Va avanzando la primavera y entaínase a rozá los praos y a destapinar pa romper terrén y palotiar. Y con ello, una xera que val pa desfacese de tapinos y morgazu y, de pasu, pa tener abonu pa semar. Refiérome al llabor de facer borrones. Yo voi facer esta mañana ún colo que tengo apilao del sitiu onde ta’l mio caborniu. Y va ayudame’l trasgu Manfurada, que yá lu veo acercase pel camín.
-Hola Manfuradina, ¿qué ñueves hai pela villa?.
-Qué tal, Xanu, pues estos díes atopéme con dalgunos de los nuestros amigos. Xuan Moñiz d’Ambás sigue encoplando poemes pa meter nuna botella y echalos a la mar que, como sabes, ye la so particular manera d’editar. Don Quixote de Caravia anda per ende exerciendo de madreñeru andante y desfacedor d’entuertos, anque me dixo que tien que poner procuru colo que fai y con quién atopa, porque diz que’l personal anda engrifáu y fechu un bederre por cuenta del andanciu sanitariu cola so carrapotada de restricciones y llaceries, pero también por esi otru andanciu que ye la crisis económica que ta espolletando al rau del otru. Vi también al Capitán Peñafrancia, que tien trabayu a esgaya nestes dómines, porque, arriendes de facer puntería coles culeres de los furtivos, también la practica nes de los pirómanos. Espi la Mariñana, siempre entamadora, apuntóse a un cursín pa deprender a iguar redes allá per Cuideiru. Y Lluis de Turiellos encamentóme que-y fixeres otra pipa col tarucu d’una panoya, que la de so yá la tien bastante chamuscada.
-Pues vamos ponemos a iguá los borrones, a prendelos y a curialos. Hoi ye un día afayadizu pa ello y hai permisu p’aborronar. Y sí que ye cierto, mialma, que tamos nunes dómines onde les ñoticies de los incendios forestales guañen per dayures. Una llaceria que se repite añu tres añu y que nun tien igua nin manera de tornala, polo que se ve.
-Amigu Xanu, ye que p’aborronar hai que saber cuándo y cómo. Tamién hai que saber cómo quemar pal llograr terrén pa pastos o pa cultivar. Y, claro, tán esos alloriaos de los pirómanos que meten fueu al monte porque-yos peta y da la real gana…
-Pues nun vamos ser nós quien nos xunamos a toa esa xermandía d’estrozadores de la ñatura. Vamos facer borrones como tien que ser y con toles precauciones que ye mester garrar pa ello. ¿Entamamos la xera, amigu?.
-¡Venga, cho, vamos a ello…!
