¿Viesteis dacuando una culiebra engrifada, xiringando'l guispiu, como pa encetate?. Agüeyasteis dayures un perru gafu arregañando los dientes con unos caniles bultables?. Sintísteis nuna llende glayar a un paisanu perdiendo les madreñes porque lu quier turriar un güe?. Pues d'una traza hermana a estes aprució hoi Don Quxote de Caravia pel requexu'l mio caborniu, qu'hasta Masgayu, que-y presta pola vida facer d'anfitrión, foi a escondese detrás d'una castañal axorizáu. Acercóse'l mio amigu arreblagando y esparabaniando, cola cara colorada y echando espumaraxos pela boca. Miróme arremellando los güeyos y púnxose él:
-¡Plaga d'osos!. ¡Dixo que n'Asturies había una auténtica plaga d'osos!. ¡Y quedóse tan campante y como si tal cosa!.
-Rediós, Don Quixote, tranquilízate, hom, que vas a echá les coraes pela boca de lo acaloriáu que vienes. ¿Quién dixo que n'Asturies había una plaga d'osos?. Porque yo, la verdá, enagora nun atopé nengún, y si hubiere tal plaga veríense per tolos sitios...
-Pues verás, Xanu, el casu ye que taba yo xintando cola tele puesta que taba echando un telediariu. Y va'l presentador y diz que per estes tierres asturianes tenemos una auténtica plaga d'osos. Y yo, claro, sintí aquello, empapicéme y casi m'afuego...
-Camiento que ye un casu más de la gran inorancia que dellos urbanites tienen del nuestru mediu rural y, los qu'amás d'urbanites son foriatos, d'Asturies en xeneral. A lo meyor ye pa espantá'l turismu de les nuestres costes y montañes y que cole pa otros sitios a dexá'l dineru...
-Nun sé yo si sedrá eso del turismu. Pero vengo observando dende abenayá qu'hai ciertu interés en cuestionar la protección que se-y da al osu. Ye un fechu que tovía nun salió del peligru de desaniciu, pero yá hai voces que dicen qu'hai osos como cuentu risa y, lo más grave, pazguatos pidiendo que puedan cazase...¡una barbaridá!. Otros sopelexen pelos medios de comunicación que l'osu compórtase como'l llobu cuando ve ganáu, ¡otra barbaridá!. Y, pa meter más mieu inda, tamién hai quien diz que cuando güel sangre humano envízcase y ataca, ¡y vuelta a sintir más barbaridaes...!.
-Amigu, Don Quixote, por esto que me cuentes, paezme qu'hai dalgún interés tapecíu por demonizar al osu presentándolu como un gran peligru pa la xente y pal ganáu. Y, claro, como solución, pues a dexar cazalos. Pero lo qu'hai que destacar a parte ye la manera desproporcionada y alarmista que dellos medios de desinformación usen pa referise a los osos. Recuerdo, apocayá, cuando hubo un alcuentru fortuitu ente un osu y una muyer al atapecer. L'animal dio-y un zarpazu, valtóla y marchó. Un casu raru y esceicional, hai que lo solliñar, que percances puen tenese tamién con xabalinos, perros, o cualquier otra triba animal. Pues cuntóme daquella'l Capitán Peñafrancia que dalgún mediu desinformativu dixo qu'escorrió la muyer, atacóla y empecipió a arrastrala pa llevala con él. ¡Otra barbaridá más a añadir a les d'enantes!.
-Pues asina tán les coses, Xanu. Agora hailos que carguen escontra los osos. Va tiempu escontra los cormoranes, tamién estorben les utres, del tema de los llobos yá ves l'espolín qu'hai montáu cuantayá. Recuerdo hai años cuando trataron de cambiar de sitiu a un faisán porque dicíen qu'asustaba a los turistes y l'animal morrió. ¡Ah!, y los mastinos escaecíos, que siempre foron la meyor arma pa tornar llobos, osos y lo que pintare...Voi enfilar camín p'alantre, que como hai esa plaga d'osos, y como dicen que se comporten como los llobos, y como cuenten que güelen la sangre humano...¡pues igual m'ataquen cien o doscientos y nun dexen escarrapiu míu!. Yá viesti lo que-y pasó al rei Favila, allá de los tiempos, por confiase.
Eché una carcaxada cola pedricazaña del mio amigu y despidime d'él, salió Masgallu a despidilu tamién, y quedé pensatible con esti asuntu de los osos y otres histories, y tamién cola zuna de los sapiens de querer desaniciar tribes animales a embute, como si la ñatura y el propiu planeta fueren la so finca particular...
