-Ayó, Xanu, ¿Qué tal lleves esto de la ñevada?. Llevamos unos díes que ta trapiando enforma, mialma...
-¡Cóime, Capitán Peñafrancia, nun contaba vete hoi per equí!.
El mio amigu, el Capitán Peñafrancia, tien el so aquello. Viste como un mosqueteru d'allá de los tiempos, colos sos calzones, sombreru orniáu con plumes, mosquete, forcáu, los doce apóstoles, espada al cintu... Diz él que sirvió nos tercios, pero ye imposible. Un xanu pue vivir munchu tiempu, pero humanos qu'arreblaguen los cuatrocientos años nun pue dase. Asina qu'andar d'eses traces tien de ser una venada del mio amigu, pero cadún tenemos les nuestres cadaunaes.
-Siempre que te veo prúyeme facete una pregunta, y hoi voi plantegátela. ¿Cómo te dio por enrolate nos tercios?.
-Pues por culpa de la danza d'una romería. Tábamos nella y entamó lo de sienpre. Un ixuxú per equí, un viva per allá, un muerra dayures...y al final acabemos a palos. Llevaba yó un garrote de ñudos mui contundente y solmené-y a ún zampándolu en suelu mientres pegaba unes berríes espantibles. Pensé que lu matare ellí mesmo y fuxí pa enrolame nun terciu y colar perlloñe. Dempués enteréme que'l rapaz que dexare escalabráu alicare y andaba per ende tan guapamente. Pero yera tarde y yo yá andaba de soldáu mundu alantre.
-Enantes sintí un españíu como d'un tiru, ¿sintístelu tu tamién? -entrugué al mio amigu.
-¡Claro que lo sintí!. Fui yo que-y aperrillé a un cazador na culera. Teníes que velu los blincos y glayíos que pegaba mientres arrascaba les ñalgues. Yo esta actividá del tiru a la culera préstame pola vida y, cada vez que cai una ñevada, avezo a salir pal monte a ver si cazo daqué. Hoi tuvi suere, mira tu per ónde.
-Rediós, vaya aficiones que tienes, Peñafrancia. Yo préstame tamién da-y a la puntería, pero soi enagora más clásicu que tu. Uso armes de los tiempos paleolíticos. Concretamente, un propulsor y unes azagayes de güesu, y como blancu, calabaces. Porque esto d'aperrillar animales paezme una barbaridá. Por cierto, esi repuelgu que tienes na frente, ¿en qué batalla mítica te firieron, ho?.
-Na batalla de La Gueta. Ello ye qu'hai unos años brindóme'l nuestru amigu Lluis de Turiellos a dir a la gueta pela seronda y, cuando andaba yo gayoleru pel castañéu, enguedeyéme nun escayu rastreru y salí aventáu pal tueru d'una castañal centenaria truñandolu como un güe y...
-¡Qué tal amigos!. ¿Entamásteis bien l'añu?.
Quien nos falaba asina yera Pinín qu'acababa de posar el madreñoxiru cerca de nós enin que nos decatáremos d'ello. Saludémonos y dixi-y yo al guah.e:
-Pues mira, Pinín, tamos equí Peñafrancia y yo charrando de facer puntería y de la caza, ¿tú practiques daqué d'ello, ho?.
-¡Ca!, De la caza nun quiero saber nada. Pero puntería sí que practico. La mio arbía preferida ye'l gomeru y préstame pola vida solmena-yos gomerazos a botes vacíos. Por cierto qu'hoi llevo un día perprestosu. Garré unos barayones, echélos pal madreñoxiru y anduvi per ende caminando pente la ñeve. Tiré pa la zona del Picu Urriellu y aquello ta espectacular.
-Toi escurriendo yo una actividá prestosa pa la prósima vegada que ñeve -permedió Peñafrancia-. Tu, Pinin, garres el gomeru. Tu, Xanu, el propulsor y les azagayes. Y yo, el mosquete. Salimos los tres a cazar cueleres de cazadores monte alantre y yá veréis cómo presta practicar puntería nesi blancu.
Paeciónos bien a Pinín y a migo la propuesta, pero nesto sintímos que nos echaben voz:
-¿Y yo qué?. ¿Nun contáis comigo?. Yo tamién practico puntería a la mio manera.
Ellí cerca nun prau taba falándonos una cabra. Yera'l diañu Secañu que camudare nesta ocasión nesi animal. Capiémoslu pa onde nosotros y entrugué-y:
-Y tu, Secañu, con qué vas practicar la puntería na culera?.
-Yo puñando. Nun sabéis la sensación tán prestosa que se siente puñando na culera y sapiando a la diana escontra un bardial. Tremendo, hom. ¡Tremendo!.
-Pues quedes reclutáu pal equipu de caza culeres -contestó'l Capitán Peñafrancia.
-Amigos -dixi yo entós-, tamos equí albintestate paraos y empecipio a enfriar. Vamos pal mio caborniu. Invítovos a un cafétín de manga que ta de viciu y de pasu escalecemos y siguimos parllando de la nuestra actividá cinexética...
