El día amenazaba agua. Paecióme afayadizu pa empobinar pal monte a visitar les neñes aprovechando que me llevanté abondo ceo. Los caminos p'aportar allá tán casi torgaos pol felechu, la yerba y los escayos, ensin escaecer les teles que van texendo les arañes confiaes de que per ellí naide nun va pasar. Hai tramos onde empoces na folla casi hasta los dodíos. Vese'l rastru'l xabalín, qu'eso d'esfozar y arrollicase pel barru présta-y pola vida.
Veo
per delantre de min correr daqué. Pienso de mano que ye un ratu, pero
ñon, trátase d'un gurriapu que trató d'esnalotiar del ñeru, pero inda
nun sabe. Voi siguiéndolu procurando nun lu triar hasta que d'un reblagu
déxolu p'atrás deseándo-y que tenga suerte y nun lu encete nengún otru
animal.
Pali que pali aporto al requexu que busco. Pero inda
m'espera una sorpresa ñueva. Dende'l camín siento un ruíu, miro pa la
mano d'arriba y veo trotiar un corzu cruzando d'un llau pa otru hasta
perdese pente'l felechu. Ye la primer vegada que veo a ún tán cerca y
tantu tiempu. Chocóme que nun cruciare a tou meter, pero asina y too nun
tuvi vagar pa sacar de la mochila'l teléfonu móvil y tira-y una semeya.
Y
ehí taben les neñes. El ñome ta puestu d'escachondéu. Si fueren
persones tendría que les llamar les vieyes, porque pola edá que camiento
que puen tener va-yos meyor esti calilificativu caberu. Trátase d'un
garrapiellu castañales, media docena, yá entraes n'años y dalguna
escurque centenaria. Tán echando agora les fueyes. Pela seronda van dar
unes bones ambozaes de castañes bien gordes. Va tocame entós compitir
col xabalín y la xente qu'ande a la gueta pa garrar el mio quiñón. Tán
arrodiaes d'otros árboles, como carbayos o abedurios. Hai dalgunes mates
d'árgoma. Y tamién tán los plantones que voi poniendo, pasu ente pasu,
estos años postreros. Lloréu, carrascu, fayes, ablanos...y nel tueru
d'un carbayu paez que prendió la semiente del arfueyu, pero hasta la
primavera viniente nun va tar clara la cosa. Tamién queda un rinconín
pal "esotismu" foriatu non invasivu, por supuesto. Una chumberina
asitiada cabo una parede de piedra y una falsa rosa de xericó, que fai
guapamente d'higrómetru ñatural porque siñala la humedanza qu'hai na
viesca abriéndose o enguruyándose.
Toca agora
doblar el renaz tirando de foceta y siguiendo col llabor entamáu va unos
díes de dir quitando felechu y escayos. Los árboles agradecen la
llimpieza, sobre too los plantones ñuevos que podríen vese apoderaos
pola maleza. La xera de la llimpieza da sorpreses. Apruz dalguna faya
ñacida de semiente, tamién castañaluques o carbayos. Poniendo procuru,
colos años puen xorrecer y salir p'alantre. Arriendes d'ello, rozar el
monte val p'amenorgar los efeutos del fueu si quixere la mala trampa
qu'aportare per esti llau onde m'afayo. La cosa quedó más o menos
curiosa. Allá pa finales d'esti mes o pal que vien de Xunu habrá que-y
dar otra pasada, porque nesta época crecen felechos, escayos y demás que
meten mieu.
