-¡Cóime!. Si tenemos per equí a Xuan Moñiz d’Ambás. ¿Qué tal te va, ho?.
-Pues pela villa siguimos col riqui-raque del andanciu y les vacunes. Y col pesadiellu de la crisis económica que bien al rau d’él. Yo siguo escribiendo y echando botelles a la mar colos mios escritos…¿Y per equí cómo va too?.
-Pues pel monte ta la ñatura reposando. Que tamos metanos l'iviernu, cho. Oi, ¿por qué nun me cuentes dalguna historia popular, d’eses qu’antiguamente se contaben nos filandones?.
-Eso ta fecho, hom. Mira, como yes xanu, voi contate una historia d’una xana. Pues ello yera un galán que s’acercó a una cueva onde vivía una xana encantada. Entós ella apurrió-y un bollu cuernos y díxo-y que lu curiare un añu poniendo procuru en que nun-y faltare nada. Dempués que tornare con él y podría desencantala. Llevó’l galán el bollu pa casa, pero atopólu la moza’l rapaz, arrincó-y un rescañu y comiólu. Al pasar l’añu, el galán foi pa onde la xana pa da-ylu. Vio entós un caballu coxu al verde y díxo-y la xana: “mira, al bollu que traes falta-y un cuernu y por eso’l caballu acoxa. Y yo voi siguir equí encantada porque nun cumplisti lo que t'encamenté…”.
-Cóime Xuan, vaya cuentu más prestosu, anque con final murniu. ¿Sabes qué pienso?. Que toos estos cuentos populares qu’antaño se tresmitíen oralmente habría que los deprender a los rapacinos nes escueles. Amás de que diba presta-yos a embute sedría una manera amañosa de que nun quedaren nel olvidu.
-Pues sí, Xanu. Y con ello tantísimes coses que pertenecen a la cultura popular qu’heredemos de los antiguos. Ye una pena que too ello vaya quedando ente dolco y la media manga…
-Como’l día pinta soleyeru, ¿qué te paez si-y pego un xiblíu a Masgallu y vamos los tres a espurrir les piernes pela viesca?. Y de pasu, pues contame más histories de xanes, cuélebres, trasgos y lo que pinten, que me presten pola vida.
