho? Yo taba na cuenta que los drechos nun se daben o quitaben siguiendo'l petite d'un grupu de persones. Son drechos, reconócense, protéxense, y puntu redondu.

 

-Pues, miániques, que tien migaya la cosa -comenté yo-. Nun imaxino yo tratar d'esa manera drechos como'l de votar, opinar, manifestase,  o los de cualquier persona por razones de raza, sexu o relixón, como nos encamienten los cartafueyos internacionales...

 

-Ya, Xanu. Pero los drechos llingüísticos siempre son secundarios pa los monxures que nos gobienen n'Asturies y pa los cabezaleros d'esos partíos qu'esberriden conseñes favoratibles a la oficialidá, pero que, a la hora la verdá, nin tán nin se-yos espera. Por más que nos pongan la cabeza como un bote, siempre va haber daqué más prioritario pa ellos. Por eso, nesti casu, entamen propuestes que nun tendríen sen si fuere p'aplicales a drechos d'otra mena...-comentó Don Quixote de Caravia.

 

-Pues vamos daos viendo cómo ta'l personal mundu alantre y cómo anden les coses na antoxana de casa...-dixi yo-. A too esto, la caldera de la sencia nun hai manera d'atopala, redióla. A lo meyor hai que llamar a espertos pa buscala. Pero como quexándolo bien tampoco nun vamos 'iguar nada, vamos  siguir amugando'l gargüelu y voi sacavos una garulla pa picar daqué y entoná'l butiellu...

 

Y los mios amigos y yo siguimos pasando la mañana a la nuestra manera y espansionando un pocoñín, que los asocedíos d'esti mundu traidor son p'alloriar too darréu... 

                                                                                

 

El país imaxinariu y los dos cuadonguismos

Andaba yo esta mañana dando una vueltuca pela carril cuando vi averáse tarabicando al busgosu Potrosu y acompañáu pol trasgu Manfurada. Saludémonos y entamemos a da-y a la parpayuela.

-¿Pa ónde empobináis, ho?

 

-Pues pa nenyuri en concreto, tamos dando un paseín pa espansionar -respondió Manfurada.

 

-Y yá de pasu aprovecho pa echar una güeyada pa ver cómo tán les coses per esta zona de la viesca -añadió Potrosu.

 

-Pali que pali, va avanzando l'iviernu camín del antroxu. Supongo qu'un día d'estos va aprucir pequí Sildru'l Guirriu -dixi yo.

 

Y, rediola, si primero lo digo, primero se llanta al nuestru llau Sidru d'un blincu cola piértiga y xingando los cencerros. Entós va y ponse  él:

 

-Pues, mialma, que yá tenemos a la vuelta de la esquina l'antroxu. Asina qu'ando pequí entrenando un pocoñin. Anque ando bien en forma, porque l'antroxu en realidá yá empicipió allá per Avientu y pa lo que vamos ye pal finxu final d'estes dómines de mazcaritos, comedies y aguilandos...-comentó Sidru.

 

Entós sintimos como una héliz y vimos que venía a posase cerquina'l maderñoxiru de Pinín. Posáronse el guah.e y el Gaviotu, que venía con él. Saludémonos toos y axuntáronse a parlotiar.

 

-Pues venimos a visitate, Xanu, porque esti añu yá se puen pañar oricios de nuestro, dempués d'abondos años de veda, y equí'l Gaviotu tráxote una paxa d'ellos pa que los cuezas y dar bona cuenta d'ellos. Asina que yá tardes en descorchar unes de sidra p'acompañar... -dixo Pinín.

 

-Mirái qué bixos de la mar. Velos y ponese a naguar ye too uno -comentó'l Gaviotu mientres nos enseñaba la paxa colos oricios.

 

Nun perdimos nin un segundu más. Enfilemos pa la llende'l mio caborniu, punxi una potona a ferver agua, eché p'allá los oricios y descorché unes de sidra mientres siguíamos echando una rocada.

 

-Esto de movese pela viesca Dayuri, alcontranos pa charrar de les nuestres coses y ponenos a arranar mientres cuecen los oricios sí que ye un país, mialma...-dixo Potrosu.

 

-¿Y por qué t'entró esi rixu patrioteru de sutrucu, Potrosu? -entrugué yo pruyéndome la curiosidá.

 

-Pues porque alluendi de la nuestra viesca hai millones de persones viviendo nun país imaxinariu. Una patria que namás que ta nes sos cabeces y que ye icompatible cola historia, la cultura y les llingües que los arrodien y que consideren gafures pa esi país de so.

 

-¡Hai, hom, ya sé per ónde vas! -respondió Sidru-, tu tas refiriéndose a toa esa xermandía que puña contra tolo que nun concase col so idioma, que consideren l'únicu posible, nin colos sos discursos culturales, que tamién consideren los únicos valoratibles. Ensin escaecer l'enfotu que tienen de mardomar a tolo demás y a remanalo pa frayalo políticamente tamién...

 

-Pues yo camiento qu'estes coses van por folaes. Y anguaño tamos nunes dómines onde los encerrizaos nos sos respeutivos países imaxinarios tán nel cumal de la fola, asina qu'a los demás tócanos ñavegar escontra'l vientu y tratar de nun nos fundir antes d'arribar a puertu cuando, allá de los tiempos, podamos atopar la mar bella -coméntó entós el Gaviotu.

