domingo, 28 de diciembre de 2014

Los Reis y Os Reises.


Les tradiciones asturianes que xiren alrodiu del seis de Xineru o Día de Reis son bien prestoses y abondoses. Nunos casos compartíes con otros milenta sitios y otres más llariegues.

Nestes dómines ye cuando a los rapacinos asturianos-yos trayíen los xuguetes -y siguen trayéndo-yoslos, claro- los Reis Magos d'Oriente. Escríben-yos cartes, van a velos na viéspora a la cabalgata y achúquense ilusionaos a la espera de lo que-yos pongan. Un personaxe vinculáu a estos reis, non esclusivu asturianu, pero con un arraigu a la nuestra tierra que lu fai casi qu'autóctonu ye'l Príncipe Aliatar, mensaxeru que precede a los reis y recibe en persona les peticiones de los rapacinos.

Hai dos aspectos que me llamen l'atención vinculaos con esta festividá. D'un llau, la utilización, polo menos na zona xixonesa, del verbu cagar pa espresar lo que dexen estes maxestaes: ¿qué te cagaron los reis, ñeñu?, entrúgase a los guah.es nesti conceyu (desconozo si la espresión ye más xeneral). L'otru, que nestes dómines apruz esi xuguete con que los mayolonos tomaben el pelo a los rapacinos y que nun ye otru que'l curriverás con cascabelinos atrás, o qu'andaba p'alantre y p'atrás. Un xuguete qu'enxamás poníen nin cagaben los reis porque, cenciellamente nun esistía.

Pero alrodiu del seis de xineru siguen celebrándose pel país mazcaraes ivernales. Nel conceyu Allande salen Os Reises, xermandía amazcarada qu'alita en llugares como Tormaleo o El Valledor, colos sos choqueiros, basoiros, cardadoras, etc. que faen trastaes y lleven l'antroxu ivernal a los vecinos. Echen los sidros la comedia per Valdesoto. Y pídise per ende l'aguilandu.

Nun dexa de tar too ello endolcao por una atmósfera de maxa. Ella ye la que fai que los rapacinos puedan tener xuguetes na nueche de reis y que los mazcaritos nos tresporten acullá del día a día de la realidá cotidiana. De les picorotes de los capiruchos de los sidros pinguen cintes de collores, simbolizando esa maxa. Reis, reises, rapacinos, xuguetes, ilusiones... ye bono parar a antroxar nesta época del añu.

viernes, 19 de diciembre de 2014

Iviernu, solidaridá, fecundidá y antroxu


Nes nuestres antigües sociedaes campesines l'iviernu yera la estación más escosa.

Recoyida la collecha, la tierra entraba en lletargu y nun daba. El fríu tarazaba. La fame escucaba.


Ye entós cuando aprucíen los aguilandos. La xente de la comunidá pidía y recibía. Relacionábase y axuntábase.


Y tamién yeren les dómines de les mazcaraes, unes manifestaciones onde s'axunten actos que puen dir dende l'esconxuru a lo dañible faciendo sonar esquilones, al zoomorfu xamánicu protector de la reciella, o al ritual de fecundidá o purificación. Y too ello colos güeyos puestos nel  finxu'l cielu del tiempu en que la lluz va apoderar a la escuridá y la tierra va volver a echar. Unes dómines d'antroxu.


La salida, el primer día de Xineru del Guirria y los Aguilanderos en San Xuan de Beleño, nel conceyu Ponga, amuésanos guapamente dalgunes facetes de lo anterior qu'algamaron les nuestres dómines.

Los mozos solteros percuerren los llugares a caballu buscando l'aguilandu. Previamente, fixérase un sortéu onde de les entrañes d'un cántaru saldrán les pareyes de mozos y moces demientres les celebraciones.


Y dempués vien la figura del Guirria. Ye un mazcaritu y, polo tanto, tresllumba les llendes d'un ser humanu. Ye otra frasca de ser que s'adientra no máxico, no xamánico. Y la so función enllaza con rituales ancestrales vinculaos a la fertilidá de la tribu.


Fundamentalmente realiza dos funciones. Una d'elles ye dir pa escontra les moces p'abrazales y besales, valtando notros tiempos hasta los tabiques o puertes del cuartu onde s'escondíen les más miedoses o roceanes pa cuplir col ritu amorosiegu.


La otra acción del Guirria ye arreflundir puñaos de ceniza a los homes que va atopando pel camín. Nun tamos equí ante un actu fechu pa fadiar o incordiar. Tolo contrario, la ceniza simboliza la purificación del ser masculín. Mesmo la tradición cristiana tienla ente los sos rituales purificadores nel miércoles de ceniza.


Ye lo anterior una descripción breve d'una d'eses mazcaraes que pervivieron ente nós hasta'l presente. Pero nun ye la única. Hai otres xermandíes amazcaraes escucando yá nesti tiempu que s'abre según nos vamos acercando a les feches navidiegues. Reises, Guilandeiros, Sidros... resclavos d'un pasáu qu'alita anguaño ente nós. L'antroxu ancestral, máxicu, tribal.


Porque cuando la natura entra na so época más gafa del añu, ye menester axuntase, engabitar, esconxurar y axeitar la manera afayadiza pa la pervivencia del clan, camín d'un nuevu ciclu de lluz y collecha. Nes mazcaraes ivernales y nos aguilandos tenemos nicios que nos llegaron a güei d'esos vieyos ritos, d'eses ancestrales tradiciones. Cultura fonda y llariega con mayúscules.


domingo, 14 de diciembre de 2014

Les ferradures del perru'l cura

Maneres d'axorizar a los rapacinos o de face-yos dalguna engatada pa toma-yos el pelo los mayolones hai bien delles. Xuando al empar cola moxiganga, l'engañu y la sorpresa ye bastantina pa ello.

Na mio época de guah.e facía furor garrar a un neñu, miralu entientes engurriando'l ceyu, señalalu col deu y espeta-y: ¿tu nun fuisti'l que-y robó les ferradures al perru'l cura?. Y entós la víctima sentía un ñudu en garguelu que lu añusgaba y imaxinaba peñerando penriba la so cabeza les consecuencies más tarrecibles.


Namás que la esplicación d'otra persona que s'apiadare del críu o la capacidá de reflexonar que se supón que nos va dando'l pasu'l tiempu llograba esñizar los mieos d'aquella acusación bederre. 


