Voces en castañéu.

Un casañéu ta bien pa dir a la gueta. Pa enllenar una cuerria con castañes. Pa curiar les castañales. Pa pasear simplemente. O p'abellugase en dalgún vieyu caborniu los xanos, diaños o trasgos. Pa eses coses paezme un sitiu afayadizu.

Lo que yá nun me gusta un res ye dar voces en castañéu. Porque nunca nun les escucha naide y tolo más valen pa oxar a dalguna pega o pa espantar a dalgún raposu que t'acusbia amatagáu.

Los asturianos conscientes de les llaceries que cuten al nuestru país tal paez que damos voces en castañéu. Nun castañéu n'abertal y ensin curiar. Onde malpenes s'atopa daqué pa demer. Y coles muries de les cuerries esbarrumbándose ente'l felechu.

Come-yos l'alma.

Nun soi nada partidariu d'andar tol día falando de fútbol y yá lo critiqué dacuando nesti blog. Pero güei voi yo menteme nesi barrizal. Y ello pola mor de qu'hai coses que llevo tan mal que si nun les asoleyo reviento.

Una de les coses futboleres que siempre me fadiaron ye la de toa esa xente que, siendo asturianos, pasen el día naguando, sofitando y festexando los triunfos d'equipos de fuera'l país. Pero, pa detrás, nun paren ehí, y nun sólo se dediquen a molestanos a los demás pegando berríes, faciendo esparabanes y hasta tirando voladores colos triunfos d'eses escuadres poderoses y foriates, sinón que cuando s'enfrenten a equipos asturianos hailos que tamién quieren que-yos zurren la badana. Y eso, collacios, nun lo llevo de nenguna de les maneres. Ye que me pongo malu, de verdá.

Asina qu'esti sábadu pasáu cuando'l millonariu equipu de D. Florentino col so potencial galácticu llegaba a pasar como una machucona penriba'l Sporting andaba yo, magar seya poco futboleru, con bastante mal humor por sentir ayuri comentarios despectivos de los merengue-babayos y hasta apuestes de cuántos goles-yos diben cayer a los del Molinón. Pa detrás, tengo tal puntería que salí a tomar daqué xusto cuando taben en tolos llaos colos güeyos clavaos nos televisores que cásique te daba apuru dirixite al camareru...

Pero la xornada taba pa la mano y pasaben los minutos y los xixoneses aguantáben-y a aquel equipón, de rebote la xermandía vocinglona foriata callaben como afogaos, y al final dábase un empate ante la incredulidá de munchos, la alegría de bastantes y el disgustu de los amantes de tirar piedres contra'l teyáu futbolísticu propiu. Como xanu que soi, y polo tanto rarón a embute, a min esnalóme la mente dos mil años atrás, onde unes llexones romano-capitalines viérense tornaes pola resistencia norteña parapetada tres los montes Molinonius. Pura épica. Un equipu asturianu con un entrenador cántabru y un guardameta llionés subiéndose a les barbes de la másima representación del imperiu futboleru, lo que demuestra que les vieyes aliances tribales inda funcionen.

Dempués los más chaqueteros diben de perdonavides y buscaben de pasu xides: "Bueno, como empatemos col Sporting nun me sabe tan mal...". A lo que retrucaba yo pensando en playu: "Yá t'oyí, navaya".

El domingu en teletini daben un reportaxe con un paisanu al qu'invitaren a ver el partíu. Ellí taba cola so gorruca y una bufanda roxiblanca al pescuezu. Cuando diba a entamar l'alcuentru, esclamó dalgo tan asturiano como contundente que diba tiempu que yo nun sintiera:

-¡A come-yos l'alma!.-

Esacto. Y añado yo que a tolos niveles. Come-yos l'alma.A tantu antiasturianu. A tantu desertor del aráu y de la patria. A tantu enemigu de los nuestros equipos deportivos, del nuestru clima, de la nuestra llingua, de la nuestra cultura, en definitiva, a tantu belixerante pa con tolo propio d'Asturies. Hai que come-yos l'alma, mete-yos como pa fregar, da-yos como panzorru, facese una semeya con ellos na boca...

¿Fala usté horteriense?.

Dende que tengo usu de razón conozo la sidra. Y dende que tuvi edá pa bebelo écholo pal butiellu dempués de tastialo.

Tola vida sentí frases como "¿vamos tomar unes botellines?", "¿vamos tomar una/unes de sidra?", "¿tomamos unos culinos?", etc. Pero siempre sentí a la xente utilizar el términu sidra en singular.

Pero dende hai unos años p'acá, cola introducción de la xíriga horteriense na nuesta cultura, siento coses como "¿tomamos unas sidras?", "¿nos pones unas sidras?" y frases pol estilu d'inventu bien recién nos ámbitos pih.os-castellanistes.

