"Dios quiera que nun me falten
una escudiellina fabes
y un garitín de boroña
pa poder acompangales"
¡Ixuxú!. ¡La danza sal de la panza!.
Saber cuándo anda Espi la Mariñana pela viesca Dayuri ye bien facil. Si nun canta, rinfla o grita daqué, nun s'afaya. Esta mañana aprució chóquele-chóquele pel camín con un fatu encolingáu nun palu que llevaba al costazu.
-¡Cóime Espe!. Con esi fatu a la espalda paeces un vagarientu buscando una casa posafuelles...
-Amigu, Xanu, ¿tu nunca sentisti eso de trayer daqué como oru en pañu?. Pues eso ye lo que traigo yo hoi nesti fatu, que de pañu ye, mialma.
-¡Meca!. ¿Y qué ye eso tán valoratible qu'acarretes ehí, ne?.
-Pues verás, como ta faciendo un día soleyeru y prestosu de branu, escurrí convidate a xintar. Y equí traigo la comida. Mira.
Entós Espi, descolgó'l fatu del palu, esfexo los ñudos y entamé a naguar too darréu. Entós, póngome yo:
-¡Rediola!. Un quesu gamonéu del puertu, un choscu de Tinéu, una pamesta de pan de sucu y unes ambozaes de cereces. ¡Pa rellamber los focicos, neña!.
-Lo único que nun traxi foi la bebida. Como siempres tienes unes botellines de sidra enfrescando...
-Por supuesto. Voi pal regatu a pola sidrina y dempués saco un sábanu del caborniu pa ponenos a xintar debaxo d'aquella faya d'ellí, que da una solombra y un frescor qu'afalaguen...
Y p'allá empobinemos. Espurrimos el sábanu so la faya, sacó la Mariñana una ñavaya de Taramundi y entamó a desquiñonar aquellos manxares, mientres yo echaba los primeros culinos de sidra.
-Pues yá anda la xente trepando cola xera de la yerba -comenté yo.
-Sí, Xanu. Anque agora cambió muncho esi llabor porque ta too mecanizao. Pa segar, pa recoyer, pa facer rollos de yerba endolcaos en plásticu. Eso de cabruñar y facer balagares y vares de yerba casi que pasó a la historia, anque tovía se ve daqué per ende.
-Yá. El trabayu de les quintanes camudó abondo. Pero'l llabor hai que lu facer igual y sigue costando sudu, anque nun ye la matancia d'otros tiempos cuando se segaba a gadaña, había qu'esmarallar, voltiar, embalagar, too ensin maquinaria. Y xuncir tamién p'acarretar...
-Yo préstame pola vida'l golor de la yerba. Cuando ta segao recién y cuando yá ta curao. Asina que cuando toi pasiando per dayures y anden a la yerba, esi arrecender ye pa min como si fuere un arume que da gloria.
-Hoi vamos a xintar con cereces. Pero yá tenemos ehí les ablanes y les mores, Espi.
-Yo les ablanes de garrapiellu siempre anduvi a elles. Y pañar mores pelos bardiales pa comeles con vinu y zúcare...¡ai, hom!.
-Pasé l'otru día pel to castañéu y veo que lu tienes rozadín y curiosu.
-Sí, Xanu, rozar el monte ye bono pa los árboles y pa tornar esi andanciu que nos acute tolos años de los incendios. Allá pa la seronda yá t'avisaré a ti y a los demás amigos pa dir a la gueta. A ver si esti añu vien pa la mano y tenemos collecha, que va unes temporaes que nun ye mui abondosa...
Y xintando y charrando fuimos dando bona cuenta del quesu, el choscu, el pan de sucu, les cereces y les botellines de sidra que, ¡ca! cayó más d'una. Reposemos bien la dixestión a la solombra y airín de la faya y aportó'l momentu de despidinos. Entós dixi yo a Espi.
-Bono, pues esi fatu que traxisti vas volver a añudalu y colgalu de palu, que te voi dar una sorpresuca pa que lleves pa casa.
Saqué entós del caborniu unes ambozaes d'ablanes de garrapiellu y apurri-yles a Espi qu'arremelló los güeyos al velos y ponse ella:
-¡Recóime, Xanu!. ¡Ablanines de garrapiellu!. Daca que les endolque nel fatu. Yá tengo pa entreteneme rucando en llegando pa casa...Pero nun pienses que voi colar ensin echate una, ho. Ehí va esa:
"Xunci les vaques, Ramona,
que nos vamos pa la yerba.
Cátame un zapicu lleche,
que tengo seca la llengua"
¡Ixuxú!. ¡Viva la viesca Dayuri!.
-¡Viva!.
Y col cantar despidímonos la mio amiga Espi y yo, dempués d'una xornada prestosa de branu xintando, pimplando y dándo-y bien a la parpayuela...
