lunes, 6 de junio de 2022

Madreñoxiru ensin pegatina...

Taba yo echando una güeyada a la contorna cuanto sentí'l ruíu d'una héliz. Vi entós que taba aterrizando'l madreñoxiru de Pinín. Acerquéme allá y, cuando se posó'l guah.e, vi que taba coloráu como un pitu, colos güeyos sangrumientos y echando espumaraxos pela boca.

-¡Rediós, Pinín, qué mala pinta traes hoi!.

-¡Como por nun la trayer, Xanu!. Vengo de Xixón y acaben de llantame noventa euros por nun llevar nel madreñoxiru la pegatina ambiental...

-Pero si'l madreñoxiru muévese con un barquín y nun contamina migaya...

-Pero considérenlu un vehículu y solmenáronme una multa. Porque pa entrar na ciudá hai que llevar esa pegatina, vengas d'onde vengas.

-Y si tienes tola documentación en regla, les viñetes, la I.T.V., el seguru, ¿pa qué val la malfadiada pegatina?.

-Val pa dos coses. La primera pa recaudar. La segunda pa fadiar  a los de siempre. Porque según los monxures políticos, la culpa de la contaminación ye del coche d'un probe currante que yá ta un poco vieyu pa desplazase. Les grandes empreses, los que se mueven na picorota del poder, yá ye otra cuestión. Garren l'avión priváu que, ¡ca!, eso nun contamina un res, y a esfrutar. Mira en qué vieno, cuánto contaminó y cuánto costó'l viaxe del regatista rei eméritu. Y los aviones del festival aeriu que celebren tolos años na ciudá, pues a ver. Y, pa dar exemplu, los mandones podríen desplazase en tresporte públicu y dexar aparcaos los coches oficiales...

-Yá Pinín.Y en Xixón, cuando aporten eses ñubes contaminantes, sobre too pa la zona oeste, nun paez que venga de los coches de los que van a ganase les fabes. Pero, claro, a los responsables d'eses ñubes yá ye màs revesoso encetalos. Y dempués saquen sides d'onde faiga falta. Mira tu la última ocurrencia de l'alcaldesa encamentando nun dar al me gusta nel whatsapp porque contamina...Lo dicho, lo que faiga falta pa cargar les tintes contra los de siempre.

-Y toi entrugándome yo qué va pasar cola folada de turistes que van aportar a la ciudá esti branu. ¿Qué ye que van multalos si nun traen la pegatina?. ¿Acabarán empobinando pa otros llaos col consiguiente perxuiciu pa la hostelería?. ¿Agospiaránse n'Uviéu y dirán a ver Xixón nun autocar, con pegatina, eso sí?. Y, cuando los asturianos d'otros conceyos onde nun anden col rollu de la pegatina, quieran averase a la costa ¿resalvarán Xixón pa dir pa otru llau?. De traca, cho.

-Pues cualquiera sabe, amigu. De toles maneres yá tas encamentáu. Merca darréu la dichosa pegatina si nun quies más problemes cuado vuelvas a la villa xixonesa. Yo espero nun los tener. Si voi p'allá entro madreñando.

-Pues ten cuidadín tamién, Xanu. Que lleves les madreñes ferraes con clavos y igual te paren porque consideren que pues estropiar les aceres. Qu'esto de la recaudación afala la imaxinación de los mandones de manera descomanada...