Y como nesti país nuestru tolo malo se pega, pues a los medios de comunicación y a les instancies politiques faltó-yos tiempu p'adherise al inventu. Y cola so potenciación a tolos nieveles, anguaño esta manera foriata y horteroide de referise a esta bebida tradicional de nuestro ta ganándo-y tarrén a les referencies de tola vida.

Hasta tal puntu que cuando un falante tradicional pide sidra, en ciertos ambientes, como siempre se pidió, col singular de la pallabra, yá hasta lu miren raro y como diciendo "¿de qué lejano monte bajó este?".

Asina que a la nuestra llingua ta saliéndo-y un nuevu llinguaxe competidor. Y nun me toi refiriendo a la llingua castellana, sinón al horteriense, un falaxe mui chupi-guai y molón.

Lo que nun pase nesti país...

Dicir que non.

L'atracción pola fama, la sonadía y les prebendes ye descomanada. Ye casi un imposible atopar dalguién qu'ante la llamada de lo rellumante respuenda con un "non".

Xente que critica la concesión de tal o cual premiu nel mundu del cine, la lliteratura, o cualquier otra actividá pierde les madreñes corriendo a garrar esos galardones si l' agraciáu ye él.

La incoherencia ta allugada en tolos requexos de la nuestra sociedá. Predicamos una cosa y facemos otra. Cuando la posibilidá de ser reconocíos pica a la nuestra puerta escaecemos llueu les nuestres rocees y crítiques gafes pa echanos en brazos del reconocimientu públicu.

Cuando los discursos críticos se centren na refuga del dineru y la bayura la situación ye esperpéntica. Los más encerriscaos defensores de los probes cambien de chaqueta y cuerren a poner la mano cuando sienten ruxir les monedes ayuri o les posibilidaes d'esguilar socialmente.

Vivimos nuna sociedá que funciona asina nuna proporción abrumadora de los casos. Y toos zapicamos neses piedres llegada la ocasión, que nun se trata equí de tirar la piedra y esconder la mano.

Y la nuestra sociedá asturiana nun diba ser menos. Los grandes posicionamientos éticos acaben esbarrumbaos como un castiellu naipes en cuanto'l poder chisga'l güeyu. Nos casos más miserables, véndese too y a toos por unes auténtiques migayes.

Dicir que non por ética y coherencia ye una frase qu'usamos nel nuestru discursu cotidianu, pero cuando somos nosotros los destinatarios de los beneficios de diversa mena la cuestión cambia sustancialmente. Y perhí ye per onde podemos alcontrar la esplicación a tanta deserción que lleva del compromisu alturista al beneficiu palpuñable.

Ciudadanos o vasallos.

Dientro d'unos díes van tornar Mingo y Colasa a ver cómo ta la casería. Si les sebes tán fradaes, la llosa cuchada y l'horru bien sofitáu.

Con esti motivu va entamase fiesta na quintana. Y los bufones reblincones yá prueben una y otra vegada los sos paxellos de fiesta y ensayen ensin descansu les sos más bixorderes moxigangues delantre l'espeyu.

Vamos asistir a una espantayada onde'l conceptu de ciudadanu va ser sustituyíu pol de la pleitesía del vasallu, y fundamentalmente más pola voluntá, a costa fecha, de los bufones reblincones y una parte mui importante de la población qu'aplaude tal comportamientu, que poles esixencies de los caseros. Les coses como son.

Pero esto en sí mesmo nun ye lo peor. Porque lo único que muestra ye la punta d'un iceberg qu'escuende la so parte más bultable sol agua. La cuestión bramente grave ye que nesti Estáu y nesta Asturies el conceptu de ciudadanu llibre y con derechos ta viéndose acorripiáu y tarazáu tolos díes. Porque'l ciudadanu cada día ta viéndose obligáu a camudar el so estatus pol d'un vasallu que sive pleitesía a una clas política y unos grupos arreyaos al poder qu'avancen con pasu fitu hacia una xudicialización de les llibertaes ciudadanes acompañada por una reconversión del Estáu Democráticu de Derechu nun réximen policial y clientelar onde'l que gorguta acaba con serios problemes.

Y de lo escrito nel párrafu anterior tenemos exemplos asgaya ensin falta de salir del nuestru país asturianu. Camiento qu'ehí ta'l megollu fundamental y pergrave de la cuestión. Mui penriba de les xirigoncies de los bufones reblincones y de les folixes fates qu'alrodiu de visites de ringorrangu entretengan por unos díes a una bona parte de los nuestros conciudadanos.
............................................................................................................
PD.: Estos díes saltó la noticia de la intención de convertir el puertu d'El Musel nun basureru a nivel inernacional. De confirmase la propuesta les nuestres costes y la nuestra ecoloxía puen sufrir un dañu considerable. Nun pintamos nada. Somos una islla d'amomiaos nel norte español. Y cuando los que remanen los filos de la política y la economía alcuentren un sitiu llaráu de vasallos mánden-yos p'allá lo que naide quier.

