Antes de poneme a escribir esto, tuvi asomáu a la ventana un bon cachu. Pasaba xente con bolses o carros pa dir comprar, supónse. Dalgunos pasiando'l perru. Otro con nada qu'indicare que diben a un sitiu concretu. La mayoría ensin mascarilles. Dalgunos caminando en parexa y ensin guardar distancia de seguridá dala. Pa tar de cuarentena, abultóme bastante personal.Ayeri la cosa yera perdiferente. Controles mui fuertes incluyendo presencia militar nuna población onde, por suerte, inda nun se dieren casos de coronavirus. Pela tarde, la xente saliendo a les ventanes a aplaudir a sanitarios y uniformaos. La mayoría teníen la persiana bien baxada y mataren la lluz, como si nun tuvieren en casa, cuando hubo la cacerolada escontra la corona. Pero esta aición cabera, vista dende les cugurutes del poder y polo que paez d'abonda ciudadanía, nun yera la políticamente correuta, como sí lo yera escuchar con atención les pallabres del monarca.
Cuando la xente tien vocación de rebañu ye mui peligroso. Partiendo de la base de que nun toi xustificando a quien salte la cuarentena que nos arcoxa, nes redes sociales abunden comentarios que firmaría cualquier nazi sobre lo que-yos tendríen que facer a los que nun tan cumpliendo con ella. Dende una moza que garraron corriendo a un probable enfermu mental que yá acumulaba cuatro sanciones por dir a bañase a la playa. A dellos namás que-yos falta pidir públicamente que torne la Inquisición.
Siento na tele dicir que Francia nun sigui la cuarentena como la planteguen n'España. Bélxica, tampoco. N'Alemaña, puen pasiar siempre que nun vayan xuntes más de dos persones. N'Italia, de la qu'entamó'l procesu, tuvieron confinaes a pequeñes poblaciones del norte onde se dieron los primeros casos y la cosa esmanganiose igual. En China dio resultáu. L'asuntu ye revesosu y abegosu de tratar y d'entender.
Afálame va díes una entruga. Nun sé hasta ónde va la raya que dixebra la utilización de tol despliegue confinador, disciplinariu y sancionador por razones estrictamente sanitaries, o si ta aprovechándose tamién pa ensayar una política del mieu encamentándonos a los ciudadanos quién manda equí, arriendes d'amosanos la bondá protectora del sistema onde vivimos y de los que lu remanen.
La cultura del ruíu aduéñase de los edificios. Apondérase al vocinglón o a quien realiza actividaes que se sientan bien lloñe. Si tas malu o tienes daquién enfermu en casa, lléveslo crudo. Y, amás, si sales a la cai pa fuxir de la tortura ruidosa, magar lleves mascarilla, guantes y vayas sólu respetando escrupulosamente la distancia de seguridá, pues tornar pa casa con una multa por sinvergüenza, mal vecín y traidor a la patria.
Asómome otra vuelta a la ventana. Agüeyo pal fondu un balcón. Ellí un vecín lleva colgada dende va unos díes una bandera española. Desconozo los efeutos terapéuticos de l'aición. Quiciabes haya colores que tienen poderes beneficiosos sobre la salú. Pienso en salir y poneme baxo ella a ver qué siento. Pero si lo faigo incumplo la cuarentena y yá ta armada. Asina que desisto.
Lleo per ende que, en pasando esti andanciu, vamos salir toos más solidarios. Tengo duldes sobre ello. Pienso qu'a lo meyor salimos toos más encabritaos, más sumisos a lo que nos encamienten dende'l poder sobre cualquier tema. Y, na nuestra relación con quien pueda saltase una norma del tipu que seya, bastante más intolerantes y amantes del palu y tente tiesu.
Güei, d'una manera especial pola situación onde tamos metíos, escurro que cuadra despidise col aquello de:
¡Haya salú!.
