Al iviernu nunca lu comió'l llobu. Y esta vegada paez que, per agora, vieno un iviernu como los d'antaño. Y eso ye bono pa la ñatura. Y si ye bono pa ella, tamién lo ye pa los seres que vivimos nel somantu de so.
Hoi salí a dar una vuelta y atopéme con Xuan de la Borrina, la muyer barbuda y la perra llanuda, que per estes dómines tienen xera pelos nuestros montes, que posa la ñublina y siempre hai daquién esconxurando pa que-y echen una gabita. Asina que punxímonos a charrar de coses mundanes, que Xuan ta bien enteráu de lo qu'asocede per ende, porque-yos lo escucha a la xente qu'anda pastoriando pela viesca.
-Pues, amigu Xuan, tamos metanos l'iviernu y siéntense lloqueros perhí. Pero non namás que del ganáu, porque tamién tamos nes dómines de les mazcaraes y les comedies.
-Esautamente, Xanu. Yá salió'l Guirria de Ponga pa danos anuncia de la entrada del añu, besar a les moces y echar ceniza a los homes. Y anden caleyando bien de mazcaritos más, pidiendo tamién l'aguilandu, vezu prestosu per estes feches.
-Dicen que la memoria ye la intelixencia de los burros, asina que, como yo toi falando de memoria, de xuru que voi dexar mazcaritos en tinteru. Viénenme a l'alcordanza, asina de botavolén, mazcaraes que salen, de magar finales d'añu hasta l'antroxu. Arriendes del Guirria, aprucen los Reises, los Sidros cola comedia, los Mazcaritos d'Uviéu, Los Zamarrones, los de Rozaes, de San Xuan de Villapañada...Y más xente enfotao en recuperar unes tradiciones con abondu raigañu na nuestra tierra...
-Pues yo, Xanu, tuvi falando l'otru día col diablu d'una comedia, que son aruelos mui afayadizos pa solmenar a los monxures gobernantes y pa facer xirigoncia de los asocedíos cotidianos. Y cuntóme una cosa que m'afitó nel mio aquello de que vivimos nunos tiempos onde anda too tracamundiao y au cada vez tenemos gobernando a más pazguatos -permedió la muyer barbuda, mientres la perra llanuda lladraba mirándomos como sofitando lo que dicía ella.
-Pues cuenta, cuenta, ne, qu'ando secañosu de ñoticies -afaléla yo.
-Mira Xanín, ello ye que, como paez ser que nun hai problemes a magüeyu pa iguar, pues resulta qu'agora anden a la tema los mandones pa ver quien la tien más grande.
-¡Rediosla!. ¿Qué anden, enseñando perhí les mingues y les fañagüentes pa ver quien lo tien más vistoso, ne?. ¡Mialma qu'esa si que nun la vi venir! -contesté yo arremellando los güeyos como dos platos.
-¡Nomenón! -intervino entós Xuan echando una carcaxada, mientres la muyer barbuda y la perra llanunda s'arrollicaben tamién de la risa-. Lo que quier dicite la mio collacia nun ye cosa braguetera, sinón de banderes y mástiles. Verás, agora quieren imitar en Xixón lo que yá fixeren n'Uviéu y llantar una banderona descomanada nun mástil vien altu pa que la vean esventolexar dende bien lloñe.
-¡Ai, hom!. Ya cayí na cuenta. Otra banderona española pergrandísima pa encamentar a los que tríen la ciudá que nun tán n'Australia o Filipines, o en Marte o Xúpiter pa los más galácticos -respondí yo.
Entós la muyer barbuda carpió echando la mano al cazu, llevantó un deu y ponse ella:
-Yo camiento qu'esto de sopelexar banderones xigantesques per dayures amuesa abonda inseguridá y un complexu d'inferiorida en quien les pon. Necesiten afitase ante peligros imaxinarios que ven pingar perriba les sos identidaes nacionales y llevanten banderes xigantes como p'abellugase y defendese d'esos peligros.
-¡Arreniego los demonios!. ¡Cuántu bederre alloriáu abeya per esta Asturies!. ¡Cuántu tontorolo, bocayón, escerebráu y faltosu dafechu añera nes nuestres instituciones!. ¡Cuántu espantayu refalfiáu y con serrín na cabeza! ¡Rediósla, cho, menuda tropa! -esberridé yo echando les manes a la cabeza.
-¡Cóime, Xanu, van fichate pa echar una d'eses comedies onde solmenten con remangu a monxures y mandones!. Qu'eso y les moxigangues son l'antroxu verdá, y non los desfiles de modelos en que lu tienen camudáu va tiempu con aculturaciones de toa mena -comentó Xuan de la Borrina.
Entós, echando mano al zurrón y sacando una bota vinu, póngome yo:
-Bono, xente, equí traigo un vinu bien prestosu de Pezós. Asina que podéis amugar el gargüelu con él mientres caleyamos per ende y seguimos dándo-y a la parpayuela.
Y asina pasemos la mañana, caminando, empinando'l coldu, esbillando les burraes que se-yos ocurren a los gobernantes, y esfrutando del monte nun día d'iviernu verdá, que pa espansionar de tantu despropósitu ye xera afayadiza y tamién presta abondo...
