-Pero, Don Qixote, ¿qué faes tu ehí iñando amatagáu?.
-Pues verás, Xanu. Ello ye que petóme dar una vuelta pela
viesca pa espurrí les piernes y espansionar y, al llegar per esti sitiu,
entráronme unes ganes tremendes de tirá los calzones. Asina que metíme detrás
d’esti bardial a posá’l güevu y, yá ves, apaecisti tu…Espera un momentín, que
pa la mano d’allá hai una bolera nel matu y voi salir per ella pa charrar un
poco contigo.
Averóse Don Quixote de Caravia pa onde taba yo, pero antes
de que gorgutáremos más nada, sintimos a daquién que venía cantando:
“Marinerín, arría la vela
que ta la nueche clarina y serena…”.
Yera Xuan Moñiz d’Ambás que venía gayasperu camín
p’alantre echando una. Acerquémonos a él y entruguémos-y pa ónde empobinaba.
-Pues nenyures en concreto. Salí a dar una revolada pel
monte pa esparcer y ver si m’inspiro pa escribir un sonetu…
-¿Y vas mandolu a dalguna revista o tas faciendo un
poemariu? –entrugué yo.
-Pues nin lo uno nin lo otro. N’escribiéndolu, voi metelu
nuna botella y echala na mar. Igual daqué día l’atopa daquién y llee’l mio
sonetu…Nun ye la primer vez que lo faigo, yá tengo echaes unes cuantes.
-¡Recóime, Xuan, sí que tienes tu maneres curioses de
publicar, mialma! –sorprendióse Don Quixote de Caravia.
-Son dalgunes de les mios ramalaes. Toos tenemos delles,
supongo.
-Eso sí que ye verdá –intervine yo-. Por exemplu, cuando
ta la nueche ñidia y sele, yo préstame poneme al llau del caborniu a comer un
platu fariñes con una cuyar de madera mientres agüeyo pa les estrelles que
rellumen allarribón en cielu. Y esfruto abondo d’esta manera tan cenciella.
Precisamente taba pensando en facelo esta nueche, porque tien pinta que va tar
escamplada y con lluna llena…
-Pues falando d’estrelles –permedió Don Quixote- voi
cuntavos una anécdota que me rellató cuantayá un paisanu vieyu que taba
llindiando vaques allá nun pueblu. Pues veréis, dicía él que les estrelles son
en realidá los diamantes qu’un xigante que vivía en cielu, allá de los tiempos
cuando los moros, perdió una nueche que salió a pasiar a la lluz de la lluna.
-¡Cómo me presta a min charrar cola xente mayor de los
pueblos y aldees de nuestro!. Tovía queda dalgún informate que conoz cuentos,
histories, lleendes, romances, cantares d’antiguamente. Un bagaxe cultural
inestimable y una ayalga pa curiar con ciñu, porque formen parte de la nuestra
alcordanza colectiva, de los nuestros raigaños más fondos –apuntó Xuan Moñiz d’Ambás.
Y asina siguimos echando una rocada los mios amigos y yo
hasta que, de sutrucu, sintimos un españíu y un glayíu retumbar na contorna.
Don Quixote y Xuan axorizáronse daqué, pero yo tranquilicélos:
-Nun pasa nada. L’españíu ye del mosquete del Capitán
Peñafrancia, y el glayíu la preba de que-y acertó na culera a dalgún escopeteru
xixilistrón. La verdá ye que toi encantáu con él porque me caltién a raya a los
amantes de soltar perdigonaes a bota voléu pel monte ellí per onde pasen…
Echemos toos una carcaxada col asuntu y entós púnxose Don
Quixote de Caravia:
-Ta empicipiando a atapecer, Xuan, meyor vamos tornado pa
casa y despidiéndonos del Xanu…
-Tienes razón –dixi yo-. Yá ye hora de que baxéis del
monte, que si se vos fai tarde siempre hai peligru de que vos pase dalgún
percance…
Despidíme entós de los mios amigos que tiraron camin
p’alantre hasta sumise allalantrón. Y yo enfilé tamién pa la mio morada.
Y equí toi esta nueche ñidia y sele. Arrecostináu en caborniu comiendo un platu fariñes con una cuyar de madera mientres contemplo rellumar en cielu les estrelles. Pero, ¿qué estrelles?. ¡Los diamantes que perdió un xigante, allá de los tiempos cuando los moros, una nueche que salió a pasiar a la lluz de la lluna…!.
