viernes, 30 de octubre de 2015

Tiempu de Samaín

Otru añu tamos nes dómines del Samaín. El finxu que marca la entrada na estación escura y el final de la recoyida de la collecha. Y cuando fai galanes un añu nuevu. Contando'l tiempu a la manera de los pueblos celtes.

Somorguiando nes vieyes tradiciones, na viéspora del Día de Difuntos o Tolosantos, a la reblagueta ente'l 31 d'Ochobre y el 1 de Payares, prendíen veles dientro de  calabaces agüecaes, nabos... Dexaben a la puerta casa cacíos con agua pa que les ánimes amugaren el gargüelu. O dexaben el llar encesu y comida pa que repunxeren fuerces nel so caleyar. Hasta dexaben llibre la cama del difuntu, nun fuera que quixere descansar un pocoñín. Tamién los rapacinos picaben nes cases buscando llambiotaes. Facíen amagüestos dexando castañes por si pasaba dalgún ánima, axuntábense los vecinos pa comer... Una enfilandrada de vezos que foron quedando escaecíos adulces col pasu de los años, el desaniciu cultural y la vagamar d'otros tiempos que traxeron a recostines otres traces culturales.

Porque tamos nel tiempu de les ánimes y los difuntos. Unes feches onde los que s'alluguen del otru llau del sucu de la ultratumba tornen a percorrer los vieyos caminos, les aldees y caseríes. Ye'l so día y hai qu'actuar con respetu pa colos que marcharon del mundu los vivos. Y tamién con procuru, porque ye nestes feches au La Güestia se fai notar tamién cola so procesión abeyando perdayures. Coles capielles y los güesos encesos. Dalgunos condergaos a acarretar los finxos que movieren en terrén ayenu cuando yeren vivos. Cuidáu y güeyu argutu. Cruzase con ella pue tener consecuencies fatales. Hai qu'entainar entós a facer en suelu un círculu y metese nél a ver si llibres. "Cuando nós yeramos vivos andábamos a estos figos. Agora que somos muertos andamos per estos güertos". "¡Andái de día, que la nueche ye mía!". Tiempu tamién d'axorizar a los vecinos preparándo-yos engataes coles calabaces enceses y marutándose con sábanes. El respigu. El mieu. La calavoria allumando na cruciada del camín, nel requexu...

Y col Día de Tolosantos l'homenaxe a los que nos precedieron y que yá nun tán con nós. La ufierta de flores nes tumbes del cementeriu. El recuerdu respetuosu. El duelgu polos que se sumieron del mundu los vivos. L'homenaxe a los antiguos. La xente que nos añó y acoricó. Que nos ayudó a sestaferiar el nuestru camín pa empobinar pela vida. Que nos deprendió les vieyes tradiciones y la llingua, calteniendo encesu'l llar de la nuestra identidá.

Tiempu de Samaín. Tiempu de difuntos.Y tamién tiempu de futuru. Porque, nel calandariu de los pueblos atlánticos celtes, entama un añu nuevu. 

sábado, 24 de octubre de 2015

De la utilización política d'Asturies

Pa munchos asturianos qu'Asturies seya un pincipáu ye un motivu d'arguyu. Pero si conocieren d'ónde vien esi títulu, la cosa cambiaría de xuro. Porque esa distinción nun aporta d'una gracia pola fidelidá, sinón de tolo cotrario. De magar el final del Reinu Asturianu, la nobleza del país entamó sublevaciones de contino: Félix Agelaci, Gonzalo Peláez, Urraca... La última que valumba foi la d'Alfonso Enríquez, conde de Noreña y de Xixón, ciudá esta destruída tres la so última derrota. Tres remontase esti noble varies vegaes escontra'l poder castellanu, la so derrota final anició un títulu de dominiu, el del Principáu d'Asturies, pol que l'heredenu de la corona, primero castellana y dempués española, garraba directamente les riendes pa mardomar esti territoriu perllevantiscu pa colos intereses reales centraliegos. Una toma militar y una anexón que pa nada concasen con títulos de fidelidá nin nada pol estilu, que ye lo que nos venden perdayures dende tolos medios informativos.

