Ta picando a la puerta Setiembre. Un mes que tien la fama, nes nuestres tierres, de trayer díes soleyeros y seles, con un ciertu tastu a seronda en finxu'l cielu. Cosa que nun vendría nada mal, porque esti branu nun foi abondosu en díes de sol precisamente. Anque ye preferible esto a turrar como llargatos, con temperatures que faen cayer los páxaros, que ye lo que asocedeo del Payares pa yuso. Toi equí, cabo'l caborniu, echando una rocada con Xuan Moñiz d'Ambás, qu'anduvo caleyando peles nuestres tierres más occidentales.
-Supongo que nel to guacéu peles mariñes del occidente astur aprovecharíes pa escribir daqué y echalo al mar dientro d'una botella, siguiendo con esi vezu editorial tan aquello que te pruye...
-Pues sí, Xanu, concretamente igüé un sonetu y echelu al agua nuna botella pa que ñavegue per ende p'aculla y, quiciabes daqué día, hebia quien l'atope y lu llea. Pero fixi más coses, hom, nun vayas creyer qu'ando tan alloriáu que me meto una porretada de kilómetros namás que pa echar una botella con un sonetu a la mar...
-Pues cuéntame, cuéntame -púnxime yo mientres esfoyaba unes panoyes.
-Mira, precisamente tuvi percorriendo tierres onde'l maíz plántase a embute. Milenta díes de gües d'esti cereal ye lo que pues ver per ellí. Fixéme en dos tribes de panoyes. Unes, cola barba clara y otres con ella colorada dafechu. Desconozo si son toes forraxeres o si dalgunes son panificables. Nesti asuntu del maíz ten en cuenta, Xanu, que los primeros granos qu'aportaron a Asturies fueron precisamente per Tapia de Casariego, allá de los tiempos...Pero tamién aproveché la mio estancia per aquellos llugares pa dir a dellos conciertos de xaronques, visitar espacios protexíos como les dunes de Penarronda o empapirotiame cola guapura de sableres como Santa Gadía...
-Espera, espera...¿qué ye eso de los conciertos de xaronques?. Tas más grilláu de lo que yo camentaba, Xuanín del alma...
-Bah, ho, nun ye pa tanto. Ello ye que pelos llamargales hai xaronques blincando pente les ñates, y claro, canten. Y hai xente que mos presta veles y sintiles. Claro que too nun ye bucolismu, porque anda'l personal revolucionáu por cuenta del oru. Allá per Salave queden escatafinos d'antigües esplotaciones auríferes de los sieglos I y II. D'ello quedó un paraxe con llagunes, galeríes y demás. Pero tamién quedó so tierra oru abondo y dende cuantayá hai empreses que lo quieren esplotar. Y, dempués de dalgunos intentos torgaos, agora paez que yá tienen permisu pa facelo. Lo que pasa qu'esa minería ye percontaminante y agresiva col mediu y hai abonda rocea ente'l vecindariu col asuntu. Veremos a ver en qué para too según colen los meses. A too esto, tando per allá enteréme que suspendienon un eventu taurín que queríen entamar per tierres de Cangues d'Onís y que per Xixón nun van entamar más nos años vinientes.
-Pues sí, Xuan. Lo de Cangues prohibéolo la Confederación Hidrográfica por mor de la chapuza que pensaben facer nun sitiu inapropiáu pa enxaretá l'eventu taurín que pretendíen. Lo de Xixón tien pinta de tar más afalao pola política que pol enfotu animalista de la corporación municipal. Ello ye que la feria d'esti añu paecía más un mitin ultraderechista qu'una corrida de toros al usu. Fíxate que dos de los gües que matanon llamábense "feminista" y "nigeriano". Pa ponese a mexar y nun echar gota.
-Yo camiento qu'eso fixénonlo porque consideren la plaza xixonesa de poca categoría y quixenon usala esti añu de coneyu d'indies pa esperimentar xunciendo tauromaquia con política machista y xenófoba. Y claro, esto dexaba col culu al aire a la corporación xixonesa, supuestamente d'izquierdes y con alcaldesa. A la fuerza aforquen, que reza'l dichu.
-Y agora, pa la seronda que yá se vien cozcando, toca otru asuntu que va suponer una bona guerra de carrobexazos. Trátase del xaréu de la oficialidá. Teóricamente habríen de ponese a reformá l'estatutu pa ello. Ñecesítase númberu de votos, qu'escurque lu hebia, pero enagora nun queda claru l'asuntu y hai discutiniu ente partidarios y detractores d'oficializá l'asturianu, pero tamién ente la propia xente que la sofita. Claru, lo que se diz claru, tovia nun ta del too'l camín que va llevá la cuestión. Pero d'equí a poco vamos ver cómo se va desenguedeyando too ello...
-Pues sí, Xanu, ver veremos en qué para lo del oru, lo de l'asturianu...pero, entrín y non, yo voi dir empobinando pa casa. Pero voi dexate antes un dichu asturianu que pue sirvir pa los gües, o toros como llamen per ende p'acullá, que van llibrá la pelleya de banderielles, rexonazos y estocaes, polo menos de mano y pela nuestra tierra: "Güe sueltu, bien se llambe".
Eché una carcaxada, despidímonos Xuan Moñiz d'Ambás y yo, y siguí esgranando panoyes, que m'entró a min el rixu de facer una boroña pa comer con lleche y nello toi...