Col pasu de los años, camiento yo qu'aquel engañu yera como un badagüeyu de lo que nos diba esperar en creciendo y nel futuru. Porque'l casu ye que, a lo llargo de la nuestra vida, tenemos que resalvar tou tipu de trampes y pilancos, enfrentanos o esmucinos de toa frasca de situaciones que nos aforfuguen y, en definitiva, sentir sobre nosotros l'apolmonamientu de tantes versiones actualizaes d'aquella alcordanza que nos respigó nel so día por culpa de les ferradures del perru'l cura.


lunes, 8 de diciembre de 2014

Llazos europeos



Ye Europa continente de naciones vieyes. Unes con estáu propiu y otres ensin él.
Tamién ye esti continente au nos asitiamos llugar de vieyes hermandaes, migraciones y relaciones.

Resulta perllamativo comprobar cómo hai mazcaraes asemeyaes a les nuestres -talo a los guirrios- pel continente européu a munchos miles de kilómetros del nuestru país. D'otru llau, nun podemos dexar de sentir como daqué hermano manifestaciones folklóriques alloñaes bien de distancia de nós. Dende música hasta cuentos o lleendes.


Danse anguaño n'Europa dos corrientes estremaes. D'un llau nel sen del uniformismu. D'otru, nel de la pervivencia de vieyes llingües, vezos y cultures. Esti últimu casu inxértase nel discursu de  la denominada Europa de los pueblos onde tien un sitiu claru y con drechu propiu la bien antigua nación asturiana.


Tovía hai xente pa esta parte occidental del continente que considera a los estaos actuales como daqué poco menos qu'inmortal, que siempre tuvo ehí y qu'hai que caltener a costa de lo que seya. Escaecen que los estaos y les naciones nacen y muerren. Y exemplos d'esto tenémoslos a esgaya y relativamente recientes (Checoslovaquia, Yugoslavia...).


Ye una xera perbona y mui saludable estrechar los llazos europeos. Pero non los iguaos nel más fríu mercantilismu, sinón los más fondos y ancestrales de frasca cultural, histórica, llingüística. Contemplando les diferencies como riqueza y afondando nes semeyances evidentes qu'atopamos. Una xermandía de pueblos europeos basaos nesa riqueza nacional ye una utopía anguaño, pero tamién la única posibilidá de sestaferiar un camín de collaboración a tolos niveles solidaria y vidable.




jueves, 6 de noviembre de 2014

Santolaya de Turiellos

La vinculación de Santa Eulalia de Mérida con Asturies vien d'antiguo. Los sos restos traxéronse a la nuestra tierra nes dómines del Reinu d'Asturies (reináu de Silo) pa que nun los coyere l'enemigu y reposen actualmente nuna urna na Catedral d'Uviéu. Ye la patrona de la diócesis y foi tamién la d'Asturies hasta la sustitución  pola Virxe de Cuadonga. Como anécdota, en 1.639 Antón de Marirreguera ganó un certame poéticu con un poema n'asturianu sobre'l pleitu ente Uviéu y Mérida polos restos de la santa.

Tamién vien d'antiguo la vinculación de Santolaya col conceyu de Llangréu. Yá figura una referencia a ella nuna donación del rei asturianu Ordoño I nel sieglu IX. Tamién hai quien caltién que foi nesti conceyu onde aniquilaron a les tropes de Munuza en retirada tres la Batalla de Cuadonga, pues el topónimu Olalies, onde se dio'l socesu, correspuende col d'Olaya, anque hai otros per Asturies onde alluguen los fechos (Proaza, principalmente).

A principios del sieglu XVII nuna cruciada de caminos llevántase na parroquia de Turiellos una capiella dedicada a la santa. Yera'l conceyu llangreanu zona importante de pasu y una de les víes usaes al entrar n'Asturies camín de la capital uvieína. Posteriormente, llevantóse nel mesmu llugar una ilesia románica con dos torres, nel añu 1.880, y consagrada tamién a Santolaya de Turiellos. Destruida cuando la Guerra Civil, reconstruyóse con otra estructura neorrománica y l'edificiu ye l'actual ilesia parroquial.

Los núclios principales de población de la parroquia de Santolaya de Turiellos yeren La Pumar, Vega y La Ponte. Nesti últimu llugar hubo lo que cuenten que foi la mayor ponte asturiana, quedado en desusu tres d'una riada que desvió'l calce del ríu y baltada llamentablemente. Tamién nesti llugar yera onde aconceyaben los vecinos de Llangréu pa tratar los asuntos de so.


La fundación pol empresariu Pedro Duro de la compañía Duro y Cía en 1.858 en terrenos de La Felguera fixo qu'esti topónimu fuere apoderando al de Turiellos, acabando por sustituilu casi dafechu. De magar principios del sieglu XX, la empresa camudó en Duro Felguera y entamaron a celebrase unos festeyos n'honor al fundador coincidiendo col so santu y que son hoi les fiestes patronales felguerines. 

Pasó la parroquia a denominase col tiempu Santolaya (Santa Eulalia, oficilamente) de La Felguera. Más sero, na década de los años sesenta, dióse'l cambiu de consagración de la ilesia, sustituyendo a la santa por San Pedro, pasando entós la parroquia a denominase San Pedro de La Felguera.

Pero l'apostalgamientu de Santolaya, la santa que per sieglos fuere la que veneraren na antigua parroquia de Turiellos y actual de La Felguera, nun foi total. Entrando pela puerta principal del templu, al fondu y a mano drecha (semeya del post), hai una capiella dedicada a ella y onde se venera la so imaxe. Ehí podéis visitala cuando vos peta y, si cuadra, prende-y unes veles echando unes moneduques. Que nesta escuridá tarrecible de desaniciu en que nos movemos anguaño, apurrir una migayina de lluz nunca ta de más. 

jueves, 9 de octubre de 2014

Un viaxe hacia l'absurdu

Nes sociedaes más primitives y tribales adícase una doble xuntanza. D'un llau,  la de los miembros de la propia tribu. D'otru llau, cola ñatura y les plantes y animales que s'alluguen nella. L'antropomorfu, el marutase d'animal o representalu en cueves y escultures da-y a ésti un valor cimeru. Porque nél tán la comída y la pervivencia de la propia tribu.

Cola evolución tecnolóxica ya'l mayor tamañu y complexidá de les sociedaes, empiecen a dase dos procesos. De mano, l'animal ye un ser inferior. La caza pa comer sustitúise pola caza pa divertise. Aprucen y espolleten los espectáculos de tortura animal. Xuégase cola pieza, faise que sufra. Y esfrútase del espectáculu. Fráyase la guaña vexetal avanzando lo ermo. D'otru llau, espolleta'l  biltu de lo individual como preferible a lo social. Búscase'l porgüeyu del individuu, non sólo frente a la sociedá onde vive, sinón a costa d'ella. Y ruempe d'esta miente l'eslabón de la vieya podrella que nos xunía a la Tierra como madre camudándola n'oxetu de negociu, a La Vieya como somantu vital.

