Entámaseme bastante bien escribir a pluma y tinteru. Y tamién copiar miñatures de códices medievales. Va tiempu que Xuan Moñiz d'Ambás m'encargare una reproducción de la miñatura del testamentu del rei Alfonsu II del Liber Testamentorum. Mandélu pasar per estes feches por ella y hoi vieno a visitame a la llende'l mio caboniu. Apurrí-yla y prestó-y abondo. Dempués entamémos a charrar.
-¿Y qué ñueves hai pela villa, Xuan?.
-Pues estos díes, el presidente tiro una bola y desarmó-yos la bolera a los qu'anden fuera bolos como vocación vital.
-¡Cóime!. ¡Cuenta, cuenta...!
-Pues qu'anduvo per Cuadonga y reivindicó la figura del llugar, de Pelayu y del Reinu d'Asturies como finxos históricos que tenemos de tar arguyosos d'ellos. Y, claro, eso puña escontra'l cuadonguismu españolista que quier facer de bierzu d'España lo que nun lo ye. Pero tamién desarma la bolera d'aquellos non cuadonguistes que refuguen esa parte de la nuestra historia. Que se ponen de llau nel tema. Y que piensen que dexándolo pa prau o atacándolo van dir dayures. ¡Ca!. ¡Menuda empanada mental, Xanín del alma!.
-Home, Xuan, ta claro que si dexes un fechu históricu en manes de quien te quier frayar con él pónes-y l'asuntu a güevu. Fáes-y un regalu impagable. La historia reivindícase como alcordanza coleutiva d'un pueblu que ye. Nin s'escaez nin se-y solmena. Yo recuerdo, allá per finales de los setenta, cómo había xente reivindicando a Pelayu y Cuadonga como finxos del ñacimientu d'Asturies, aperrillándo-y al cuadonguismu y plantando batalla, nunca meyor dicho...
-Pero dempués vieno la estratexa equivocada, Xanu, que ye la que sigue la mayoría non cuadonguista. Dexar apodrecer l'asuntu o tira-y carrobexazos. Y, claro, los cuadonguistes tirando voladores. Y la población asturiana recibiendo esti mensaxe caberu y sintiéndose más españolistes que la de coyer. Poro, el presidente desarmó-yos la bolera y arrampuñó-yos un discursu perafayadizu pa dir faciendo país. Onde nun hai cabeza tien d'haber rau, que reza'l dichu.
-La verdá ye que, ente los discursos del presidente y les sos aiciones hai una distancia galáctica. Nun concasen nada les sos pallabres y les sos obres. Ehí tenemos rescamplando'l tema de la odicialidá. Unos discursos favoratibles, emplegando dacuando l'asturiano, y una práutica de dexar el tema ente dolco y la media manga, escaecíu y empatonáu. Nun sé si ye estratexa a costa fecha, desdexamientu, o incapacidá. Pero'l casu ye que'l presidente ta remanando'l discursu de la oficialidá, celebrando'l 25 de Mayu como'l día de la bandera, y agora reivindicando los nuesos anicios como reinu. Anque namás que queden en discursos y más nada.
-Y con ello llevando pal so fuelle unos discursos qu'habríen de ser parte de los pegollos d'un movimientu de reconstrucción nacional asturianu. Pero esto ¡ca! nun esiste, resalvando seutores mui minoritarios. Y eso págase carísimo. Porque vamos dexar les coses nidies, una reivindicación llingüística, por exemplu, ensin tar afitada nuna conciencia nacional o de país ye como una campana ensin mayuelu. Y, al final, va cayendo en sucu baxeru. Que ye lo que tamos viendo anguaño bien claro.
-Pues sí, Xanu. Pero equí acuantayá que s'arrenunció a crear una conciencia nacional. Refugóse trabayar nun discursu y proyeutu de país onde tendría que s'inxertar el tema llingüísticu, por exemplu. Trabayóse na estaya del idioma como un elementu a parte d'un tou que forma. Y la población, dempués de décades, sigue ayena al tema, castellanizándose cada día más...Porque nun tien concienca de país asturianu.Ycreyendo, en bona parte, l'únicu discursu que se-yos ofrez de manera mayoritaria ¡que somos la cuna d'España!.
-Resalvando una parte minoritaria que ve claro lo que paez qu'una mayoría anecia en nun ver, esto paez que va siguir pel mesmu camín. Y nun descarto que los discursos llingüísticos, históricos y identitarios en xeneral pasen a manes de xente que, a la hora de la verdá, nun mueve un deu por plasmar en fechos esos discursos.
-Vamos que la bolera van armala otros...Per agora, yá van desarmando la del contrariu, y casi ensin despeinase...
-Pues bono, Xanu. Volviendo al tema que me traxo per equí, Si tanto te presta escribir a pluma y tinteru y copiar miñatures, podríes facer un códiz onde reflexares los aconteceres d'esta viesca Dayuri.
-¡Cóime!. Una idea pa tener en cuenta. Amás, voi contate que toi deprendiendo a escribir cola caligrafía visigótica asturiana del Liber Testamentorum. Podría quedar estupendu un Llibru De La Viesca Dayuri. Voi dir afilando dalgunes plumes y faciendo tinta pa enllenar un cuernu. El Scriptorium del Xanu podría dar pa muncho, miániques...
-Pues a ello, Xanu, a ello. Que conteníos pa facer un códiz bien prestosu nun te van faltar...
