miércoles, 26 de agosto de 2015

Caleyando dayures

Saliendo del asfaltu hai bien de caminos pa caleyar. Carreros, siendes, carriles. Adiéntrense en monte, culebrien pela marina. Tapizaos pola fueyarasca, la tierra pisao, calzaos con llábanes y regodones. Caminos onde perdese pa observar, dedicanos tiempu y espansionar.

Siempre nel requexu más inesperáu pues ver una utre allarribones, o un rebecu paciendo pa escontra una peña, o atopar el mesmu rastru del osu. Porque los caminos de tierra, piedra y foyarasca siempre lleven ayuri. Al animal xabaz, a la faya centenaria, al carbayu, a la nozal que ximielga'l ramaxe cabo'l ríu. Tamién al arrecender del ocle que va dexando la marea y a nortiar allalantrones un pesqueru banciando ente les foles.

Pel nuestru país asturianu tenemos bien de siendes señalizaes con marques pintaes, paneles, postes, fitos...Al traviés d'elles podemos aportar a milenta paraísos que frayen  la monotonía de lo cotidiano y suéltennos los arcoxos del pensamientu dexándolu esnalar.

Caleyando dayures empobinamos a la busca d'otres metes bien estremaes a les de la rutina diaria: al picorotu onde peñera la utre o l'aigla, al mayáu onde paz el ganáu, a la vieya faya que vixila la fonte, a la capiella col texu centenariu, al afalagu de la brisa mientres agüeyamos los cachones romper na pintalarrama d'islles y cantiles. 

Y son eses otres metes les que van ayudanos a avanzar, pali que pali, nel conocimientu aposentáu de lo que nos arrodia y de nós mesmos,  pa reflexonar y esparder, p'afondar nesi otru camín vital finxáu por eses dos entrugues qu'arrecostinamos desque los humanos facíemos galanes: d'aú venimos y pa ónde enveredamos. 

miércoles, 19 de agosto de 2015

La ufierta turística asturiana

Magar el puxu y la difusión del turismu de sol y playa na ufierta turística estatal, Asturies sigue lloñe de los finxos d'esi tipu de turismu más propiu de los países mediterranios. Los modelos nesti sector a aplicar nel nuestru casu han ser, entós, de raigañu propiu y sofitándose no llariego y non calcando esperiencies foriates.

Les playes de la nuestra mariña non sólo son un sitiu p'asoleyase. Tienen l'añadíu del so potencial como bayura paisaxística y ambiental. Tenemos la costa menos frayada del llitoral estatal y eso ye un valor a considerar. Tamién alrodiu de les nuestres sableres y cantiles tenemos rutes senderistes pa potenciar. Porque la mariña y les playes puen usase pa más que pa turrar al sol como llargatos.

Tierra adientro tenemos unos paraxes de monte escepcionales. Tamién nesti casu altravesaos por rutes de senderismu bramente guapes. Caminar peles coraes d'un fayéu ye una esperiencia difícil d'escaecer pa quien nun conoz la viesca atlántica y somorguiaos na so maxa podemos imaxinar una xana, un busgosu o dalgún diañu escucándonos dayuri.

Pero non sólo tenemos un mediu natural ricu pal turista. Tenemos tamién un patrimoniu material ya inmaterial con abondes d'alternatives pa ufiertar. Xacimientos paleolíticos, túmulos y dólmenes, castros, arte asturianu, románicu, escatafinos de castiellos, les ayalgues catedralicies... Ye lo que denominamos el turismu cultural. Y equí tenemos un potencial descomanáu pa ufiertar.

Tamién les manifestaciones relacionaes cola etnografía, la música ya'l folklor, les fiestes y romeríes tradicionales, o actividaes que van recuperándose con pie fitu nes últimes dómines como les mazcaraes ivernales, son fontes afayadices pal turismu. Un turismu que nun tien por qué ser braniegu namás, sinón que pue espurrise a lo llargo de tol añu.

Tampoco nun hai qu'escaecer que dientro d'esi turismu hai xente que nun se mueve sólo pol güeyu, sinón tamién pol butiellu. Equí entra en danza un sector que ta de moda anguaño y bien sopelexáu pelos canales televisivos: la gastronomía. Y dientro d'esti ámbitu tamién n'Asturies tenemos una bayura bultable. Productos de la mar y de la tierra. Races autóctones qu'entamen a comercializase cada vegada con más puxu (pites pintes, gochu d'oreya llarga o asturcelta, cabra bermeya, oveya xalda, vaca casina y asturiana de los valles...). Una auténtica guaña pal paladar del visitante. Tenemos la mayor mancha quesera peninsular y escurque hasta europea. La meyor escanda continental reconocida y un llargu etc.

Potenciar tolo anterior, arriendes de más aspectos que nun enriestro nel post, porque tampocu nun se trata d'una descripción dafechu (redes museístiques, p.ex.), tienen de ser la base de la nuestra ufierta turística. La mentalización y l'enfotu por desarrollalu ye xera y responsabilidá de l'alministración asturiana. Pero non sólo d'ella. La propia sociedá asturiana tien que se mentalizar y trabayar nello como fonte d'actividá económica pa la que tenemos una abondante ufierta de recursos. 

  

miércoles, 12 de agosto de 2015

Depredadores veraniegos

Una playa ye un sitiu afayadizu pa practicar bastantes actividaes. Pasiar, facer exerciciu, xugar, zampuxase nel agua, nortiar barcos n'horizonte, observar l'ocle que les foles van dexando na arena, andar pelos pedreros viendo la fauna que nellos habita...