 

Y, entrín y non charrábemos d'estes coses, noté que Manfurada taba entreteníu pasando piedriquines pel furacu de la mano. Entós póngome yo:

 

-A, Manfuradina, véote como n'ayén y despistaducu ehí a lo tuyo... 

-¡Ca!. Nun pienses que nun m'interesa lo que tais diciendo, Xanu. Toi sintiéndovos lo que faláis y pensando tamién. Yo qu'ando caciplando per ende peles cases de la villa adico cómo anda la xente alloriao siguiendo a cabezaleros que tan como auténtiques maniegues. Papando discursos que meten mieu. Ta too tracamundiao enforma y tal paez qu'enveredamos pa tiempos abegosos y pindios...

 

-Coincido colo que diz Manfurada, chachos. Yo que me muevo pel agua y pel aire visitando sitios a magüeyu puedo dicivos qu'hai bien de xente qu'anda envizcao con eses espiriques que nos lleven a un mundu au'l desaniciu de los pueblos y l'arcoxar a la xente son les metes a algamar pelos monxures políticos y económicos de turnu. Una llaceria -amestó Pinín.

 

-Y equí, n'Asturies, la cosa nun pinta diferente. Vamos camín d'acabar estrapayaos por esa folada tarrecible. Siguimos picu abaxo, por nun dicir que cayendo en barrena, simplemente. Tiénenmos bien xuncíos al rumbu del país imaxinariu qu'enxarenten xente foriato y ayeno, pero que cuenta con toles sofitancies posibles ente nós -puntualizó Sidru.

 

-Y empapirotiaos con esi discursu de la amabilidá llingüística, que nun ye má una garduña pa cazar boborolos. Y colo de los cuadonguismos p'acabar de frayanos -dixo Manfurada.

 

-¿Los cuadonguismos? ¿Pero qué ye qu'hai más d'ún, ho? -entrugó entós Pinín.

 

-Pues sí. Concretamente hai dós -respondió Manfurada-. D'un llau'l cuadonguismu de dreches que sopelexa que la nuestra tierra ye'l bierzu d'esi país imaxinariu del que falamos, y que'l nuestru destín históricu ye sacrificanos por él a cosa del nuesru propiu desaniciu. Pero hai otru cuadonguismu d'izquierdes que considera que somos el faru qu'alluma al proletariáu del mundu y la nuestra misión ye tamién sacrificanos pa tener siempre encesu esi faru como prioridá absoluta, arrenunciando a lo nuestro por ser  siempre secundario y perdiendo les madreñes p'andar  al rau de lo que se cuez na capital del reinu, al empar que se refuga cualquier poryeutu fechu con arbíes propies. Al final, dambos cuadonguismos coinciden nuna cosa y que ye andar siempre estelaos y remanaos polo qu'otros entamen per ende p'aculla...

 

Tando nestes, sentimos retumbar en tol monte una voz arrecha y melguera inconfundible que cantaba:

 

"Camín del futuru enfilo

col fatu bien añudáu, 

col enfotu por bandera

y el palu pintu terciáu.

¡Ixuxú! ¡Viva la viesca Dayuri! ¡Puxa Asturies!"

 

Yera Espi la Mariñana. Capiémosla pa onde tábemos nós y entrugué-y yo:

 

-Con tola que ta cayendo, ¿hai enfotu pol nuestru país, Espi?

 

-Si llevamos en fatu otra manera abondo estremada de facé les coses, si nos enfotamos nello, y si camudamos tanta  amabilidá por más palu pintu, igual hai un ventanucu pa l'enfotu, Xanu, quién sabe. Peridfícil lo tenemos, pero...

 

Y ello foi que los oricios acabaren de tresnar. Asina que fiximos posa na nuestra parrafada y entamémosla a saborgalos mientres amugábemos el gargüelu con unos culetinos de sidra, que yá sabéis lo que nos encamienta'l dichu de qu'oveya que berra, bocáu que pierde...

 

                                                                           

 

 

Una ayalga y un currivirás...

Fai galanes el mes de Xineru. Díes de xelada, cutu y ñeve nos altos. De reposu en monte. Tamién amañosos pa trepar daqué. Hoi riscó l'alba d'un día escampláu. Entróme'l rixu de cabruñá'l rozón pa entamala a esverar y rozar los bardiales de la llende'l caborniu. Asina que garré los fierros y púnxime a ello. Cuando taba enfotáu nello vi como pasar una solombra perriba min. Dempués aterrizó en prau'l madreñoxiru de Pinín. Posáronse d'él el guah.e y el Gaviotu. Dexé la xera y fui pa contra ellos pa saludalos. Entamemos a echar una rocada.

-Bono, Xanu, escomencipia l'añu y paeciónos una bona idea venir a facete una visita -dixo'l Gaviotu.

-Y tamién a traete daqué que de xuro que te va dexar plasmáu -añadió Pinín.

-¡Rediosla, chachos!. ¡Pues yá toi arranando por saber qué ye eso que me traxístis! -entainé a contestar yo.

-Pues verás -siguió'l Gaviotu-. Ello ye que tuvimos apocayá per Cuadonga. Ellí atopemos un monxu vieyu con unes guedeyes y unes barbes llargues y blanques. Dixímos-y que conocíamos la Viesca Dayuri y, entós, entregónos esto encamentándonos que lo guardemos y curiemos mui bien pequí.

Sacó de siguío'l  Gaviotu una botella d'un zurrón y apurriómela. Y póngome yo:

 

-¡Cóime!. ¡Nun imaxinaba que podía quedar yo plasmáu con una botella, que talo paez dágua...!

