Asina qu'entamemos a pimplar y a da-y al rabil del farol p'amagostá les castañes con fueu de carbayu, árbol totémicu de la triba ástur, y que lleva dando madera pa escalecer y tizar los llares de magar los tiempos más ancestrales.
-Con castañes y sidrina esconxúrase la pandemina -dixo Xuan remedando esi dichu de que con fabes y sidrina nun fai falta gasolina que poníen antaño nes llunes traseres de los coches.
-Llevámoslo crudo con esto del andanciu. Ta espoxigando nesta seronda y figúraseme que pal iviernu podemos tar nuna situación aforfugante dafechu -añadió Don Quixote afalagando les barbes.
-Amigos, yo lo que me fadia enforma ye andar tol día cola careta puesta cuando baxo a la villa -comentó'l trasgu Manfurada-. La verdá que vivir pel monte ye toa una suerte, porque pues andar ensin ella y, pa detrás, resulta perdifícil contaxase, porque con bien poca xente te pues atopar...
Yo, que taba dándo-y al farol y agüeyando pal fueu pa que nun morriere, cambié de llau'l bichi de la parrafada que taben echando los mios amigos y comenté:
-Pa mio idea, la seronda ye una de les époques más guapes pa caminar pel monte. Les viesques vístense cola so meyor gama de collores algamando asina unos cumales de guapura difícilmente superables. Tamién ye la época d'andar a la gueta pelos castañeos. Y de cruzate con castañales centenaries, dalgunes camudaes cuantayá en cabornios, pero que siguen echando oricios con unes castañes bultables. Por cierto, nun sé si dedrá verdá, pero tengo sentío comentar que nes zones onde les castañales funden los raigaños pente'l carbón, tan abundante en delles fasteres asturianes, tienen un frutu con una calidá especial...
Y tando nestes plátiques enredaos, aportó'l momentu de empecipiar a espellicar les primeres castañes yá amagostaes y afalagar los gargüelos con sidra del duernu. Fíxose de mano un silenciu, como si tuviéremos participando en dalgún ritual o comunión. Tastiábamos les castañes y echábamos sorbiatos de los vasos. Xuan Moñiz d'Ambás zarramicaba los güeyos mirando p'arriba como si fuere a entrar en dalgún trance. El trasgu Manfurada asentía cola cabeza como dándo-y el preste al convite. Don Quixote de Caravia iñaba de placer gastronómicu y yo escalecía les manes de la que frotaba les castañes pa pulgales. Entós comente-yos a los mios amigos:
-Pues ya tengo la calavera iguada cola calabaza p'alluma-yos el camín a les ánimes pela nueche. Y nun podemos escaecer, n'acabando l'amaguestu, de dexa-yos unes ambozaes d'elles y unes botellines de sidra'l duernu pa qu'amuguen el gargüelu y maten la fame, que vendrán de bien lloñe y cansaes pa visitar a los suyos y los llugares onde vivieron...
-Pues sí, Xanu -dixo Manfurada-, esta nueche axúntense vivos y ánimes, que cellebren el so retornu añal al mundu de los qu'inda nun colaron p'acullá de la ultratumba. Hai que lo respetar y tratar de que s'afayen lo meyor posible nesti retornu...
-¡Cuántes vegaes percorreríen antiguamente estos montes, estos castañeos, estes viesques, dimiríen les castañales pa echar nes cuerries o andaríen a la rebusca...pasarien peles saltaderes, cruzaríen portielles, fadríen sucos, cárcobes, y llantaríen finxos pa curiar lo de suyo!. Yo, cuando ando pel monte, arriendes d'observar l'arboleda o d'escuchar los xuxuríos de los páxaros o'l tinglar de les esquiles, fíxome tamién en tolos elementos etnográficos construyíos polos d'antiguamente -comentó Don Quixote de Caravia.
Y ello foi que bebiendo, comiendo y charrando foi atapeciendo nel requexu onde vivo nel mio caborniu nesta viéspora tán especial au les ánimes tienen el privilexu de tornar per unes hores al mundu de los vivos...
