A vegaes éntra-y a ún el rixu por daqué. Y si anda refalfiáu más. Y si ta confináu en casa por mor d'un andanciu gafu, más cabruña nes vidayes l'aquello de les apetencies.Yo entrárame'l petite d'un bollín de cuernos. Siempre me prestaron yá de magar yera guah.e. Y aquel xueves, fartucu de tar trancáu en casa, naguaba por ún que, amás tien cuatro rescaños, que siempre presta rucalos.
Y pol aquello de matar dos páxaros d'un tiru escurrí dir compralu a la panadería que me quedaba más lloñe, p'asina de pasu espurrir un pocoñín les piernes. Asina que vistime y empobiné p'allá.
Crucé delles cais gayasperu ensin problema nengún y averéme a la panadería que yá la tenía a unos cincueta metros. Foi entós cuando sintí que m'entrugaben.
-A, oiga, ¿pa ónde empobina usté?.
De sutrucu sintí como un ñudu m'añusgaba'l garguelu. Un par de municipales echábenme l'aliendu casi na cocorota per detrás.
-Voi por un bollu cuernos a esa panadería que ta ehí enfrente.
-¿Ah, si?. ¿Podría apurrimos el carné d'identidá?.
Pescancié entós que taba perdíu y viénoseme'l mundiu, el degorriu y la carne enriba. Saqué la cartera y apurri-yos el carné onde ponía bien clarino que yo vivía una mazanes más p'alla.
-¿Y nun conoz usté nenguna panadería más cercana'l domiciliu de so?. ¿Acasu nun sabe que ta casi na llende de la villa, ho?.
-Bono, home, ye que'l pan d'esa panadería d'ehí enfrente ta de viciu y, amás, los bollos de cuernos que tresna tienen sonadía y too. Y como quería ún pues empobinaba p'allá.
Miráronse los uniformaos ente ellos y ún fíxome una pregunta que me dexó clisáu y desconcertáu dafechu.
-Esi bollu que va comprar ¿sabe cuántos cuernos tien?.
-Pues cuato, como toos.
- Esauto. Asina que vamos pone-y una multa por cada cuernu del bollu. ¿Tamos?.
-¿Cómo ye, ho?-contesté yo arremellando los güeyos-. ¿Qué ye que si fuere comprar una pamesta que nun tien cuernos nun me llantaben multa dala?.
-Pues non. La multa va colgada de los cuernos. Y son cuatro. Asina qu'hai que la multiplicar por esa cantidá. Va queda-y la corexa más esturniada qu'un figu pasu.
Empecipié entós a amoriar somorguáu nun sudu fríu...
Y foi nesi intre cuando sintí un dolor descomanáu nun cadril. La xostrada fuere bona y cayere de la cama en mui mala postura. Incorporéme esguilando pel metálicu bien doloríu. Miré'l reló y marcaba les ocho y cuartu de la mañana. Decidí entós llevantáme y tirar pal cuartu bañu a duchame y echar una pomada na mancadura cerquina'l postreru pa dempués almorzar.
Acoxaba de manera bien bultable. Vistime y salí a comprar el pan del día concentrándome bien en facelo na panadería de más lloñe casa pa espurrir les piernes engarrotaes dempués de tres selmanes de confinamientu coronavíricu. Entré y pidí un par de richis. Entós la moza que m'atendía púnxose ella:
-Richis nun me queden, señor. Pero puedo vende-y dos bollinos de cuernos...
-¡Como dices, ne!-glayé-y tou esprecetáu a la rapaza-. Dos bollinos son ¡ocho cuernos!. ¡Ocho nada menos!. ¡La madre que lo parió!. ¿Tu que quies que me lleven en pelondines presu, rapaza?.
La moza quedó clisada pa min, pálida y engarrotada como si l'acabare de condergar a la foguera la Santísima Inquisición.
Y salí escopetáu de la panadería ensin comprar nada enfilando pa casa ensin mirar nin pa los llaos, talo que si llevara oreyeres como un caballu de tiru.
Cuando taba a piques d'aportar al portal sintí que me falaben per detrás.
-¿Pa ónde va usté?.
Di la vuelta y un par de municipales mirábenme entientes. Entróme un respigu que me xiringó'l cuerpu dende les dedes a la coroniella.
-Voi pa casa. Vivo ehí, nesi portal.
-Vemos que nun lleva nada. ¿Acasu salió a dar una vueltina saltándose'l confinamientu?.
-¡Ca, non!. Fui por un par de richis a la panadería, pero namás que me podíen vender dos bollos de cuernos. ¡Ocho cuernos nada menos!. ¡Menudu marrón pa estos tiempos!. Pero yo nun me la xuego a lo tonto y a lo fato d'esa manera. Asina que torné pa casa ensin nada y alón.
Mirarosen ente ellos los axentes del orde llariegu como desconcertaos dafechu y ensin entender un res de lo que-yos dicía. Fixeron unes mueques. Ún d'ellos señalóme col brazu pal portal y xuxurió:
-¡Tire p'alla, ande!. ¡Tire p'alla...!
Asina qu'equí toi agora, a la hora de xintar y col platu delantre les ñarices ensin saber cómo encetalu. ¿Pero cómo rediós se m'ocurriría tostar un par de güevos con patates?. ¿Y con qué pingo yo nos güevos agora?. Pámidea que con esto del confinamientu toi alloriando...Vaya día que llevo... ¡Ai, hom, qué cruz...!
