Tán cayendo estos díes unes bones pelones. Ye bono que xele, pa saniar la ñatura, que repose pel iviernu y que xorreza con fuerza pa la primavera. Taba yo esta mañana con un montón de blimes faciendo un paxu, cuando, de sópitu, aprució delantre de min Sidru'l Guirriu con un saltu de la piértiga y xingando los cencerros.
-Ayó, Sidru, abenayá que nun te veía per equí.
-Qué tal, Xanu, pues salí guei a pasiar pela viesca y a blincar percima dalgunos matos pa caltenéme en forma, que tamos nel antroxu del iviernu y camín del finxu final del domingu'l gordu y el martes d'antroxu. Amás, vengo percontentu, porque pámidea qu'acabo d'atopar los mios ancestros más remotos.
-Cóime, eso paezme mui interesante. ¿Y de qué ancestros me fales, ho?.
-Pues verás. Esto de marutase vien de mui antiguo. Yá vemos antropomorfos pintaos nes cueves de cuando'l paleolíticu. Y una cosa que llama l'atención actualmente ye la semeyanza ente mazcaritos que salimos separtaos per miles de quilómetros de distancia. Concretamente, lo de cubrir la cabeza con un capiruchu podemos velo en pueblos de lo más alloñaos nel mapa. Camiento que nos vien de dalgún tipu de xamanismu, un atributu de sociedaes tribales. Hasta al magu Merlín o a les fades de los cuentos infantiles los representen con capiruchos na cabeza. La ilesia, pa castigar a los infieles allá de los tiempos, ponía-yos el capiruchu pa ridiculizalos, considerábalos moros, xente pagano, ya identificaba'l capiruchu como ún de los sos atributos. Dempués asumiólu nes sos procesiones colos ñazarenos, guardianes del santu que lleven a recostines, como suel facer con tolo pagano p'asimilalo...
-Camiento que lleves abonda razón, Sidru. Esto del capiruchu yá lo tenía yo agüeyao en mazcaraes de mui lloñe, que nun tendríen que coincidir coles nueses. Como se trata de vezos que se pierden na nueche de los tiempos, escurque les coincidencies seyan escatafinos d'intercambios culturales per aciu de les migraciones d'antiguamente, de tiempos paleolíticos y neolíticos. Esto tien unos raigaños mui fondos, nin.
Entós Sidru'l Guirriu, echó mano a so la faxa, apurrióme una semeya, y ponse él:
-Díxite enantes qu'atopare los mios encestros. Mira Xanu, una venus sidru paleolítica col capiruchu cubriéndo-y la cabeza como lu traigo yo. Ehí tenemos un ñiciu claru de l'antigüedá d'esti vezu. Y tamién que pue tar relacionáu col xamanismu tribal. Les venus teníen una función de fertilidá pa unos clanes onde les gafures del desaniciu y la fame taben siempre amenazándolos. Les pintures y grabaos nes cueves, tratando de favorecer la caza y la reproducción... La nuesa triba tien muncha antigüedá y pesu nos nuesos ancestros más vieyos.
Quedé yo arremellando los güeyos ante la semeya d'aquella venus sidru. Nun contaba que pudiera tar viendo una especie de guirria paleolítica delantre les mios ñarices. Pero la semeya que m'apurriere Sidru'l Guirriu yera real y afalóme un interés descomanáu.
-La bircha, Sidru, figúraseme qu'atopasti un resclavu de los tos antecedentes xamánicos más remotos. Nun me choca qu'andes contentu. Vienes d'una triba que pervivió al traviés de los tiempos hasta anguaño mesmamente. Y agora convídote a tomar unos culinos de sidra y saborgar unos bollinos preñaos de gu, que los acabo tresnar va un cachín, mientres siguimos charrando un poco más. D'equí a poco vamos pone-y el ramu al antroxu, va entrar la cuaresma, y la primavera va entamar a facer galantes y a esconsoñar la viesca. Pero inda tamos nel tiempu del antroxu ivernal, mialma...
-Pues vamos a ello, Xanu. Vamos a ello...