Ye lo que nos tienen programao a nosotros. Convertir el cacarexáu "paraísu natural" nun basureru descomanáu.

Y mientres pasa esto, el personal a figos y col pasu cambiáu. Como siempre. Un dolor.

Prueba de Valor.

El barganaz onde se diba celebrar el gran combate taba atarraquitáu de xente arrodiando'l so perímetru. La Prueba de Valor que diba decidir si'l gran xefe Pamestona tornaría a ganar l'honor de dirixir la tribu de los feseanios dos años más taba a puntu d'entamar.

D'un requexu salió l'osu Yogui desafiante y gafu caminando siempre a dos pates. La tribu acorviólu ya insultólu tolo que quixo y más. Empobinó pal centru del recintu y quedó a la espera de que saliere'l so enemigu.

Ente una mar de glayíos, aplausos, iñíos, dees francíes por espatuxos y bazos fendíos por coldos eufóricos, salió'l gran xefe Pamestona, col so taparrabos con una rosa collorada bordada primorosamente al altor de los perendengues, faciendo esparabanes y enseñando dos bolones nos sos trabayaos brazos.

El gran xefe ya l' osu miráronse desafiantes y engarráronse con puxu. Una bofetada ensin contemplaciones dexó la zarpa Yogui marcada na cara Pamestona. Pero lloñe d'acuruxase, el bravu cabezaleru solmenó-y un rodiyazu na coyonera a la fiera que-y fixo pegar una berrida al empar que soltaba un resoplíu propiu d'una ballena de gran tonelaxe. De sutrucu, Pamestona esparrancó les piernes y garrando al osu con una mano de la pechera y pasándo-y la otra pela entepierna hata garra-y la culera llevantólu en pelondines y zampólu en suelu ente un gran estruendu de güesos francíos quedando inmóvil dafechu.

La tribu celebraba enfotada y entusiasmada'l resultáu del combate. El gran xefe ganárase a los güeyos de tola castra feseania'l derechu de dirixir los sos destinos un par d'años más, que traducío a llunes yera una burrada d'elles. Y allá, rinchando, acercábase'l carru apináu de pinchos de tortiella, tiráu por dos gües que casi nun yeren a movelu de lo que pesaba por más que los afalaben, pa festexar la xornada.

Pela nueche na so tienda, el gran xefe Pamestona miraba con cara circunstancies pal gran fechiceru Carafigu que, encanáu dafechu pa iguar les sos milenta frayadures, rancía tiráu en suelu como un fardu. Trataba de gorgutar daqué ya'l gran xefe cozcóse hasta elli y púnxo-y la oreya raspiándo-y la boca pa sintilu. Un filín de voz salió entós del gargüelu del gran fechiceru Carafigu:

--Anque me mates polo que te voi dicir, gran xefe Pamestona, pa la prósima Prueba de Valor ¡va marutase d'osu Yogui to puta madre!.--

Xermandía de non agresión. ¿Acuéi?.

Toos persabemos les tirries ancestrales que nos profesamos los que tamos d'esta mano del sucu que separta los que quieren un futuru pa esta nación de los que la quieren camudar nuna fastera atlántica col futuru peslláu.

Nesi aperrillanos de contino practicamos xeres abondes. Dende sopelexar bilordios dayuri, pasando por escurrir toa mena de llevantos y acabando pol insultu llisu y llanu. Poner exemplos ye fato y pérdida de tiempu, asina que voi aforrame amesoriar dellos.

Y, magar pueda suponer dar voces en castañéu otra vegada más, quiciabes seya'l momentu de parar d'una vez y enfotanos en mirar caún los trapos puercos que tenemos en casa p'abogadalos, envede rebuscar nes cases ayenes los de so p'asoleyalos perende.

Podíamos entamar guapamente por axeitar una "xermandía de non agresión", esbrexando por enterrar vieyes zunes y poniendo tol remangu por zarrar feríes engafentaes cuantayá. Camiento que toos díbamos salir ganando col cambiu.

Pensái qué prestoso tien de ser pasar per delantre la casa d'esi vecín que siempre isaba'l perru pa contra ti y comprobar que yá nun lo fai y, pa detrás, hasta cuando ta pa la mano, pue da-y por apurrite un canxilonáu d'agua pa que mates el secañu.

