miércoles, 26 de mayo de 2021

Charrando de les madreñes

Siempre me gustaron los muxinos y los perros. Pero pa curiá’l requexu onde vivo nun tengo nin unos nin otros. Fáimelo un velociraptor llamáu Masgallu pol aquel gayasperu col que se mueve dayuri. Tamién ye un bon anfitrión qu’acompaña a les mios visites. Pues taba yo l’otru día entamándola con un par de madreñes cuando apaeció Masgallu acompañando a Sidru’l Guirriu y a Espi la Mariñana, que veníen afalagándolu y faciéndo-y patagüeyos.

Saludémonos y ponse Sidru:

-Cóime, Xanu, veo que tas faciendo un par de madreñes.

-Pues sí, amigu, estes encargómeles Xuan Moñiz d’Ambás. Voi rematales grabándoles con un dibuxu y barnizándoles. Tamién-yos voi poner unes canteses y ferrales con gomes.

-Préstame ver tovía pares de madreñes a la puerta de dalgunes cases de les zones rurales o que tienen corrada. Magar nun tienen la utilización d’antiguamente, tovía-yos faen serviciu a la xente y siguen usándose –comentó Espi la Mariñana.

-Pues sí –intervino Sidru-, y hasta dacuando pue vese a daquién calzándoles pel cascu urbanu de les nuestres villes. Y quiero facer finca nesti puntu. Les madreñes ñon namás que fueron un calzáu venceyáu al mediu rural. Hubo, y entá queda, una utilización urbana de les madreñes. Llimpiábense y calzábense como si fueren zapatos nes nuestres villes. Había hasta un tipu de madreñes iguaes más fines pa estos usos, pues yeren pa pasiar y ñon pa trabayar na güerta o na corte.

-Y también s’usaron como calzáu pola xente minero –añadió Espi-. Vese en bien de semeyes antigües. Amás, de pasu, veníen a sirvir como lo qu’hoi conocemos como calzáu de seguridá, porque pa machucar los deos teníen que francer primero les madreñes o los zuecos nos sitios onde los usaben.

-Ye bien interesante lo que me tais cuntando sobre les madreñes –intervine yo-. Y recuerdo tener visto a xente calzaes ferraes con clavos, antes de que vinieren les gomes pa pone-yos, como se fai actualmente. Yo faigo dacuando dalgún par d’elles cuando me les encarguen, como nesti casu. Tamién me presta facer otros trabayos artesanos, como zapiques, gaxapos, goxos, vexigos…

-Pues sí –dixo Sidru’l Guirriu-, les artesaníes tradicionales son abondes y prestoses. Y por suerte, nun tán toes desaniciaes, como ye’l casu de de les madreñes, que tamos falando.

Y tábamos charrando asina cuando Masgallu garró una zapica y púnxose a tallar una flor galana nella coles sos garres. Los mios amigos quedaron clisaos ante la escena, pero aclare-yos yo l’asuntu:

-Deprendilu yo a tallar de piquiñín. Con eses cuchiellones de les garres amáñase con ello divinamente. Cuando acabe esti par de madreñes que m’encargare Xuan Moñiz d’Ambás voi apurri-yles pa que-yos grabe él un dibuxu curiosín antes de pasar a barnizales.

-¿Pues sabes qué te digo, Xanu?. Que voi dexate agora mesmo encargaes unes madreñes pa migo. Tengo ganes d’andar chóquele-chóquele con elles per ende –dixo Espi la Mariñana-.

-Pues eso ta fecho, Espi. N’acabando esti par póngome coles tuyes, qu’esta temporada ando pa la mano nel asuntu de l’artesanía. Y agora, si vos paez, vamos facer un altu nel llabor y dar una vueltiquina pa espurrir yo un poco les piernes. ¿Acuéi?.

Y Masgallu, Sidru’l Guirriu, Espi la Mariñana y yo punxímonos a caminar un cachín mientres siguíamos parllotiando del asuntu madreñeru. Y foi entós cuando Espi gargolió un cantar bien prestosu sobre esti asuntu:

“Les asturianes/van de madreñes/ruxen los clavos, leré/da gloria oyeles. ¡Ixuxú!."

  -¡Guo! -gritemos Sidru y yo al empar mientres Masgallu iñaba a la so manera...