Cuando guah.es, lo del gomeru prestaba. Daquella nun se compaben en ferreteríes o dayures. Facíense. El forcáu, buscabase rebuscando pente les sebes de sanxuaninos. Yeren bonos. Pa les gomes, abeyar pelos talleres a la gueta de cámares. Habíales coloraes y ñegres. La badana, cola llingüeta de dalgún zapatu. P'arreyar, cordel de bramante. De proyectil, piedres.Hai coses que nun queden namás que pa la renombranza col pasu de los años. Recíclense y tornen a l'actualidá. El gomeru ye una d'elles. Pasó colos años de ser trebeyu de rapazos a arma de los mayores. Ello per aciu de les lluches obreres. Nelles, la rempuesta a gomerazos a les cargues policiales foi una constante per años. Y con un cambiu de la munición que los facía más contundentes. Los rodamientos d'aceru nun yeren pa tomalos a broma precisamente. Inda m'alcuerdu de la escena de cuando acabó l'encierru d'un grupu de trabayadores de la Duro Felguera na torre de la Catedral d'Uviéu. Regaláron-y al arzobispu un gomeru como recuerdu.
Anguaño andamos de cuarentena. Y cuando la xente anda trancada en casa obligatoriamente, suel afilase l'inxeñu al traviés del humor pa facer menos pindia la cuesta. De mano, encabritó a bien de xente que dalgunos saltaren la cuarentena echando mano de picaresques y estratexes varies. Peles redes sociales mencionábase, en plan de broma, que diba tase sollerte col gomeru pa meter en vereda a los infractores. Pero, al pasar los díes, la cosa camudó en daqué tarrecible. Entamaron a esporpollar los chivatazos. Los insultos dende la ventana a quien pasare pela cai, ensin reparar nin siquirera que'l caminante podía nun tar escaqueándose de nada. Asina, insultaron a neños autistes con permisu pa pasiar colos padres. A enfermeres que tornaben de nueche pa casa dempués d'una xornada agotadora y peligrosa. Denunciaron en comunidaes a vecinos que nun salíen a aplaudir a una hora determinada. Les coraes podres de bien de ciudadanos asoleyáronse asina per ende y recordáronnos que la semiente del fascismu siempre pue guañar en cualquier llau.
Yo, si me dan a escoyer ente aperrilla-y a un caminante que, supuestamente, sal a la cai col envís de saltase la cuarentena, o d'escoyer como diana al chivatu de turnu, de toes toes que voi pol caberu. Y camentando la que nos pue venir encima n'empicipiando a normalizase una migayina les coses, cola reaición ciudadana impredecible que pue haber al tornar a les cais, y colos carrobexazos económicos, sociales y políticos que nos puen solmenar dende los aruelos del poder, tampoco nun descarto pa nada qu'acabemos avieyando y col gomeru al pescuezu.