L'esporpolle del individualismu ya'l distanciamientu de la ñatura algamen nos tiempos actuales un finxu que marca la última fase d'un viaxe a l'absurdu como especie y como sociedá. Los desanicios nel ferial de la vida algamen el so mayor sinsentíu. L'avance hacia la destrucción del planeta como hábitat afayaízu pa vivir entaina a reblagos. Otramiente, l'individualismu empicorótiase como l'oxetivu deseable. El triunfu individual, magar haya qu'esgonciar los proyeutos vitales de milenta conciudadanos, ye la meta a algamar.El porgüeyu colectivu sucumbe ante l'envizcamientu nel embeligru propiu.

En cada época histórica remanecieron contradicciones qu'acabaron resolviéndose nuna dirección determinada, acertada o erronia. Y, anguaño, tamos nuna d'eses encruciyaes onde toca iguar una situación enguedeyada abondo pa col mediu biolóxicu y ambiental d'esti planeta qu'habitamos y pal col modelu de convivencia pa onde empobinamos. Suena'l turullu qu'alerta del camín abegosu que llevamos como colectividá y que nos indica que ye una necesidá vital atopar alternatives que corrixan la trayectoria escabarriada de les nuestres sociedaes antes de que zapiquen nun caleyu d'imposible salida.

miércoles, 24 de septiembre de 2014

L'Alborecer d'onde venimos

Asturies conserva escatafinos de presencia humana de magar les dómines más remotes. Non namás de la nuestra especie, sinón tamién d'otros tiempos como, por exemplu, los del neandertal, onde tenemos xacimientos pervaloratibles.

Escarabicando nel pasáu, tenemos dos grandes époques anteriores a los tiempos de los ástures -auténticos  "güelos" históricos de los asturianos-, qu'abarquen bien de milenios, onde podemos atopar nicios  de civilizaciones que güei tenemos integraos dientro de la bayura del nuestru patrimoniu cultural. Una d'elles ye la de les cultures cazadores-recolectores que dexaron el so rastru ya'l so arte en bien de cueves del nuestru país.

Pero güei voi centrame notra gran época prehistorica. La que va del neolíticu al bronce y de dexó güelgues bien visibles ente nós que llegaron a l'actualidá.

Allá na Sierra Plana de La Borbolla, nel llugar llaniscu de Puertas de Vidiago,  hai una peña conocida como Peñatú. Enclavada nuna zona de necrópolis tumulares, esti llugar sagráu de l'antigüedá forma un abellugu onde hai unes representaciones rupestres que nos dan anuncia de cuando yéremos tribu que pastoriaba y cultivaba, con organización y tamién xerarquía, y que va del neolíticu al bronce, precedentes a la edá del fierro ástur.

Al llau de grupos de puntos, apaez la representación de varies figures humanes y lo que paez un cuadrúpedu. Pero, ente elles, hai una que lleva garráu un báculu o cayáu, lo que la destaca del restu como si fuere'l cabezaleru del grupu o director de dalgún tipu d'actividá (¿danza ritual?). Al llau d'estes figures apaez representáu'l perconocíu ídolu, grabáu na roca y pintáu d'ocre, al qu'acompaña, nesta ocasión, un puñal que vien a indicanos que se trata d'un personaxe cimeru de la tribu inmortalizáu nel panel de la peña.

Ehí tenemos una representación de los antecedentes tribales de nuestro. L'alborecer d'onde venimos. Una sociedá agraria y pastoril, plasmación ente nós d'una de les grandes revoluciones de la humanidá, la neolítica, que sigue siendo anguaño ún de los sofitos de la nuestra sociedá. El pasu del cazador-recolector al agricultor-ganaderu. La sociedá xerarquizada y representada col cayáu o'l puñal del xamán, del xefe, del cabezaleru. El llugar sagráu y cargáu de simbolismu que nos llega, al traviés de milenios d'historia y de milenta xeneraciones, a les dómines actuales. 

Pero estos escatafinos nun queden per ende perdíos albintestate y ayenos de tou significáu actual. Non. Pues tampoco nun tien que nos cayer en baxo la capacidá de les sociedaes actuales d'atropar dientro del so bagaxe cultural y simbólicu representaciones que se pierden na nueche de los tiempos. Porque, magar el tiempu trescurríu, incorporémosles como patrimoniu de nuestro y hasta les usamos a vegaes como símbolos identificativos de la cultura del nuestru país. Y ye que los resclavos d'otros tiempos siguen teniendo presencia na nuestra sociedá d'anguaño, escurque nel nuestru subconsciente colectivu,  tresformaos en riqueza cultural y tamién identitaria.




viernes, 12 de septiembre de 2014

Les cases de les güeles


Hai un dichu qu'espresa qu'un de los sitios onde meyor te pues afayar ye en ca güela.
Y uso'l femenín porque paezme que na nuestra cultura tradicional hai un ciertu recuerdu de vieyes dómines matriarcales.

Yo de rapacín anduvi bien de cacíu revueltu per casa les mios güeles y la so rodiada. Yeren dambes cases, vieyes muestres de la nuestra arquitectura popular. Una d'elles, construida contra turria, utilizando un desnivel o corte del tarrén pa llevantala y qu'inda conservaba adosáu a una paré'l vieyu fornu de piedra onde antañu arroxaren. La otra, una típica casa mariñana que tenía na so antoxana un guapu horru que lo mesmo facía de celleru que de cuartu adicional y onde dormí yo bien de veces.

Naquel entornu aprendí munches coses de la nuestra cultura y entamé a conocer el mundu al que viniere al traviés de les pallabres y espresiones de la nuestra llingua. Por cierto, una llingua estremada de la qu'usaben na escuela y que me produxo momentos d'auténtica estrañeza. Nun me cuadraba a min por qué en clas llamaben saltamontes a los saltapraos, babosas a los llimiagos y ¡ciervos volantes! a les bacallories, qu'eso yá yera pasase un cachu de la raya.

Cuenten los que saben d'estes coses, que los años de la nuestra infncia son perimportantes pal espollete posterior de la nuestra personalidá. Y, nel mio casu, confieso qu'asina pintó, pues según fueron cayéndome los años enriba, más me petaba a min somorguiame na nuestra cultura y emplear, a costa fecha, la nuestra llingua... y, asina, hasta güei.