El casu ye qu'últimamente arruxida enforma tol tema de los alcuerdos de mínimos, xuntances y demás. Pero almeyor fai falta una premisa previa. Entamala con una xermandía, un pactu non esplícitu, de non agresión. Camudar darréu y dafechu los comportamientos y discursos belixerantes y enterrar definitivamente les gafures, obleros, mexacanes y tentaciones de toa mena pola apurridiella, palu nuna mano y chaqueta na otra, recordando'l final de les vieyes romeríes.

El camín pa entendenos toos ta ehí delantre esperando pola sestaferia. La verdá ye qu'andamos endagora en pañales. A ver si puxamos pa iguar esa xermandía a la que me refiero y entamamos a facer galantes. Dempués a caminar. Y hasta pue que dalgún día hasta a entainar y too.

Xente de casa.

Ye corriente ente nosotros nun-yos facer munchu casu a la xente de casa. Nin a nivel de los medios que namás que ven lo que relluz pa los madriles, nin bien de veces pa los más llariegos.


Esta vegada sí, nalando pela rede (Infoasturies) podemos echar una güeyadina a un historial deportivu d'esos qu'hai que ver sentaos pa nun amoriar. Ye l'historial de Manolo Busto, piragüista qu'acaba d'algamar la so décima medalla d'oru nesti deporte nel últimu campeonatu del mundu de maratón celebráu en Portugal. Y como nun ye oru tolo que relluz, si-y sumáis les consiguíes notros metales, el palmarés asusta.


Pa detrás la so historia deportiva nos últimos tiempos tien el so aquello. La federación española de piragüismu nun lu traga. Quier xubilalu y pone-y toles torgues posibles pa que nun pueda compitir. L'añu pasáu consiguiéronlo, pero esti nun tuvieron otru remediu qu'apechugar con él y ehí ta'l nuevu campeonatu. Qu'una federación quiera apostalgar y retirar a un campeón d'esti nivel ye como pa resfregar los güeyos d'incredulidá.


Tamos ante'l mayor campeón del deporte asturianu de tolos tiempos y ún de los mayores campeones a nivel mundial. Pero ehí ta medio arrequexada la so trayectoria. Desconocida dafechu pa munchísimos conciudadanos asturianos. Ensin casi ser p'acutar un sitiu nos medios d'indormación nin pacullá nel estáu nin paciacá en casa. Y pensar que pueda sonar pa esos premios que se dan toles serondes nel Campoamor d'Uviéu y que prefiero nun mencionar pa nun me poner de mal humor ye perder el tiempu. El provincianismu y papanatismu polo ayeno paga'l so peaxe.


Y la verdá, viendo cómo tan les coses, cuando la xente de casa llogra daqué importante y que fai que sonemos por dalgo más que por llaceries o caxigalines, nun me cai embaxo. Como ye esti casu. Un piragüista que nel estáu vecín allugonos nel mapa. Y anque esto se dea mui de xemes en cuando, presta.

Xuntanza. Primeres reflexones.

Va pocos meses desque s'entamare na rede un movimientu favoratible a la xuntanza nacionalista/asturianista. Magar permediaren d'entós p'acá los meses del branu cola so desbandada vacacional, el ruxerrux medró y espardióse. Hebo tamién novedaes apocayá y nun ta de más que caún reflexone sobre lo andao.

Empecipiando pol capítulu de torgues destaquen les que yá imaxinaba. D'un llau la que surde del encerriscamientu d'una parte de los cabezaleros políticos en convertise ellos y les sos formaciones nel "referente". Dalgo que nunca nun va pasar y que la realidá, sobremanera electoral, ta encargándose de retrucar una y otra vegada. Por más que fadie y disguste a dellos, equí nun hai un referente. O si se quier dar la vuelta a la tortiella, toos son referentes, ellos y los que consideren los sos enemigos políticos nos ámbitos nacionalistes/asturianistes.

Hai qu'apechugar tamién con un sector formáu por xente que s'afaya como en cá güelu no marxinal. Ye constatable nel naconalismu/asturianismu la esistencia de grupos con un mieu escénicu descomanáu. Amorien coles altures polítiques y si ellí onde s'alluguen entama a xorrecer, éntra-yos un pruyiciu que nun son a aguantar por dixebrase y montar la so xermandía casera. Esta actitú pue restrexase a lo llargo de la historia de les formaciones polítiques asturianes.