 

-Sí, pero llei la etiqueta que tien pegada -señaló entós Pinín-. Y yá verás que sorpresón vas llevar...

 

Eché-y una güeyada pa la etiqueta de la botella. Taba escrita a mano con una lletra antiguo que reconocí darréu como visigótica asturiana y en llatín. Traducío al nuestru idioma ponía esto: "Beberaxu máxico iguao con agua de la Caldera de la Sencia del llugar de Cuadonga...". Dempués ponía los floritos colos que taba fechu y que, rebuscando con paciencia, podemos atopalos, guapamente, na Viesca Dayuri. ¡Y vaya que si plásmé con aquello! Quedé arremelláu naquella botella y como empapirotiáu un cachu. Dempués, tornando a migo, dixi a los mios amigos:

 

-¡Pues menudu tesoru que tengo nes manes! Esti beberaxu ye lo que pue facer que salga del aburrigañamientu y la vida amomiada y n'ayén onde ta somorguiao la sociedá asturiana d'anguaño...Y recuerdo que tenemos encamentao, a la xente qu'abeyamos per esti monte, buscá la Caldera de la Sencia, que ta perdida cuantisimayá y que s'atopa ayuri ente nós. Ensin ella nun hai manera de tresná'l beberaxu máxico y, entós, pinten mal les coses nesti país de nuestro...

-Entós -púnxose'l Gaviotu- yá podemos ponenos a escurrir ónde podemos esconder esta ayalga pa curiala y que nun  desapaeza...

-Y recordar a tola xermandía d'amistaes d'esta viesca que nun afloxen na xera de buscar la Caldera de la Sencia, que vanos nello la pervivencia del nuestru país -comentó Pinín.

De mano, guardéla nun sitiu bien difícil d'atopar nel mio caborniu. Dempués saque unes de sidra y entamemos a meter unos culetinos pal butiellu. Y póngome yo:

-Camiento que los Reis Magos d'Oriente sedríen bien arrogantes con vosotros y que vos cagaríen bien de regalos...

-Yo punxéronme un currivirás con cascabelinos atrás -dixo'l Gaviotu.

-Y yo otru, pero'l míu anda p'alantre y p'atrás -contestó Pinín.

-Pues yo cagáronme una nota colos trabayos que tengo de facer pa tené la llende'l caborniu en perfectu estáu de revista -dixi yo riéndome pa siguir cola broma de los mios amigos.

-La verdá ye que presta pola vida ver a la rapacería ilusionase cola llegada de los Reis Magos d'Oriente, tresalecer cuando ven pasá la cabalgata, achucase ceo pa que puedan dexá los regalos y llevantase atarraquitaos d'ilusión pa rebuscar per casa p'atopalos, que puen tar nun armariu, so la cama, onde dexasti les zapatielles...en cualquier sitiu escondíos -dixo'l Gaviotu.

-Ye que'l mundu del guah.eríu ye máxicu en sigo mesmu, ¡y ensin falta de beberaxu dalu pa que-yos esnale la imaxinación! -comenté yo.

- ¿Sabéis que vos digo? Pues qu'un día vamos enteranos daveres cómo ye un currivirás, porque nos lu van acabar poniendo de tanto aneciar en pidí-yoslu una xeneración tres d'otra -permedió entós Pinín.

Y ente culetinos y risotaes siguimos dándo-y  a la parpayuela y pasando la mañana nesta viesca onde la ilusión y l'enfotu tovía guañen ente nós...

                                                                            

Solsticios y Mazcaraes

Voi pañar unes castañes

allá en monte nuna cuerria

pa facer bonos potaxes

nestos díes de La Vieya.

¡Ixuxú! ¡Viva la Viesca Dayuri!

 

A estes altures, nun fai falta que vos diga quién pue andar per ende, nesti monte, si sientes gargoliar a una muyer una cantarada. ¡Ca! Pues equí toi yo esta mañana soleyera, cuando'l mes de Payares y l'añu van camín de dar les boquiaes, acompañáu de Sidru'l Guirriu, que son les dómines d'él y anda pel monte saltando sebes pa entrenar. Y yá se vien averando Espi la Mariñana p'axuntase a echar una rocada con nós. Saludémosla y siguimos dándo-y a la parpayuela. Asina que póngome yo:

 

-Ayeri foi'l solsticiu d'iviernu. Asina que yá entremos nel ciclu onde la lluz va dir, adulces, apoderando a la escuridá...

 

-Pues sí -dixo Espi-, anque tamos escomencipiando l'iviernu, los díes van dir medrando. Esto de los solsticios dexáronmos una güelga bien fonda al traviés de les civilizaciones que triaron esta tierra y otres munches, mialma, y tovía hai xente que los sigue celebrando. La llucha ente la lluz y les tiniebles. Un fitu qu'enxamás cayó embaxo na historia de la humanidá...

 

-Sí. Y estes dómines au tamos son perespeciales na nuestra cultura tradicional. Tiempu de mazcaraes, comedies y aguilandos. De cambiu de lo vieyo polo nuevo. De naguar porque, pali que pali, vaya creciendo la lluz y acercándose los tiempos onde la ñatura empicipie a esconsoñar -apuntó Sidru.

