miércoles, 28 de septiembre de 2022

Fueyes de seronda

Entremos na seronda. La dómina de la collecha, la mayada y la gueta. La viesca va dir, pali que pali, anubriéndose con una pintalarrama de colores que son tou un afalagu pal caminante. Vieno la muga y eso ye perbono, que'l branu tráxomos seca abondo. Siento que daquien cózcase pela carril. Ye'l mio amigu Pachín Boroña.

-Qué tal, Pachín, supi que veníes pela carril porque sentí cantar al carru y sonar los esquilones de los gües.

-Sí, Xanu, voi ver si paño daqué lleña pa tizar, que yá entamen a enfrescar los díes y quédanos tovía por pasar casi tola seronda y l'iviernu.

-Ún de los ñicios de que tamos na seronda ye que yá se puen agüeyar, nes mañanes soleyeres, los praos relluciendo cubiertos pola orbayada...Y, a too esto, que yá sabes que cuando venís a visitame d'allabaxón éntrame'l pruyiciu por saber les nueves qu'hai...

-Claro qu'hai nueves, Xanu. El tema del tren ye como'l cuentu de ñunca acabar. Agora resulta que pa dir de Llaviana a Xixón tárdase más que nos años cuarenta del sieglu pasáu cuando funcionaba coles locomotores a vapor. 

-¡Rediosla, cho!. Y dempués anden encamentando a la xente que dexen guardaos los coches porque contaminen. Pues d'esta manera, menudu xaréu pal que tenga que garrar el tren pa trabayar. Tendrá que madrugar a esgaya pa llegar, si llega...

Entós empicipió a sonreir Pachín de sutrucu, entrugué-y a qué se debía, y ponse él:

-Pues qu'hoi traigo una ñoticia prestosa, hom. Resulta que nos madriles echaron pa casa a Mallada y quieren poner otra persona pa encabezar les llistes de los populares per Asturies.

-Pues llueve sobre moyao, Pachín. Porque la so predecesora, Cherines, acabó h.ispiando pa casa tamién.

-Claro, Xanu, pero ye normal. A naide con dos deos de frente se-y ocurre tener como ún de los temes estrella de la llexislatura andar de cruzada escontra d'un idioma, porque nin los tos propios votantes lo pescancien. Si te paez una refugaya, pues déxeslu nun segundu planu y dediques la xera a otres coses. Pero non, zapicaron nesi erru estes dos cabezaleres y acabaron nel mesmu sitiu, pa casa. Y como quien venga agora siga per esi camín acaben tosquilándolu tamién.

-Bono, yá tamos na época de pañar nos pumares, mayar, pisar y echar nes pipes. Y ensin escaecer tampoco que pal occidente tán tamién na dómina de ponese colos llabores de la vendimia y entamala col vinu...

-Y d'equí a poco vamos andar a la gueta, y vendrán los potes de castañes y los amagüestos, Xanu...

-Pues sí, yá entamen a cayer les fueyes na seronda anunciando la collecha. Una época prestosa del añu y bien guapa pa los que nos presta caleyar pelos nuestros montes y viesques, Pachín.

-Mialma que sí, Xanu. Agora voi siguir carril p'alantre a pola lleña. Pa otru día echamos otra parrafada y yá te daré más nueves que vayan pasando. Ta llueguín.

-Ta llueu Pachín. Y mánda-yos un saludu a les mios amistaes de la villa...