Porque, teo de reconocer, que ye nesa cultura y nesa llingua onde realmente m'afayo, y onde puedo dicir, falando de papu sanu, que m'atopo como en ca güela.

viernes, 5 de septiembre de 2014

Cinco momentos d'Asturies y una entruga final

1) Facía galanes el sieglu VIII y na Batalla de Cuadonga entama con Pelayu'l biltu d'un nuevu reinu. El so fíu, Favila, muerre según les versiones oficiales, nel alcuentru con un osu. El so cagüercu na ilesia de la Santa Cruz, enriba un dolmen, fálanos del aniciu d'una nueva época u lo indíxena y lo feudal tresnen el formientu d'un pueblu históricu: l'asturianu. 

2) El Reinu d'Asturies espolleta y con elli la identidá nacional asturiana echa raigaños naquelles dómines. Naz l'Arte Asturianu con monumentos que lleguen a güei. Igüense xoyes que formen anguaño parte de la nuestra bayura cultural y tamién identitaria, la de los Anxeles y la de la Victoria.

3) Caleyamos pelos carreros de la Edá Media. El treslláu de la corte acullá de les nuestres fronteres ye'l finxu que marca una decadencia y escaezu. Xuxen entós reacciones internes d'afirmación y defensa. L'obispu Pelayu encerríscase na defensa de la diócesis. Hai llevantamientos secesionistes protagonizaos por Felix Agelaci, Gonzalo Peláez, Urraca...

4) La Xunta Xeneral fai de muérganu de gobiernu asturianu per sieglos. Con motivu de la invasión napoleónica asume'l poder y la defensa del territoriu de Les Asturies. Dase'l llevantamientu del 25 de Mayu de 1.808, envíense embaxadores a Inglaterra demandando ayuda. A propuesta de Xovellanos créase la bandera d'Asturies pa dirixir los exércitos del país.

5) Dempués de bien de sieglos d'historia, anguaño Asturies alcuéntrase nuna encruciyada tarrecible que la pue llevar a sumise definitivamente notres identidaes nacionales ayenes a ella. Escaeciendo los naturales d'esta tierra los sos raigaños identitarios ya históricos. Esbarrumbando la so cultura y llingua. Embizcaos dafechu en tolo foriato qu'amiya d'au fore y apostalgando lo propio. Ayenos al fechu del nuestru autogobiernu y autodefensa colectivos, empozaos nel olvidu y l'aculturación más xabaces de tolos tiempos, surde la entruga:

¿Tenemos enfotu nun futuru de nuestro o acércase'l puntu y final d'esta nación milenaria? 




domingo, 27 de julio de 2014

La llingua horteriense




Dende que tengo usu de razón conozo la sidra. Y dende que tuvi edá pa bebelo écholo pal butiellu dempués de tastialo.

Tola vida sentí frases como "¿vamos tomar unes botellines?", "¿vamos tomar una/unes de sidra?", "¿tomamos unos culinos?", etc. Pero siempre sentí a la xente utilizar el términu sidra en singular.

Pero dende hai unos años p'acá, cola introducción de la xíriga horteriense na nuesta cultura, siento coses como "¿tomamos unas sidras?", "¿nos pones unas sidras?" y frases pol estilu d'inventu bien recién nos ámbitos pih.os-castellanistes.

Y como nesti país nuestru tolo malo se pega, pues a los medios de comunicación y a les llurigues cosmopaletes faltó-yos tiempu p'adherise al inventu. Y cola so potenciación a tolos nieveles, anguaño esta manera foriata y horteroide de referise a esta bebida tradicional de nuestro ta ganándo-y terrén a les referencies de tola vida. Yá nin descarto que'l día menos pensáu daquién pida unos "culillos de sidras", pues según la llei de Murphy, too pue empeorar.

Hasta tal puntu reculamos que cuando un falante tradicional pide sidra, en ciertos ambientes, como siempre se pidió, col singular de la pallabra, yá hasta lu miren raro y como diciendo "¿de qué lejano monte bajó este?".

Asina que a la nuestra llingua ta saliéndo-y un nuevu llinguaxe competidor. Y nun me toi refiriendo a la llingua castellana, sinón al horteriense, un falaxe mui chupi-guai y molón.


Y, pa más inri, tamos somorguiaos en plenu branu. Una época afayadiza onde les haya pa tastiar sidra. Asina que nun nos queda nada d'horteriense qu'escuchar. Espero, polo menos, que si toi tomando un culín y lu siento, nun m'empapice y monte l'espectáculu tiráu metanes el chigre añusgáu y soltando pataes.

Lo que nun pase nesti país...
 

jueves, 24 de julio de 2014

Les güelgues del pasáu

Un país vieyu y milenariu como'l nuestru tien tamién un pasáu con bayura de fechos y escatafinos que van dexando al traviés del tiempu milenta güelgues que nosotros recorremos anguaño munches veces siendo desconocedores d'ello.

Un día soleyeru del branu decides dir a dar una zampuxada a una playa de les nuestres costes. Enfiles pa Perlora a Entrellusa y siénteste nel sableru a esfrutar del día contemplando la islla que tienes enfrente. Pues nel llugar pudo tar hai ochocientos años un pescador dempués de tornar de la caza d'una ballena, o reposaron los restos d'un gran cetáceu, o mesmamente los barriles pa meter el saín. Porque nesi sitiu tuvo asitiáu un puertu balleneru nel sieglu XIII. Una de les abondes güelgues d'antiguamente.


Otru día pues decidite por dir a caleyar pel monte. Empobines pal puertu San Llorienzu y tires pela ruta senderista qu'empobina pasando per Piedra Xueves p'alantre. Nuna parte del trayectu vas tar recorriendo una cachu del Camín Real de la Mesa, una de les principales víes de penetración ancestrales nel nuestru actual país, que fore calzada romana y antes seique camín prerromanu. Ehí tenemos otra güelga de la nuestra historia.

Va unos años atopaben na cai de la Rúa n'Uviéu los restos d'una calzada que daten alrodiu del sieglu XII y con calicates probablemente inda anteriores. Quién diba a dicir a los munchos ciudadanos qu'a diariu caleyen pela nuestra capital que so los sos pies alcontrábase una güelga abierta cuantisimayá reculando nel nuestru pasáu.

Y d'esta miente, podríemos siguir enriestrando exemplos de tou tipu, dende los tiempos más remotos hasta otros más recién. Porque, como dixi al entamu, tenemos milenta güelgues abiertes notres dómines na nuestra tierra. Nel nuestru casu cásique podemos dicir que, bien de veces, más que facer camín al andar, remocicamos y actualizamos los vieyos caminos yá abiertos por otra xente tiempu atrás. 


Asina que cuando empobinamos pa un cuetu, o cuando baxamos pa la mariña, o cuando caleyamos perende pelos nuestros pueblos, villes y ciudaes, pudiéremos tar, guapamente, triando una d'eses güelgues que, allá de los tiempos, daquién derrompiere na nuestra tierra. 