 

-Reises de Tormaleo y Valledor, Mazcaritos de Rozaes, de Villapañada, Zamarrones en L.lena, Guirria y Aguilanderos en Ponga, Mazcaritos n'Uviéu, Sidros per Valdesoto...y más xente que me queda en tinteru y qu'andechen nesto de recuperar les vieyes tradiciones -añadió Espi.

 

-Pues too ello podemos resumilo como l'antroxu, porque lo d'antroxar nun ye namás qu'allá pa Febreru o Marzu. Emprima agora y espúrrese a lo llargo del iviernu -intervine yo.

-Pues sí, miániques, el solsticiu d'iviernu y les mazcaraes van xuncíos col mesmu lloriame -dixo Sidru-. Porque tamos en tiempos que yeren perabegosos pa les vieyes cultures, onde aprucen el fríu y la ñeve, la tierra nun da, desplácense los animales, y la triba veía más amenazada la so supervivencia. Agüeyando p'aquelles venus acutralaes del paleolíticu pescanciamos la ñecesidá de la reproducción y la supervivencia, lo gafo de la esistencia en tiempos remotos. Mirái mesmamente ente nós a la venus de La Riera, pa la fertilidá de la tribu, o a la de Les Caldes, amestadura de muyer y animal y probablemente tallada nun propulsor pa cazar.Y si adicamos tamién pa les pintures de les cueves y l'arte mueble vemos antropomorfos, figures onde s'amiesten los rasgos humanos y animales, que ye lo que nos llegó a los nuestros tiempos en dellos mazcaritos. Hasta la mesma Vieya cola calavera d'un caballu o una burra afatada con rames y ropaxes paez llevanos en pelondín a ritos tribales. Claro qu'anguaño los significaos que pudieren tener, allá de los tiempos, yá tán despintaos na nuestra alcordanza.

-Tamién veo yo una rocea a reconocer d'ú venimos que camiento que tien que ver col enchipamientu que tenemos nes cultures abondo desendolcaes teunolóxicamente, pero que nun lo tán a otros niveles. Ehí tenemos delantre les nuestres ñarices guerres y xenocidios como parte del nuestru día a día. La barbarie en plenu sieglu ventiún. Pensamos que tolo pasao yera poco menos que propio de xente aburrigañao, pero, según vamos pescudando nello, observamos que nun yera asina pa nada -reflexonó Espi.

-A too esto -púnxime yo-, el pesu de les cultures y creencies ancestrales ye tán bultable, que les mesmes relixones actuales sofítense nelles tratando d'averales pa sigo. Rebautícense zones dolméniques o especialmente telúriques, afítense fiestes nos solsticios...Por poner un exemplu namás, ehí tenemos el llugar telúricu de Cuadonga, que rescampla como bierzu de cultu paganu, cristianizáu cuantisimayá. ¿Y sabéis qué vos digo?. Que pa los mitos como yo y pa bien de xente tamién, estes feches son especialmente afayadices, porque nos xunen a vieyes cultures que dexaron el so ñiciu nes actuales. Recordái mesmamente cuando pa quitar el fríu  a la hora d'echase o pa sanar la mancadura d'un neñu usamos la espresión ¡uxa, uxa! Cualquiera sabe d'ónde nos vien esa invocación pa esconxurar lo que consideramos dañible...

-Pues, falando de lo más mundano, equí traigo una goxa castañes qu'acabo de pañar na cuerria. Y como'l Xanu siempre tien sidrina per ende, podemos amagostales y siguir charrando un puquiñín más -brindónos entós Espi.

A Sidru'l Guirriu y a min paeciónos estupenda la idega d'Espi la Mariñana, asina que punxímonos a ello, que comer, beber y echar una rocada son actividaes bien prestoses, miániques...

                                                                                  

                           

El lloriame nuevu

Pues ello ye que taba yo esta mañana iguando un tayuelu cuado sentí sonar unos esquilones. Aprucí pa la carril y vi que venía monte arriba Pachín Boroña delantre de la pareya y el carru, y tiráu p'atrás, como enchipáu y gayoleru. Saludémonos y pruyóme entruga-y pol aquello de la so fachenda tan aquello.

-Véote hoi especialmente gayasperu, Pachín.

-Claro, Xanu, écha-y una güeyada pa lo que tengo detrás y vas saber por qué.

Miré entós pa los armentíos y el carru y póngome yo:

-Mialma que traes frescos los gües y percuriosu'l carru...

-Gracies, ho, pero repara nel lloriame. ¡Ye nuevu y hoi toi d'estrenu...!

-¡Ai, hom, ye verdá. Y bien guapu que ye...!

-Xanu, por munchu ciñu que-y garremos a les coses, hai vegaes que toca renovase o morrer. Y el lloriame que tenía yá daba perceguera ponese a xuncir con él. Asina qu'arrascá'l bolsu y a comprar otru...

-Pues mira tu, Pachín, esto que me dices valme de metáfora pa coses que dacuando camiento yo. En bien de facetes nesta vida enfotámonos n'intentar llograr coses usando unos aperios que yá nun cuaquen pa ello. Pero aneciamos en nun los anovar y asina nos pinten les coses...

-¿Sabes qué pasa, Xanu?. Pues que, davezu, cuando enxaretamos dalguna organización o proyeutu p'algamar unos fines, asocede qu'acabamos envizcándonos no entamanao convirtiéndolo en fin en sigo mesmo y escaeciendo esos oxetivos que queríamos algamar...