Nes dómines que vivimos, hai una fundación onde venceya  al país asturianu cola corona española, xunciendo a la nuestra tierra al herederu o heredera del reinu d'España. Entama ella unos premios anguaño llamaos "Princesa de Asturias". La idea central ye da-y puxu a la corona española, al traviés del herederu/a que correspuenda, usando la nuestra tierra pa premiar a xente destacao de diverses disciplines, pero onde too xira, al final, alrodiu del príncipe y princesa españoles en cada momentu, auténticos protagonistes de los eventos entamaos con motivu de los premios concedíos por esa fundación privada encargada de organizalos y que muestra una perceguera-por llamalo con un calificativu suave- hacia aspectos centrales de la identidá asturiana como pue ser l'idioma, d'una forma nada disimulada y hasta vergonzosamente descarada.

D'esta manera, Asturies, los sos símbolos nacionales, dellos fondos económicos sacaos de los tributos ciudadanos,  y el títulu de dominiu medieval que la vincula -pola fuerza de los "fierros"- a la corona española utilícense pa emponderar la institución monárquica qu'encabeza la xefatura d'esti Estáu. Na edición d'esti añu rescampla esa utilización, fondamente política, d'unos actos aparentemente (solo aparentemente) culturales. Tolos medios de comunicación destaquen el llamáu, perfondamente políticu, del rei español a la unidá patria per aciu del refugu del procesu catalán. ¿Qué tien que ver eso con unos premios dedicaos, teóricamente, a empicorotiar trayectories nel mundu de les artes, la ciencia o'l deporte?. Pues nada. Absolutamente nada.

Pero nun ye oru tolo que relluz nel bandu opuestu a lo anterior. Porque el casu ye qu'estos actos celebraos n'Uviéu tienen, dende va unos años, una contestación social na cai. Alredor de la plaza de la Escandalera axúntense dellos colectivos sociales que griten el so rechazu a los actos intitucionales. Pero que naide nun se lleve a engañu. Bien de xente -solliño que non too y quede esto perclaro- de los que participen nesa protesta, coinciden colos emprendedores de los premios na utilización política d'Asturies pa los sos intereses. Porque ente los que protesten alcuéntresnse los que trabayaron a estaya pa esgonciar l'avance de cualquier iniciativa política nacionalista/asturianista na nuestra tierra. Los que refuguen la nuestra bandera o la nuestra historia. Los que festeyen la destrucción de la Cámara Santa o la biblioteca de la nuestra Universidá nel 34. Eso sí, marutao too ello so proclames a la oficialidá del bable y bla-bla-xu-xu. En definitiva, la otra cara de la mesma moneda: la utilización política de la patria asturiana. Por tirios y troyanos. Por unos y otros.

Porque, falando alto y claro y en resumíes cuentes, anguaño Asturies derivó nuna simple marioneta política d'intereses políticos españolistes, d'un signu o d'otru, ayenos a ella. Un probe felpeyu y una xirigoncia. Por muncho que fadie y duelga reconocelo.

Y eso ye, y non otra cosa, lo que tenemos nestos tiempos y lo único qu'hai nesta tierra que vaga al aldu y albintestate. Y asina va siguir ocurriendo entrín y non el personal nun esconsoñe d'un pigazu identitariu que nos ta pasando una factura descomandademente cara política, social y culturalmente. ¡Probe país!



 

martes, 20 de octubre de 2015

La Bornaína Santiago

El nome del sitiu viniérame per vía familiar. Compónse de dos partes. Una, l'amu de cuantayá del llugar o escurque la época na que se fixo la borronada. La otra una quema nel monte pa usala de pastu o llosa.

Anguaño ye una finca pa pacer el ganáu. Ta zarrada de muria. Tien nun llau los muruecos d'una casa. Pa la vera del camín calzáu de piedra, úpense dos fayes centenaries. Les úniques qu'atopé en tol monte. 

Cuando pela seronda ando a la gueta paso per delantre d'ella y alcuérdome de lo que me cuntaren cuantisimayá. Ellí casare un antepasáu míu con una moza d'aquella casa hoi esbarrumbada y marcharen pa les amériques. Colos años sumióse-yos el rastru.

D'aquellos tiempos a l'actualidá dio munches vueltes la historia: pasaren monarquíes, dictadures, repúbliques, revoluciones, constituciones... Emigrare xente alluendi pa nun tornar y viniera xente d'otros sitios pa quedase.

