Sigo avanzando na igua del códiz onde voi dir reflexando los aconteceres de la viesca Dayuri. Pues ello ye que taba esta mañana acabando una miñatura cuando'l velociraptor Masgallu avisó que taba averándose daquién a la llende'l caborniu. Y, mialma, tratábase d'una visita prestosa, porque cuantayá que nun atopaba per equí a Xuan de la Borrina acompañáu de la muyer barbuda y la perra llanuda. Saludémonos, punxéronse la perruca y Masgallu a enredar, y nós entamemos a parlotiar tan guapamente.
-Pues, Xanu, ando folgando bastante esti branu. Y ello por mor de les foles de calor que faen que nun necesite andar escamplando ñublines per ende. La verdá ye que toi trabayando bien poco porque la xente que trepa pel monte nun esconxuren casi nada -dixo Xuan.
-La que debe tener más xera que tu ye Santa Bárbola, porque los díes chornosos puen acabar cola ñube, la truena y hasta refocilos, y hai xente qu'invoca entós a esta santa cristiana -contesté yo-. Esto de les foles de calor yo figúraseme que sedrá otra engatada del dichosu cambiu climáticu. Anque díes chornosos pel branu siempre hebo, lo que pasa que tantos de siguío y metiéndonos neses temperatures tan altes yá ye otra cosa.
-Los díes soleyeros son afayadizos pa los llabores del branu -dixo la muyer barbuda-. La xente que tien qu'andar a la yerba va poder facelo, si aguanten el calorazu, porque con estos díes nidios... El problema ta en que, si se prolonguen enforma y vienen calcando d'esta manera, tamién apaez la seca, les fontes queden como pimpanes, los regatos escosen, los praos nun dan...
-Y tenemos otra vuelta la llaceria de los incendios forestales. Tolos años aprucen per dayures. Nun falla. Unes vegaes por cuenta d'un rayu...pero otres por culpa de unos sapiens que de sabencia amuesen bien poca, mialma -comenté yo.
-Yá podemos ver per ende la folada del turismu -dixo Xuan-. Y equí tenemos otra llaceria. D'un llau, hai turistes respetuosos cola natura y que vienen a espansionar y conocer la nuestra tierra. Pero dempués tenemos a los que yá se conocen como pisapraos, esos de respetar nada de nada.
-La verdá ye qu'esos pisapraos son tremendos -añadió la muyer barbuda-. Con un menú pa dos quieren xintar cuatro. Si ven perros o gatos sueltos arramplen con ellos pensando que nun tienen amu. Si nun atopen ónde aparcar, nun se corten n'invadir una quintana y meter el coche sol horru...¡menudu andanciu que son!.
-Y la puxarra que van dexando perhí. Nun solo ye que contamine, porque si tires cascos de vidriu pente la maleza puen facer un efeutu llupa y prender el fueu -añadí yo-. Y pa la mariña nin vos cuento. Yo ver esos ensames d'adultos y rapacinos armaos con calderos redes y palos pa fustacar pelos pedreros a ver qué pesquen danme una perceguera tremenda. ¡Qué zuna con pensar que los animales son xuguetes, rediosla!.
-A, Xanu, andamos col gargüelu bastante secañosu. ¿Nun tendrás unes de sidra enfrescando en regatu, ho? -comentó entós Xuan de la Borrina chisgándome un güeyu.
-Bah, bah, ¡como si nun me conocieres, Xuan. Vamos ponenos a la solombra y amusgar los gargüelos! -contesté-y yo.
Asina que fui pal regatu a por unes botelluques, empobinemos pa un carbayón a esfrutar de la solombra y del airín de les sos fueyes al xiringase y entamemos a trasegar unos culetinos. Entós póngome yo:
-Yá tán los garrapiellos de los ablanos faciéndonos de naguar. Engorden les ñueces. Los oricios de les castañales déxense ver pa dir medrando. Nos bardiales madurecen les mores...Presta pasiar pela ñatura un día guapu y soleyeru del branu.
-La ñatura ye bayura, Xanu, -dixo Xuan-. Y curiala ye como curiar el somantu onde mos añicó Asturies...