-Pues sí que ye verdá, cho. Y, nos peores casos, esi proyeutu qu'entamanemos, hailos que lu usen pa promoción personal, pa sacar porgüeyu, y camúdenlu asina nuna guaña d'intereses y non nun preséu útil p'algamar finxos. Y, si ven que nun-yos sirven pa ello, nun tienen problema pa enveredar pa otru llau onde lo ven más amañoso...Por poner un exemplu, esto va viéndose nel asturianismu, mialma. Dende va tiempu hai un movimientu de xente que h.ispió p'atechase a la solombra del poder políticu de turnu que da vergoña velo. Quieren vendenos la moto de que colen pa un sitiu afayadizu pa trabayar por cuestiones como l'idioma. Pero yo, nun me la peguen. Ehí hai munchu interés y nada d'esi altruismu casi heroicu conque se nos presenten delantre, Pachín del alma...A too esto, ¿Hai nueves perhí abaxo, ho?

 

-Hai daqué, Xanu. Una d'elles que na Ca'l Conceyu de Tapia refugaron lo de la mina d'oru. Agora paez que la pelota ta nel teyáu del Gobiernín, que podría tirar per otru camín. Ver veremos... Falando de coses más llúdiques, entremos nes dómines de les llacuaes. Xorrecen fiestes gastronómiques per dayures que van rematase coles pitances navidiegues. Ah, y perimportante tamién ye  renombrar que falta poco pa qu'empicipien les mazcaraes ivernales, con sidros, guirria, reises, mazcaritos de toa mena en dellos llugares d'Asturies, comedies, aguilandos...

 

-Claro, ye qu'empobinamos pal solsticiu d'iviernu que nos trai en pelondín tradiciones vieyes y prestoses qu'inda aliten anguaño, Pachín...¿Y pa ónde empobines monte arriba, ho?

 

-Pa nenyures en concreto. Esta mañana xuncí pa estrená'l lloriame y pa folgar. Que yo a los gües y el carru nun los uso namás que pa trabayar, tamién los saco p'asoleyalos y espansionar...

-Entós, como veo que tienes vagar, ven p'acá que vamos enfilar pel gargüelu abaxo unos culetinos de sidra y siguir dándo-y un pocoñín más a la parpayuela.

-Estupendo, Xanu, pues vamos p'allá...

                                                                               

El gorru coloráu del trasgu Manfurada

El mio amigu'l trasgu Manfurada ye la comedia. L'otru día taba yo sentáu cabo'l caborniu cuando lu veo venir tou escalabráu y fechu una llaceria.

-Pero, Manfurada, ¿Qué ta pasó, hom?

-¡Ai, Xanu, que me puñó un güe!

-¡Rediós!. ¿Y cómo foi eso?

-Pues verás. Como andamos na temporada de la gueta, pues resulta qu'atopé una cuerria enllena de castañes valdunes nuna llende au pacen unes vaques con un güe. Como a los gües-yos gusta puñar contra lo colorao, amazcaréme de verde pa pasar desapercibíu pente'l prau y pañar una goxa castañes...Pero'l malfadiáu animalón namás que me vio de lloñe turrióme y tuvi que salir prau alantre y furar pente unos escayos pa que nun m'enganchare...¡Y d'estes traces quedé!

-A, Manfuradina, y el gorru tamién lu llevabes de verde, ho?

-¡Rediosla, el gorru non, llevábalu coloráu!

-Entós nun t'estrañe nada de lo que te pasó. Como bien dixisti enantes, a los gües gústa-yos más dir a lo colorao que a un rapacín un xeláu de chocolate...

Dempués tuvimos charrando un cachu y el mio amigu trasgu despidióse y siguió'l so camín. Quedé yo reflexonando sobre aquel sucesu y entós el mio maxín llevóme al pendolín a una comparación. Pensé yo qu'hai munchos asturianos que traten d'amazcarar los sos rasgos culturales y llingüísticos col envís de pasar desapercibíos n'ambientes que consideren "finos" y onde sienten vergoña de presentase como son en realidá. Y sucede con frecuencia que se-yos escapa dalguna pallabra, o dalgún detalle, que faen que la so trampa rescample dexándolos n'evidencia...

Y pienso yo cuánto meyor-y diría a esa xente si fueren per esti mundu como realmente son, ensin avergonzase d'ello y llevándolo con arguyu y ensin complexu nengún. De xuro que diben tener muncho adelantao y nun tendríen que pasar la vida con esi aforfugu del que, de contino, s'obliga a comportase a ún como'l que nun ye...

                                                                            

Na carril echando una parrafada

Cuando ando trepando pela contorna y anda per ende un amigu, nun fai falta que lu vea dafechu pa saber quién ye. Siempre hai dalgunos ñicios que lu descubren. Hoi andaba yo esverando la llende'l caborniu mientres sentía barrenar a un picutorneru, que velu mal que se m'entama, mialma, pero sentilu tal paez qu'hai una carrapotada d'ellos pequí. Pues ello ye que sentí cantar un carru y sonar unos esquilones. De sutrucu, supi que xubía carril p'arriba Pachín Boroña. Asina que salí a la escontra d'él, saludémonos y escomencipiemos a echar una parrafada.

-Bono, Pachín, y ¿pa ónde empobines, ho?

-Pues voi ver si cargo lleña p'allarribón, qu'entremos na seronda  y, en pasando unes selmanes, camiento qu'han venir díes fríos y voi tener que tizar pa escalecer. Y, yá de pasu, a ver si aprovecho p'acercame al castañéu d'Espi la Mariñana a guetar daqué, qu'ando yá naguando por facer el primer amagüestín de la temporada...

