-Qué tal, Xanu. ¿Qué
andes rebuscando perhí, ho?.
-¡Cóime, Capitán
Peñafrancia!. Pues ando pañando melecinatos pa la mio botica, que l'iviernu ye
una estación aquello pa garrar cualquier alifaz y hai que proveese.
-Pues yo delles veces
faigo dalgún resguñu con escayos y ando aprovisionáu. Mira qué traigo equí.
Entós, Peñafrancia,
sacó d'una faltriquera un peu de llobu y dixi-y yo:
-¿Tú pa qué lu uses?.
-Yo pa cicatrizar
mancadures. La povisa que sal d'esti fungu ye amañosa pa ello.
-Yo pa eso uso tamién
telarañes...
Quien asina nos
falaba yera Pinín que viniere col madreñoxiru pel ríu acompañáu del Gaviotu
ensin que nos decatáremos d'ello. Entós, saludélos:
-¡Ayó, amigos!.
Afayáivos con Peñafrancia y migo. Equí tamos charrando de plantes curatives que
nos ufierta la ñatura.
-Pues parllando
d'eso, nun escaezáis lo que mos da la mar. Mirái l'ocle. Tamién ye afayadizu pa
curar malures. Yo préstame pasiar a la vera la mar cuando hai marexada d'ello
triándolo y sintiendo los rebusquinos que me fai nos pies. Hai xente que se
frota con ello. Y de los baños col agua de la mar pa qué cuntavos. Son bien
saludables -comentó'l Gaviotu.
-Pues miániques que
la ñatura tien bayura de floritos, plantes, fungos, ocle y toa una carrapotada
más d'aquello que puen pintar perbien en cualisquier momentu pa solliviar les
gafures qu'acuten la salú: manzanilla, tila, menta, benitón, cola de caballu,
valeriana, anís...-recitó'l Capitán Peñafrancia-. Y yá sabéis aquello de que
"la cirigüeña de tolos males ye dueña...".
-Yo avezo a tomar
dalgún ferviatu antes d'achucame. Entona y presta. Y más col tiempu fríu como
fai pel iviernu -añadió'l Gaviotu.
-La xente antiguo
sabía d'esti asuntu. Pañaba per ende y usaba los remedios que nos ofrez la
ñatura. Un bagaxe perimportante de la cultura popular que yá vien de los
tiempos más antiguos de la humanidá. Agora ta too un poco más perdío y tienes
que dir a llibros pa informate d'ello -apuntó Pinín-. Y falando de llibros,
l'otru día lleí nún qu'una cogorda mui corriente de ver que-y llamen cola de
pavu ye mui investigada na melecina poles sos propiedaes beneficioses...
-Yá sabes, Pinín,
qu'esi gran inventu pa la humanidá que ye la penicilina ñaz d'un fungu, que
paez ser que yera conocíu mui antiguamente poles sos propiedaes
medicinales...-recordó Peñafrancia.
-Pues yá que tamos
dando la parpayuela con esta espirica y aprovechando que fai una mañana fría, invítovos
a un fervinchu nel mio caborniu -brindé yo a los mios amigos.
-Sí. Pero primero
vamos dar bona cuenta d'esta paxa sardines que vos traigo, que casique blinquen
y too de los fresques que tan -apuntó'l Gaviotu.
-Y pa remoyar el
gargüelu voi descorchar unes de sidra -añadí yo.
Y d'esta manera, empobinemos pal caborniu a da-yos a les sardines, la sidrina...¡y ensin escaecer acabar con un bon fervichu, que tengo na mio botica una bona amuesa d'ellos pa qu'escueyan los mios invitaos...!.
