Lo del arcu la vieya tien el so aquello, refiérome al nome. Fai referencia a la manera que por tierres astures llamen a la madre tierra y lo que l'arrodia. La Vieya, la Madre Tierra, vien venerándose dende acuantisimayá poles tribes humanes, y ye normal que la respetaren y curiaren. El so somantu acorica la vida y permite que xorrezan plantes, árboles y animales. Si curiamos d'esi somantu, pue vení la bayura. Si lu frayamos, pue aprucí la llaceria. Porque La Vieya respuende acordies a les nuestres aiciones.
Yo estremo tres momentos na relación de los humanos col somantu La Vieya. El primeru, cuando yeren cazadores-recolectores. Nesa etapa respetábenlu y malpenes lu modificaben un res. Siguíen a los animales nes sos migraciones pa cazar y buscaben alimentu ellí onde xuxere. Eso vémoslo mesmo hoi nes sociedaes cazadores-recolectores qu'enagora queden nel planeta.
Dempués vieno la gran revolución neolítica y los humanos empecipiaron a dexar güelga fonda nel somantu La Vieya. Talárose viesques y amburáronse montes pa llograr asina pastos. La ñatura empecipió a amosar cambios y a esplotase de manera más intensiva. Tamién la población humana espolletó enforma comparándola con etapes anteriores y la competencia ente tribes polos recursos fixo que medraren les amarraces ente los pueblos.
El tercer momentu anicia cuando la Revolución Industrial. Vien con ella'l gran estropiciu del somantu de La Vieya. Va avanzando, pali que pali, esi fenómenu que casi nos afuega anguaño de la contaminación. L'agua, l'aire, la vida cotidiana va asemeyándose a un enorme basureru qu'amenaza la propia supervivencia de los humanos nel planeta. La Vieya dexa de venerase y curiala pa despreciala y esgonciala dafechu. Pero, güeyu al cartafueyu, ye ella la que tien el poder de dar o torgar la vida nel planeta. Y escaecelo pue llevar a consecuencies catastrófiques. De fechu, ya empobinamos pa elles...
-¡Qué tal, Secañu, ya me vagaba vete, que cuantayá que nun caleyábamos xuntos pel monte!.
-¡Cóime, reconocístime, Xanu!.
Chocába-y al mio amigu'l diañu Secañu de que lu reconociere darréu. Aveza siempre a presentase camudáu en dalgún animal. Esta vegada vino marutáu d'oveya xalda. Pero la trampa rescampla. Venía xiblando tan campante. Y les oveyes berren, pero nun xiblen...
-Paez que va escamplar, magar la truena d'esta nueche pasada. Asina que vamos poder dir a espurrí les piernes monte alantre a ver la cuerria y a esfrutar de la viesca que sigue espectacular vistida colos colores de la seronda -dixi-y al mio amigu.
-Esperemos que sí y que nun nos garre una ñube per allalantrón que nos ponga pingando.
-Cuntóme un paxarín que vamos tener un día soleyeru. Asina que nun hai problema. Trátase d'un paxarín de munchu fiar...
Y d'esta manera, el mio amigu'l diañu Secañu y yo empobinemos hasta perdenos nel somantu de la viesca onde moramos, que ye tamién un cachín del somantu de La Vieya, de la tierra y de la vida, entrín y ñon les males zunes de dalgunos humanos nun nos la estrocen.