-Estupendo. La verdá ye que la seronda ye una estación bien guapa del añu. Los montes vístense con unos colores vistosos abondo. Y dempués ta l'aquello de los castañeos. Metémonos en tiempu de la rebusca, de demer pa les cuerries, d'amagostar...¡y de rellamber los focicos cola sidra'l duernu, que tamos tamién n'epoca de mayanza!

-A too esto, diba facete dempués una visita y apurrite unes madreñes nueves que merqué pa ferrales, encantesales y pone-yos tamién protección nel papu...

Garró entós Pachín de carru les madreñes, apurriómeles y póngome yo:

-¡Ah! Agora que tamos colo de les madreñes escaecíaseme dicite que, pa cuando tornes pequí, mira ver si me traes una mantega d'eses que faes tan curioses. Que como tienes ganáu, camiento que siguirás faciendo mantega, quesu, requesón y lo que cuadre...

-¡Sí, hom! ¡Eso ta fecho! Cuando torne pal monte yá paso a visitate p'apurrite la mantega y recoyer les madreñines...

-A, Pachín, ¿y hai novedaes pellí pa la villa, ho?

-Haber siempre les hai, Xanu, pero con una d'elles traigo yo la risa floxa, por nun llorar...

-¡Cuenta, cuenta! ¿Qué pasa perhí, ho?.

-Pues qu'anden echando la comedia pa la Xunta Xeneral...

-¡Rediola! ¡Anden los sidros pela Xunta entamanando la comedia! ¡Eso nun lo podía imaxinar yo!

-¡Nomenón, Xanu! ¡Nun se trata d'esa comedia, sinón d'otra! Verás, esplícotelo. Ello ye que, como los monxures diputaos abúrrense abondo, escurrieron entamala otra vuelta colo de la oficialidá del asturianu y eonaviego. Cosa imposible dafechu, porque los númberos nun dan...

-Yá. Y cuando podíen dar tampoco nun ye que punxeren gran enfotu p'algamala...

-Esáutamente, Xanu, esáutamente. Lo que rescampla ye que la espirica llingüística asturiana nun ye má un carrobexu p'aventalu unos escontra d'otros a ver quién manca más a quién. Pura comedia. Simple paripé.

-Pues, Pachín del alma, esa comedia y esi paripé pa lo que valen ye pa que la xente s'alloñe más del tema, que lu vean como un alderique eternu que faen unos y otros somorguiaos nel so mundu y d'espaldes a los intereses verdá de los falantes. Y les consecuencies d'esa comedia figúraseme a min que vamos a veles nos años vinientes. Y van ser pernegatives pal idioma...

-Pues sí, Xanu. L'asturianu y eonaviego como carrobexos pa solmenase dayures, per un llau, y los falantes usándolos pa comunicase como siempre fixeron, per otru. Eso sí, n'aruelos coloquiales, que cuando se sal d'ellos yá sabemos les estorbises que siempre hubo y que sigue habiendo anguaño...Dos ámbitos estremaos y que tal paez que pertenecen a mundos diferentes...

-¡Hai, hom! Pasen los años y hasta les xeneraciones y siguimos empatonaos nuna llamarga que tal paez que nun tien igua dala, Pachín...

-Pues, polo que nos toca, el nuestru camín tien de ser el de siempre, Xanu. Pa qu'una llingua y una cultura alienden ye mester usales. Si l'asturianada ta viva ye porque se canta. Si la gaita ta viva ye porque se toca. Si la danza ta viva ye porque siguimos enxareyándonos con ella...Y si l'asturianu y eonaviego tán vivos ye poque siguimos usándolos, por mui mancorniaos que tean nestes dómines. 

-Pues, amigu, tenemos que siguir viviendo y tresmitiendo la nuestra herencia llinguística y cultural, alcordanos de la nuestra historia, en definitiva, curiar lo nuestro...Porque si esperamos porque vengan d'ayuri a facelo por nós, va vaganos, cho...Asina que, Pachín, cuando allá pela Xunta Xeneral cansen d'echar esta comedia, a ver con cuála otra nos sorprenden. Yá me contarás. Que pa eso tienen bon remangu, mialma...

-Cualquiera sabe, Xanu, cualquiera sabe...Y agora voi siguir carril p'arriba a pola lleña y les castañes. Como voi xubir más vegaes esta seronda, yá te fadré una visita pa garrar les madreñes y date la manteguca...¡Ta llueguín!

-¡Ta llueu, Pachín!

Y el mio amigu siguió carril p'arriba y yo empobiné coles madreñes pa la llende'l caborniu mientres sentía taladrar al picutorneru, que ye muncho más prestoso que sentir les comedies que se monten dellos allá per Uviéu, miániques...

                                                                                 

El cuélebre y los tres artesanos

Pues ello ye que yá tamos metíos na seronda y equí toi hoi arrecostináu nel caborniu y ensin esperar visita nenguna, a nun ser qu'aporte pel camín dalguna sorpresa. Y taba recordando una historia que sentí, cuantayá, a una muyerina mui vieya mientres filaba una rocada una nueche nun filandón. Asina que voi rellatávosla agora yo pa dir pasando'l tiempu:

"Ello yera una vegada un cuélebre gafu hasta velo y dexalo. Tenía axorizaos a tolos habitantes de la contorna. Dacuando, desapaecía dalgún papáu pol animalón y la so cadarma apaecía espreganciada díes dempués peles caleyes. 