En cierta manera xuncíu al anterior, tamién hai militantes o simpatizantes políticos que consideren un trabayu perimportante puñar contra tolo que se ximielga nos ámbitos nacionalistes/asturianistes. Lo que nun ta con ellos ta escontra d'ellos. Semen equí y acullá, llevantos, bilordios, acusaciones de toa mena. Revuelven na puxarra col envís d'atopar aquél fallu del so "enemigu" y asoleyalu aína. Una simple güeyada a la rede apúrrenos casos d'estos a magüeyu. Una de les sos espresiónes más gafes alcontrámosles cuando nos atopamos na antoxana de dalguna fecha importante que pue dir dende una convocatoria electoral a celebraciones como la del 8 de Setiembre. Neses ocasiones sal, de sutrucu, la noticia que truña contra l'otru, l'alderique que xorrasca les áscuares asollando'l fueu del enfrentamientu que paecía anubríu. Tamién esto ye constatable agüeyando dayuri.

Hai un tema que resquema y ye motivu de qu'espoxiguen les discusiones darréu, pero por ello nun se pue resalvar pa dexar de llau. El perconocíu contenciosu xudicial poles sigles AA. Equí hai que filar fino y falar claro. Tamos ante un finxu fundamental, ante una exa clave sobre la que xiren les mayores zunes del nacionalismu d'izquierda anguaño. Nun ye xera de mio permediar nel contenciosu. Nin dar nin quitar razones a naide. Eso tengo que lo dexar claro, nidio y rellumante. Pero como nacionalista favoratible a la xuntanza tengo de reconocer y manifestar, porque camiento que ye compartío por abonda xente más, qu'esti tema xudicial ye anguaño un sucu perimportante que torga l'apautamientu del nacionalismu d'izquierda. Eso ye asina y nun lo podemos negar. Rescampla. Y si se quier tien igua. Porque los xulgaos tán atarraquitaos de milenta temes más graves qu'esi y tienen arreglu. Y nun digo más nada.

Pero too nun son tenebreros nel procesu hacia la xuntanza. Hai tamién pasos que, garraos con tola prudencia y xacíu que requieren, apunten nun sen más afayadizu pa toos. D'un llau, l'allugamientu alrodiu del llema "SOS Asturies" d'un bon garrapiellu de fuerces polítiques, sindicales y ciudadanes. D'otru, la robla d'un alcuerdu ente AA (una de les partes, pa que naide nun se remonte nin moleste) ya'l PAS. Dalgo que franció lo que se suponía que yera'l procesu llóxicu: xuntanza del nacionalismu d'izquierda pa dempués buscar l'acercamientu al asturianismu interclasista. Y ye precisamente esto cabero lo que me fai aportar a la última reflexón.

Pragmatismu, xenerosidá, dexar nel estoyu principios irrenunciables. Efectivamente, p'algamar una xuntanza pola que tamos arranando una parte, con tola modestia y tamién con tol convencimientu, mayoritaria de los nacionalistes y asturianistes hai que siguir dos fitos básicos que nos encamienta'l nuestru saber popular. El primeru, nun poner el carru delantre los gües, plantegando enriba la mesa de debate principios utópicos irrenunciables. El segundu, que'l gatu con guantes nun caza. Si'l procesu entaína al revés de lo que se pensaba y primero hai qu'encontar nel fortalecimientu d'un pactu ente asturianistes y parte de la izquierda nacionalista pa tender una ponte que valga pa que nun segundu momentu se sume a él la parte restante d'esi nacionalismu pues bienveníu seya.

P'acabar, el filandón de la xuntanza ta abiertu y nun paez que lo fixere de baldre. Namás qu'hai que recordar qu'equí naide ye más llistu que naide, nin más importante, nin imprescindible. Caún pue tener una aportación tan importante como la de cualquier otru al mesmu. Y ente toos podemos consiguir dir avanzando si nos enfotamos nello. Falaba enantes del envizcamientu por ser "referente". Pues si en dalgún momentu consiguimos iguar un "referente únicu y compartíu pola mayoría de los nacionalistes/asturianistes" de xuro que les coses van camudar pa bien d'una manera clara y radical.

Vieyos, veceros, y desorganizaos.

La población asturiana avieya cada vuelta más. Nun se remocica y estos díes d'atras aprucíen nos medios de comunicación datos aparrantes de la desproporción ente la xente más vieyo y la más mozo. Somos abenayá una de les poblaciones más allancaes d'Europa.

Arriendes de les torgues qu'esto acarreta en bien de faces, tamién tien una plasmación de mena política y electoral. Una pírámide de población asina empobina hacia l'inmovilismu tanto a la hora de sofitar alternatives sociales nueves a les esistentes como a la hora d'espeyar resultaos electorales. En resultancia repítese eso tán encamentao dayuri de "siempre más de lo mesmo".

