Domingu guapu de Setiembre. Una mañana afayadiza pa caminar pel monte y echa-yos una güeyada a los castañeos. Neso tábamos el velociraptor Masgallu y yo cuando sintimos un burbús. Fuimos caminando p'hacia él. Allá, a la vera d'un camín, vimos a daquien. Según avanzábamos pa él decatéme que se trataba de Xuan Moñiz d'Ambás, que paecía que charraba con daquién, magar nun veía interlocutor dalu:
"...De magar les décades trescurríes de Constitución y Estatutu, n'Asturies talo paez que se detuvo'l tiempu nes dómines de la Transición. Esti ye un sitiu onde paez que ñunca nun pasa nada. Una sociedá polícamente amomiada y emburrecida qu'asemeya tar con un pie na dictadura anterior y con otru nel sistema políticu actual. Nuna eterna Transición. Y lo peor nun ye eso. Lo peor ye que, a vegaes, tien ún la impresión de que va p'hacia atrás, envede p'alantre. Nel Estáu Español, a lo llargo de les últimes décades, los pueblos estremaos que lu igüen avanzanon cadún a la so manera. Unos, pasu ente pasu, pel camín autonómicu p'alantre. Otros entainanon afitando procesos ñacionalistes pa plantar cara al uniformismu pol que nagüen los fachañoles, esa población bien grande que, magar la Constitución, siguen arranando por un modelu estatal uniformista y centralista, neto al del réxime anterior. Y, n'Asturies hai fachañoles a esgaya. Refuguen la nuestra autonomía. Sofiten cualquier intentu de colonización -que ñon de convivencia- cultural foriata. Y del idioma pa qué falar. L'asturianu ye un oxetivu cimeru a valtar y desaniciar. Los fachañoles d'Asturies, arriendes d'atopalos davezu en cualquier ámbitu de la sociedá, ñalen como pexe nel agua peles formaciones polítiques de la drecha, que nel nuestru casu ye estrema drecha pura y dura. Pero nun mos tenemos que dexar engañar. Tamién nes formaciones de la izquierda podemos atopalos. Porque pa dalgunos, nun ye incompatible llevantá'l puñu y cantar la Internacional y, el empar, añorar un modelu territorial del Estáu claváu al anterior..."
Pa cuando taba nesti puntu de la so pedricazaña, yá tábamos Masgallu y yo a la vera de Xuan y pudi ver plasmáu que taba falando con una calavera qu'aguantaba nuna mano. Entós saludélu:
-¡Cóime, Xuan!. ¿Qué faes ehí sentáu charrando con esa cocorota?.
-¡Qué tal, Xanu!. Pues esta que ves ye la calavera Rondera y dacuando charro con ella en plan hamletianu. Dígote daveres que, viendo la carrapotada de babayos, puzcalabres ya inorantes qu'inunden esta Asturies d'anguaño ye preferible milenta vegaes falar con ella qu'aguantar a toa esa tropiella infame...
-Home, visto asina, nun dexes de tené la to parte de razón. Polo que tuvi escuchando mientres m'acercaba a ti, andes quemáu abondo cola sociedá asturiana d'anguaño...
-Quemáu, encabritáu y tolo que quieras amestar. Aforfuga y aparra vivir nun país onde una parte importante de la xente -evidentemente, nun me refiero a too- tovía nun saleo de les llendes de la Transición d'allá de finales de los setenta. Nun se quier enterar que somos una ñación histórica del Estáu Español. Siguen refugando lo ferial d'esta tierra y esfruten tirando carrobexazos escontra l'idioma asturianu como si tal cosa.
-Pues agora que quieren entamala a reformá l'Estatutu Autonimía pinta la cosa abegosa, Xuan...
-Perabegosa, Xanu. Los fachañoles tienen una presencia bultable na Xunta Xeneral. Afáyense como gatu n'escarpín cola situación actual. Nun quieren avanzar un res na autonomía de nuestro y tiénen-y una zuna al asturianu tan descomanada qu'hai que resfregá los güeyos pa creyé les coses que se sienten y se lleen per ende.
-Vamos, que cuando, allá en pasando bien de tiempu, los historiadores estudien esta etapa de la historia Asturiana, una de les coses que más va rescamplar va ser que foi la comunidá del Estáu onde más tiempu tardanon en salir de la Transición...
-¡Eso si salimos, Xanu!. ¡Esi si salimos, que yo ya nun sé si, puestos a movenos del sitiu onde tamos, vamos dir p'alantre...¡o p'atrás!. Too va depender de si los fachañoles medren social y políticamente o si la ciudadanía asturiana demócrata verdá llogra apoderalos y reducilos a una mínima ya irrelevante espresión. Ver veremos...
-Bono Xuan, Masgallu y yo vamos seguir camín p'alantre. ¿Acompáñesmos?.
-Ñon, Xanu, gracies pol brinde. Tovía ye ceo pa baxar a xintar a la villa y voi quedar un cachu más pel monte parllando con Rondera, que me sirve de terapia pa espansionar y relaxame. Pa la siguiente vegada que venga pela Visca Dayuri, ya te fadremos una visituca...
-Pues entós hasta llueguín, Xuan.
-Ta llueu, Xanu.
Y Masgallu y yo seguimos camín p'alantre, mientres Xuan Moñiz d'Ambás siguía charrando cola so compañía tan aquello. Pero, mialma, que pue ser guapamente preferible eso a tratar de dialogar y razonar con toa esa xermandía amomiada y emburrecida qu'abeya per esta malfadiada Asturies d'anguaño...
