La viesca Dayuri nun ye un sitiu como otros. Equí pues atopar xanes, trasgos, diaños o cuélebres. Tamién pues dar cola neanderthala Guoné, o con personaxes aquello como'l Capitán Peñafrancia o Sidru'l Guirriu. Pero esta viesca nun ye un paraísu, ¡ca!, porque tien los sos peligros. Apocayá falábavos de los xintabables. Pero güei voi davos anuncia de la triba más espantible que tría esti monte. Son los totalisaurus rex, auténticos xigantes depredadores. Pocos los vieron en carne y güesu y salieron bien paraos porque quien s'atopa con ellos nun suel tornar pa cuntalo. Pa ello hai un trucu que vos voi dicir dempués pa esmucise d'esta castra y otres asemeyaes. Lo que sí apaez de xemes en cuando ye la cadarma de dalgún. Entós entainamos a sofitala de pies onde l'atopemos pa que'l caminante sepa qu'entra en zona peligrosa y tien de dá la vuelta. Precisamente ayeri, tando yo pasiando con Masgallu, atopemos una d'eses cadarmes. Asina que llamé darréu a Pachín Boroña y a Guoné pa que m'echaren una mano con ella pa señalá'l sitiu peligrosu au taba.
-¡Menudu exemplar, Xanu!. Esto ye un monstruu dafechu. ¡Cuántes estroces fadría en vida! -comentó Pachín Boroña.
-Mialma que tienes razón, Pachín. Esta triba ye espantible bramente. Menos mal qu'enxamás dimos con nengún exemplar, porque sinón...-añadió Guoné.
-Pues sí, collacios, -dixi yo-. Pero hai un trucu pa fuxir de les sos caxaes. Trátase de dicir bien alto pa que lo sienta, pero como si tuvieres falando pa contigo, tres esconxuros. El primeru ye l'esconxuru cultural. Recitar que refugues la cultura común de los totalisaurus. Dempués emponderar la diversidá ñacional d'esti mundu. Y, p'acabar, esberridar bien alto que tenemos que vivir nun mundu de convivencia y collaboración na diversidá. Namás qu'asina pues llibrate d'acabar nel so butiellu.
-Pues menos mal qu'esisten esconxuros pa safate d'esta bestia. Porque sinón salir con vida d'un alcuetru con un especime d'estos ye una baraya -dixo Pachín Boroña.
D'esta manera, mentes díbamos charrando, fuimos a poner de pies y a encontá la cadarma del totalisaurus rex. Taba nuna cruciada de caminos, nuna zona arrequexada y onde entama un terrén enllamargáu y abegosu de visitar. Sentimos entós el sormiellu de daquién que venía como afanosu. Yera Sidru'l Guirriu. Saludémoslu y dixímos-y lo que tábamos faciendo. Entós va y ponse él:
-Pues tengo que vos dá les gracies, porque lo de los esconxuros nun lo sabía. Precisamente per esta zona vengo dacuando a entrenar cola piértiga, porque ye dificultosa y amañosa pa ponese en forma. ¡Menos mal que ñunca nun atopé dengún bichu d'esos!. ¡Redios qué llargu y altu ye!. ¡Y menudos taragaños que tien de fincar con eses caxaes y esos dientonos!.
-Cuerren tiempos gafos pa quien quier vivir en llibertá nel so llar y en convivencia respetuosa colos ayenos. Ser fiel a la cuna onde t'añaron págase anguaño con tributos bien altos. Les tribes qu'oliven por uniformizar a los demás imponiendo la socieda de suyo son mui potentes y tienen medios abondos. Hasta la viesca Dayuri nun se llibra d'ellos. ¡Y mirái qu'esti monte ye estremáu a otros, miániques! -dixi entós yo esmolecíu y engurriando'l ceyu.
-Meyor empobinamos monte abaxo y nos alloñamos d'esta zona -intervino Guoné-. Que por munchu esconxuru que sepamos, meyor que nun vayamos dar de ñarices con un exemplar de totalisaurus rex. ¿Y sabéis que vos digo?. Que va siendo hora de señalizá les fasteres onde anden estes tribes dañibles y poner pilancos y torgues per dayures pa defendemos d'ellos, que yo, como desciendo d'una castra de cazadores-recolectores, tengo maña neso y puedo echavos una gabita.
-Pues tienes razón, Guoné. Vamos aconceyar a tolos amigos d'esta vieca pa entamá la xera de protexemos d'eses tribes destructives. La viesca Dayuri ye de nueso y nun podemos consentir que mos la conviertan nun ermu onde nun se pueda vivir y espansionar a modo -comentó entós Sidru'l Guirriu arrestiellando la voz y pegando un blincu cola piértiga.
-Yo tengo ferramientes a esgaya. Un carru rinchón y una parexa de gües roxos que da gloria velos tirar. Asina que, cuando podamos quedar un bon garrapiellu d'amigos, avisáisme que me planto pequí col carru atarraquitáu pa entamaná lo que faiga falta pa defender esti monte de los sos enemigos -comentó Pachín Boroña enfotáu.
Y charrando y caminado aportemos cerca la llende del mio caborniu. Despidímonos cola tranquilidá de tener señalizada cola cadarma del totalisaurus rex una zona peligrosa de la viesca Dayuri. Quédanos agora xera abondo pa señalizar otres zones per onde anden Y pone-yos tolos pilancos y trampes posibles pa tornalos y poder facé les nueses vides en paz...
