Guoné ye una amiga mía neanderthala del clan de los homones, una triba pervieya que vive nes cueves de les nueses viesques. Dixéronme que'l so ñome vien de que cuando entama a correr, si dalgún ñarru como yo se-y altraviesa na trayectoria, acháplalu como una machucona.
Taba yo l'otru día echando una rocada cabo'l caborniu col trasgu
Manfurada. Falábamos de coses imposibles, como qu'esti país esconsoñe
dacuando. Entós vimos pente un claru de l'arboleda pasar escopetáu a un
coneyu con cara sustu. Darréu asomó Guoné con un garrote arremangáu
intentando aperrilla-y na cocorota pa cazalu. Dexemos tar la cosa y
siguimos a lo nueso, porque ella ye cazadora-recolectora y ye lo normal de ver...
Pero, de sutrucu, vemos pasar per delantre de nós a la rapaza que
s'acurrucó, pálida como la lleche preso, cabo un carbayón y ensin
gorgutar. Detrás apaeció'l coneyu que s'engurrionó xunta ella muertu
mieu y ellí taben los dos metiós ún pela otra como dos amigos del alma.
Yo apurri-yos una zapica lleche caliente y una escudiella de castañes cocíes y
punxéronse a comicales acuruxaos.
Foi entós cuando sentí glayar a Manfurada:
-¡Mira, Xanu, per ellí va un grupu de xintabables!.
Efectivamente, dende una llombuca vimos cómo pasaben, a un tiru de
gomeru, un grupu de xintabables de caza. Esta triba xabaz ye pertemida
por toles demás que viven nestes viesques. Llámenlos los xíbaros de los
ástures pola so capacidá de reducir al mínimu la intelixencia d'aquellos
a los que prinden, asina como por practicá'l canibalismu sobre la
castra de los falabables, unos habitantes bien pacíficos que namás que
quieren que los dexen falar en paz. ¡Mira tu qué cenciello y pacífico ello!.
Al cachu alloñáronse. Reparemos entós Manfurada y yo en Guoné y el
coneyu que siguíen amedranaos al llau del carbayón. Y voi yo y coménto-y
al trasgu:
-¿Viesti, Manfurada?. Ye realmente increyible les aliances, munches
veces contra ñatura, que se puen observar cuando los afectaos nortien un
enemigu común gafu y descomanáu...
-Efectivamente, Xanu, les aliances más improbables danse nesos casos,
magar delles veces hailos tan testerones que nin asina. Como en too,
esisten les esceiciones. ¿Acasu nun coñocéis nenguna?.
Entós, como si un rellugu nos allumare al empar na mente, Guoné, Manfurada y yo, esclamemos al empar:
-¡Los asturianos!.
Y ye que, mialma, cuánto meyor diríen les coses nesta tierra de nueso si envede aperrillamos a la primer ocasión, fixéremos más piñu pa enfrentamos a toa esa gandayona que mos quier esfarrapá la cultura, la llingua, la tierra...¡el país!.