Pero tamién hai quien va a la playa a exercer de depredadores, basándose nuna concepción de la fauna como si d'un xuguete se tratare. Asina podemos ver a xente -y ente ello a munchos rapacinos- armao con redes con palu y calderos qu'empobinen pa los fontanes de los pedreros a ver que se pue pescar per ellí. Dalgún pexucu, una sapa, un cámbaru, un ronchel... lo que cuadre. Dacuando vase tamién a la desembocadura del ríu qu'acaba na playa a por ranes. Y hasta dalguna llagartesa qu'escalez despistada pue acabar de mala manera.

¿Y si cai dalguna presa qué?. Pues nada. Porque se fai pa enredar y entretenese. Guapamente morrerá o quedará tirada dayures. Tamos ante un conceptu de los seres de la natura como trebeyos, oxetos pa divertise simplemente. Muncha xente entamará de xuro esta actividá ensin decatase de qu'actúen como simples depredadores. Cuando permedien rapacinos -pese al ciñu con que los armen con redes y calderos- tán deseducándolos nel respetu a los animales y a la propia naturaleza, convirtiéndolos, con toles bones y inocentes intenciones con que se faiga, en depredadores precoces.

Meyor usar les sableres de la nuestra mariña pa espansionar, asoleyase y contemplar tolo que  se quiera a los animales qu'ellí s'atopen y na so contorna. Pero pa observar y deprender, non pa capturar y desaniciar. Too ye mentalizase y proponéselo.

miércoles, 5 de agosto de 2015

El maíz de los ástures

Lleo na prensa provinciana que nos cartelos informativos del xacimientu de La Carisa apaez la burrada de que los ástures qu'habitaren el llugar nel so día comíen MAÍZ. Lleo tamién que los espertos soliciten la retirada d'esos cartelos porque consideren que dexen en ridículu a los asturianos ante los turistes que visiten el llugar.

Pregúntome yo quien sedrá'l responsable de la burrada en cuestión. Pregúntome tamién qué filtros pasaron los paneles informativos antes d'asitialos onde tán. Y pregúntome en qué manes tán los asuntos relativos a la cultura asturiana.

Pero pienso tamién que cuando se dan esti tipu d'aberraciones hai que molestase una migayina n'afondar nos oríxenes de les causes que lleven a elles. Y pescudando nello llego a la mesma conclusión que siempre aporto a ella cuando se dan estos casos.

Una conclusión que nun ye otra que la inorancia de la nuestra historia y cultura ye una de les señes d'identidá de la sociedá asturiana actual. Esa historia y esa cultura tán ausentes casi dafechu de la nuestra enseñanza, dende les escueles a la universidá. Tampoco nun tienen llugar nes polítiques culturales de les nuestres instituciones. Y, resumiendo, esa historia y esa cultura malviven apostalgaes no marxinal y prácticamente invisible.

Asina que, entrín y non la situación siga siendo esa, que se dean ente nós esti tipu de noticies alloriantes y estrambótiques entra dientro de lo normal y esperable. 

Ye lo qu'hai y lo que tenemos.

lunes, 3 de agosto de 2015

La fayona del busgosu.


Na viesca que s'espurre penriba'l llugar de La Ponte de Turiellos, ellí onde dicen les cróniques que s'axuntaben los vecinos en conceyu a toque de turullu, ábrese un claru. Nuna campera arrodiada con muria, pa la parte d'abaxo que llenda col camín, atópase una faya descomanada. Un exemplar maxestuosu y centenariu de faya que s'alza pa contra'l cielu abriéndose en dos brazos como queriendo algamar la eternidá. Sorprende y abluca'l so magníficu estáu de conservación. Nin el rayu, nin el fueu, nin la mano de la mala xente fixo mozqueta nel so tueru y rames. Cásique un milagru.

Pero yo sé del secretu qu'abelluga esta fayona. Y ye que lleva siendo curiada desque guañó d'un fayuquín pel últimu busgosu llangreanu. Un busgosu pervieyu, mochu, abangáu polos años y coxu pol mor del tiru furtivu d'un cazador hai cien años. Dacuando, préstame averame a esti conceyu pa echar una rocada col mio amigu. Arreblagamos la muria y arrecostinámonos a la solombra de la faya pa falar de los vieyos tiempos, de la vieya xente y de los vieyos dioses. Dempués despidímonos y saludamos a la nuestra amiga que nos manda un besu a la so manera, xiringando los sos brazos y afalagándonos con un airín prestosu que nos reconforta nos díes chornosos del branu.

Pero confiésovos qu'ando esmoleciu. Y ye que'l mio amigu confesóme va tiempu qu'anda percansáu de la vida terrenal y que-y entra cada vegada más fuerte'l rixu de retirase al olimpu de los mitos de la manera en qu'avecen a facelo: sumiéndose por encantu. Pienso que si esto asocediere qué diba pasar entós cola fayona. Si l'acutiría'l rayu, amburaría'l fueu o si'l so troncu centenariu acabaría baltáu pola zuna de dalgún humanu desaprensivu y foín.

Asina que me tengo propuestu como un llabor prioritariu convencer al mio amigu busgosu a que siga ente nosotros milenta años más. Comprométome a visitalu too darréu pa que nun- y vague la so esistencia terrenal. Y que la vieya faya siga ehí per munchos más años y xeneraciones como un tótem que recuerde a los naturales d'esta pola llangreana los tiempos en que los antiguos s'aconceyaben pa encarar xuntos el destín a toque de turullu.