Como yá vos conté dayures, el velociraptor Masgayu tien mui bon remangu pa tallar dibuxos coles sos garres en pieces de madera. Precisamente taba esta tarde dibuxando una flor galana nuna zapica que fixere yo ayeri cuando se punxo sollerte y salió h.ispiando pal camín. Deseguidina aprució acompañáu de Lluis de Turiellos que venía fumarriando na so pipa de maíz.
-¡Ayó, Lluis!. ¿Qué ñueves traes de per ende p'acullá, ho?.
-¡Hola, Xanu!. Pues de ñueves traigo qu'acabo de llegar de tierres somedanes, onde anduvi unos díes caleyando, oreyando y agüeyando, que ye como hai qu'andar cuando te somorguies na ñatura.:
-Pues cuenta, cuenta, que yo estes coses de la ñatura sabes que me presten pola vida.
-Verás, Xanu. El casu ye que, arriendes d'espurrí les piernes y espansionar per aquellos paraxes, tenía'l pruyiciu de ver centaures somedanes, tirañes y xaranzanes, arriendes d'observar etnografía, tastiar gastronomía y esfrutar de viesques como los fayeos. Ah, y antes de que se m'escaeza, atopé, bien cerca de la xubida a les ruines del Castiellu del Alba, excrementos del osu plagaos de güesos de cereces, pues nestes dómines ta poniéndose bien fartucu per onde hai cerezales...
Dempués, Lluis de Turiellos echó una pipada y siguió:
-Como te dixi enantes, quería ver, a costa fecha, centaures somedantes, unes flores que son tou un emblema biolóxicu asturianu, por ser un endemismu de nuestro. Eso llogrélo caminando pel escobiu de La Malva, dende onde se nortia la central del mesmu ñome empozada na ñatura. Pués nesti llugar pudi ver dalgunes d'elles mecíes coles tirañes, que son unes plantes insectívores. Dambes, centaures y tirañes, puen vese davezu xuntes en zones calices y abondo llentes, delles veces metíes nel mesmu agua. Pero nun acabare equí'l mio rixu botánicu. Petábame tamién echa-yos una güeyada a les xaranzanes, unes plantes que, dende bien antiguo tienen propiedaes medicinales. Pa veles tienes qu'empobinar pa les zones altes, onde tan les brañes, por exemplu. Yo tiré pa la braña de Mumián. Primero esfruté del fayéu de La Enramada, que lu tuvi que cruciar p'aportar a ella. Y allaribón pudi contemplar unes cuantes xaranzanes, que yá taben perdiendo la flor pa ponese en zurrón, que ye como se-y llama a la planta que tien la semiente inda por esparder. Y, claro, de pasu ver los teitos, las ol.leras y el ganáu de la raza roxa asturiana, que daba gloria velo...
-¡Bien interesante lo que me cuentes, Lluis!. Y de lo que l'osu anda a cereces estos díes igual con paciencia pue nortiase dalgún...
-Echándo-y paciencia igual sí. Pero yo tampoco nun me molesto gran cosa en velu o dexalu de ver. Bástame con saber qu'enda per ende y ameyorando, pali que pali, el númberu d'exemplares. Per agora namás que vi excrementos, pero tampoco ye como pa enchipase d'ello...
Echemos Lluis y yo una carcaxada col aquello del "rastru gastronómicu" del osu y despidime d'él mentes empobinaba monte abaxo. Y mirái per ónde entróme a min el rixu d'andar a cereces, como'l plantígradu. Pero téngolo difícil, porque per equí yá cayeron va un tiempu y la única manera que tengo de faceme con elles ye diendo a mercales a la villa...
