jueves, 19 de noviembre de 2020

¿Quién-y robare les ferradures al perru'l cura?

 

Per estes dómines yá va la temporada d'andar a la gueta dando les boquiaes. Tamos tamién en tiempos afayadizos pa caminar pela viesca, porque la seronda va camudando'l monte nuna pintalarrama de collores espectaculares y triar los caminos cubiertos pol mantu de la foyarasca ye una actividá prestosa dafechu. Ello ye que'l trasgu Manfurada y yo qudáremos p'almorzar xuntos y dar la parpayuela mentes víamos como l'alborada bañaba de rellumos la viesca. Dionos por sacá la espirica d'esi vezu que tien la xente mayor d'embromar dacuando a los rapacinos, toma-yos el pelo y reíse coles veyures coles que reaccionen. Y tando nesto, vimos aprucir a Lluis de Turiellos, que ye un visitante fixu del monte per estes feches p'andar a la gueta. Capiémoslu y acercóse onde tábamos.

-¡Qué tal, chachos! -saludómos Lluis cuando aportó a nós.

-¡Home, nin!, yá vemos que sigues cumpliendo puntualmete cola xera de pañar castañes na seronda -contesté-y yo.

-Pues si, amigos, per equí ando a la rebusca, que per esti añu la collecha de castañes acábase y voi ver si paño les últimes ambozaes d'elles...

-¿Sabes de que tábamos charrando? -permedió entós Manfurada-. Pues de les bromes que los mayoronos gasten a vegaes a los ñeños pa toma-yos un poco'l pelo y armar comedia. Por cierto, ¿alcuérdeste tu de dalguna que te gastaren cuande yeres guah.e, hom?.

Entós va Lluis y arrascando'l cazu como faciendo memoria díxonos:

-Pues mirái, alcuérdome yo d'un asocedíu que me pasó siendo un críu y que nun fui a escaecer enxamás. Y, pa detras, tien la so apegadiella. Pues resulta que diba yo con mio ma pa casa y crucémonos con un paisanu. Y va él y mírame seriu, señálame col deu y espétame: "Pámidea que fuisti tu'l que-y robó les ferradures al perru'l cura". Al sintir yo aquella acusación púnxoseme un ñudu en gargüelu que m'añusgaba y tiré pa casa bien esmpolecíu, porque yá yera grave roba-y les ferradures a un perru, ¡pero que pa detrás fuere'l del mesmísimu cura, yá yera demasiao!. Pero foron pasando los díes y naide nun vieno a por min y aquello foi quedando tapao pola povisa de los años nun requexu de la mio alcordanza...hasta apocayá, que xubí pal sobráu de casa y atopé esto.

Y entós, Lluis de Turiellos metió la mano en bolsu y sacó una ferradurina pequeña, d'un tamañu que podía encaxar guapamente na pata d'un perru grande como un mastín. Amosónosla y añadió.

-Amigos, munchos años dempués d'aquel episodiu, voi confesavos ún de los mayores secretos de la mio vida. ¡Sí, fuere yo'l que-y robare les ferradures al perru'l cura!. Namás que fui a atopar esta y suelo llevala comigo, a manera d'amuletu,  porque dicen que les ferradures traen suerte. Y agora voi dexavos y tirar camín p'alantre, que voi ver si paño daque. ¡Hasta la prósima vez que nos alcontremos, collacios!.

Y empobinó hasta perdese na viesca dexándonos a Manfurada y a min empapirotiaos con aquel rellatu tan aquello. Dempués de un cachu dixi-y yo al mio amigu'l trasgu:

-¿Sabes una cosa, Manfuradina?. Figúraseme que Lluis de Turiellos acaba d'embromanos col cuentu de les ferradures del perru'l cura y agora mesmo debe tar arrollicándose  de la risa monte p'alantre...

-Yo nun sé qué te dicir, Xanu. Lo de que-y tomaren el pello colo de les ferradures ye guapamente creyible...¡Pero que fuere verdá que lo fixo, nun acaba de convenceme!. ¡Ca!.

Y siguimos a lo nuestro, pero cambiando la parrafada. Que lo de les bromes que se puen gastar a los rapacinos dexó de paecenos interesante dempués de lo qu'acabáremos de sintir...