Si tuviere qu'apostar anguaño por qué cantidá de la población podría sofitar dalgún proyectu políticu arreyáu al nacionalismu/asturianismu abúltame qu'andaría alrodiu d'ente venti y trenta mil persones. Nun ye un balagar, miániques, pero tampoco cantidá despreciable. Traducío n'escaños nunes elecciones aseguraríen presencia na Xunta Xeneral, magar non gobernar na mesma.

El problema ye que lo dicho nel párrafu anterior tendría acutáu un sitiu na nuestra sociedá nes condiciones más favoratibles. Y ye agora cuando nos podemos entrugar: ¿Tamos güei delantre d'eses condiciones?. Y la rempuesta podríamos dala nun perfectu tonu coral: non. Porque falamos de condiciones ideales y nel casu de que too se fixere d'una manera axeitada y afechiscada dafechu.

Pero la realidá muéstranos un panorama muncho más solombriegu. El sitiu afayadizu pa ilusionar y mover a toa esa xente ta por andechar. Los proyectos que se presenten anden perlloñe de capiar a aquél que-y prestaría engabitar n'estayes netamente asturianes. Nun fai falta estruyar el cerebru sacando conclusiones nin perdese en grandes rebilicoques mentales. Basta y sobra con sentir lo qu'opina esa xente o con lleer lo qu'escribe. Dende cuantayá quieren "un referente únicu" como finxu qu'oriente nel trabayu ya'l votu. Y tamién dende cuantayá refúguen los "garrapiellos de referentes" que lleven a la confusión y, lo peor de too, a la desmoralización descomanada y qu'avanza col pasu de los años.

Pa detrás el sector que debiere xugar un papel más dinámicu en tol procesu, la mocedá, alcuéntrase escabarriada. Unos pilen pal desdexamientu activista y pa la abstención electoral. Otros siguen la buelga abierta pol pa o'l güelu y participen de la derecha estatal o de la izquierda plural estatal tamién. Pocos s'alluguen nel nacionalismu/asturianismu. Y bastantes de los que tán dispuestos a trabayar atópense enguedeyaos na doctrina de la "guerra permanente" yá endémica nesti tipu de formaciones.

D'esta miente, el panorama que podemos nortiar ye apolmonante. Nun s'atopa per onde s'esmucir d'una situación que ye como'l cuentu de la bona pipa. Nunca acaba y vuelve siempre a entamar. O si lo miramos al vies, sí s'atopó y atopa per onde salir de la llamarga: sentándose a negociar, falando, enterrando l'hachu guerra y enfotándose nel alcuerdu y la xuntanza.

Y asina ta la situacion actualmente. Gobernando esi réximen clientelar que nun pierde veceros por mal que lo faiga, sinón que los gana. Un réximen onde gobiernu y oposición representen la comedia de les desavenencies y, darréu, participen de la pitanza y les prebendes. Y como oposición al mesmu, una xente tresmanao, que nun ve la hora de sestaferiar nun camín claru y común, cola moral embaxo, y col convencimientu que-yos da la testonería de los fechos de que nun hai nada que facer.

Y asina alborez y atapez nesti vieyu país. Ente vieyos movíos pola rutina, agradecíos al réximen de toa frasca, y descontentos desorganizaos de contino. Asina alborez y atapez dende años, dende décades... dende siempre.

Y, por enésima vez, convién repitir que'l tren de la historia nun pasa constantemente. Xugar a nun lu garrar ye enredar con una ruleta rusa de consecuencies imprevisibles.

L'asignatura pendiente.

Cualquiera que me visite sabre de sobra a estes altures lo cafiante y repunantucu que me pongo con dalgunes coses. Repítome como la morciella y si fixere un actu de resumen igual con un 10% de les entraes del blogue diba sobráu pa dicir lo que quiero.

Güei voi cabruñar otra vuelta con más de lo mesmo y encamentáme a min mesmu de variar un pocoñín, que llevo una trayectoria que...

Total, que voi escribir de la que considero l'asignatura pendiente de nuetro: la historia. Como antoxana, diré que si tuviere que reducir al másimo los pegollos identitarios d'una nación quedaríame con los dos que m'abulta que más rescamplen: la llingua y la historia, que vienen a ser dos de les principaes erbíes qu'esa nación tien pa reconocese a si mesma y ver el mundu.

Nel casu de la llingua y afortunadamente parezme que lo tenemos bastante claro. Facemos piñu a la hora de considerar l'asturianu fnxu cimeru de la nuestra identidá y darréu demandamos pal mesmu la consideración cimera que se tien pa cualquier llingua d'un país: la oficialidá y l'emplegu normal y davezu en cualquier sitiu, circunstancia y ocasión.

