Yá tenemos l'añu nuevu faciendo galanes. Y, como avezo a facer per estes dómines, voi llevar una ufrienda p'allalantrón, na llende de la Viesca Dayuri, a un vieyu dolmen conocíu como la Mesa Los Antiguos. Llevantéme abondo ceo, col riscar l'alba, encamenté a Masgallu que curiare bien el caborniu, y púnxime a esperar por Espi la Mariñana y Lluis de Turiellos que quedaren en dir comigo. Metí en zurrón un ramu lloréu, unes ablanes y unes mayuques pa dexar allá. Bien llueu, aportaron los mios amigos. Saludémonos y echemos a andar.
-Bono, pues, arriendes d'estrenar añu, vamos camín d'unes feches bien prestoses, sobre too pa la rapacería. Yá anda per ende'l Príncipe Aliatar arrecoyendo les cartes de la reciella de casa p'apurrí-yosles a los Reis Magos d'Oriente. Claro que tamién pa los mayores nos puen cagar daqué...-dixo Lluis.
-Eso siempre y cuando se portaren bien pel añu, porque sinón puen dexar carbón y ceniza -comentó Espi.
-¡Meca!, entós a min van cagame regalos abondo. Fui bonísimu esti añu que pasó -contesté-yos yo ensin aguantame a echar una carcaxada.
-Yo tovía m'alcuerdo de dalgunos regalos de cuando yera rapacín -dixo Lluis-. El primeru que recuerdo foi un tambor de latón pintáu con escenes béliques alredor. Conservélu en casa bastantes años y taba perabolláu. Nun sé con qué pudi acutir aquel tambor pa dexalu d'aquella manera. Paecía que-y cayere enriba un elefante...Tamién recuerdo un castiellu de madera, con dos torres, una puerta encarnada y les ventanes pintaes como d'estilu góticu. Venía con soldaos con armadures y plumes y caballos afataos. De la soldadesca nun conservo un res, pero'l castiellu ¡téngolu tovía!. Claro que cuando dexé una güelga fonda que sirvió siempre de chanza nos aruelos familiares ye cuando se me ocurrió pidir una escopeta y un páxaru pa matalu. ¡Y mirái qu'agora refugo abondo lo de la caza, rediola!. ¡Qué ocurrencies tenemos de rapacinos!.
-Pues yo cuando falo de regalos siempre me bien un refocilu a la cabeza con aquella engañifa que nos soltaben y que siempre acababa de mala manera. Cuando daquién diba fuera, pedíes-y un regalu y contestábente aquello de que te diben trayer un curriverás con cascabelinos atrás. Cuando tornaben, el dichosu curriverás enxamás aprucía. Hasta que dibes creciendo y decatándote de qu'aquello yera pura comedia -comentó Espi.
Entós Lluis, ximielgó la cabeza como ñegando y ponse él:
-Agora qu'Espi menciona lo de les engañifes pa colos rapacinos, alcuérdome d'una que me tuvo aforfugáu y apolmonáu una temporada cuando neñu. Ello ye que diba yo con mio ma y un paisanu miróme entientes y sentenció mui seriu: ¡Tu fuisti'l que-y robó les ferradures al perru'l cura!. Y, ¡recóime!, que menudu axorizu que llevé cola acusación, que yá veía yo venir a prindame pol asuntu, hasta que, claro, fui cayendo en que los perros nun tienen ferradures...
Y charrando amigablemente aportemos hasta'l dolmen de La Mesa Los Antiguos. Posé ellí la mio ufrienda, fiximos renombranza de los antepasaos que yá nun tán con nós. Paremos un cachu pa descansar, picar daqué y amugar el gargüelu, y tornemos pa casa llueu, nun fuere a echásenos la nueche encima. Y ello foi que, cuando tábemos cerca de la llende'l mio caborniu, sentimos sonar unos campanos y atopemos a Sidru'l Guirriu.
-¡Cóime, Sidru, camiento que tarás bien en forma pa estes feches!. Que tamos en tiempu de guirrios, comedies, agilandos y mazcaraes de toa mena -dixi yo.
-Pues sí -contestóme Sidru mientres nos apurría la garapiña qu'arrecendía bien prestosa-, tamos somorguiaos nes mazcaraes d'iviernu y los guirrios y les comedies tenemos muncha xera per delantre...
-Pues si d'echar comedies se trata, l'añu que coló tuvo asocedíos a embute pa comentar, mialma, -comentó Espi.
Siguimos el nuestru camín, Lluis, Espi y yo andando y Sidru'l Guirriu blincando hasta qu'aportémos a la llende'l mio caborniu. Y yá díbamos a despidinos cuando sentimos xuxuriar a un raitán na picorota d'un abeduriu. Y entós va Espi y ponse ella:
-¿Qué ye, que nun echáis en falta nada antes de despidinos, hom?.
-¡Meca, sí, ne! -respondí yo-. ¡Falta que nos eches una!.
Y entós la nuestra amiga la Mariñana gargoliónos, cola so voz prestosa, aquella de:
"Si quieres que vaya a vete
echa al to perru cadena, eueee,
que me lladra cuando vengo
a cortexate, morena, eueee"
¡Ixuxú!. ¡Viva la Viesca Dayuri!