                                                     

miércoles, 2 de julio de 2014

El vistíu de la gaita

La nuestra cultura popular ta lloñe de ser daqué endolcao en arrecendores de cuchu, como bien davezu s'empeñaron y siguen empeñando en presentánosla. 

Porque la nuestra cultura popular algamó cuantayá llugares cimeros y tán afechiscos como cualquier otra de les cultures que se nos presenten como empicorotiaes.

El desendolcu de l'asturianada ye espectacular. Escuchar una interpretación d'esti xéneru musical por dalguna de les nuestres grandes voces ye tou un gozu y un gran espectáculu. Nun ye la primer vegada nin sedrá la última en que cantantes llíricos combinen esti xéneru col nuestru canciu tradicional.

Hai imáxenes que nos puen pasar desapercibíes, pero que si razonamos sobre elles puen llevanos a ver qu'esa cultura que nos presentaben como de segundu nivel nun tenía la mesma consideración pa los antiguos, sinón tolo contrario.

Cuando la xente andaba al llabor ponía'l zurrón de pelleyu al costazu y empobinaba p'allá. Nun necesitaba orniatu nengún porque tratábase de daqué funcional.

Pero esi mesmu pelleyu vistíase coles meyores gales cuando con él se facía'l fueye pa una gaita. Más entá, la imaxe de la gaita entera ye toa una demostración de ciñu por adornala y presentala guapa y curiosa a los güeyos de la xente. La gaita vístese y órniase, porque nun sólo va usase pa la folixa, sinón pa la ilesia. Nun sólo va usase pa lo festivo, sinón pa lo solemne. Porque algama l'altor de gran cultura, d'alfombra y ringorrangu, y non sólo de caleya.

A lo llargo de los años enfótase con razón la xente más concienciao de conservar y tresmitir la nuestra identidá en llograr col idioma algamar coteros altos de calidá, d'usalu pa coses perseries y non namás que pa lo festivo y folixero. Pero esto tamién sucedió y sucede con otres manifestaciones de nuestro. Podemos observar semeyes de xente antiguo lluciendo con arguyu los paxellos tradicionales. Y tamién semeyes de vieyos gaiteros con esos paxellos y les sos gaites acordies a la importancia del momentu: vestíes de gala pa la ocasión.

Too ello, bien mirao, ye daqué llóxico y esperable. Los herederos d'una de les naciones más vieyes ya importantes nel so tiempu d'Europa son los depositarios tamién d'una cultura importante y digna, por más qu'heba tovía quien s'encerrisque en presentánosla como d'una importancia menor ya inferior a la d'otres.

jueves, 19 de junio de 2014

El Chigre

"Toca la gaita, gaiteru..."

El chigre, la canaleta so la barra pa echar l'escarrapiu los culinos. El serrín estrando'l suelu. Les meses y les sielles. El sarru peles paredes. El ruxerrux de los veceros. El culín echáu que chisca pente espumes de mazana formientada n'oru. Les pintes y les caciples de vinu del pelleyu.

Y la tonada, el coriquín, la gaita, el chiste, la coña, la risada, los taquinos, la espirica, l'espansionar.

Hai conservatorios pequeños espardíos dayures peles nuestres parroquies y villes. Onde'l cantar y la folixa algamen la categoría d'arte. Onde se tresna cultura del mayor nivel. Una cultura ayena al ringurrango de los ámbitos cosmopaletos. Endolcada nel arume de lo popular, de lo tresmitío al traviés de les xeneraciones, que dexa nel paladar el tastu de lo antiguo y lo fondamente llariego. Son los chigres, llugar afayadizu pa cantales toes, charrar de lo que pinte, roblar tratos y espansionar del xugu diariu de les esmoliciones.

Cuando s'acaba una andecha ponse un ramu lloreu p'anunciar el llabor fechu. Cuando se remata una casa allúgase tamién el ramu lloréu p'anunciar la morada afechiscada. Cuando s'entama un espicha asítiase bien altu y visible'l ramu lloréu pa que naide nun escaeza qu'ellí hai sidra, cantares, corrigüela y xermandía.

Hai una güelga ancestral nel nuestru suelu que guía pa un futuru con raigaños nel pasáu y cruza pel presente. Que güel a chigre y suena a tonada. Que s'upa al cielu pente rebilicoques de gaita. Que respiga y afalaga.

Porque en chigre  toos somos protagonistes y cantámosles toes a la nuestra manera. Toos somos ún. Los que soplen y gargolien y los qu'escuchen y animen. Toos. Porque toos asollamos la llama qu'alluma la nuestra tradición heredada qu'inda rebulle y alienda. Y porque ellí tolos gargüelos desamen nún solu pa gritar a los cuatro vientos "¡guo!".





 

lunes, 9 de junio de 2014

El bonitu y la guapura

Hai ciertes pallabres castellanes que, aplicaes en ciertos contestos, rinchen a la oreya de quien tea averáu al idioma asturianu. Dalgunes pallabres de dambes llingües puen coincidir dafechu, otres estremase dafechu, y tamién les hai que puen tener significaos dixebraos, magar asemeyaes na forma.

Un casu de lo anterior tenémoslu col términu "bonito". Na versión castellana úsase pa describir lo guapo y tamién pa denominar al pexe que lleva esi nome. Pero n'asturiano lo bonito, como sinónimu de guapura nun se da, pero sí'l bonitu como pexe.

Poro, cada vez que se declara a dalgún llugar nuestru como'l más "bonito" rínchame muncho a la oreya la espresión. De fechu, ránce-yos a más xente y hai ocasiones en que pa destacar con dalguna distinción a un llugar nuestru, yá sustituyen esi términu por "guapu", más acordies cola realidá llingüística de nuestro. 

Y dientro d'esos llugares bonitos que dacuando se declaren ente nós, hailos que tán na mesma costa. Sitios de la mariña o directamente pixuetos. Y ye equí cuando'l términu se convierte pa min nun grillíu difícilmente soportable. Porque un pueblu marineru asturianu "bonito" sólo soi a identificalu como que nél hai una bona tradición pesquera d'esti pexe, pero más nada.

Asina que, por si acasu al llector-y pasa como a min -y cuento que a bastante más xente-,  aprovecho pa encamenta-y que, si s'entera de la noticia de que a tal o cual sitiu nuestru-y conceden la denominación de bonito, nun caiga na tentación de salir xispiando p'allá naguando y pensando qu'hai unes xornaes gastronómiques estupendes, que la cosa nun va perhí. Eso sí, pue empobinar p'allá bien gayoleru si lo que quier ye afayase nun sitiu guapu verdá. Nesti casu sí que va acertar de xuro. 


lunes, 26 de mayo de 2014

La nación de bisonte como badagüeyu tarrecible

Enterábemonos apocayá del partu d'una nación de bisonte n'Asturies, fechu que rescampla yá que cuenten les cróniques que llevábemos un puñáu de milenios ensin velos pacer per estes tierres.