Pero, magar lo anterior, la Bornaína Santiago sigue anguaño ehí. Cola muria cercándola, la casa esgonciada y les dos fayes centenaries a la vera del camín calzáu.

Y pienso que ye mui importante que cuando caleye pel monte siga pasando al llau d'ella. Porque considero que mentes queden bornaínes dayures, les nuestres raíces van siguir allancaes na tierra. 

Y eses raíces son les que nos faen reconocenos, individual y colectivamente, al traviés de l'alcordanza y les que nos dan l'alimentu pa empobinar a la busca del futuru.


 

sábado, 10 de octubre de 2015

Tiempu de castañes

Entremos nel mes d'Ochobre y con él empecipia la temporada de les castañes y los vezos y actividaes vinculaos a elles.

Unes dómines pa empobinar pal monte a los castañeos y ponese a demer pa la cuerria, o a guetar y rebuscar les que yá cayeron al suelu, esbillando ellí mesmu los oricios que van arregallando.

Dempués comeles amagostaes, cocíes con o ensin pulgu, iguando potaxes, purés, o en repostería. Tamién dexándoles mayucar pa dir emplegándoles cuando cuadre.

Y venceyada a la gueta, ábrese tamién la temporada de los amagüestos, d'axuntase cabo'l farol onde se van amagostando les castañes y charrar o armar folixa. Acompañando la comedera con sidra'l duernu o con vinu na fastera suroccidental del país.

Antaño la cultura vinculada a los castañeos tuvo un puxu bien grande ente nós y les castañes formaben parte importante de la dienta asturiana. Dempués hubo un tiempu onde, xunida a una mayor bayura de recursos alimenticios, empezaron a apostalgase y hasta tuvieron la so llenda negra -ye como comer madera, dicíen-.

Actualmente sigue diéndose a elles, magar los castañeos anden bastante abandonaos y la celebración de los amagüestos sigue calteniéndose, introduciéndolos tamién como una actividá de folgueta nos centros escolares, lo que ye bien importante. Los potaxes de castañes van teniendo tamién una recuperación y esporpolle.

Asina que tenemos per delantre un puñarráu de díes pa dir a la gueta o a la rebusca. Una actividá prestosa pa espurrir les piernes allaribón en monte, empozase en viesques prestoses que van dir vistiéndose yá cola pintalarrama de colores perguapos de la seronda, y tornar pa casa con unes ambozaes de castañes na mochila. Pues a esfrutar y a ello.

jueves, 1 de octubre de 2015

Les cultures populares como bayura y xuntanza

Va unos años taba viendo una actuación d'un grupu folk d'un país del norte européu. Una persona conocida comentábame que veía aquella música como propia, neto a que si fuere de casa.

Polo menos no que se refier al continente européu onde nos asitiamos -anque escurro que podríamos dir más lloñe-, hai bien de manifestaciones de les cultures populares onde remanecen puntos de semeyanza y oldéu. Ello fai qu'observando y sintiendo eses cultures podamos afayanos ya identificanos.

Unes manifestaciones que puen dir dende vezos populares, a la gastronomía, a la mitoloxía, a la música o a les mazcaraes.

Ello fai qu'esa cultura popular represente, en xunto, una bayura bultable y tamién un aruelu d'intercambiu y xuntanza ente los pueblos continentales. 

Surden bien d'eventos p'amosar esa xuntanza y hermanamientu culturales con festivales y actividaes que s'esparden dayures. Por poner dos botones de muestra namás bien conocíos nestos ámbitos, ehí tenemos el festival intercélticu de Lorient o'l de mázcara ibérica de Lisboa.

Tamién ye cierto qu'esa guaña cultural -non sólo a nivel continental, sinón mundial- ta amenazada por un enemigu común: el cosmopaletismu uniformista que puxa por axuntanos a toos baxo un grupu de llingües mayoritaries privilexaes y so unos vezos culturales uniformes onde nun s'estremen persones alloñaes per miles de kilómetros.

Pero, afortunadamente, hoi ye un fechu con brenga esi intercambiu y conocimientu mutuu ente les cultures populares de munchos países, con o ensin estáu propiu. Una manera de conocese y axuntase basándose nes diferencies, les semeyances, el compartir y el respetar.

Un camín que paga la pena sestaferiar y percorrer na busca del entendimientu y la collaboración ente los pueblos y les naciones.