miércoles, 11 de agosto de 2021

La invasión estrozona

Somorguiémonos nel branu. Hoi tamos de conceyu Espi la Mariñana, Don Quixote de Caravia, el trasgu Manfurada y yo. Bono, y el velociraptor Masgallu, pero como iña y nun fala...

-Mirái. ¿Gústavos? -entrugó Don Quixote amosando un gomeru.
 
-Paez curiosu -dixo Espi-. ¿Pa qué lu lleves contigo?.
 
-Pa defendeme de la invasión si me veo acorraláu.
 
-¿De qué invasión mos tas falando? -estrañóse Manfurada.
 
Don Quixote de Caravia engurrió'l ceyu, arrestielló la voz y púnxose él:
 
-De la turística. Refiérome a la invasión turística. De la foriata principalmente, pero ensin escaecé la parte que-y finca a la llariega. Y de la estroza que faen dayures esti tipu d'invasiones. Esi turismu de zurriburri xabaz que nun respeta nada y esgoncia lo qu'atopa ellí per onde pasa. Un modelu de facer turismu emburrecíu, que puña contra lo que debiere ser una actividá turística prestosa y ñecesaria que respete y esfrute de los llugares per onde pasa.
 
-Nun me digas nada -intervino Manfurada-. Yo'l branu pasáu andaba revolviendo per un horru, allá pa la costa, cuando sentí ruíu abaxo. Escuqué y vi unos manguanes aparcando los coches sol horru. Pero inda vi más. Resulta qu'otros aparcaron los coches na antoxana d'una casa. Tuvieron que salir los dueños a encamenta-yos a unos y otros qu'aquello yera un espaciu particular, priváu, y que nun podíen invadilo a lo xole.
 
-Pues yo -dixo Espi- anduvi de monte. Resulta que taba esfrutando d'una mañana soleyera agüeyando pa la preciosidá del paisaxe que m'arrodiaba, cuando veo un par de coches parando cerca d'au taba yo. Baxáronse d'ellos unos zarrapastrosos y tiraron unes botelles pa escontra un matu. Y yá sabemos lo que pasa. Si son de plásticu puen tar ellí emporcando años y años. Y si son de cristal, puen facé l'efectu llupa y provocar un incendiu.
 
-Equí pela viesca Dayuri tamién pasen a vegaes pazguatos gochonzonos que van dexando una güelga de puxarra per onde caminen. Asina que, dacuando, tengo que facer de basureru y pañar tola porquería pa tiralo a un contenedor allá pa les afueres de la villa -puntualicé yo.
 
-Pues agora pescanciaréis por qué ando yo armáu col gomeru -dixo Don Quixote-. A lo meyor aperríllo-y a dalgún na culera cuando lu vea estrozanado daqué. O solméno-y al coche, qu'eso fádialos más que si se mancare un familiar, ¡rediosla!. Toi fartucu d'ivasiones estrozones. Amás, esos impresentables espanten al turismu respetuosu, qu'esfruta y ayuda a conservá lo que va visitando. Porque esi turismu tamién esiste, mialma. Y ye lo qu'hai que potenciar. Más cultura y menos panoyos.
 
-Lo que ta claro que nesto que tamos falando tien d'intervení l'alministración. Trabayar por ufiertes turístiques de calidá, onde la cultura y l'espansionar vayan xuncíos. Y ñon tocá'l turullu d'una masificación pa batir nengún récord. Que, al final, acaba matandose la gallina de los güevos d'oru -púnxime yo.
 
Y tábamos charrando asina, cuando Masgallu salió a carrenderes y aportó con un bote vacíu na boca pa enseñámoslu.
 
-¡Rediós, que yá tán equí! -gritemos toos al empar...