La xente del llugar nun s'atrevíen a andechar pa enfrentase al cuélebre. Asina qu'un día aconceyaron y escurrieron facer una ufierta pa que tres héroes voluntarios fueren a echa-y un boroñu preñáu d'alfileres al cuélebre y desaniciase asina d'él. Con munchu sacrificiu, axuntaron una recompensa bien curiosa y dieron anuncia d'ello. Y, a los pocos díes, presentáronse tres artesanos dispuestos pa la  xera entamanada:

El primeru yera un gran tallador de bilordios.

 

El segundu yera un gran texedor de llevantos.

 

El terceru yera un gran iguador de ximuestres.

Reuniéronse los tres voluntarios y decidieron tresnar el boroñón preñáu d'alfileres y desquiñonalu en tres partes iguales que repartiríen pa ente ellos, col envís de que nengún mosquiare de la so misión contra'l cuélebre.

Cuando taben na so casa, acuruxaos pol mieu a la xera que teníen encamentada, escurrieron los tres la mesma engatada: mandar caún el so cachu de boroñu, partíu en dos trozos y marutaos como una sabrosa llambionada, a los otros dos artesanos  p'añusgalos. Dempués simularíen que los matare'l cuélebre y que namás que sobreviviere ún, qu'acabare con él, como un auténticu valiente, cobrar la recompensa y h.ispiar perlloñe a esfrutala, engañando asina a los vecinos.

 

Fixérenlo asina y morrieron los tres. Asina que, a fin de cuentes, la xente del llugar quedó ensin héroes y col problema por arreglar. Y el cuélebre pudo siguir cola so actividá sanguinaria per munchos años ensin que naide nun-y punxere pa ello torga nenguna. 

 

Sicasí, dalgo camudó nel comportamientu del espantible ser. Sigún cuenten los más vieyos, enantes del sucesu de los tres artesanos, el cuélebre avezaba a xiblar pela nueche de manera que facía respigase a tolos vecinos. Pero, dempués del sucesu, cambió los xiblíos por unes carcaxaes descomanaes que facíen tremar a les mesmes coraes de la tierra..."

Bono, pues esti foi el cuentiquín que sintiere a aquella paisanina. Y toi camentado yo qu'estes histories qu'avezaben a contar nos filandones, dacuando, escurriendo un pocoñín, puen resultanos amañones pa pescanciar dellos asocedíos de les nuestres vides cotidianes...

                                                                      

                                                                                 

La caldera de la sencia

 -A, Patriciu, ¿nun vendrás cola intención de furtiame daqué, hom?

-¡Ca!, Xanu, soi un sumiciu, pero tamién mitu seriu y fáigoles cuando les tengo que facer. Pero hoi nun toca, ho, que vengo esmolecíu buscando una caldera.

-¿Una caldera? ¿Dícesme qu'una caldera? ¡Rediósla, Patriciu, nun soi a entendete, chachu!

-A ver, Xanu, que nun ye una caldera cualquiera. Ye la de la sencia, que la curiaben allá de los tiempos nel templu d'El Milagru, per Cuadonga, y cuantayá que desapaeció y, claro, el beberaxu de la sencia sumióse con ella. Y como tengo esperiencia en sumir coses, voi ver si me val tamién p'atopar ésta...

Entós va Patriciu y echó mano a una fardela que trayía colgada en bandolera, sacó un papel, espurriólu y ponse él:

-Mira, Xanu, esti ye un dibuxu de Cuandonga nel sieglu dieciocho. Si te fixes na ventana d'arriba a la manzorga, hai una roldana y pinga d'ella un reyu que tien por una caldera que ta cabo ún de los tabayones. Pues esa ye la caldera de la sencia. Col agua d'ellí facíase un beberaxu que daba sencia a quien lu tomare. Pero como s'escabarrió la caldera amunchayá, pues la sencia tamién. ¡Y esi ye'l motivu de que la xente asturiano ande al aldu, amomiao, al debalu y ensin enterase de la misa la media!

-¡Arreniego los demonios!. Pero, magar apaeza la caldera y vayamos por agua a Cuadonga, ¡si nun tenemos la receta'l beberaxu poco podemos facer!

-Ehí ta l'aquello del asuntu, Xanu. Nun hai receta. Porque la sencia llévala l'agua y namás qu'apruz si se garra con esa caldera. Por eso ye perimportante atopala. Pa xaguar toa Asturies a calderaes y que la nuestra xente esconsoñe d'una vegada, ¡caso en tal! Que baxamos en barrena ensin xixa nin xacíu que lo torne y, dempués de tantu tiempu n'ayén, yá paecemos más una güestia penitenciando qu'un pueblu arrechu que sabe defendese y, per esi camín,  la nuestra tierra va acabar de mui mala manera...

-Agora sí que t'entiendo, Patriciu. Yá me paecía a min que les llaceries que pasen nesta Asturies de nuestro nun tienen manera razonable pa esplicales y talo paecen surrealistes dafechu.  Pero pa dar con ella va ser cosa de puru milagru. ¡Cualquiera sabe aú pue tar, si ye que ta ayuri...!

-Pues, Xanu, por eso ando yo pequí hoi. Porque esi sitiu onde ta ye per esta rodiada, na Viesca Dayuri. Cuntómelo un monxu vieyu d'aquellos llugares que-y aportare la ñoticia por tresmisión oral de la xente antiguo. Y yera mui de fiar. Dafechu.

