Conozo un paisanu que diz en plan comedia qu'antaño n'Asturies ferrábense les vaques, los caballos y los paisanos, pol aquello de pone-yos clavos a les madreñes. Pues per esta viesca, una manera d'estremar a los mios amigos ye pol ruxir de les madreñes, porque les lleven asina ferraes. Hoi los madreñíos que me punxeron sollerte yeren los de Xuan Moñiz d'Ambás. Saludémonos y entamemos a charrar.
-Xanu, tamos na viéspora d'una de les feches que rescamplen na historia d'Asturies. El llevantamientu escontra la invasión napoleónica del 25 de Mayu de 1.808.
-Pues sí, Xuan. Una sublevacion popular y una rempuesta de la Xunta Xeneral que se proclamó Suprema asumiendo'l mandu en tol territoriu asturianu y declarándo-y la guerra al mesmísimu Napoleón. Tovía anguaño tenemos una placa n'Uviéu que recuerda a dellos de los héroes d'aquel entós.
-Y onde tenemos a dos muyeres, Xuaca Bobela y Marica Andallón que foron auténtiques cabezaleres del llevantamientu. Tamién destaca'l fechu de que na Xunta, por carta enviada por Álvaro Flórez Estrada, que redautó tamién la proclama de la intitución, pidió ayuda a Inglaterra. D'aquella vienmos la bandera asturiana, que foi propuesta por Xovellanos y la creación d'un exércitu propiu pa enfrentase al invasor. Había cabezaleros y pueblu enfotaos na defensa del país, ¡mialma!.
-Yo hai un fechu que me presta abondo, Xuan. Ye lo del Reximientu d'Hibernia. El gobiernu central títere mandárelu pa sofocá la rebelión asturiana. Yera una especie de llexón estranxera con munchos irlandeses nella. Al llegar a Asturies...cambiaron de bandu y llegaron a ser la guardia d'honor de los diputaos de la Xunta. Actualmente podemos ver nes vidrieres de la instititución un arpa irlandesa, que yera l'emblema d'aquel reximientu.
-Yá ves, Xanu, lo que fuimos y no que quedemos anguaño. De un pueblu combativu a otru amomiáu que desconoz la propia historia y arrana por tolo foriato avergonzándose de lo propio. Quién nos vio y quién nos ve...¿Tu vas celebrar de dalguna manera l'aniversariu de mañana, ho?.
-Non, amigu Xuan. Nun ando de gracia pa celebraciones viendo la llaceria en que ta esti país nuestru anguaño. Voi pasiar pela viesca como siempre pa espansionar y alón.
-Pues yo tampoco, Xanu. Nun ando nada gayasperu pa festexar nada. Dicen que van facer dalguna alcordanza na Xunta Xeneral que, conociendo como ta'l patiu, espero que nun seya nenguna moxiganga ensin puxu. Camiento qu'habrá dalgunos grupos políticos que fadrán tamién daqué. Pero albidro que la mayoría de la población asturiana va pasar penriba la fecha como si nun fuere con ello. Son los tiempos que cuerren y lo que tenemos...
-Pues nada, amigu, a ver si aporta'l día en qu'esta vieya ñación europea esconsoñe y vaya atopando un sitiu dignu ente'l restu de ñaciones del mundu. Magar, per agora, camiento que nun toi plantegando ma una baraya...
