-A, Don Quixote, ¿cómo ves tu esti enguedeyu de lo de los cormoranes?. Nada menos que quince grupos conservacionistes tán opuestos dafechu a ello.
-Pues, amigu Xanu, opuestos y pámidea que con razón. Si dempués de tantos años matando a esta triba d’aves la población de pexes, como los salmónidos, sigue menguando habrá que buscar otres esplicaciones. Por exemplu, la contaminación, la estroza de viesques de ribera, los banzaos, el furtivismu, la introducción d’especies foriates, los dragaos y encauzamientos, la propia pesca masificada…
-Comentábame apocayá Lluis de Turiellos que, allá pola villa, daba gustu pasiar cabo’l ríu. Páxaros gorgoritiando, pegues faciendo ñeros, coríos nel agua, gaviotes que remonten ríu arriba, xaronques cantando, cormoranes, garces, martines pescadores, llondros, arriendes de poder ver nalando truches…Comentábame también cómo ye cada vegada más corriente ver xente con cámares y teleoxetivos grabando. Dalgunos son biólogos, profesores y estudiosos. El ríu como bierzu de vida y zona pa observar y espansionar. Prestoso a embute…
-Pues sí, Xanu. Pero’l ríu también ye ñegociu. Milenta llicencies que dan perres al gobiernu asturianu gracies a la pesca. La ñatura y el porgüeyu choquen con frecuencia. Y dempués hai otru tema. ¿De quién son el ríu y la ribera?. Cualquier ciudadanu tien drechu a pescar dientro d’una reglamentación. Pero cualquier ciudadanu tien drechu también a esfrutar de la fauna que cría alrodiu d’ellos. Y nun hai por qué eliminar nada. Esa fauna siempre tuvo ehí. Meyor poner procuru en conservar l’espaciu natural qu’en buscar culpables con desanicios que nun resuelven nada, polo que se ve.
-Almeyor tamos echando la culpa a unes aves d’estroces que causen los humanos. Porque si dempués de dieciséis años desaniciando nun s’iguó’l problema de los salmónidos…
-Según tán plantegando’l tema dende'l gobiernu, l'aquello namás que se va arreglar faciendo desapaecer cualquier especie que vaya’l ríu a pescar, menos los humanos, claro. Y eso ye una barbaridá. ¿Sabes qué vienen demandando dende va tiempu los partidarios de desaniciá los cormoranes?. Pues gárrate fuerte. Plantégase eliminar de les nuestres riberes a los llondros, les garces, los martinos pescadores y, en xeneral, cualquier triba animal qu’incluya pexes na so alimentación. Y munchu güeyu, que too ye entamar por una especie pa llevar darréu les demás.
-¡Ai, Don Quixote, esto pinta feo!. Los qu’esfruten agüeyando pa la ñatura, los que lo pasen perbién grabando o sacando semeyes a les especies animales de les riberes nun paguen por ello. Los que pesquen sí. Y el dineru tira muncho…
-Pues de lo que sí te puedo dar anuncia ye que los cormoranes y dalgunes garces que se veíen estos años pasaos pel ríu, yá se sumieron. Escurro que tán desaniciaos. ¿Vamos poder velos dacuando?. Amás, pa rematala, tán matándolos en plena época de cría, porque tamos nel tiempu de guariar y echar ñeraes ñueves. Un despropósitu monumental. Y, a too esto, dalgunes son especies vulnerables, como dalguna castra de los propios cormoranes. ¡Menuda incoherencia, miániques!. Una pena.
Y el mio amigu, despidióse de min y echó a andar monte abaxo camín de la villa. Cormoranes, garces, llondros, martines pescadores, la bayura de la fauna de los nuestros ríos y les sos riberes mancorniaos pol propiu gobiernu qu’habría de curiar por ello…Sí, mialma, una pena.
