Empobinamos pel camín de la seronda. Entama la viesca a vistise cola pintalarrama de colores ocres. Les primeres fueyes empecipien a anubrí los caminos. Pero esta nueche anduvi de velea. Allalantrón nun paraba de xiblá'l cuélebre. Y esi xiblíu cálate la pelleya, respígate y acurúxate. Pasó tola nueche xiblando. Y eso indica que daqué tarrecible ta asocediendo dayures. Púnxime pela mañana a esgranar unes panoyes cabo'l caborniu cuando vi acercase a Don Quixote de Caravia con cara enfurruñáu y reburdiando pelo baxo.
-Ayó, Don Quixote.
-Qué tal, Xanu. Véote la cara un poco aquello. ¿Pasóte daqué, ho?.
-Pues pasóme qu'anduvi tola nueche de velea por culpa de que nun paró de xiblá'l cuélebre. ¡Menuda medrana, cho!. Y cuando se pon asina ye que daqué malo ta pasando...
-Lo que ta pasando dígotelo yo. Yá escomencipió la cruzada fachañola. Anden engrifaos y echando espumaraxos pela boca por culpa del asuntu de la oficialidá amable del asturianu.
-¿Pero tanto-yos fadia'l tema, ho?. Polo que tengo entendío esa oficialidá va ser, si viniere, sonce, suave, hasta'l puntu de qu'hai xente que nun tien claro si sedrá realmente una oficialidá...
-Da igual, Xanu. Pa los cruzaos fachañoles, la pallabra oficialidá da-yos noxu y voltura. Nun quieren vela nin en pintura. Refúguenla por mui feble o floxa que fuera. Y, claro, como yá emprimó'l procesu pa ver si reformen l'Estatutu, que llevaría incluyida la oficialidá, entós puñen como gües emberriacaos. Los medios desinformativos asturianos yá se punxeron a sopelexar toles babayaes que vengan per u quiera. Aprucieron per equí políticos madrilanos a encamentamos la barbaridá d'oficializá l'idioma. La campaña mediática echó a andar y la machucona desinformativa y adoctrinadora fachañola quier estrapayar tolo que nel tema llingüísticu se-y ponga per delantre. Y neses tamos...
-De toles maneres, collaciu, lo qu'importen nesti asuntu son los escaños y los votos. Si sumen, tiren p'alantre, y sinón, quedará too ente dolco y la media manga. Por muncho que s'esprecete la fachañolada, ye cuestión de votos y escaños, nin.
Don Quixote de Caravia quedó en silenciu un momentu. Echó la mano al cazu pensatible, ñegó cola cabeza y ponse él:
-Yo cada vegada m'entrugo con más frecuencia si'l problema de les llingües estatales nun sedrá que nun hai manera posible de valtar definitivamente col conceutu fachañol de lo que ye España. Tenemos una Constitución, sí. Pero ¿qué porcentaxe de la clas política tien enfotu nel Estáu plurinacional y plurillingüíticu qu'esa constitución abelluga?. Y lo qu'escurque seya más importante, ¿qué porcentaxe de la población lu tien?. Camiento, amigu Xanu, que los raigaños del fachañolismu son perfondos y guañen estupendamente. La España definida nos principios del movimientu ñacional de la dictadura anterior pámidea que tien siguidores ente la población a magüeyu. Hai bien de xente que diz, falando de papu sanu, que ye constitucionalista, pero a la hora de cincar temes como los idiomes estatales, sálta-yos la venada fachañola y emburrien...
Y nestes tábamos cuando sentimos el ruíu d'unes madreñes. Yera Espi la Mariñana. Saludémosla y dixímos-y de lo que tábemos falando. Entós, mui llaspardera, ponse ella:
-Mierda. Esa ye la pallabra clave. Usóla'l fináu Labordeta nel Congresu y foi mui celebrao naquel entós. Mirái, chachos. Pretender qu'un babayu integrista uniformista entre en razón en cuestiones como esta ye perdé'l tiempu d'una manera penosa. Y nel tema del asturianu, enxamás van entrar en razón, porque los babayos fachañoles van morrer defendiendo la so cruzada escontra too lo que nun seya uniformismu centraliegu, magar vivan cien años. Con esta xente nun queda otra que dexalos echando gafures y tirar p'alantre. Amás, nagüen porque-yos dean cancha pa soltar les sos pedricazañes. Y mialma que-yos la dan los medios de desinformación, como llevamos viendo tola vida colos d'Asturies. Pero ye que, pa detras, munchísima xente que ta pol idioma entra al trapu y dedícase a repití lo qu'ellos dicen pa dempués retrucalos, pero lo que tán faciendo, en realidá y anque nun seya la so intencion, ye entrar al so xuegu y contribuir a difundir les sos falcatrúes. Mandalos a la mierda y tirar p'alantre, collacios, eso ye lo qu'hai que facer.
-Pues ye como pa pensar lo qu'acabes de dicimos, Espi -contesté yo-.. A too esto, ¿Pa ónde empobines con esi chóquele-chóquele madreñeru?.
-Voi echar una güeyada al castañéu, que yá vamos metemos n'Ochobre y la gueta ta a la vuelta de la esquina. Ah, miániques, tai invitaos a dir comigo a la rebusca. Mientres pañamos, charramos, cantamos y armamos folixa si fai falta. Que bien ñecesario que ye espansionar del atorollamientu de tantu zoquete fachañol. Y agora déxovos, que dempués tengo que tornar pa la villa a facer unes coses y tengo d'entainar. Pero voi echavos un cantar popular que pue valir, guapamente, pa mandar al aquello a los bocayones uniformistes de turnu. Ehí va:
"Dicen que tienes tres gochos
según pregona to ma.
Y yo digo que son cuatro,
contando al gochu to pa.
¡Ixuxú!".
-¡Guo!, - gritemos Don Quixote de Caravia y yo al empar al sintí'l canciu prestosu de Espi la Mariñana.
Dempues ella enveredó monte arriba y Don Quixote y yo quedemos parllando otru cachu más, de lo de la oficialidá y d'otres coses...
