El ruxerrux del ríu reláxame. Como abondes coses más: una música melguera, un paisax, una fonte, el mofu nel tureru d'un árbol, l'ocle na playa erma...Esta mañana averéme al ríu pa espansionar. Y púnxime a camentar sobre'l conceutu de guapura de los sapiens occidentales, de cómo agüeyen pa otres cultures empicorotiaos nesi pedestal de superioridá que da pertenecer al ñomáu primer mundu...
Vi entós que daqué aportaba ríu arriba. Yera Pinín ñavegando nel so madreñoxiru. Algamó onde yo taba y entamemos a charrar.
-Cóime, Pinín, veo que gu vienes de marineru saliándote ríu arriba.
-Pues sí, amigu Xanu, esta mañana apetecióme ñavegar envede volar, porque aporté ayeri mesmo de tierres perlloñe de les nuestres. Del oriente nada menos, y ando cansáu d'andar per allarribón...
-¿Y qué tal te pintó per ellí?. Son cultures estremaes a esta, vezos, comida...
-Pintóme estupendamente. Cuando viaxes lloñe, que t'afayes o ñon nos sitios au aportes depende muncho de la predisposición a respetar y deprender que tengas dientro la to cabeza. Si yes abiertu y arrogante pa con otres cultures, el camín pue tornar de pindiu n'amañosu guapamente.
-Pues andaba yo referviendo esta mañana neses cuestiones. Y reparé nesa superioridá fata y grandona qu'inunda al mundu occidental que lu fai mirar bien de vegaes con despreciu lo propio d'otros llaos. Y los modelos de guapura que proponen dacuando per ende nun son como pa tirar voladores precisamente. L'otru día vi nuna revista eso que llamen la moda de pasarela y quedé clisáu. Rapaces esglamiaes, que tal paez que tienen la salú pingando d'un filu sonce, llevando unes ropes rares. Una d'elles yera una cadarma andante con taparrabos, a falta de meyores idees p'afatala. El conceutu de guapura física y de vestimenta occidentales habría que facéselo mirar seriamente.
-Pues sí Xanu. Yo viaxo permuncho mundu alantre y veo otros conceutos de guapura que, miániques, paécenme bien meyores que munchos de los que tanto mos enchipamos d'amosar per equí. Concretamente, estos díes d'atrás anduvi pel Xapón. Vi valtos de sumo, participé nuna ceremonia del te y vi actuar una maiko, que ye una rapaza aprendiz de gueisha. La musiquina recordábame una de les nuestres añaes, anque nun yera p'añar rapacinos, la danza prestosa y la ropa de la mocina guapa verdá...Por cierto, ¡deprendí a comer con palillos!- remató Pinín soltando una carcaxada.
-Yo, de mano, conformaríame con que desaniciaren esa moda d'aflacar a les modelos de per equí hasta estremos enfermizos. Poner xente esglamiao como modelu de guapura corporal figúraseme descomanadamente dañible pa la xente más mozo, que puen garrar vezos alimentarios que lo lleven a enfermar gravemente. Y de les vestimentes nun voi añadir un res. Dicen que pa gustos hai collores. Magar tamién dicen qu'hai gustos que merecen palos, mialma.
-Bono, amigu -dixo Pinín mirando ríu arriba-, voi siguir col mio guacéu acuáticu. La mañana ta sele y prestosa pa esparcer. De la que torne igual m'avero al to caborniu pa siguir dando la parpayuela una migayina más. Ta llueguín entós.
-Ta llueu, Pinín. Yá sabes ónde tienes la to casa. ¡Bona singladura, vieyu llobu de...ríu...!