Asina que tornamos a tener ente nós a aquellos animales cuantayá desaniciaos y que namás que yéremos a observar nos paneles pintaos y grabaos de les nuestres cueves prehístóriques.

Pocu tiempu dempués cayí na cuenta qu'esa nación animal pudiere trayer con ella en pelondines un badagüeyu tarrecible pa otra nación, nesti casu nel sentíu políticu del términu: l'asturiana.

Y ello ye que nun fin de selmana de fondu raigañu históricu por coincidir cola fecha gloriosa del 25 de Mayu de 1.808, axuntáronse dos fechos que dan perceguera.

El primeru, el fedor insoportable a la España más arcaica y rancia de ciertes celebraciones futboleres que casi dexen en caxigalines otres equivalentes festexaes nel réxime anterior. Unes espantayaes que tuvieron un seguimientu de meter mieu per estos llares atlánticos onde tolo malo se nos pega.

D'otru llau, la comedia electoral d'unes elecciones europees onde la mayoría de la población pasó de tanta xigomencia y demagoxa barata, pero que nun quita pa qu'otra xente ande güei festexando l'afitamientu na nuestra tierra de polítiques que bancien ente l'españolismu inmovilista ya'l norcoreanismu populista.

Asina qu'ello ye que, adicando la plasmación de dambos acontecimientos na nación política asturiana, tengo la impresión de que la venida a esti aruelu patriu de la nación biolóxica de bisonte pudiere representar un badagüeyu de lo que nos espera n'adelantre: tornar al pasáu, concretamente -social y políticamente- a una especie de nueva edá de piedra.

viernes, 16 de mayo de 2014

Un país a escures dafechu: Asturies.

Cuando una sociedá se mueve envizcada nel autoodiu y los complexos más fondos, la clas política dominante reflexa esi día a día.

Hai estayes u se ve perbién esi andar al debalu, cavando de contino una fuexa pal propiu futuru. Porque arcoxándose, a costa fecha, nun hai futuru, nin equí, nin nenyures.

Una d'eses estayes que pue sirvir guapamente d'espeyu au reconocese ye la cultural y, dientro d'ella, la histórica. Recordemos l'episodiu surrealista de les pieces arqueolóxiques de la Campa Torres abandonaes nun michinal. O los pilancos pa siguir colos trabayos en La Carisa. O la eterna espirica del abandonu de los monumentos del Arte Asturianu.

Va dalgún tiempu, la Universidá americana de Columbia incluyó a Asturies dientro del so círculu d'actividaes arqueolóxiques a subvencionar. Comprometióse a apurrir fondos pa dos xeres. Una en Faro, n'Uviéu, rellacionada cola cerámica del llugar. Otra en Tiñana, Siero, que finca a unos restos probablemente d'una fortaleza de les dómines del Reinu d'Asturies.

Pero en dambos casos remanecieron les estorvises. Anque les alministraciones nun teníen qu'aportar dineru, nun apoyaron los proyectos presentaos. Concretamente, nel casu sierense, simplemente l'alministración asturiana negóse a dar el permisu pa unes escavaciones que nun-y costaben un res. Agora, lléganos la noticia de que l'apoyu de la universidá de Columbia retírase y va dedicalu a otros llugares onde lu reciben como cai de caxón: coles manes abiertes.

¿Cómo quedamos los asturianos nesti casu?. Pues como xente inculto, desdexao y, si se m'apura, faltosuco. Quedamos en porrica nel esterior y per enésima vegada como los primeros enemigos  de lo nuestro.

Porque, por muncho que nos  enchipemos de grandonismu delles veces dientro, y sobre manera fuera, la realidá ye que tamos matando toles lluces que nos pudieren allumar el nuestru camín hacia un horizonte y un futuru. Sacar proyectos  propios p'alantre nesta tierra ye casi una utopía porque les torgues a resalvar son constantes. L'únicu clavu ardiendo al que nos gusta garranos ye al de quexalo bien y de contino, y a culpar a los demás de la nuestra situación d'esbarrumbe nacional.

Si hai quien escurra que, como asocedíó notros tiempos, güei pintamos daqué y que va haber daquién que nos faiga casu, qu'esconsoñe d'una vez. Nun nos engañemos nin seyamos fatos. Anguaño nun somos vanguardia de nada, nin allumamos camín a naide y muncho menos a nós mesmos. Empicorotiamos a los puestos de decisión a los más negaos, a los que nagüen esbabayándose polo foriato y frayen con saña lo llariego. Lo nuestro ye autodestruinos y quexanos dempués amargamente de que paecemos un ermu. Esos son los dos sofitos qu'escoyimos, de los tiempos, como finxos guía de la nuestra sociedá. Nun tenemos lluz dala. Simplemente somos un país a escures dafechu que se mueve a palpu, pero non p'ayudase, sinón pa solmenase palos.

martes, 13 de mayo de 2014

Políticos gasterópodos




Tovía nun soi a entender por qué n'España y, más en concreto, n'Asturies, nun hai, al día de güei, nenguna formación política que tenga como símbolu o emblema una llámpara bien afitada a una roca.

Porque la querencia al cargu qu'amuesa la castra política ente nós ye digna d'asombru. Abluca, plasma, alloria. Pa que dalgún cargu dexe'l so escañu tien que ser mui, pero que mui gordo y casi que permediar un milagru. Son como llámpares bípedes. Unes llamparones que nun hai arbía que les mueva del sitiu. Si lleguen a cayer na dómina de la edá de piedra, de xuro que nun diba haber picu asturiense que les soltare y la fame espurriríase per ende ente'l desesperáu clan.

Choca esto colo qu'asocede p'arriba de los Pirineos. Notros llugares, el dexar el puestu cuando peñera sobre la cabeza del políticu de turnu la dulda razonable o la imputación -y yá nun digo nada si permedia una sentencia xudicial condenatoria- por un supuestu casu neglixente o corruptu, la persona afeutada abandona'l so puestu hasta que se resuelva l'asuntu como midida d'hixene política y en paz. Pero equí, non. Rotundamente, non. Porque per estes tierres tenemos una especie endémica rabiosamente autóctona que ye'l "políticu gasterópodu" o "políticu-llámpara" que s'encloya de manera tala nel so asientu parllamentariu que movelu d'él ye un llabor dignu d'héroes. 