-Entós habrá que la entamar aconceyando a la xente de confianza que vien per esta viesca pa qu'echen una gabita nesti llabor tan importante. Hai abondos llugares y requexos onde pue tar la caldera de la sencia y tenemos que nos esguedeyar pa buscala. Un país ensin sencia ye una marioneta remanada por intereses foriatos. Y eso ye lo que vien pasando cuantisimayá n'Asturies...

-Concretamente de magar desapaeció la caldera de la sencia hai yá bien de xeneraciones. Asina que toca ponese a buscar con enfotu y ensin descansu.

-Bono, Patriciu, pues voi tocar el turullu p'aconceyar a la xente amigo d'esta Viesca Dayuri, que toca entainar nesta xera tan importante. Vamos a ello...

                                                                              

                                                                               

Camín del Solsticiu de Branu

Vivimos nos díes con más lluz del añu. Y ello ye pola mor de que vamos camín del solsticiu de branu. Hoi vieno ceo a visitame la mio amiga la neanderthala Guoné. Tráxome una llebre yá esfoyada pa que faiga yo un guisu y xintar xuntos. Tovía me queda lo cabero del pelleyín de vinu y vamos aprovechalo echando unos cachos, que dempués avinagra y piérdese, cóime.

-Bono, Guoné, el solsticiu de branu ta ehí a la vuelta de la esquina como quien diz.

-Sí, Xanu, un resclavu qu'heredemos de les vieyes civilizaciònes que triaron el nuestru suelu.

-Yo esto de les vieyes civilizaciones nunca nun me cayó embaxo. Porque cuando una civilización sume, nun lo fai dafechu y de sutrucu. Siempre puen quedar ñicios, llixos, que trespasen al pelondín el tiempu y algamen mesmamente les dómines de gu.

-Pues sí. Y exemplos tenémoslos a embute. Basta con pescudar la mitoloxía qu'aportó a nós. Les tradiciones y vezos que se tresmitíen nos filandones cabo'l llar. Los solsticios. Tantes coses...

-Miániques que sí, Guoné. Arrepara na cigua, por exemplu. Cliques yá les tenemos representaes nel Pozu'l Ramu. Nes tradiciones populares, una manera d'oxar al demoniu de la casa ye qu'una muyer-y enseñe la fañagüeta. Y esi puñu que bien de xente lleva colgáu al pescuezu pudiere ser la representación d'una clica, precisamente, pa tornar el mal del güeyu. Da too ello pa pensar. Y les mazcaraes d'iviernu, con esos seres marutaos d'animales que yá vemos representaos nos tiempos prehistóricos o en cultures tribales qu'aportaron a los tiempos de nuestro...

-Y mira tu, Xanu, esi bixu cultural que ye'l corri-corri. Xente estudioso del nuestru folklor yá apuntó que pue ser daqué prehistórico, tribal. Pero, pa detrás, podemos arreparar nes pintures de Peñatú. Al llau del que llamen ídolu, hai unes figures humanes. Unes tán casi alliniaes y como caminando. Pero hai otra enfrente d'elles que lleva un cayáu y ta coles piernes y los brazos espurríos como blincando. Aseméyase bien a lo que vemos nesta danza. ¡Menuda coincidencia!. Y danza y pintures tán nun mesmu aruelu cultural d'antiguamente.

-Pues, falando de dances, ehí tenemos la nuestra, garraos en círculu, moviéndonos p'alantre y p'atrás y xirando. Tamién, ente los que s'averaron al estudiu d'ella, piensen que pudiere ser de dómines perantigües, una herencia de maneres de danzar de los nuestros antepasaos ástures. Yo va tiempu que lleí un llibru mui prestosu de folklor de María Xosefa Canellada. Ún de los prólogos cinca l'asuntu de vieyos escatafinos que pudieron pervivir nes sociedaes rurales asturianes. Y diz, nada más y nada menos, que pudiere restrexase nelles comportamientos de cuando les sociedaes yeren cazadores y recolectores. Y plantega que, guapamente, pudo haber una civilización que nos dexó xoyes como Altamira, na vecina Cantabria o'l Pindal, n'Asturies.

-Ten en cuenta, Xanu, que, mesmamente'l bierzu del reinu asturianu tien el so aquello. El llugar, cristianizáu, paez ser un llugar de cultu a la Diosa Deva. L'enterramientu de Pelayu y la so muyer Gaudiosa fixéronlu na ilesia de Santolaya d'Abamia, que taba al llau d'un túmulu dolménicu hoi desaniciáu. Dempués, a Favila, tamién lu enterraron nuna ilesia, la de la Santa Cruz, asitiada enriba d'otru túmulu dolménicu, que conserva  anguaño la so estructura menos la cobertoria. Y hai que sorrayar que la tierra d'esi túmulu considerábalo la xente como con propiedaes curatives hasta tiempos relativamente recientes.

-A too esto, tornando al tema de los solsticios, tenemos ehí la tradición de la foguera. Pescudar hasta qué tiempos remotos podemos recular  con esi ritu que conservamos actualmente venceyáu a la Nueche de San Xuan tien tamién la so migaya.

Y mientres siguíamos dándo-y a la parpayuela, entamé a tresnar el guisu de llebre, empicipiemos a remoyar los gargüelos con un cachu de vinu y punxímonos a naguar pensando na xinta que dábamos a meter pal butiellu...