Onde camiento qu'acoxamos más ye na historia. D'un llau, porque la desconcemos enforma. D'otru llau, porque lo poco qu'aportó a nosotros foi tracamundiao pa xustificar identidaes ayenes. P'acabar, porque nos enfotemos na recuperación de la llingua dexando munches vegaes n'abertal y echando meruxa la faza histórica.

Cuando a un pueblu como ye'l nuestru casu-y arrampuñen la so historia, o polo menos fitos imprtantes d'ella, puen adoptase dos postures. Dexalo tar y tratar d'escaecelo o encerriscase en recuperar lo perdío.

Nel primer casu, contrariamente a la intención de los partidarios de l'amnesia, lo que sucede ye qu'esa historia acaba siendo utilizada polos lladrones pa frayar sistemáticamente cualquier intentu de que guañe nesi pais una conciencia identitaria. Nel casu asturianu rescampla esto de tal manera que nun me paez que faiga falta poner exemplos acabante pasar el 8 Setiembre endolcáu nes connotaciones del "bierzu de..." que toos conocemos de sobra.

Nel segundu casu y de llograr l'oxetivu ábrese una posibilidá descomanada d'afondar y empobinar pel camín identitariu. Con agüeyar pa otros países colos que compartimos estáu debiere ser bastante pa pescanciar esto. Tamién con comprobar l'enfotu enfermizu de los que nos gobiernen por tapecer cualquier rellumu históricu que contribuyere a que guañe ente nosotros el conocimientu históricu propiu, cualquier rispiu qu'aumentare'l probe badaxe de la nuestra alcordanza histórica, debiere ser tamién bastante p'atalantalo.

Pienso entós que dibiéremos trabayar más nesta estaya de la nuestra identidá colectiva. Desaniciar dafechu los mieos y prexuicios que dacuando nos afalen pola mor de les interpretaciones y xustificaciones ayenes a nosotros que de períodos de la nuestra historia se vienen faciendo dende cuantayá. Encamentanos tamién que cualquier períodu históricu nuestru pue ser arrampuñáu y utilizáu contra la nuestra alcordanza histórica, somantu básicu de la nuestra identidá.

Hai coses que nun me caen en baxo. Si siguimos al pie de la lletra les informaciones que los lladrones históricos arreyaos al poder nos apurren, la historia del nuestru territoriu dixebraríase en dos grandes etapes: la primera, enantes de Cuadonga onde too sedría romano, y la segunda dempués d'esa dómina onde too sedría español. Y entós entrugo: ¿Ú Asturies?. La negación cimera, l'absurdu empicorotiáu a la categoría de conocimientu rescampla dafechu.

Y al final, les consecuencies de too ello tamos pagándoles anguaño. Por dos factores que caminen xuncíos: los intereses foriatos esfronaos colos nuestros, y los nuestros propios prexuicios y desdexamietu. Nel primer casu poco podemos facer, van siguir ehí combatiendo la nuestra identidá histórica. Remanándola y ocultándola. Pero nel segundu namás que nosotros tenemos la pallabra y la decisión fita de d'amechar na xera o de dexalo too pa monte...

Castiellu Gauzón: ¿cruzamos los deos?.

Doi una revolada pela rede y alcuentro nel diariu dixital Aruelu anuncia de les escavaciones que se tan faciendo nel Castiellu de Gauzón. Cuando llego a onde se fala de les dataciones siento rebusquinos en butiellu. Ye nun sieglu anterior a la Batalla Cuadonga. Malo.

Les escavaciones de La Carisa asoleyaron unes fortificaciones que tamién yeren anteriores o cercanes a la dómina de la citada batalla. Tamién consideraben los arqueólogos que podíen tar enriba d'otres ástures. Hasta la xente folixera entamó una moxiganga anual de llucha ente astures y romanos.

Rescamplaba de cualquier manera que se quixere güeyar aquello que n'Asturies había una sociedá abondo más organizada que la que se suponía n'antoxana de la mítica batalla. De sópitu, dende'l Gobiernu Asturianu paralicen les escavaciones que se llevaben faciendo dende años atrás. Nun ye casualidá nenguna, nin falta presupuestos nin nada. Ye una decisión tomada a costa fecha. Ta claro.

Pues lo qu'asoleyen les escavaciones nel Peñón de Raíces son más de lo mesmo. N'Asturies había na sociedá organizada y con guaños de feudalismu enantes de lo que se pensaba. Y eso lleva a la conclusión de que la xente d'aquelles dómines tenía una conciencia muncho más espolletada de pertenecer a un territoriu del que se pensaba tamién.

Poro, ando yo roceanu. Dicen que les escavaciones de Gauzón van prolongase hasta'l mes de payares. Espero que seya asina. Y que pal añu qu'entra entamen otra vuelta con elles pa que rescample tolo que ta tapecío nel tarrén y tres la borrina de la historia. Y espero y deseo que nun venga la orden tarrecida de "Esto se ha acabado. No interesa seguir con estas historias" dende'l Gobiernu del Señor Areces col beneplácitu de la Izquierda Plural.