Asina que'l casu ye qu'últimamente cuando voi a un chigrucu a comer una potina llámpares cada vegada ye más corriente que m'entre una especie de rocea acompañada de fuertes temblores. Garro entós les cáscares y míroles y remíroles, cíncoles cola cuyar una y otra vuelta y hasta col deu. Y compruebo hasta la repunancia, ante'l plasmu de los otros comensales que m'arrodien,  que bramente toi comiendo un gasterópodu de roca y non a un diputáu d'una institución...



viernes, 9 de mayo de 2014

Un vienres como otru cualquiera





Güei ye un vienres como otru cualquiera. Cola noticia prestosa de los Sidros y la Comedia d’embaxadores per Lisboa. Cola noticia llamentable de la muerte, ayeri, del atleta Yago Lamela. Lleendo y sintiendo perdayuri lo de siempre y lo esperable, esa enfilandrada de lletaníes que yá sólo dan perceguera y más nada. Col pensamientu críticu retorcigañándose firíu y solitariu como un esculibiertu agonizante. Col narcisismu y l'autocomplacencia empicorotiaos nel olimpu de los dioses de barru. Col cainismu como códigu adoráu de comportamientu grupal y social. Cola tremenda soledá que tamién ye, como la otra cara de la moneda, esti mundu virtual u tantos amigos tenemos y que son otros tantos que desconocemos. Cola pluma escosa y gastada de repitir, cafiantemente, lo que naide nun quier lleer,  y col gargüelu sangronientu de dar voces en castañéu una vegada y otra, y otra, y otra. Col enfotu al to llau, como un hermanu ximielgu, aneciando en siguir escribiendo y gritando. Güei ye un vienres como otru cualquiera. Afayaízu, guapamente, pa la renombranza del enésimu naufraxu de les nuestres añorances. P’afondar un palmu más nel cagüercu de les nuestres ilusiones. Un vienres nublu y buxu. Repititivu.y cafiante. Si acasu, cola novedá de comprobar cómo puxa por abrise en cielu una llugada que nos lleva a nenyures. Güei ye un vienres de tantos que cute escontra la mesma llábana de siempre como una pimpana escaecida nun requexu bisiegu allá de los tiempos. Endolcáu nel sonsón gayoleru de los cencerros a lo lloñe y nel tinglar murniu de les campanes cerquina. Güei ye un vienres. Miániques que sí: un vienres como otru cualquiera.

viernes, 25 de abril de 2014

Frikillingüismos.

Lleo ayuri un llamamientu pa facer un grupu de xente pa  practicar  y ameyorar la fala n'asturianu. El motivu pa ello plásmame y clísame, pues ye'l de que nun hai sitios nenyures pa poder facelo.

Una interpretación de lo anterior pue ser que pa practicar l'asturianu estándar sedría bono formar grupos pa tala xera. La falta de difusión d'esi modelu estandarizáu podría emburriar a soluciones d'esti tipu pa deprendelu y espardelu.

Pero tamién pue dase otra interpretación que, supongo, ye toa una invitación pa los que s'oponen a la normalización d'esta llingua pa tirar los sos carrobexazos escontra d'ella.

Esa otra interpretación ye que l'asturianu yá nun se pue sentir en sitiu dalu y, polo tanto, los pocos que lo saben habríen d'aconceyase pa practicalo. Taríamos entós dando por muertu esti idioma a nivel de fala patrimonial y, entós, ún de los sofitos básicos pa la so reivindicación como ye'l que sigue vivu güei, quedaría inutilizáu.

Como nun toi nel pelleyu de quien propón eses iniciatives nun puedo afirmar nin negar cuala de les dos posiciones ye la correcta, pero sí anotar que pue llevar a situaciones nada deseables pal futuru del idioma, polo que considero mui peligroso dexales cayer per ende  ensin considerar esa ambigüedá a que dan llugar y el dañu hacia'l propiu procesu de normalización llingüística asturianu que pudiere provocar un plantegamientu ambivalente.

Lo cierto ye que, anguaño, la llingua asturiana vive y podemos atopala dende estaos bastante espurechos (esa xente que dicimos que fala zarrao) a toa una montonera de formes mecíes cola castellana, dende situaciones en que prima muncho l'asturianu a les que lo fai perpoco. Y, por supuesto, una parte importante de la población que yá ye de fala castellana dafechu.

Pero'l casu ye que tovía se siente falar n'Asturies y aquella persona que quiera conocer y practicar asturianu (resalvando'l modelu estándar) enagora pue facelo si s'aveza a afinar la oreya y escuchar. Y tamién hai llugares onde se puen usar bien de pallabres y espresiones que conocemos. Pa ello ye necesario salir a la cai, somorguiase nos ámbitos afayadizos, percorrer los nuestros llugares y echar parrafaes con toa esa xente que tovía nun escaeció esti vieyu idioma nuestru. Poniendo l'atención pertinente, seguro que vamos deprender, inda na actualidá, coses de la llingua asturiana que desconocíamos.

Lo que pasa tamién ye que l'apreciu pola fala usada polos falantes patrimoniales del idioma ye dacuando refugada dende dientro por una parte de la xente enfotao na normalización del mesmu. Contraponse a vegaes lo que ye idioma culto de lo dialectal, considerando esto cabero como daqué menor. Y yá nun digo nada de los falantes del llamáu "amestao", aperrillaos y hasta ridiculizaos davezu por esa  xente que piensa qu'apostrofando de viciu per delantre y per detrás yá ta aseguráu'l futuru de la llingua. Pero ye precisamente esi usu dialectal -amestao incluyíu- el que caltién viva esta llingua nuestra y la que mamemos y siguen mamando, afortunadamente, munchos asturianos. Ello, sobra dicir, nun habría de contraponese gota con deprender y usar un modelu estandarizáu, que ye lo qu'ocurre con milenta d'otros idiomes. 

Tengo la impresión de qu'hai xente vinculao a esi procesu normativu del asturianu qu'anda fuera bolos davezu. Que nun s'entera muncho del asturianu que se fala anguaño nesti país, y que se comporta con él como si fuere una llingua estranxera, afayadiza pa frikillingüismos, pa analizala como una cobaya de llaboratoriu, o pa enchipase como una nueva élite cultural cosmopaleta. Y cuando se zapica neses piedres, puen surdir propuestes y plantegamientos d'interpretación duldosa o que, directamente, puen convertise nun auténticu búmeran contra la propia llingua a defender.

lunes, 21 de abril de 2014

¿Pitu o pita?

