Si quies tener garantíes plenes de que t'insulten, censuren o te dibuxen como un diañu dañible con cuernos y rau, manifiesta una opinión crítica nun aruelu onde se muevan mentes gregaries, sectaries y adoctrinaes. Nunca falla.De magar somos rapacinos vivimos somorguiaos en programaciones de toa mena. Depréndenmos a siguir tales idees, a estos o aquellos cabezaleros, a participar d'unes conductes que son les correutes ya indiscutibles. Encamiéntenmos y guíenmos pa ser rebañu, pa dilimos nuna coleutividá dirixida. L'individuu tien que se mover acordies a unos finxos y a unes llendes.
D'esta miente, cuando esi individuu trata d'empobinar pela carril del pensamientu críticu, reflesivu y razonáu, empecipia a sintir na cocorota l'aliendu de la censura, la marxinación o la esclusión. Pero que naide nun piense que lo anterior ye ermuno d'unes idioloxíes concretes. Ñon. Como se diz agora, eses consecuencies son tresversales y atópales n'ámbitos que puen tar perenfrentaos ente sigo.
El llibre pensamientu ye una mar onde s'afayen los prauticantes del xacíu críticu y razonáu y au naufraguen los cerebros adoctrinaos. Ñavegar per ella al debalu ye la opción que-y queda a quien nun quier arcoxase a peselbre nengún, nin participar de tal o cual movimientu, ideoloxía o proyeutu dayures renunciando pa ello a prauticar la discrepancia y aceutando dafechu andar al rau de quien manda ensin gorgutiar.
Les monxures mangonien y ordenen. Los rebaños obedecen y faen de "policíes de balcón" sollertes a les voces y pensamientos discrepantes. Y quien nun quiera renunciar a ser individuu con criteriu propiu tien el camín pindiu y abegosu neses llurigues, por nun dicir imposible.
Queda entós echase a ñavegar al debalu pela mar del llibre pensamientu. Soltar les les andanaes de rigor si dalguna nave de dogmáticos adoctrinaos apruz nel finxu'l cielu, y echar al agua milenta botelles con mensaxes críticos, ñuevos y escritos col razonamientu non adoctrináu esperando de que, daqué día, arriven a unes manes que los faigan de so y xorrezan llibres de torgues.