Y ye que cuando ún siente esi discursu paranoide y enfermizu dafechu que renuncia a llamar al nuestru país coses tan simples ya inofensives como "Asturias" o "Provincia de Asturias" o "Región Asturiana", como ellos mesmos lo veníen faciendo hasta agora, porque al podriellu qu'esa xente tien por cerebru abúlten-yos subversives camudando la denomiación por "Comunidad Autónoma" pue esparar yá de too, hasta que a la propia Virxen de Cuadonga la denominen "Elemento religioso patronal de la Comunidad Autónoma consituida en una franja territorial norteña española". Como pa permitir escavaciones que puedan estimular una peligrosísima conciencia territorial separatista. Y nun vos rir: tiempu al tiempu.

El día dempués.

Sí qu'hebo trepe alrodiu del acabante pasar 8 Setiembre. Nel día dempués asela'l baturiciu. Dellos analicen lo pasao. Otros escaecen cansaos.

Güeyemos de too. El que lleva a convertise nel comunicáu, artículu, movimientu previu a cualquier fecha impotante col envís de xorrascar nunes áscuares siempre vives pa prender la foguera la discordia.

Los que roblaron un alcuerdu que nos garró a casi toos col pie cambiáu y que demuestra que los partíos asturianos puen sentase a falar y hasta firmar alcuerdos ensin que'l mundu argaye.

Los que fixeron actos dixebraos pa frustración de munchos y allegría de los de siempre.

Los qu'aprovecharon la ocasión pa cabruñar na idega de la necesidá urxente y vital d'empobinar al entendimientu y la xuntanza.

El discursu paranoicu y con reminiscencies preconstitucionales d'una clase política dominante encerriscada y envizcada con reivindicar un españolismu ximielgu del que remanen aquellos amantes de los estaos uniformistes y dictatoriales.

Los que participaron nes celebraciones festives y relixoses de los sos conceyos o enveredaron camín de Cuadonga ayenos a toa celebración política. Y los que participaron de la folixa institucional.

Los que propunxeron feches alternatives a esti día porque nél nun s'afayen.

Los qu'abeyaron pela rede parándo equí y esnalando p'allá espardiendo pareceres, comentando y retrucando.

Y los que lleguemos a esti dia dempués a facer les nuestres reflexones y pescudar dayuri les de los demás. Cola cabeza un pocoñín atorollada yá de tantu xaréu y bastantes ganes d'espansionar una migayina siquiera.

Remembranza.

Pelayo, Favila, Alfonso I, Fruela, Aurelio, Silo, Mauregato, Bermudo, Alfonso II, Ramiro, Ordoño, Alfonso III.

Reinu d'Asturies.

Nación Asturiana.

Territoriu, instituciones, arte, llingua, vezos, cultura...

Identidá propia y estremada iguada al traviés de los sieglos.

Brenga milenaria.

Asturianos.
..........................................................................................................................................................................
P.D.: La identidá asturiana alcuéntrase anguaño nun momentu críticu. Recula cada vegada más y queda arrequexada dafechu. L'españoilismu ranciu identitariu anúbrelo casi too y nun dexa resquiebra pa lo llariego. Güei más que nunca échase en falta una organización cívica qu'axunte asturianos enfotaos en defender la so identidá y n'afalar a la clas política a defender los intereses d'esta vieya nación. Dende la consciencia de dar voces en castañéu, gúei nesta fecha tán simbólica pa los asturianos pido públicamente la refundación de Conceyu Bable.

Una anuncia sorprendente.

"Esto representa un acercamientu ente'l PAS y Andecha Astur que partiendo de cero permitirá dir conociéndonos meyor y buscar les coincidencies ente les dos organizaciones pa ver qué posibilidaes hai de trabayar conxuntamente". (Lluis Anxel Núñez. PAS)

"Esto ye una amuesa mui importante de voluntá d'entendimientu ente Andecha y el PAS. Andecha Astur fizo esta apuesta táutica y entama a dar resultaos pero queda munchu trabayu, paciencia y mano izquierda. Queremos que la sociedá asturiana perciba al traviés de xestos como ésti que son posibles y necesaries otres alternatives a la política destructiva del gobiernu PSOE-IU". (Mariu Arbesú. Andecha Astur).

Esta noticia acabo d'esmesala del diariu dixital Infoasturies. Paezme sorprendente. Pa min ye mui llueu pa facer valoración dala d'ella porque me garra de sópitu. Consideré interesante ponela nel pergamín y ehí ta.