Esa imaxe d'un rapacín metíu nun cuartu y arrodiáu d'aparatos llétricos y pantalles nun nos fincó a los que fuimos neños acuantayá. Naquellos tiempos esporpollaben tou tipu de xuegos que facíes na cai. L'escondite, saltu y arroba, tres marinos a la mar, el pinchu, el pañuelín, a Roma, el lirio-lario, el cascayu o castru, la goma, los banzones o gua, les fiches, la peonza, a facer gomeros... O convertise en músicos impovisaos con riqui-raques, zamploñes d'alcacer, berrones o cornetes, xiblatos afuracando güesos de piescos... Visto ello güei, paez mentira que pudiéremos entretenemos con xuegos que, en dellos casos, yeren lo más cenciello que se pueda imaxinar. 

Como lo de xugar a pitu o pita. Pa ello, cuando pela primavera o'l branu granaben les plantes que formen los praos, garrabes el tallu d'una que tenía la espiga yá cola semiente formada (en zurrón, que se diz). Entrugábes-y a los amigos si queríen pitu o pita a manera d'acertixu. Dempués esnidiabes los deos índiz y pulgar pel tallu p'arriba hasta que te quedaba la grana garrada nellos. Si esa grana tenía forma arredondiada, yera pita, y si quedaba la picorota de la espiga destacada y bien visible yera pitu. Y el qu'acertare, pues acertao quedaba, y si permediaba dalgún tipu d'apuesta, ganada quedaba. 

Nun sé yo si a los rapacinos d'esta dómina que tamos-yos fadría muncha gracia dexar los sos aparatos llétricos con pantalles, mandos y botones y ponese a enredar con trebeyos d'aquella otra época. Pero nuca se sabe. A lo meyor, si tuvieren ocasión de prebar, igual-yos prestaba pola vida...

viernes, 11 de abril de 2014

Asturianos: de fidalgos con montera a vasallos en porrica

Les tierres del norte peninsular tuvieron d'antiguo l'aquello de considerales llugares de fidalgos. Allá pel sieglu XVI nada menos qu'un 80% de la población asturiana considerábase d'esa condición, magar una bona parte d'ello viviere cola corexa fecha una llaceria.

Escurque foi esa una de les causes pola qu'en tiempos pasaos los asturianos llevaben a gala nun quitar la montera en sitios zarraos, como por exemplu nos oficios relixosos na mesma ilesia. Tuvo que permediar la ordenanza pertinente pa obligar a los antiguos a quitar la montera nesos llugares. Y empicipiemos entós los asturianos a quitala, resalvando al gaiteru que, como reliquia de tiempos casi remotos yá, sigue anguaño con ella puesta.

Y a lo meyor foi esi'l principiu d'una serie de llaceries posteriores. Entamemos quitando la montera. Dempués a reínos de los vezos culturales nuestros, a refugar la propia llingua y asina sucesivamente hasta aportar a güei en qu'andamos práuticamente en porrica. Porque esto cabero ye lo que nos ta asocediendo actualmente. Tamos siguiendo amomiaos lo que nos manden perdayuri, por fato que pueda ser, al empar qu'abandonando o refugando lo propio, y quedando desnudos y albintestate. Comprobando empampirotiaos cómo apodrigaña tolo nuestro. Cómo vamos, día a día, quedando ensin país.

Asina que de ser tierra de fidalgos arguyosos de llucir la tiesta cubierta cola montera pasemos a convertinos nuna xermandía de vasallos coritos y escorrexaos por tou quisqui que fixe los sos oxetivos destructores en nosotros y na nuestra patria asturiana. Esta ye la situación actual au tamos y el futuru que podemos acolumbrar nel finxu'l cielu. Y too emprimó por un xestu que, quiciabes, paeciere entós ensin mayor relevancia. Aceutando vezos y órdenes foriates y quitando un día la montera...

viernes, 4 de abril de 2014

Morriendo de salú

Diben los caballos cargaos colos pelleyos de vinu a distribuilos pelos chigres.
 

Diben coles llecheres vendiendo lleche catao recién peles cases.
 

Diben coles carruches y baldes de sardines y pescao a vendelo pregonándolo a voces: ¡sardines fresquines!.
 

Diben al mercáu con aquellos quesos fresquinos que te vendín les paisanines endolcaos en fueyes de berza y tresnaos na casería, y que daba gloria tastialos...
 

Pero llegaron los grandes intereses y toa aquella xente estorbábalos. Sobraben. Yeren una estorbisa pal negociu. Había que los echar.
 

Entós los mandones prohibieron lo pelleyos de vinu, les llecheres vendiendo lleche catao recién, les sardineres pregonando'l pescao acarretao de la rula, y la venta de quesos fechos na casería.

Porque too ello representaba un gran peligru pa la nuestra salú.
 

Agora papamos salú a esgaya en forma de colorantes, conservantes, anilines... y toa una carrapotada de metralla química. Una salú mui moderna y mui beneficiosa... pa dalgunos. 

Entós anguaño morremos refalfiaos de "salú".  Pero, eso sí, mui llegalmente.

sábado, 29 de marzo de 2014

El Xixón pixuetu y el "Retablo del Mar"

El recuerdu que tengo más afitáu nel maxín de cuando, yá dende neñu, diba a Xixón ye'l del vieyu puertu pesqueru de Cimavilla. Los barcos y les llanches de los pescadores. L'arrecender a salmoria. La rula col so traxín. Y les sardineres asitiaes cabo d'ella vendiendo'l pescáu recién rulao.

Pero los tiempos cambien y eso que llamen la modernidá fixo que nun primer momentu prohibieren la venta ambulante de pescáu desaniciando'l vieyu oficiu de les sardineres. Dempués treslladaron la rula pal puertu d'El Musel. Y dende entós dalgo fondo cambió na mio manera de ver el barriu pixuetu xixonés. Hasta tal puntu que, magar el tiempu trescurríu, entá nun soi afayame del too cuando caleyo pel actual puertu deportivu. Fáltame daqué.
 
Por fortuna, una parte d'esi daqué atopélu hai bien d'años cuando visitaba'l muséu allugáu na Ca Xovellanos. Nel so sobráu pudi ver la obra escultórica del "Retablo del Mar" de Sebastián Miranda. Delantre los mios güeyos espolletaron rescamplando les imáxenes d'antaño. Ellí taben de nuevo la rula, los pexes, les sardineres, la xente... dicen que los propios vecinos del barriu d'aquel entós tán retrataos pol  autor. Sí, delantre mio tenía l'alcordanza más playa pesllada naquel cuartu d'esposiciones.

Asina que cuando dalgún foriatu m'entruga ú pue ver dalgo típico de Xixón siempre-y contesto:

-Pue dir a dar una vuelta per Cimavilla pa ver los oríxenes de la ciudá. Y dempués pue visitar na Ca Xovellanos el "Retablo del Mar" pa entender la so esencia, el so corazón y la so alma-.