-Qué tal Xuan. Albidraba que diba dar contigo con esta ñublina que vieno hoi y acerté. ¿Pa ónde enveredes?.
-Hola, Xanu. Pues voi pal requexu de la Fonte'l Güeyu.
El requexu de la Fonte'l Güeyu ye un sitiu que namás que conocemos los mitos. Nengún sapiens sabe d'él. Anque me merecen tola confianza, nin siquiera-yos lu enseñe a los mios amigos humanos. Ellí la xermandía de los mitos atopamos la paz dafechu, espansionamos y garramos fuerces. Siguí entrugándo-y al mio amigu:
-¿Vas pasar ellí la mañana hasta qu'escample, ho?.
-Voi a daqué más -resmpondió Xuan echando la mano a una fardela-. ¿Ves esta figura?. Pues voi a facer un mechinal un poco amatagáu y ponela ellí.
Aquella figura que m'enseñaba'l mio amigu yera de piedra y paecía una muyer como embarazada, con un banduyu bultable y los brazos espurríos p'alantre que nin siquiera yeren p'abarcalu dafechu.
-Mira, Xanu, esta figurina ye una réplica d'una ayalga asturiana. Llámenla la Venus de La Riera y tien munchos miles d'años, de les dómines del paleolíticu. D'aquellos tiempos atópense per toa europa figurines de muyeres acutralaes, rechonchudes, y na península namás qu'afayaron hasta agora esta que t'amueso. Asina que tien importancia y abonda.
-¡Perinteresante lo que me cuentes, cho!. ¿Y tu por qué pienses que facíen naquellos tiempos estes figures?.
-Pues mira, Xanu, pa entender cualquier fechu de tiempos pasaos hai que facé l'esfuerzu d'asitiase nes coordenaes d'ellos. Analizalos dende un puntu de vista actual pue llevanos a zarapicar y nun entender nada. Nes dómines de les glaciaciones, los clanes humanos vivíen na raya de la subsistencia. Quedar desaniciaos yera un fechu que los esmolecía darréu. Yera vital pa la supervivencia del clan tener criatures. Y cuando una muyer ta embarazada suel garrar pesu. Magar nun hai alcuerdu del too na comunidá científica, yo camiento qu'estes figures tan relacionaes cola fecundidá del clan, cola ñecesidá de reproducción qu'aforfugaba de contino a los integrantes d'él. Pudieren representar un prototipu, dexaseráu, de lo que camentaben que yera una muyer con garantíes de parir y criar metanos d'una mortandá infantil bultable.
-¿Y por qué quies busca-y un sitiu na Fonte'l Güeyu?.
-Bono, ye una venada que me dio. L'agua que ñaz d'una fonte ye como un partu de vida de la madre tierra, del somatu de La Vieya. Y esta figura ye un partu de vida de los humanos y, escurque, de la vida animal y hasta vexetal. Figúraseme que la fonte y la figura xuncen bien.
-Pues sí que xuncen, miániques. Pámique tuviesti una idea prestosa, Xuan. Cuando vaya a dar una revolada pel requexu de la Fonte'l Güeyu voi esfrutar de la Venus tamién. Y agora voi dexavos, porque quiero enllenar esti goxu con castañes d'una cuerria, que m'entró l'aquello d'iguar un potaxe d'elles y yá tengo en caborniu'l compangu y too. Hasta la prósima vegada que nos veamos, Xuan, muyer barbuda y perra llanuda...
-Hasta la prósima, Xanu. Y recuerda que lleva más el güeyu que'l butiellu. Nun vayas empalagate y acabar con torzones de barriga...
-Tendrélo en cuenta, tendrélo. Anque col saque que tengo, nun sé si l'armaré...Ta llueguín...
